Jon 18

Kimako Yecu

(Mat 26:47-56; Mar 14:43-50; Luk 22:47-50)

1Ka Yecu otyeko loko lok man, ci oa kacel ki lupwonyene, ci gucito gungolo nota me Kidron. Onongo tye poto mo kunu, ci odonyo iye kacel ki lupwonyene. 2Juda, ma ceng odobe, bene onongo ngeyo kabedo meno, pien Yecu ki lupwonyene yam gimaro coke kunu. 3Juda ogamo lwak acikari ki ludito tic mogo ki bot ajwaki madito pa Lubanga ki Luparicayo, ci gucito kunu ki tara ki mac raa ki jami lweny. 4Yecu onongo ngeyo gin ducu ma bitime ikome, ci okato botgi, kun penyogi ni, “Wuyenyo anga?” 5Ci gin gudoke iye ni, “Yecu me Najaret.” Ci Yecu ogamo ni, “An a en.” Juda ma odobe onongo ocung kacel kwedgi. 6Ka Yecu owaco ki gin ni, “An a en,” gujer ki ngegi, gupoto piny. 7Ci dok openyogi ni, “Wuyenyo anga?” Ci gin gudoke iye ni, “Yecu me Najaret.” 8Ci Yecu owaco ni, “Atyeko titiwu ni an a en; ka wuyenya, ci wuwek jo man guciti.” 9Man otime wek lok ma ceng en oloko ocobe kakare, ni, “Ikin jo ma ceng imiya, pe tye mo ma orwenyo.” 10Cimon Petero onongo tye ki pala lucwan; ci owoto, otongo ki opii pa ajwaka madit, ci onguno ite ma lacuc woko. Nying opii meno Maliko. 11Ci Yecu ociko Petero ni, “Dwok palani i akurane. Itamoni pe abimato ki ikikopo me can ma Wora omiyani?”

Kitero Yecu inyim Anac

12Lwak acikari ki laditgi ki lutic pa Lujudaya gumako Yecu, ci gutweye. 13Ci gukwongo tere bot Anac, ma Kayapa onyomo nyare, ma onongo en ajwaka madit i mwaka meno. 141 Kayapa en aye ceng omiyo tam bot Lujudaya ni ber dano acel oto pi lwak.

Petero okwero Yecu

(Mat 26:69-70; Mar 14:66-68; Luk 22:55-57)

15Cimon Petero olubu kor Yecu, kacel ki lapwonye acel mukene. Lapwonye man onongo ngeyo ajwaka madit, omiyo en odonyo idyekal pa ajwaka madit kacel ki Yecu; 16ento Petero ocung woko i dogcel. Lapwonye meno ma ajwaka madit ngeyoni ocito, ci oloko ki angeca ma gwoko dogcel, ci okelo Petero i idyekal. 17Ci angeca ma gwoko dogcel openyo Petero ni, “In bene pe itye ikin lupwonye pa dano man?” Ento Petero ogamo ni, “An a peke ikin gi.” 18Lutic ki ludito tic onongo gumoko mac miri iwang oo, pien piny onongo ngic, ci gucung kun gioyo mac. Petero bene onongo ocung kacel kwedgi ka oyo mac.

Ajwaka madit openyo Yecu

(Mat 26:59-66; Mar 14:55-64; Luk 22:66-71)

19Ajwaka madit openyo Yecu pi lupwonyene, ki ikom lok ma en pwonyo. 20Ci Yecu odoke iye ni, “Yam aloko kamaleng bot lwak; nino ducu abedo ka pwony i kacoke ki i Ot pa Lubanga, kama Lujudaya ducu gicoke iye. Pe aloko lok mo i mung. 21Ipenya pingo? Peny jo mayam guwinyo lok ma awaco botgi; gin ngeyo lok ma awaco.” 22Ka oloko lok man, ci ngat acel ikin ludito tic ma ocung odongo lem Yecu, kun waco ni, “Igamo dog ajwaka madit kumeno?” 23Ci Yecu ogamo ni, “Ka aloko marac, ci nyut caden me gin marac ma an aloko; ento ka aloko maber, ci idonga pingo?” 24Lacen Anac ocwale bot Kayapa, ajwaka madit, kun pud kitweye.

Petero dok okwero Yecu

(Mat 26:71-75; Mar 14:69-72; Luk 22:58-62)

25Cimon Petero onongo ocung kun oyo mac. Ci jo mukene dok gupenye ni, “In bene pe i ngat acel ikin lupwonyene?” Ento en okwero woko, kun waco ni, “An ko.” 26Ngat acel ikin opii pa ajwaka madit, wat pa dano ma Petero onguno iteni, dok openye ni, “Nakanen pe aneni kacel kwede i poto?” 27Ci Petero dok okwero; ci twon gweno otugi kok cut.

Yecu inyim Pilato

(Mat 27:1-2; 11—14; Mar 15:1-5; Luk 23:1-5)

28Lacen Luyudaya gukwanyo Yecu ki i ot pa Kayapa, gutere i ot pa laloc madit pa Luroma. Onongo piny dong cok ruu. Gin ki komgi pe gudonyo i ot pa laloc madit pa Luroma, pien gumito bedo ma gulonye ite cikgi ni o ka gucamo Karama me Kato. 29Piman omiyo Pilato okato woko botgi, ci openyogi ni, “Wudoto dano man pi kop ango?” 30Ci gin gudoke iye ni, “Ka onongo dano man pe latim marac, kono pe wakele boti.” 31Ci Pilato owacigi ni, “Wun ki komwu wutere, wungole kop kun wulubu cikwu.” Ento Lujudaya gudoke iye ni, “Cik pe ye ni wan wanek dano mo.” 322 Man otime wek lok ma Yecu owaco ocobe kakare, kun nyutu kit to ma ebito kwede.

33Ci Pilato dok odonyo i ot ci olwongo Yecu, kun penye ni, “In i Rwot pa Lujudaya?” 34Ci Yecu ogamo ni, “In iwaco lok man piri keni, kece mono jo mukene aye gutiti?” 35Ci Pilato odok iye ni, “An Lajudaya bo? Roki ki ajwaki madito pa Lubanga aye gukeli bota. In itimo gin ango?” 36Ci Yecu ogamo ni, “Kera pe me lobo man. Ka onongo kera obedo me lobo man, kono jona gulwenyo pira, wek pe kimiya i cing Lujudaya; ento kera pe me lobo man.” 37Dok Pilato openye ni, “In dong i Rwot bo?” Ci Yecu ogamo ni, “In iwaco ni An a Rwot. Kinywala piman, abino i lobo bene piman, pi bedo caden me lok ada. Dano ducu ma gitye i ada giwinyo dwona.” 38Ci Pilato openye ni. “Ada en gin ango?”

Kingolo ki Yecu kop me to

(Mat 27:15-31; Mar 15:6-20; Luk 23:13-25)

Ka owaco lok man, ci okato woko bot Lujudaya, ci otitigi ni, “An gira pe anongo kop mo ikome. 39Ento wun wutye ki kitwu ni myero agonyiwu ngat acel ikare me Karama me Kato. Wumito ni agonyiwu Rwot pa Lujudaya?” 40Ento gin dok guwoo ni, “Pe en, ento Baraba.” Baraba kono ceng lalweny aligo.