ኢሳያሳ ቲንቢቴ 11

ሳሮቴ ኩሚዳ ካዎቴ

1ኢሴዬ ዱሩማፔ

ኣጫይ ፑርጫና፤

ኢዛ ጻጶታፔ

ኢሲ ሃጋይ ኣይፌ ኢማና።1

2ጎዳ ኣያናይ፥

ኣ ኤራቴኔ

ኣኬካ ኣያናይ፥ ዞሬ ኣያናይኔ

ዎልቃ ኣያናይ፥

ኤራቴ ኣያናይኔ

ጎዳስ ያሺሲዛ ኣያናይ

ኢዛ ቦላ ሼምፓና።

3ጎዳስ ያሻን ኢዚ ኡፋዬታና፤

ባ ኣይፌን ቤኢዳ ማላኔ

ባ ሃይን

ሲዪዳ ማላ ፒርዴና።

4ጊዶ ኣቲን ሂዬሳታስ

ጺሎ ፒርዳና፤

ሳኣ ቦላ ማንቆታስ

ሱሬ ፒርዳና፤

ባ ኢንጻርሳ ጻምኣን

ሳኣ ሾጫና፤

ባ ዶና ፔኖን

ኢታታ ዎና።2

5ጺሎቴ ኢዛስ

ጼሳ ዳንጮ ጊዳና፤

ኣማኔቴይ ኢዛስ

ዳባላ ዳንጮ ጊዳና።3

6ካና ሱይቴይ ዶርሳ ላቃራ

ኢሲፌ ዳና፤

ማሄይካ ዴይሻ ላቃራ

ኢሲፌ ኢቻና፤

ሚዛ ማሪ፥ ጋሞ ማሪኔ

ሞ ሜሄይ

ኢሲፌ ሄሜታና፤

ጉ ናይ ኢስታ ሄማና።

7ሚዚኔ ዛርዶይ ኢሲፌ ሄሜታና፤

ኢስታ ማራቲካ ኢሲፌ ኢቻና፤

ጋሞይ ቦራ ማላ ሃፓ ማና።

8ሚዛ ናይ

ኢታ ሾሻ ኦላን ካኣና፤

ን ዱንታ ናይ

ባ ኩሼ ጎፔ ሾሻ

ኦላን ዬዳና።

9ጌሺ ጊዲዳ

ታ ዙማ ቦላ ቆሄቴና

ዎይኮ ኦኒካ ዬና፤

ሃ ኣባ ኩሚዛ ማላ

ሳኣ ኡባይ ጎዳ ኤሮን ኩማና።45

ዲኤቲ ቢዳይታ ሲሞ

10ሄ ዎዴ ኢሴዬ ዜሬ ካዎቴታስ ማላታ ጊዲ ኤቃና፤ ካዎቴቲ ኢዛኮ ያና፤ ኢዛ ሼምፖሶይ ቦንቼታና።6 11ሄ ዎዴ ጎዳይ ናምኣን ባ ኩሼ ሚጪዲ ኣቲዳ ኣሳ ኣሶሬፔ፥ ፑዴሃ ጊብጼፔ፥ ዱጌሃ ጊብጼፔ፥ ቶጵያፔ፥ ኤላሜፔ፥ ሳናኦሬፔ፥ ሃማቴፔኔ ኣባ ጋጻን ዲዛ ዴሬታፔ ሺሻና።

12ካዎቴታስ ማላታ ኤሳና፤

ቁ ኦዲ ዴንና፤

ኢስራኤሌፔ ጎዴቲ ቢዳይታ

ዛሪ ኤሃና፤

ላሌቲዳ ዩሁዳ ኣሳ

ኦይዱ ባጋ ቢታ ጋጻፔ

ኢዚ ሺሻና።

13ኤፍሬሜ ቃናቴቴ ኤቃና፤

ዩሁዳ ሞርኬቲካ

ቃንጼታና፤

ኤፍሬሜይ ዩሁዳ ቦላ

ቃናቴና፤

ዩሁዳይካ ኤፍሬሜ ኢጼና።

14ኢስቲ ኣርሼይ ዉሊዛ ባጋራ

ፊሊስጼሜታ ዱጉን

ዎና፤

ናምኣይካ ኢሲፌ ጊዲዲ

ኣርሼይ ሞኪዛ ዴሬዛ ቦንቃና፤

ኢስቲ ኤዶሜ ቦላኔ

ሞኣቤ ቦላ

ባንታ ኩሼ ዴንና፤

ኣሞኔ ኣሳይ ኢስታስ ሃሬታና።

15ጎዳይ ኢታ ጫርኮን

ጊብጼ ኣባ ሜሊሳና፤

ኢዚ ባ ኩሼ ኤፊራጺሴ

ሻፋ ቦላ ዬዳና፤

ላፑን ኬሲ

ሻኬሬ ዬጋና፤

ሄሳ ጊሻስ

ኣሳይ ቶሆፔ ጫማ

ኬሶንታ ፒናና።7

16ካሴ ኢስራኤሌይ ጊብጼፔ

ኬዚሺን ሃኒዳይሳ

ኣሶሬን ኣቲዳ ኣሳይ

ኬዛና ኦጌ ኢስታስ ጊጊሳና።