ኢሳያሳ ቲንቢቴ 3

ዬሩሳላሜ ቦላኔ ዩሁዳ ቦላ ያና ፒርዳ

1ቤኢቴ፥ ጎዳይ ኡባፌ ዎልቃማ ጎዳይ

ኣሳስ ኮሺዛ ካ፥

ሃኔ ማዶ ኡባ

ዬሩሳላሜፔኔ

ዩሁዳፔ ዲጋና።

2ቃራታኔ ኦላንቻታ፥

ፒርዲዛይታኔ ናቤታ፥

ሙሬኒዛይታኔ ጪማታ፥

3ሃምሳ ሃላቃታኔ ኦላ ጋዳዋታ፥

ዞራንቻታኔ ሂላንቻታ፥

ጪንጫቴን ቢቲዛይታ

ኡባ ይሳና።

4ታኒ ዬላጋ ናይታ

ኢስታ ቦላ ሹማና፤

ቄሪ ናይቲ ኢስታ ሃራና።

5ዴሬይ ዴሬ ቦላ፥

ኣሲ ኢሶይ ኢሳ ቦላ፥

ሾሮይ ሾሮ ቦላ፥

ዬላጋ ናይቲ ጪማታ ቦላ፥

ሹፉሮይ ቦንቼቲዳይታ ቦላ

ዴንዳና።

6ኣሲ ባ ኣዋ ኬን

ባ ኢሻንታፌ ኦይኪዲ፥

«ኔስ ማይኦይ ዲዛ ጊሻስ

ኑና ካሌዛይሳ ጊዳ፤

ሃ ላሌቲዳ ሶሆዛ ኣዋቴ

ኔ ኤካ» ጋና።

7ሂስቲን ኢዚ ሄ ዎዴ

ባ ቃላ ቁ ሂስቲዲ፥

«ታኒ ኣይኮካ ማዲኬ፤

ታሶን ማይኦይኔ ሚዛ ካ

ባይንዳ ጊሻስ ታና

ዴሬ ካሌዛዴ

ሂስቶፍቴ» ጋና።

8ዬሩሳላሜይ ጋንዲጋራዉስ፤

ዩሁዳይካ ኩንዳና ማታዱስ፤

ጋሶይካ ኢስቲ

ባንታ ሃሳያኒኔ

ኦሶን ጎዳራ ኤቄቲሼ

ኢዛ ቦንቾዛ ቶቼቴስ።

9ኢስታ ኣይፌሶይ

ኢስታ ቦላ ማርካቴስ፤

ኢስቲ ሶዶሜ ኣሳ ማላ

ባንታ ናጋራ ቆቶንታ

ቆንጬን ሃሳዬቴስ፤

ኢስቲ ባንታ ቦላ ኢታ ሚሽ

ኤሂዛ ጊሻስ

ኢስታስ ኣዬ ኣና!

10ጺሎታስ፥ «ጺሎቲ ባ ሎኦ ኦሶ

ኣይፌ ማና፤

ሄሳ ጊሻስ

ኢስታስ ሎኦ ጊዳና» ጋ ዮታ።

11ኢታታስ ኣዬ ኣና!

ኢስታ ቦላ ኢታ ሚሺ ያና፤

ኣይስ ጊኮ ኢስቲ

ባንታ ኦሶ ማላ ኤካና።

12ዬላጋቲ ታ ዴራ ኡንኤቴስ፤

ማጫሳቲካ ኢስታ ሃሬቴስ፤

ታ ዴሬዞ! ኢንቴና ካሌዛይቲ

ኢንቴና ባሌዳ፤

ኢንቴ ቢዛ ኦጌፔካ

ኢንቴና ካሬ ኬሲዳ።

ጎዳይ ባ ኣሳ ቦላ ፒርዳና ፒርዳ

13ጎዳይ ፒርዳናስ ሺሎታን ኡቲዴስ፤

ዴራ ቦላ ፒርዳናስ ዴንዲዴስ።

14ጎዳይ ዴሬ ጪማታኔ

ካሌዛይታ ፒርዳናስ

ኢሲ ቦላ ሺሺዲ፥

«ታኒ ዎይኔ ቶኪዛሶሆዛ

ኢሲዴታ፤

ማንቆታፔ ኢንቴ ቦንቂዳይሲ

ኢንቴ ቆልኣን ዴስ።

15ታ ዴራ ኣይስ ሜቶን ሊቂሲዴቲ?

ማንቆታ ኣይስ ዬሴቲ?

ሃይሳ ዮቲዳይ ታና ጎዳ፥

ኡባፌ ዎልቃማ

ጎዳ ጾሳ» ጌስ።

ጺዮኔ ማጫሳታስ ኢሜቲዳ ሴራ

16ጎዳይ፥ «ጺዮኔ ማጫሳቲ

ኦቶሬቲዳ፤

ባንታ ቆ ዋርጺ ሂስቲሼ፥

ባንታ ኣይፌን ሶምኢ ቤሲሼ፥

ባንታ ዱጫ ቃሼ፥

ባንታ ቶሆን ዲዛ ሳጋዮ

ጊሪሲሼ ሄሜቴቴስ።

17ሄሳ ጊሻስ ታኒ ጎዳይ

ጺዮኔ ማጫሳታ ሁኤ

ጪቶን ጎኢሳና፤

ታኒ ጎዳይ ኢስታ ሁኤ

ቦኣሳና» ጌስ።

18ሄ ጋላስ ጎዳይ ጺዮኔ ማጫሳታ ኣሌቆ ሚሻታ፥ ሄይቲካ ቶሆ ሳጋዮታ፥ ሁኤ ኣሌቆታ፥ ቆ ጎዝዳታ፥ 19ሃይ ጉቲቻታ፥ ኩሼ ሳጋዮታ፥ ኣይፌሶ ካሚዛ ቁራጬታ፥ 20ሁኤ ጎሴታ፥ ሳጋዮታ፥ ሁኤ ኣሌቆታ፥ ጼሳን ዳንጪዛ ዳንጮታ፥ ሺቶ ቢልቃጼታ፥ ኣሼንኪታቤታ፥ 21ሲ ሚዲጋታ፥ ቢራ ሚዲጋታ፥ 22ሴሎ ማይኦታ፥ ጋርሳራ ማይኢዛ ማይኦታ፥ ካባታ፥ ኩሼ ካራጺቴታ፥ 23ሄሬጋታ፥ ላይኖታ፥ ጊዶራ ማይኢዛ ማይኦታ፥ ቢናና ቃቺዛ ኣሌቆታኔ ኣይፌሶ ካሚዛ ቆሌታ ኡባ ዳፊ ኤካና።

24ሺቶ ጺንቆን፥ ዳንጮ ዎዶሮን፥

ጎፋሬ ቦኣን፥

ሴሎ ማይኦ ማቃን፥

ፑላቴ ፒጌን ላማና።

25ኢንቴስ ኣቱማ ኣሳቲ ጊ ማሻን፥

ኦላንቻቲ ኦላን ሃይቃና።

26ጺዮኔ ፔንጌቲ

ካሎ ጋዴን ዎ ኡታዳ

ዬኪዛ ማጫሳ ማላ

ዬካናኔ ዚላላና።