ጌሻ ማጻፋ
ኢሳያሳ ቲንቢቴ 21
ባቢሎኔ ቦላ ዮቴቲዳ ቲንቢቴ
ኣባ ላንቄን ዲዛ ባዞ ቢታስ ዮቴቲዳ ጎዳ ቃላይ ሃይሳፌ ካሊዛይሳ።
ዱጌሃ ባጋፌ ጎቴ ጫርኮይ
ፒቲ ኤኪ ዪዛ ማላ
ዎራጂዛይ ሺሮ ዴንዛ
ባዞ ቢታፌ ዬስ።
ያሺዛ ኣጁታ ታ ቤኣዲስ፤
ኣ ኢሚዛይሲ
ኣ ኢሜስ፤
ዲኢዛይሲ ዲኤስ።
ኤላሜ ዴንዳ!
ሜዶኔ ጊዶ!
ኢዛ ጋዳ ዋዬ ኡባ
ታ ኤሳና።
ሄሳ ጊሻስ ታ ጼሳይ
ሳኮ ጻላላ ጊዲዴስ፤
ሚጻይ ኦይኪዳ ማጫሳ ማላ
ታና ሌሶይ ኦይኪዴስ፤
ታኒ ሲዪዳ ዮኦይ
ታና ጋዲጋዲሲዴስ፤
ታ ቤኢዳ ዮኦን ሺሮታዲስ።
ታ ዎዚናይ ፖዱ ጊዴስ፤
ታና ያሺ ኮኮሪሲዴስ፤
ታ ኡፋይሳን ናጊዳ ኦማርሳይ
ታ ቦላ ሂርጋ ዬጊዴስ።
ኢስቲ ማዳ ጊግሲዳ፤
ኡቲዛሶ ጊግሲዳ፤
ሚዳኔ ኡዪዳ።
ኢንቴኖ ሹሜቶ ዴንዲቴ!
ጎንዳሌዛ ዛይቴን ቁጪቴ!
ጎዳይ ታና፥
«ባ፤ ዎቺዛ ኣስ ዎ፤
ኢዚ ባ ቤኢዳይሳ ዮቶ።
ፓራን ጎሼቲዛ
ፓራ-ጋሬታ ቤኢዛ ዎዴ
ሃሬ ቶጊዛይታ
ጋሜላ ቶጊዛይታ
ቤኢዛ ዎዴ ኢዚ ዩሺ ቆፖ፤
ሎኤ ዎቾ» ጊዴስ።
ናጊዛይሲካ ዋሲሼ፥
«ጎዳዉ፥ ታኒ ጋላስ ጋላስ
ፓጬይ ባይንዳ
ሻኮ ቦላ ኤቃዲስ፤
ኦማርስ ኡባን
ታ ናጊዛሶሆን ኤቃዲስ።
ቤኢቴ፥ ኢሲ ኣሲ ፓራታን
ጎሼቲዛ ፓራ-ጋሬታን ዪዴስ፤
ሂስቲዲ፥ ‹ባቢሎኔይ
ኩንዳዱስ! ኩንዳዱስ!
ኢዚ ኤቃ ጾሳ ሚስሌቲካ
ሜቄሬቲ ጋዴን ኩንዲዳ›
ጊ ዛሪዴስ» ጊ ዋሲዴስ።1
ባሌን ቡኬቲዳ ታ ዴሬዞ!
ኡባፌ ዎልቃማ ጎዳ
ኢስራኤሌ ጾሳፌ
ታ ሲዪዳ ቃላ ኔስ ዮታይስ።
ኤዶሜ ቦላ ዮቴቲዳ ቲንቢቴ
ኤዶሜ ጊሻስ ዮቴቲዳ
ሚኖ ዮኦ፤
ኢሲ ኣሲ ሴይሬፔ
ታና ጼይጊዲ «ናጊዛይሶ!
ጋዴይ ዎንታናስ
ኣይ ኬና ሳቴይ ኣቲዴ?
ናጊዛይሶ! ጋዴይ ዎንታናስ
ኣይ ኬና ሳቴይ ኣቲዴ?» ጊዴስ።
ናጊዛይሲ ዛሪዲ፥ «ዎንታና፤
ጊዶ ኣቲን ሲሚዲ ቃማና፤
ኦይቻና ኮይኮ ኦይቺቴ፤
ጊዶ ኣቲን ሲሚዲ
ሃ ዪቴ» ጊዴስ።
ኣራቤ ቦላ ዮቴቲዳ ቲንቢቴ
ኣራቤ ጊሻስ ዮቴቲዳ ሚኖ ዮኦ፤
ኢንቴኖ ዳዳኔ ዛልኣንቻቶ!
ኢንቴ ኢንቴ ጫና
ጋሜላታራ ኣራቤ ባዞን ኣቃና።
ሳሜቲዳይታስ ሃ ኤሂቴ፤
ኢንቴኖ ቴማኔን ዲዛይቶ!
ቤቴ ኣሳታስ ካ ኤሂቴ።
ኢስቲ ጊ ማሻፌኔ
ኮሆፔ ሾዴቲዳ ጊ ማሻፌ፥
ዋጼቲዳ ዎንዳፌፔኔ
ሱሊዳ ኦላፔ ባቃቲዳ።
ጎዳይ ታና፥ «ኮንቲራቴ ኦሳንቻ ኦሶ ጋላሲ ዉሪዛ ማላ ኢሲ ላይ ጊዶን ቄዳሬ ቦንቾይ ኡባይ ዉራና። ቄዳሬ ቢታን ዎንዳፌን ዱኪዛ ዎልቃማ ኦላንቻታፔ ጉቲ ኣታና፤ ሄሳ ጎዳ ኢስራኤሌ ጾሳይ ዮቲዴስ» ጊዴስ።
Source notes (1)
- Cross-reference ኣጁ 14፡8፤ 18፡2
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.