ሲቆ ሳባ 8

1ኔ ታ ኣዬይ ን ሚ ዲጪዳ

ታ ኢሻ ማላ ጊዲዳኮ

ታ ኔና ኦጌን

ዴማዳ ዬራ ኤኪዳኮ

ታና ኦኒካ ካናኮሺን!

2ታና ታማርሲዳ ታ ኣዬይሶ

ታ ኔ ኩሼ

ኦይካዳ ኤፋናኮሺን፤

ኔ ኡያናስ

ኦሮማኔፔኔ ዎይኔፔ

ጉምኤቲዳ ሎኦ ኡሹ

ታ ኔስ ኢማናኮሺን።

3ባ ሃዲርሳ ኩሼ ቦላ

ታና ቦርኮቲሴስ፤

ኡሻቻ ኩሼንካ

ታና ቆሜስ።

4ኢንቴኖ ዬሩሳላሜ ጌላኦቶ!

ሲቆዚ ባስ ዶሲዲ

ዴንዳና ጋካናስ

ኢዛ ኢንቴ ቤጎንታ ማላ

ታኒ ኢንቴና

ሃዳራ ጋይስ» ጋዱስ።

ላጌቲ

5«ባ ሲቆ ላጌዛ ቦላ ዜምፓዳ፥

ባዞፌ ዪዛራ

ሃና ኦኔ?» ጊዳ።

ጌላኦያ

«ቤኒ ኔ ኣያ

ኔና ሚጻታ ዬሊዳ

ኣፒሌ ሚ ጋርሳፌ

ታ ኔና ቤጎ ዴንዲስ።

6ሜርና ሲቆን

ኔ ዎዚናን ታና ዎ፤

ታና ጻላ ኔ ቄሴ ቦላ

ማታሜ ማላ ሾጫ፤

ኣይስ ጊኮ ሲቆይ

ሃይቆ ማላ ሚኖ፤

ቃናቴይ ዱፎ ማላ

ሜንጼ ኢታ፤

ኢዚ ላጮይካ ታማ ላጮ ማላ

ፖፖልኡ ጌስ።

7ሃ ዳሮይ ሲቆ ታማ

ቶይሳናስ ዳንዳዬና፤

ዲኦይካ ሜጪዲ ኤፌና፤

ኣሲ ባስ ዲዛ ሚሽ ኡባን

ሲቆ ሻማናስ ኮይኮ

ሲቆይ ሚሻን

ቤቶንታ ጊሻስ

ኣሳይ ቂልጪ ካኤስ» ጋዱስ።

ላጌቲ

8«ን ኡቶንታ ቄሪ ሚቻ

ኑስ ዳዉስ፤

ኣዚናይ ኢዞ ኦይቺኮ

ኑ ኢዚስ ኣይ ኦኔ?

9ኢዛ ጊምቤ ጊዲዳኮ

ኑኒ ኢዚ ቦላ ቢራፔ

ሻኮ ኦና፤

ኢዛ ጌሊዛ ፔንጌ ጊዲዳኮ

ኑኒ ኢዚ ቦላ

ሊባኖሴ ዚጋፔ

ሳንቃ ኬሳና» ጊዳ።

ጌላኦያ

10«ቤኢቴ ታኒ ጊምቤ፤

ታ ንቲካ ሻኮ ማላ፤

ታኒ ታ ሲቆዛራ ዲዛ ዎዴ

ኢዚ ኡፋይሲኔ

ሳሮቴ ዴሜስ።

11ሶሎሞኔስ ባኣሊ-ሃሞኔን

ዎይኔ ቶኪዛሶሆይ ዴስ፤

ሄ ዎይኔ ቶኪዛሶሆዛ

ኦሳንቻታስ

ኪራ ኢሚዴስ፤

ኢስቲካ ሁኤን ሁኤን

ሺ ቢራ ኢዛስ ኤሄቴስ።

12ጊዶ ኣቲን ታስ ቡዞ ጊዲዳ

ዎይኔ ቶኪዛሶሆይ ዴስ፤

ሶሎሞኔ ኔኒ ሺ ቢራ ኤካ፤

ኦሳንቻቲ 200 ቢራ

ኤኬቶ» ጋዱስ።

ፓንዚ

13«ሃኔ ታ ሚሺራዬ!

ኔ ኣታኪልቴ ጊዶን

ዳሼ ሃሳይዛ

ቃላ ታ ላጌቲ ሲያና ኮዬቴስ፤

ኣኔ ታናካ ኔ ቃላ

ጬንጉርሳ ሲሳ» ጊዴስ።

ጌላኦያ

14«ታ ሲቆዞ!

ታኮ ኤሶን ሃ ያ!

ሳዎ ኣታኪልቴቲ ሞኪዛ

ዙማታ ቦላራ ጉፒዛ

ጌኔሳ ዎይኮ ዉሻ

ላቃ ሚሳታ» ጋዱስ።