Jon 19

1Ci Pilato otero Yecu, ka ogoye ki anino. 2Acikari gucweyo lalukana okutu, gurwako iwiye, dok guruke ki bongo makwar. 3Ci gubino bote kun giwaco ni, “Wamoti ba, Rwot pa Lujudaya!” Ci gudonge.

4Pilato dok okato woko botgi, ci owaco ki gin ni, “Nen, akelo en botwu, wek wunge ni pe anongo kop mo ikome.” 5Ci Yecu okati woko botgi kun oruku lalukana okutu ki bongo makwar. Ka dok Pilato owacigi ni, “Nenu dano man.” 6Ka ajwaki madito pa Lubanga ki ludito tic gunene, ci guwoo ni. “Gure ikom yat! Gure ikom yat!” Ento Pilato owaco botgi ni, “Wun wutere, wugure ikom yat, pien an gira pe anongo kop mo ikome.” 7Ci Lujudaya gugamo doge ni, “Wan watye ki cik; pi cik meno en myero oto, pien okete kene ni en e Wod pa Lubanga.” 8Ka Pilato owinyo lok man, ci lworo omede ikome. 9Dok odok iot, openyo Yecu ni, “In ia ki kwene?” Ento Yecu pe ogamo doge. 10Omiyo Pilato owace ni, “Pe igamo doga? Pe ingeyo ni atye ki twer me gonyi, ki twer me guri ikom yatariya?” 11Ento Yecu odoke iye ni, “Ka onongo nene pe kimiyi twer ma oa ki malo kono pe ibedo ki twer ikoma; pimeno ngat ma omiya boti tye ki bal madit makato.”

12Nia ikare meno Pilato ocako yenyo yo me gonye, ento Lujudaya guwoo ni, “Ka igonyo dano man, ci in pe larem Cecar. Dano ducu ma kete kene me bedo Rwot, nongo pyem ki Cecar.”

13Ka Pilato owinyo lok man, ci okelo Yecu woko, obedo iwi kom me ngolo kop ikabedo ma kicano iye got; ileb Ibru kilwongo ni Gabata. 14Nino meno onongo obedo me Yube me Karama me Kato, ikin cawa macok romo abicel. Ci Pilato owaco bot Lujudaya ni, “Nenu, Rwotwu en!” 15Dano guwoo ni, “Tere woko cen! Tere woko cen! Gure ikom yatariya!” Dok Pilato openyogi ni, “Agur Rwotwu ikom yatariya?” Ci ajwaki madito pa Lubanga gudok iye ni, “Wan pe watye ki Rwot, kono Cecar keken.” 16Ci Pilato omiye botgi wek gugure ikom yatariya.

Kiguro Yecu ikom yatariya

(Mat 27:32-34; Mar 15:21-32; Luk 23:26-43)

17Ci gutero Yecu woko kun otingo yatariyane, naka wa ikabedo ma kilwongo Cogo Wic; ileb Ibru kilwongo ni, Golgota. 18Ci gugure ikom yatariya kunu, ki jo mukene aryo kacel kwede, acel tungcel, acel tungcel, kun Yecu tye idyere. 19Pilato ocoyo lok, ci oguru iwi yatariya ma kicoyo ni, “Yecu me Najaret, Rwot pa Lujudaya.” 20Lujudaya mapol gukwano lok man, pien kama kiguro iye Yecu onongo tye cok ki taun madit, dok kicoyo ileb Ibru, ileb Roma ki ileb Grik. 21Ajwaki madito pa Lubanga gucito bot Pilato ci guwaceni, “Pe ico ni, ‘Rwot pa Lujudaya,’ ento ni, ‘Dano man owaco ni, an Rwot pa Lujudaya.’” 22Ento Pilato odok iye ni, “Gin ma acoyo, dong acoyo otum.”

23Ka acikari gutyeko guru Yecu ikom yatariya, ci gukwanyo ginarukane, gupoko i dul angwen, dul acel pi acikari acel acel; ki kanyine bene. Kanyine onongo pe kikwoyo akwoya, ento kicweyo acweya, cake ki malo. 241 Guloko keken gi ni, “Pe myero wayecu, ento wabol kwir iye, wek wanen ngat ma bitero.” Man otime wek ginacoya ocobe kakare, ni,

“Gupoko ginarukana ikin gi,

kibolo kwir ikom bongona.”

25Acikari gutimo man; ento min Yecu ki lamin mine, Maliam dako pa Kelopa, ki Maliam Lamagdala onongo gucung cok ki yatariyane. 26Ka Yecu oneno mine, ki lapwonye meno ma en maro kun gucung, owaco bot mine ni, “Maa, nen wodi!” 27Ka dok owaco bot lapwonye meno ni, “Nen meni.” Nia icawa meno lapwonye meno otere paco, ogwoke.

To pa Yecu

(Mat 27:45-56; Mar 15:33-41; Luk 23:44-49)

282

Lacen inge man, Yecu onongo ongeyo ni jami ducu dong otum woko; wek ginacoya ocobe kakare, ci owaco ni, “Orwo neka.” 29Agulu kongo bwino mawac onongo kicibo kunu. Ci ngat mo ikin gi olutu amor i kongo bwino mawaci ci orwako iwi tal, ci oketo i dog Yecu. 30Ka Yecu dong ocwiyo kongo bwino mawaci, ci owaco ni, “Dong otum.” Ci okulu wiye ci oto.

Kicobo laknget Yecu

31Nino meno obedo ceng me yube pi Cabit, omiyo Lujudaya gukwayo Pilato ni myero kitur tyen dano ma kigurugi, ci kitergi woko, wek komgi pe orii iwi yat i ceng Cabit, pien ceng Cabit meno onongo nino madit me karama me kato. 32Acikari gubino, guturu tyen dano mukwongo, ki tyen dano me aryone ma ceng kigurugi kacel ki Yecu. 33Ento ka guo ikom Yecu, ci guneno ni dong otyeko to woko, ci pe dong guturu tyene. 34Ento ngat acel ikin acikari ocobo lakngete ki tong; ci cutcut remo ki pii oo piny ki i lakngete. 35Ngat ma ceng oneno kit ma gin man otime obedo caden. Lok ma en obolo tye ada, en ngeyo ni ebolo lok ada, wek wun bene wuye. 363 Pien meno ducu otime wek ginacoya ocobe kakare ni,

“Cogone mo pe kibituru.” 374

Dok dul ginacoya mukene owaco ni,

“Gibipiro wanggi ikom ngat ma kicobo.”

Kiyiko kom Yecu ilyel

(Mat 27:57-61; Mar 15:42-47; Luk 23:50-56)

38Lacen ingeye, Yucepu me Arimataya, ma onongo en lapwonye pa Yecu, ento i mung, pi lworo Lujudaya, olego Pilato ni myero eter kom Yecu, ci Pilato oye. Ci obino, otero kome. 395 Nikodemo bene, mayam ocito bot Yecu dyewor, obino kun okelo mo ma kur ma kirubu ki atakarac pi gwoko kome, ma peke mito romo kilo pyere adek. 40Co aryo meno gutero kom Yecu, guboyo ki bongi matar, kacel ki mo ma kur, macalo kit me yik pa Lujudaya tye. 41Kama kigure iye onongo tye poto, i poto meno onongo tye iye lyel manyen kama yam peya kiyiko iye ngat mo. 42Pi ceng me yube pa Lujudaya, dok pien bur lyel meno obedo cok ki kunu, omiyo kiyiko Yecu kunu.