ኢሳያሳ ቲንቢቴ 14

ዲኤቴፌ ኢስራኤሌ ኣሳ ሲሞ

1ጎዳይ ያቆቤስ

ናምኣን ቃታና፤

ኢስራኤሌካ

ዛሬዲ ዶራና።

ኢስታ ኢስታ ቢታን ዎና፤

ኢማቲ ዪዲ ያቆቤሶ

ኣሳራ ዋላኬታና።

2ካዎቴቲ ኤፊዲ

ኢስታ ኢስታ ቢታ ዛራና።

ኢስራኤሌ ኣሳይ ካዎቴታ

ባስ ኦይኪዲ

ማጫሳኔ ኣቱማሳ

ኣይሌ ሂስቲዲ

ጎዳ ቢታን ሃራና።

ባና ዲኢዳይታ ዛሪ ዲኣና፤

ባና ኡንኤዳይታ

ዛሪዲ ሃራና።

ባቢሎኔ ካዎይ ሃይቂዳይታ ቦላ ጉጄቴ

3ጎዳይ ኢንቴና ኢንቴ ዋዬፔ፥

ሜቶፔኔ ኡንኤቴፌኔ

ኢታ ኣይሌቴፌ

ኔና ሼምፒሲዳ ጋላሲ፥

4ኢንቴ ባቢሎኔ ካዎ ቦላ

ቂልጪሼ፥ «ኡንኤዛይሳስ

ዎዴይ ዋኒ ዉሪዴ?

ኢዛስ ጊሪሲዛይሲ ዋኒ ኤቂዴ!

5ጎዳይ ኢታ ጻምኣኔ

ሃሪዛይታ ካዎቴ

ጉፌ ሜንዴስ።

6ካዎቴታ

ፓጬይ ባይንዳ ሾጪዳይሳ

ቃታይ ባይንዳ ጎዲ ጎዲ

ቆጺዳይሳ ሜንዴስ።

7ቢታያ ሳሮኔ

ሼምፖ ዴማዱስ፤

ኡፋይሳ ማዛሙሬ ዬጻዉስ።

8ሃራይ ኣቲን ዚጋቲካ፥

ሊባኖሴ ጺዳቲካ

ኡፋዬቲዳ፤

ኔካ ኩንዳዳሳ፤

ሚ ቃንጺዛዴይካ ሃይሳፌ ጉዬ

ካልታ ኑ ቦላ ዴንና።

9«ኔኒ ዪዛ ዎዴ ሲኦሌይ

ኔና ሞካናስ ጊጌታዱስ፤

ኔና ሞኪ ኤካና ማላ

ሞይቲሌታ፥

ኣላሜ ቦላ ዴሬ ሃሪዛይታ

ኡባታ ዴንዱስ፤

ቃሴ ካዎቴታ ቦላ

ካዎቲዳ ካዎታ

ኢስታ ኣራታፔ

ዴን ኤሳዱስ።

10ኢስቲ ኔስ፥

‹ኔካ ኑ ማላ ዳቡራዳሳ፤

ኑ ማላካ ጊዳዳሳ።

11ኔ ቦንቾይ ዲ ጊሪሳራ

ዱጌ ሲኦሌ ዎዴስ፤

ባዳቲ ኔስ ጋርሳራ ሂጼቲዳ፤

ጉጹኔቲ ኔስ ቦላራ

ማይኦ ጊዳና› ጋና» ጌታ።

12ኔኖ ዎንታ ናዞ፥

ቶሮጄ ጾሊንቴዞ፥

ኔ ዋናዳ

ሳሎፔ ዱጌ ኩንዳዲ?

ካዎቴታ ካዉሺዳ

ኔኒ ዋናዳ ዱጌ ዬጌታዲ!1

13ኔኒ ኔ ዎዚናን፥

«ታኒ ፑዴ ሳሎ ኬዛና፤

ታ ካዎቴ ኣራታካ

ጾሳ ጾሊንቴታፔ ቦላራ

ቃን ዎና፤

ዙማ ቦላ ሺቂዛሶን

ኣንጄቲዳ ዙማ ቦላ

ቃሶሆን

ታ ካዎቴ

ኣራታ ቦላ ኡታና።

14ታኒ ሻራቲ ዲዛ ቃሶሆፔካ

ፑዴ ኣና፤

ታኒ ታና ኡባፌ

ቃ ጾሳ ማላ

ኦና» ጋዳሳ።

15ጊዶ ኣቲን ኔኒ ሲኦሌን

ዱጌ ጪማ ኦላን ዬጌታዳሳ።2

16ኔና ቤኢዛይቲ ኡባይ

ቲሺ ሂስቲ ጼሊዲ

ኔና፥ «ቢታ ቃዳይሲኔ

ካዎቴታ

ኮኮሪሲዳይሲ ሃይሴ?

