ኢሳያሳ ቲንቢቴ 19

ጊብጼ ቦላ ዮቴቲዳ ቲንቢቴ

1ጊብጼ ጊሻስ ዮቴቲዳ ቃላይ፥

«ቤኢቴ፥ ጎዳይ ኤሶቲዛ ሻራ

ቶጊዲ ጊብጼ ዬስ።

ጊብጼ ኤቃ ጾሳቲ

ኢዛ ሲንን ኮኮሬቴስ፤

ጊብጼ ዎዚናይ

ኢስታ ጊዶን ሴሬስ» ጌስ።

2«ታኒ ጊብጼታ

ኢሳ ኢሳ ቦላ ዴንና፤

ኢሻይ ኢሻራ፥ ሾሮይ ሾሮራ፥

ካታማይ ካታማራ፥

ካዎይ ካዎራ ኦሌታና።

3ጊብጼታ ዎዚናይ ላቤታና፤

ታኒ ኢስታ ሃልቾ

ሃዳ ኦና።

ኢስታ ኤቃ ጾሳታኔ ሞይቲሌታ፥

ቱና ኣያና ጼይጊዛይታኔ

ማሮታ ዞሬ ኦይቻና።

4ቃሴ ሜንጼ ኢታ ኣሳ ኩሼን

ታ ጊብጼታ ኣ ኢማና፤

ባቢሲዛ ካዎይ

ኢስታ ሃራና» ጌስ

ጎዳይ፥ ኡባፌ

ዎልቃማ ጾሳይ።

5ኣባዬ ሻፋ ሃ ፓጫና፤

ሃ ጉጺ ጉጺ ሜላና።

6ዛራ ሃቲ ጺንቃና፤

ጊብጼ ካንቼቲ ሚጪ ያና፤

ሻጫቲኔ ጫሬ

ማታቲ ሹላና።

7ኣባዬ ሻፋ ላንቄን

ሃ ማታን ዲዛ

ሚቲ ሹላና፤

ሻፋ ማታን ዜሬቲዳ

ካ ኡባይ

ጫርኮን ፒቴቲ ያና፤

ኣይኮይካ ኣቴና።

8ሞሌ ኦይኪዛይቲ ጬጫና፤

ኣባዬ ሻፋን

ጋቲሌ ዬጊዛይቲ

ኡባይ ዬካና፤

ሃ ቦላ ባንታ

ጊቴ ዬጊዛይታ

ኡባ ዎልቃይ ኢጻና።

9ፓቴቲዳ ታልባ

ሱቂዛይቲ ያና፤

ቃሴ ቦ ፑቶፌ

ማይኦ ዳዲዛይቲ

ሂዶታ ቃንጻና።

10ማይኦ ዳዲዛይቲ ጬጫና፤

ዳሞዛን ኣቂዛይታ

ዎዚናይ ሜቃና።

11ጻኖሴ ቢታ ሃላቃቲ ኬሂ ኤያ፤

ኣ ኤራንቻ ጊዲዳ

ካዎ ፓሮኔ ኣ ኤራንቻታ

ዞሬይ ሃዳ።

ፓሮኔስ፥ «ታኒ ኣ

ኤራንቻታፔ ኢሳ፤

ታኒ ካሴ ካዎታ ካሊዛዴ»

ዋኒዲ ጌቲ?

12ኢንቴ ኣ ኤራንቻቲ

ሃኢ ኣዋን ዲዞ?

