ኢሳያሳ ቲንቢቴ 27

1ሄ ጋላስ ጎዳይ ሌዋታኔ ጌቴቲዛ

ጾንጌቲዛ ሾሻኔ

ጻጼቲዛ ሾሻ

ባ ሚኖ፥ ጊታኔ ዎልቃማ

ጊ ማሻን ቃጻያና፤

ኣባን ዲዛ ዎጋ ዶኣ

ቃንጼሬ ዬጋና።

2ሄ ጋላስ፥ «ዎይኔ ሚ ቶኪዛ

ሎኦሶዛስ ዬጺቴ!

3ታኒ ጎዳይ ኢዛ ናጋይስ፤

ታኒ ኡባ ጋላስ ሃ ኡሻይስ፤

ኦማርሲኔ ጋላስ ኢዛ ናጋይስ፤

ሄሳ ጊሻስ ኦኒኔ

ኢዛ ቆሄና።

4ታኒ ሃንቄቲኬ፤

ታናራ ኦሌታናስ ኣጉንኔ

ኪንዲቾይ ኬዚዳኮ

ታ ኢስታ ኢሲ ቦላ ጹጋና!

5ዎይኮ ታኮ ዪዲ ታና ባንታስ

ቆቴቲዛሶ ኬሴቶ፤

ታናራ ጊጌቶ፤

ኤ ታናራ ጊጌቶ» ጌቴታና።

6ያና ጋላሳታን

ያቆቤይ ጻጶ ዬዳና፤

ኢስራኤሌይ ኣጫናኔ ጪያና፤

ሂስቲን ኢስታ ኣይፌይ

ሳኣ ኩማና።

7ኢዞ ሾጪዳይታ ሾጪዳ ማላ

ጎዳይ ኢዞ ሾጪዴ?

ኢዞ ዎዳይታ ኢዚ ዎዳ ማላ

ኢዞ ዎዴ?

8ኦላኒኔ ዲኦን ኔ ኢዞ ቃጻያዳሳ፤

ኣርሼይ ሞኪዛ ባጋ ጫርኮይ

ጫርኪዛ ማላ

ዎልቃማ ጎቴ ጫርኮን

ኔ ኢዞ ጎዳዳሳ።

9ያቆቤይ ያርሾ

ያርሺዛሶ ሹቻታ

ቦቂንታ ሹቻ ማላ

ጋጪ ሊቂሲሺን

ኣሼሮ ጌቴቲዛ

ኤቃ ጾሳይ ሚስሌኔ

ኤጻኔ ጩዋሲዛ ሶሆታ

ኢስቲ ዲዛሶሆታፔ ሾዲ ኦሊሺን

ሄ ጋላስ ሞሮይ ኣቶ ጌቴታና፤

ሄሲ ኢዚ ባ ናጋራ ዲጎይሳስ

ኩሜ ኣይፌ ጊዳና።

10ጊምቤቲዳ ካታማያ ካይዛዱስ፤

ባዞ ቢታ ማላ

ኦሌቲዳሶ ጊዳዱስ፤

ማራቲ ሄን ሄሜቲዲ

ሄን ኢቻና፤

ኢዚ ሃጋታካ ፖቂ ማና።

11ኢዚ ጼራይ ሜሊዲ ሜቃና፤

ማጫሳቲካ ሚጺ ኤና፤

ኣኬካይ ባይንዳ

ዴሬ ጊዲዳ ጊሻስ

ኢዛ ሜዳይ

ኢዛስ ቃቴና፤

ኦዳይሲካ ኢዛ ማሬና።

12ሄ ጋላስ ኤፊራጺሴ ሻፋፔ ሃ ባይንዳ ጊብጼ ሻፋ ጋካናስ ጎዳይ ባ ካ ቡካና፤ ኢንቴኖ ኢስራኤሌ ኣሳቶ፥ ኢንቴ ኢሶይ ኢሶይ ሺቃና።

13ሄ ጋላስ ጊታ ዛዬይ ፑኔታና፤ ኣሶሬን ዲኤቲዳይቲኔ ጊብጼን ኡንኤቲዳይቲ ጉዬ ዬሩሳላሜ ሲሚ ዪዲ ጌሻ ዙማ ቦላ ጎዳስ ጎይናና።