17ሳኣ ባዞ ኬሲዳይሲ፥

ካታማታካ ላሊዳይ፥

ዲኤቲዳይቲ ባ ዴሬ

ሲሚ ቦንታ ማላ

ዲጊዳይ ሃይሴ?» ጋና።

18ካዎቴታ ካዎቲ ኡባይ

ቦንቾን ስኪዳ፤

ባ ዱፎን ዱፎን ሼምፒዳ።

19ኔ ጊዲኮ ኮዬቶንታ ሃጋ ማላ

ዱፎፔ ዎራ ኦሌታዳሳ፤

ማሻን ጫዴቲዳይታን፥

ዱጌ ጪማ ሹቻ

ኦላን ዎዳይታን፥

ኣሳ ኩሼን ሃይቂዳይታን

ካሜታዳሳ፤

ኔኒ ቶሆን ዬቲዳ

ኣሃ ማላ ጊዳዳሳ።

20ኔኒ ኢስታራ ዱፎን ዳካ፤

ጋሶይካ ኔ ቢታ

ባሻዳሳ፤

ኔ ዴሬዛ ኔ ይሳዳሳ፤

ኢታ ኦዛይታ ዜሬ

ሙሌካ ኣኬኬቴና።

21ኢስቲ ዴንዲዲ

ቢታ ላቶንታ ማላ፥

ኣላሜን ባ ካታማ

ኢስቲ ኩንንታ ማላ

ካሴ ኢስታ ኣዋታ ናጋራ ጋሶን

ኣቱማ ናይቲ

ሲፌታናሶሆ ጊግሲቴ።

22ኡባፌ ዎልቃማ ጎዳይ፥

«ታኒ ኢስታ ቦላ ዴንዳና፤

ሂስታዳ ኢስታ ሱን፥

ኢስታፌ ኣቲዳይታ፥

ኢስታ ዜሬኔ

ዬሌታ ባቢሎኔፔ ይሳና።

23ታኒ ባቢሎኔ ቁጻርሳ ኣቆሶኔ

ጫሬ ኬሳና፤

ባሻ ፔይጻን ታኒ ኢዞ

ፒታ ይሳና» ጌስ።

ኣሶሬ ቦላ ዮቴቲዳ ቲንቢቴ

24ኡባፌ ዎልቃማ ጎዳይ፥

«ታኒ ሃልቺዳ ማላ ፖሌታና፤

ታ ቆፒዳ ማላካ ሃናና።3

25ታኒ ኣሶሬ ታ ቢታ ቦላ ሊቂሳና፤

ታኒ ኢዛ

ታ ዙማ ቦላ ዬና፤

ኢዛ ቃምባራይ

ታ ዴሬዛ ቦላፌ ዴንዳና፤

ኢዛ ቶሆይካ

ኢስታ ሃሼፔ ኪቻና»

ጊ ጫቂዴስ።

26ሳኣ ኡባስ ቆፌቲዳ

ቆፋይ ሃይሳ፤

ካዎቴታ ኡባ ቦላን

ሚጬቲዳ ኩሼይ ሃይሳ።

27ኡባፌ ዎልቃማ ጎዳይ

ሃይሳ ቆፒዴስ፤

ሄሳ ኢዛ ኦኔ ዲጋናይ?

ኢዚ ባ ኩሼ ዴንዴስ፤

ሄሳ ዛራናይ ኦኔ?

ፊሊስጼሜታ ቦላ ዮቴቲዳ ቲንቢቴ

28ካዎ ኣካዜይ ሃይቂዳ ላይ ሂዝጊዛ ቃላይ ዪዴስ፤4

29ኢንቴኖ ፊሊስጼሜ ኣሳቶ፥

ኢንቴና ሾጪዳ ጉፌይ

ሜቂዳ ጊሻስ

ኡባቲ ኡፋዬቶፍቴ፤

ሾሻ ጋርሳፌ

ሃሶ ሾሺ ኬዛና፤

ኢዛ ዜሬካ

ጾንጌቲዛ ማርዜራ

ዲዛ ሃሶ ሾሽ ጊዳና።

30ፑቴሳ ማንቆቲ

ዱሳሶ ዴማና፤

ሜቶታንቻቲ

ዎፑ ጊዲ ኢቻና።

ጊዶ ኣቲን ታኒ ኔ ዛሬ

ኮሻን ዉርሳና፤

ቃሴ ኔፔ ኣቲዳይታካ

ዲፒ ሂስታና።

31«ኔኖ ፔንጌዞ! ዉ! ዉይ ጋ፤

ኔኖ ካታማዞ! ዋሳ፤

ኢንቴኖ ፊሊስጼሜ ኣሳቶ!

ኢንቴ ኡባይካ ሂርጋን ሴሪቴ!

ጋሶይካ ፑዴሃ ባጋፌ

ጩዋይ ኢንቴ ቦላ ዪዴስ፤

ሄ ጪፍራፔ

ዱጺ ኣታናይ ዴና።5

32ሄ ካዎቴታፔ

ኪቴቲ ዪዛ ቃስታኔታስ

ኣይ ጊ ዛራኔ?

‹ጎዳይ ጺዮኔ

ሚን ኤሲዴስ፤

ዋዬ ኤኪዳ ዴሬይ

ኢዚ ጋርሳን ሼምፖሶ

ዴሚዴስ› ጊ ዛሮ።»