Jon 14

Yecu en yo me o bot Lubanga Won

1“Pe wuwek cwinywu obed ki par mapol; wuye Lubanga, dok wuye an bene. 2I ot pa Wora tye iye kabedo mapol. Ka onongo pe kitmeno, kono onongo pe atitiwu ni acito kayubu ki wun kabedo. 3Ka acito, ayubu ki wun kabedo, ci dok abidwogo kaomowu, wek kama an abedo iye, wun bene wubed iye. 4Kama an acito iye, wun wungeyo yone.” 5Ci Tomaci owace ni, “Rwot, wan pe wangeyo kama icito iye; watwero ngeyo yone ningning?” 6Yecu odoke iye ni, “An a yoo, ki ada, ki kwo; pe tye ngat mo ma bino bot Won, kono ki i an keken. 7Kono ceng wungeya, kono wungeyo Wora bene; nicake kombedi dong wungeye, dok bene dong wunene.” 8Ci Pilipo ogamo doge ni, “Rwot, nyutiwa Won, ci biromowa.” 9Yecu odoke iye ni, “Dong arii kwedwu kare malac rom man, ento pud peya ingeya, Pilipo? Ngat ma oneno an nongo dong oneno Won; itwero waco ningning ni, ‘Nyutiwa Won?’ 10In pe iye ni an atye i Won, ki Won i an? Lok ma aloko botwu pe aloko pira kena, ento Won ma bedo i an aye tiyo tice. 11Wuye ni an atye i Won, ki Won i an; nyo ka pe kitmeno, wuye an pi tic ma atiyo keken.

12Adada awaciwu ni, ngat ma ye an, en bene bitiyo tic ma an atiyo; dok bitiyo tic madito makato man, pien acito bot Won. 13Gin ducu ma wubilego i nyinga, abitiyone, wek kiket deyo ikom Won pi Wod. 14Ka wubilego gin mo i nyinga, ci abitiyone.

Yecu ocike ni ebicwalo Cwiny Maleng

15Ka wumara, ci wubigwoko cika. 16Ci abilego Won, wek en omii ki wun Lacungudwar mukene ma bibedo kwedwu nakanaka, 17en Cwiny me ada, ma lobo pe twero limo, pien lobo pe nene, dok pe ngeye. Wun wungeye, pien en bedo kwedwu, dok bibedo i wun.

18Pe abiwekowu macalo lutino kic; abidwogo botwu. 19Odong kare manok, ci lobo pe dok binena, ento wun wubinena; pien an akwo, wun bene wubikwo. 20Inino meno wubingeyo ni an atye i Won, ki wun i an, ki an i wun. 21Ngat matye ki cika, ma gwokogi, en aye ngat ma mara; ngat ma mara, Wora bimare, an bene abimare, abinyute bote.” 22Juda ma pe me Keriot openyeni, “Rwot, man bibedo ningning, ni ibinyute botwa, ento pe bot lobo?” 23Ci Yecu odoke iye ni, “Ka ngat mo mara, ci en bimako lok mera. Wora bimare, ci An kacel ki Wora wabibino bote, ci wabibedo kacel kwede. 24Ento ngat ma pe mara, pe lubu loka. Lok ma wuwinyoni pe mera, ento pa Won ma ceng oora.

25Lok man atitiwu kun pud atye botwu. 26Ento Lacungudwar, ma en Cwiny Maleng, ma Won bicwalo i nyinga, en bipwonyowu jami ducu, en bipoyo wiwu i lok ducu mayam atitiwu. 27Awekiwu kuc, kuc mera amiyo botwu. Amiyowu, pe kit macalo lobo miyo. Pe wuwek cwinywu obed ki par mo, pe wulwor. 28Dong wuwinyo awaciwu ni, an abicito woko, dok abidwogo botwu. Kono wumara, kono cwinywu yom, pien acito bot Won; pien Won dit kata. 29Kombedi atito ki wun lok man ma peya otime, wek ka bitime, ci wuye. 30Pe dok abiduru lwak lok mapol kwedwu, pien laloc me lobo man tye kabino. En pe tye ki twer ikoma; 31ento man time wek lobo onge ni, an amaro Won, dok atiyo macalo Won ocika.

Ayu malo, wacitu.”