Jon

Kwena Maber ma

JON

Ocoyo

Lanyut wilok madito ma i buk man

Kwena Maber ma Jon ocoyo nyutu Yecu ni obedo Lok pa Lubanga matye labed naka ma oloke odoko dano ci “obedo ma kwo ikinwa,” 1:14. Kit macalo buk man tito, buk me Kwena Maber man kicoyo wek lukwanone guye ni Yecu aye obedo Lalar mayam con kiciko pireni, en aye Wod pa Lubanga, dok bene ka guketo niyegi ikome ci gibinongo kwo 20:31.

Inge lanyut man ma tito kamaleng ni Yecu en aye obedo Lok pa Lubanga ma rii matwal, dul mukwongo me Kwena Maber man kelo kamaleng ginanyuta me aura ma nyutu ni Yecu aye obedo lalar mayam kiciko pireni, dok bene en aye Wod pa Lubanga. Dul malubu man tito telok ma mako ginanyuta magi ducu ma otime. Dul man tito kit ma dano mogo guketo niyegi ikom Yecu kun gidoko kwede lulub kore, wa ki jo mogo ma gujemo ikome kun gikwero keto niyegi ikome. Cura (13—17) tito matut kit ma Yecu obedo ka nywako kacel ki lupwonyene iwor ma kimake iyeni, ki kit ma obedo kalok kwedgi kun jingo cwinygi wek gubed atera ma pud peya kigure ikom yat. Cura ma dolo lok ma i buk man tito kit ma kimako ki Yecu, ngolo kop iwiye, gure ikom yat wa ki nicer ki i lyel, ki kit ma obedo ka nyute bot lupwonyene madong otyeko cer woko ki i lyel.

Lok atita ikom dako ma kimako katimo tim aborni i cura 8:1-11 kitwodo kakare woko pien lucoc macon wa ki lugony leb macon guweko lok atita man woko, ento jo mukene gire gucoyo lok man kamaleng.

Jon keto kili ikom lok ma mako mic me kwo ma labednaka ma a ki i Yecu, mic man matye kombedi kun bino bot jo ma giye ni Yecu aye yo, ki ada, ki kwo. Jon nyutu lapor mapol ma a ki i kwo me nino ducu me nyutu ada me kwo me cwiny, lapore jami macalo pii, mugati, dero, lakwat ki romine, poto olok ki nyig olok.

Lacim wilok madito ma i buk man

Lok atita

Jon Labatija ki lupwonye pa Yecu mukwongo

Tic pa Yecu ikin lwak

Kare me agiki me kwo pa Yecu i Jerucalem ki i kabedo ma cokcok ki kunu

Nicer ki nyute pa Rwot

Ladol lok: nyutene bene i Galilaya