ኢሳያሳ ቲንቢቴ 6

ናቤቴስ ኢሳያሳ ጼይጌቴ

1ካዎ ኦዚያይ ሃይቂዳ ላይ ጎዳይ ቃ ኣራታ ቦላ ኡቲዳይሳ ቤያዲስ፤ ኢዚ ማይኢዳ ኣፋላ ማጫራይ ጾሳ ኬ ኩሚ ኡቲዴስ።1 2ሱራፌሌ ጌቴቲዛ ኪታንቻቲ ኢዛፔ ቦላራ ዴቴስ፤ ኢሲ ኢሲ ሱራፌሌስ ኡሱፑን ቄፌቲ ዴቴስ፤ ናምኡ ቄፌታን ባ ኣይፌሶ ኣይፌሶ ካሜቴስ፤ ናምኡ ቄፌታን ባ ቶሆ ቶሆ ካሜቴስ፤ ናምኡ ቄፌታን ፒራቴስ። 3ኢሶይ ኢሳራ፥

«ጌሻዉ፥ ጌሻዉ፥

ጌሻዉ

ኡባፌ ዎልቃማ

ጎዳ ጾሳዉ!

ሳኣ ኡባይ

ኢዛ ቦንቾን ኩሚዴስ» ጊዳ።2

4ኢስታ ቃላ ጬንጉርሳፌ ዴንዲዳይሳን ጾሳ ኬስ ዮቻይ ቃጺዴስ፤ ቃሴካ ጾሳ ኬ ጩዋይ ፒ ጊ ኩሚዴስ።3

5ሂስቲን ታኒ፥ «ታኒ ዶናይ ቱኒዳ ኣሳ፤ ቃሴ ዶናይ ቱኒዳ ኣሳታ ጊዶን ዴኣይስ፤ ታኒ ካዎዛ፥ ኡባፌ ዎልቃማ ጎዳ ጾሳ ታ ኣይፌን ቤኢዳ ጊሻስ ታስ ኣዬ ኣና! ታ ያዲስ» ጋዲስ።

6ሂስቲን ሱራፌሌታፔ ኢሶይ ያርሺዛሶዛፔ ቃጴን ታማ ቦንቆ ኤኪዲ ፒራሼ ታኮ ዪዴስ። 7ታማ ቦንቆዛን ታ ዶና ቦቺዲ፥ «ቤኣ፤ ሃይሲ ታማ ቦንቆዚ ኔ ዶና ቦቺዴስ፤ ኔ ሞሮይ ኔፔ ኪቺዴስ፤ ኔ ናጋራይካ ቁጬቲ ኪቺዴስ» ጊዴስ።

8ሄሳፌ ጉዬ ጎዳይ፥ «ኦና ኪቶ? ኑስ ኦኔ ኪቴታናይ?» ጊሺን ሲያዲስ። ታኒካ ዛራዳ፥ «ሄኮ፥ ታና ኪታ» ጋዲስ።

9ሂስቲን ጎዳይ፤

«ባ፤ ባዳ ሃ ኣሳስ፥

‹ኢንቴ ሲሲ ሲዬታ፤

ጊዶ ኣቲን ዩሺ ቆፔኬታ፤

ኣይፌን ጼሌታ ሺን ኣኬኬኬታ›

ጋዳ ኢስታስ ዮታ።

10ሃይሳ ዴራ ዎዚና ዳሚሳ፤

ኢስታ ሃይካ ቱሊሳ፤

ኢስታ ኣይፌዛካ ቆቂሳ፤

ሂስቶንታ ኣጊኮ

ኢስቲ ባንታ ኣይፌን ቤኣና፤

ባንታ ሃይን ሲያና፤

ባንታ ዎዚናንካ ኣኬካና፤

ሂስቲዲ ኢስቲ ታኮ

ሲሚዲ ፓጻና» ጊዴስ።4

11ታኒካ፥ «ኣቤት ጎዳዉ!

ሃይሲ ኣይዴ ጋካናስ

ሃናኔ?» ጋዲስ።

ኢዚካ ዛሪዲ ታስ፥

«ካታማቲ ኢስታን ዴኢዛ ኣሲ

ዪን ኢስቲ ላሌታና

ጋካናስ፥

ኬቲካ ኡባይ

ካይዛና ጋካናሲኔ

ቢታይካ ሙሌራ ኣይኮይ ባይንዳ

ቡላ ጊዳና ጋካናሳ።

12ታኒ ጎዳይ ኣሳ

ሃሳና ጋካናሳ፤

ቢታካ ኣይኮይ ባይንዳ

ባዞ ኬሳና ጋካናሳ።

13ታሙ ኣሳፔ ኢሲ ኣሲ

ቢታ ቦላ ኣቲኮ፥

ኢዚካ ያና፤

ቃንጺ ዬጊን ኣቲዳ

ዎላ ዱሩማ ማላ ጊዳና፤

ጌሻ ዛሬይ ሄሳ

ሄ ዱሩማ ማላ ጊዳና» ጊዴስ።