ኡባፌ ዎልቃማ ጎዳይ

ጊብጼ ቦላ ኦና ቆፒዳይሳ

ኣኔ ኢንቴና ቤሴቶኔ ኤሪሴቶ።

13ጻኖሴ ሃላቃቲ ኤይዳ፤

ሜምፒሳ ሹሜቲ ባሌቲዳ፤

ኢዚ ዴሬ ካሌዛ ኤሬቲዳይቲ

ጊብጼ ኣሳ ባሌዳ።

14ጎዳይ ኢስታ ቦላ

ዶቺዛ ኣያና ጉሲዴስ፤

ማቲዳ ኣሲ ባ ጮሻን

ጋንዲጋርዛ ማላ

ጊብጼይ ባ ኦሶ ኡባን

ጋንዲጋራና ማላ ኦዳ።

15ካጬ ዎይኮ ጎይና፥

ዛምባ ዎይኮ ሻጫ

ሄይቲ ኡባይ

ጊብጼስ ኣይኮካ ማዴቴና።

16ሄ ዎዴ ጊብጼ ኣሳይ ማጫሳ ማላ ጊዳና። ቃሴ ኡባፌ ዎልቃማ ጎዳይ ኢስታ ቦላ ባ ቄሴ ዴንዛ ዎዴ ኢስቲ ያሻን ኮኮራና። 17ዩሁዳ ኣሳይ ጊብጼ ኣሳ ቦላ ሺሮ ዴንና፤ ኡባፌ ዎልቃማ ጎዳይ ኢስታ ቦላን ኦና ሃልቺዳ ሃልቾፌ ዴንዲዳይሳን ዩሁዳ ጊሻስ ሲዪዳ ኡባይ ሺሮታና።

18ሄ ዎዴ ጊብጼ ቢታን ዲዛ ኢቻሽ ካታማቲ ካናኔ ቃላን ሃሳያና፤ ኡባፌ ዎልቃማ ጎዳ ባጋ ጊዳናስ ጫቃና። ሄ ካታማታፔ ኢሲኒያ ባሻ ካታማ ጌቴታ ጼይጌታና።

19ሄ ዎዴ ጊብጼ ቢታን ጎዳስ ያርሾሶይ ኦሴታና፤ ቃሴ ጊብጼ ቢታ ዛዋን ጎዳስ ቱሲ ኤቃና። 20ሄሲ ኡባፌ ዎልቃማ ጎዳስ ጊብጼ ቢታን ማላታኔ ማርካ ጊዳና፤ ኢስቲ ባንታና ኡንኤዛይታፔ ዴንዲዳይሳን ጎዳኮ ዋሲዛ ዎዴ ኢዚ ኢስታ ኣሺዛዴኔ ማዲዛዴ ኪቲዲ ኢስታ ኣሻና። 21ጎዳይ ባና ጊብጼታስ ቆንጪሳና፤ ኢስቲካ ሄ ጋላስ ጎዳ ኤራና፤ ያርሾኒኔ ካ ያርሾን ኢዛ ጎይናና። ኢስቲ ጎዳስ ኣዲኔታና፤ ባ ኣዲኔቲዳይሳካ ጋና። 22ጎዳይ ጊብጼ ቦሻን ሾጫና፤ ዛሪዲካ ኢስታ ፓና፤ ኢስቲካ ጎዳኮ ሲማና፤ ኢዚካ ኢስታ ዎሳ ሲዪዲ ኢስታ ፓና።

23ሄ ዎዴ ጊብጼፔ ኣሶሬ ጋካናስ ዎጋ ኦጌይ ኦሴታና፤ ኣሶሬቲ ጊብጼ፥ ጊብጼ ኣሳይ ኣሶሬ ባና፤ ቃሴ ጊብጼቲኔ ኣሶሬቲ ኢሲ ቦላ ጎይናና። 24ሄ ዎዴ ኢስራኤሌይ ቢታስ ኣንጆ ጊዳናስ ሄን ማራን ጊብጼራኔ ኣሶሬራ ኢሲፌ ቆዴታና። 25ኡባፌ ዎልቃማ ጎዳይ ኢስታስ፥ «ታ ዴሬ ጊብጼይ፥ ታ ኩሼይ ሜዳ ኣሶሬይ፥ ታ ጺንጾ ኢስራኤሌይ ኣንጄቲዳይታ ጊዴቶ» ጊ ኣንጃና።1