ጌሻ ማጻፋ
ኢሳያሳ ቲንቢቴ 31
ጊብጼን ኣማኔቲዛይታስ ኣዬ ኣና
ፑዴ ኢስራኤሌ ጌሻኮ ጼሎንታይታስ፥
ጎዳፔ ማዶ ኮዮንታይታስ፥
ማዶ ዴማናስ
ዱጌ ጊብጼ ዎዛይታስ፥
ፓራ-ጋሬታ ዳሮቴኒኔ
ባ ፓራ ሚኖቴን
ጬቄቲዛይታስ
ኣዬ ኣና።
ኢዚ ጊዲኮ ኣ ኤራንቻ፤
ኢዚ ባሽ ኤሃና፤
ባ ቃላካ ላሜና፤
ኢታ ኦዛይታ ቦላኔ
ቆሆ ኦዛይታ
ማዲዛይታ ቦላ
ኢዚ ዴንዳና።
ጊብጼ ኣሳይ ኣሳፔ ኣቲን
ጾስ ዴቴና፤
ኢስታ ፓራቲካ ኣሾፔ ኣቲን
ኣያና ጊዴቴና።
ጎዳይ ባ ኩሼ ሚጪዛ ዎዴ
ኢዛ ማዲዛዴይ ጴታና፤
ማዴቲዛዴይካ ኩንዳና፤
ናምኣይካ ኢሲፌ ያና።
ጎዳይ ታስ፥ «ጋሞይ ዎይኮ
ዎዳላ ጋሞይ ሜሄ ኦይኪዲ
ዳሮ ሄንንቻቲ
ጼይጌቲ ሺቂዲ
ኢዛ ቦላ ዪኮ ኢስታ ዋሶይ
ኢዛ ያሺሶንታይሳ
ኢስታ ዋሶይ
ኢዛ ዳጋንንታይሳ ማላ
ኡባፌ ዎልቃማ ጎዳይ
ዙማ ቦላኔ ዙምቡላታ ቦላ
ኦላስ ዎና።
ካፎይ ቦላራ ኣላንዛ ማላ
ኡባፌ ዎልቃማ ጎዳይ
ዬሩሳላሜ ካማና፥
ናጋናኔ ኣሻና፤
ኢዚ ቦላራ ኣዲ
ኢዞ ኣሻና» ጌስ።
ኢንቴኖ ኢስራኤሌ ኣሳዞ!
ኢንቴ ኬሂፔ
ማካሊዳይሳኮ ሲሚቴ።
ሄ ዎዴ ናጋራይ ኩሚዳ
ኢንቴ ኩሼቲ ቢራፔኔ
ዎርቃፌ ኦዳ ኤቃ ጾሳታ
ኢንቴ ኡባይካ ዎራ ዬጋና።
«ኣሶሬይ ኣሳ
ማሻ ጊዶንታ
ማሻን ሃይቃና፤
ኣሾ ማይኢዳዴ
ማሻ ጊዶንታ
ሃራ ማሻይ ኢዛ ማና፤
ኢዚ ጊ ማሻ ሲንፌ ባቃታና፤
ናቴቲ ዶሳይ ባይንዳ
ዎልቃን ኦና።
ሚኖ ሚጻይ ሺሮ ጋሶን ኩንዳና፤
ኦላ ጋዳዋቲካ
ኦላ ባንዲራ ቤኢዲ
ዳጋማን ኩማና»
ጌስ ታማይ ጺዮኔን፥
ታማ ጮጬይ
ዬሩሳላሜን
ዲዛ ጎዳይ።
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.