Jon 15

Yecu en olok me ada

1“An aye olok me ada, Wora en aye lapur. 2En lwero janga ducu ma ikoma ma pe nyak woko, ento janga ducu ma nyak en yubu, wek omede, onyak mapol. 3Wun dong kityeko yubuwu woko pi lok ma apwonyowu kwede. 4Wubed i an, ki an bene i wun. Macalo jang olok pe twero nyak pire kene, ka pe tye ikom yat olok, kitmeno wun bene pe wutwero nyak, ka pe wubedo i an. 5An olok, wun jange. Ngat ma bedo i an, ki an i en, en nyako nyige mapol, pien pe wutwero timo gin mo labongo an. 6Ka dano mo pe bedo i an, ci kibole woko macalo jang yat ma kitongo, ci two woko. Kicokogi, kibologi i mac, ci giwang woko. 7Ka wubedo i an, kun loka bedo i wun, ci wuleg gin ducu ma wumito, ci kibitimo pirwu. 8Man bikelo deyo ikom Wora, ka wunyako nyigwu mapol; kitmeno wubidoko lupwonyena. 9Macalo Won ceng omara, an bene amarowu kitmeno; wubed i mara. 10Ka wugwoko cika, ci wubibedo i mara, kit macalo ceng agwoko cik pa Wora, ci abedo i mare. 11Lok man atitiwu wek yomcwinya obed i wun, wek wupong ki yomcwiny. 121

Man aye cika, ni wumare kekenwu kit macalo ceng amarowu. 13Pe tye ngat mo matye ki mar madit makato man, ni dano mo miyo kwone pi lureme. 14Wun lurema ka wutiyo gin ducu ma acikowu. 15Pe dok alwongowu ni lutic, pien latic pe ngeyo gin ma ladite tiyo; ento alwongowu ni lurema, pien gin ducu mayam awinyo ki bot Wora dong atyeko nyutiwu. 16Pe wun aye wuyera, ento an aye ayerowu, dok aketowu wek wucit wunyak nyigwu, dok wek nyigwu orii; wek gin ducu ma wubilego ki bot Won i nyinga, en omii ki wun. 17Gin ma acikowu en ene ni, wumare kekenwu.

Adagadaga pa Lobo

18Ka lobo okwerowu, ci wun myero wunge ni yam okwongo kwero an ma kun peya okwerowu. 19Kono onongo wun wubedo jo me lobo, kono lobo omaro wun; ento wun pe jo me lobo, ento ayerowu ki i lobo; pimeno lobo okwerowu. 202 Wupo i lok mayam atito botwu ni, ‘Latic pe bedo dit makato ladite.’ Ka yam kiliba, wun bene kibilibowu; ka yam gumako loka, ci gin bimako mewu bene. 21Gin magi ducu kibitimo ikomwu pi nyinga, pien pe gingeyo ngat mayam oora. 22Kono pe nene abino, aloko botgi, kono pe gitye ki bal; ento kombedi dong pe gitye ki lok ma gibipido kwede pi balgi. 23Ngat ma kwera, nongo okwero Wora bene. 24Kono yam pe atiyo ikin gi tic ma dano mo mukene pe otiyo, kono pe gitye ki bal, ento kombedi dong guneno dok gukwero an kacel ki Wora. 253 Ento man otime wek lok ma kicoyo i Cik meggi ocobe kakare ni, ‘Kikwera nonono.’ 26Ento ka Lacungudwar bibino, ma abioro botwu nia ki bot Won, ma en aye Cwiny me ada ma a ki bot Won, en bibedo cadena. 27Wun bene wucaden, pien wubedo bota nia i acaki.