Jon 17

Yecu olego pi lupwonyene

1Ka Yecu oloko man, ci oilo wange malo i polo, ci owaco ni, “Wora, kare dong oromo; ket deyo ikom Wodi, wek Wodi bene oket deyo ikomi. 2Macalo yam imiye twero ikom gin ducu matye ki kom, wek omii kwo ma pe tum bot jo ducu ma ceng imiyo bote. 3Man en kwo ma pe tum, ni gunge in Lubanga acel me ada, ki Yecu Kricito mayam ioro. 4Dong aketo deyo ikomi i lobo, kun acobo tic ma ceng imiya me atiya. 5Wora, kombedi dong i ket deyo ikoma inyimi, ki deyo mayam abedo kwede inyimi ma peya icweyo lobo.

6An atyeko nyutu nyingi bot jo ma ceng imiya ki i lobo. Gin ceng meri, dok in imiyogi bota, gin gugwoko loki. 7Dok bene dong gingeyo ni jami ducu ma imiya oa ki boti. 8An dong amiyo botgi lok ma ceng imiya, ci gin dong gujolo, dok gingeyo atikatika ni an aa ki boti; dok giye ni in iora. 9Alego pirgi; pe alego pi lobo, ento pi jo ma ceng imiya, pien gin meri. 10Jona ducu obedo meri, ki meri ducu obedo mera, alimo deyo pirgi. 11An pe dok abedo i lobo, ento gin gitye i lobo, an abibino boti. Won Maleng, gwokgi i nyingi ma con imiya, wek gubed acel kit macalo wan acel. 121 Ka ceng atye kwedgi kacel, agwokogi i nyingi ma imiya; agwokogi, pe tye mo ma orwenyo ki ikin gi, kono dano ma myero orweny keken, wek ginacoya ocobe kakare. 13Ento kombedi atye kabino boti; lok man aloko i lobo, wek gubed ki yomcwiny ma mera, wek gupong kwede. 14Atyeko miyogi lok meri; ci lobo okwerogi, pien gin pe jo me lobo, macalo an bene pe a dano me lobo. 15Pe alego ni myero ikwanygi woko ki i lobo, ento ni igwokgi ki ikom Larac. 16Gin pe jo me lobo, macalo ceng an bene pe a dano me lobo. 17Lonygi ki ada; loki en ada. 18Macalo iora i lobo, an bene aorogi i lobo. 19An amiyo kwona kena pirgi, wek gin bene gumii kwogi ken gi piri.

20Pe alego pi jo man keken, ento pi jo ma biye an pi lokgi. 21Wek gin ducu gubed acel. Kitmacalo in, Wora, ibedo i an, an bene i in, gin ducu gubed i wan, wek lobo oye ni in iora. 22Deyo ma ceng imiya, an amiyo botgi, wek gubed acel macalo wan acel, 23an i gin ki in i an, gubed acel atika, wek lobo onge ni in iora, dok imarogi macalo imara. 24Wora, amitoni joni ma imiya ni, gubed bota kama an atye iye, wek gunen deyo mera ma imiya pi mar meri ma imara kwede ma ocake ma peya icibo guti me lobo. 25Ai Won ma opore, lobo con pe ongeyi, ento an angeyi; ki jo man ngeyo ni in iora. 26Amiyo nyingi ongene botgi, dok abimiyo ngene, wek mar ma imara kwede obed i gin, ki an i igi.”