Jon 16

1Atyeko titiwu lok man wek pe cwinywu oari ki i niyewu. 2Kibiryemowu woko ki i kacoke; dok kare bibino ma dano ducu ma nekowu bitamo ni gitye katic pi Lubanga. 3Kibitimo man ikomwu pien pe gingeyo Won, kadi an bene. 4Ento atitiwu lok magi wek ka karegi bio, wupo ni yam atitiwu pirgi.

Tic pa Cwiny Maleng

Yam pe atito lok man botwu i acaki, pien onongo pud atye kwedwu. 5Ento dong abidok bot ngat ma ceng oora, pe tye ngat mo ikinwu ma penya ni. ‘Icito kwene?’ 6Cwinywu opong ki kumu pien atitiwu lok man. 7Ento atye katitiwu lok ada ni, bibedo ber botwu ka an acito; pien ka pe acito, ci Lacungudwar pe bibino botwu. Ento ka acito, ci abiore botwu. 8En ka obino, bimiyo lobo niang ikom bal, ki kit ma atir, ki ngolo kop: 9ikom bal, pien pe giye an; 10ikom kit ma atir, pien adok bot Won, pe dok wubinena; 11ikom ngolo kop, pien laloc me lobo man dong kingole kop woko.

12Pud atye ki lok mapol me awaca botwu, ento pe wutwero kanyone. 13Ka Cwiny me ada bibino, en bitelowu i ada ducu; pien en pe bilok pire kene, ento gin ducu ma en biwinyo, biwaco botwu, dok bititiwu gin ma bitime anyim. 14En biketo deyo ikoma, pien bikwanyo loka, ci biwaciwu. 15Gin ducu ma Won tye kwede mega; en ma omiyo awaciwu ni, Cwiny Maleng bikwanyo loka, ci biwaciwu.

Cwercwiny ki Yomcwiny

16Odong kare manok, ci pe dok wubinena; ento inge kare manok, ci wubinena.” 17Ci Lupwonyene mogo guloko keken gi ni, “Man gin ango ma en waco botwa, ni, ‘odong kare manok, ci pe wubinena, ento inge kare manok, ci wubinena’; dok ni, ‘Pien adok bot Won’?” 18Ci Lupwonyene guwaco ni, “Man kono te loke ningo, ni, ‘odong kare manok’? Pe waniang gin ma en tye kawaco.” 19Ento Yecu ongeyo ni gin mito penye, omiyo en owacigi ni, “Wutye kapenye kekenwu pi lok manen awaciwu ni, ‘Odong kare manok, ci pe dok wubinena; ento inge kare manok, ci wubinena’? 20Adada awaciwu ni, wubikok, wubikumu, ento lobo cwinye bibedo yom; cwinywu bicwer, ento cwercwinywu biloke doko yomcwiny. 21Ka mwoc ogoyo dako, ci en bedo ki arem, pien cawane nongo dong oromo me nywal; ento ka dong onywal, ci pe po pi arem pien nongo cwinye yom pi nywalo dano i lobo. 22Kombedi cwinywu cwer, ento abinenowu doki, ci cwinywu bibedo yom, pe tye ngat mo ma bikwanyo yomcwinywu ki botwu. 23Inino meno pe wubipenya lok mo. Adada awaciwu ni, ka wubilego gin mo bot Won, en bimiyowu i nyinga. 24Nio icawa man peya wulego gin mo i nyinga; wulegi, ci wubinongo, wek wupong ki yomcwiny.

Loc ikom lobo

25Lok man atitiwu i carolok; ento kare bibino ma pe dok abilok kwedwu i carolok, ento abititiwu lok ikom Won kamaleng. 26Inino meno wubilego Won i nyinga. Pe awaciwu ni abilego Won me kakawu. 27Won kikome marowu, pien wun wumara, dok wuye ni an aa ki bot Won. 28An aa ki bot Won, ka abino i lobo; dok abiweko lobo, me dok bot Won.”

29Ci Lupwonyene guwaco ni, “Nen, dong itye kalok kamaleng, pe i carolok. 30Kombedi dong wangeyo ni, in ingeyo gin ducu, dok pe dong wamito penyi; piman waye ni in ia ki bot Lubanga.” 31Yecu odok iye ki gin ni, “Kombedi dong wuye? 32Kare bibino, dok bene dong oo, ma wubiket woko, ngat acel acel i pacone, wubiweka kena. Ento pe atye kena, pien Won tye kweda. 33Awaco lok man botwu wek wubed ki kuc i an. I lobo wutye ki can; ento wudii cwinywu, an dong aloyo lobo.”