Jon 20

Yecu ocer

(Mat 28:1-8; Mar 16:1-8; Luk 24:1-12)

1Inino mukwongo me cabit, Maliam Lamagdala opuk ilyel odiko con ma piny pud col ci oneno ni kikwanyo got woko ki i dog lyel. 2Ci en oringo, ocito bot Cimon Petero, ki bot lapwonye meno ma Yecu maroni, ci otitigi ni, “Kikwanyo Rwot woko ki ilyel, ento pe wangeyo kama kikete iye.” 3Ci Petero gin ki lapwonye meno gumako yo me cito ilyel. 4Gin aryo ducu guringo kacel, ento lapwonye meno oyomo Petero ki ngwec, ci okwongo o ilyel. 5Ka oo kunu ci ongiyo i lyel, ci oneno bongi matar ma onongo kiboye kwedeni gudong kakare; ento pe odonyo iye. 6Ci Cimon Petero obino kun lube, ci en odonyo ilyel. Ci onongo bongo matar gudong kakare, 7ki kitambara ma ceng obedo tung kuwiyeni, bene onongo pe tye kacel ki bongi matar, ento odole, tye kene pat. 8Lacen lapwonye meno ma okwongo o ilyel bene odonyo iye; oneno ci oye. 9Pien onongo pud peya guniang ginacoya, ni myero en ocer ki ikin jo ma oto. 10Ci Lupwonye meno gudok paco.

Yecu onyute bot Maliam Lamagdala

(Mat 28:9-10; Mar 16:9-11)

11Ento Maliam ocung ki woko ikanget bur lyel kun kok. Ikare ma en pud tye kakoko, ci ogungo piny ka ongiyo ilyel. 12Ci oneno lumalaika aryo ma rukgi tar, kun gubedo kama kipyelo kom Yecu iye, acel tung wiye, acel tung tyene. 13Ci lumalaika gupenye ni, “Dako, ikok pingo?” Ci en dok iye ki gin ni, “Kikwanyo Rwoda woko, pe angeyo kama kikete iye.” 14Ka dong oloko lok man, ci oloke, oneno Yecu kun ocung ingeye, ento pe ongeyo ni en Yecu. 15Yecu openye ni, “Dako, ikok pingo? Iyenyo anga?” Ci Maliam otamo ni gwok nyo en lapur poto, ci owace ni, “Ladit, ka in aye itere, tita kama ikete iye, wek acit akwanye.” 16Ci Yecu olwonge ni, “Maliam.” Maliam oloke, ci owace ileb Ibru ni, “Raboni!” (Ma te loke ni, “Lapwony.”) 17Ci Yecu owace ni, “Pe i gud koma, pien peya acito bot Won. Ento cit bot utmega, wek ititigi ni, an atye kacito bot Wora ki bot Wonwu, bot Lubangana ki bot Lubangawu.” 18Ci Maliam Lamagdala ocito, owaco bot lupwonye ni. “Aneno Rwot”; ci otitigi ni Rwot owaco lok magi bote.

Yecu onyute bot lupwonyene

(Mat 28:16-20; Mar 16:14-15; Luk 24:36-49)

19Otyeno me nino meno, ma en nino mukwongo me cabit, ma onongo dong kicego dogola kama lupwonye gucoke iye pi lworo Lujudaya, Yecu obino, ocung idyergi, ci owaco ki gin ni, “Kuc obed kwedwu.” 20Ka dong Yecu owaco lok man, ci onyutu cinge ki lakngete. Lupwonye cwinygi obedo yom ka guneno Rwot. 21Ci Yecu dok owaco ki gin ni, “Kuc obed kwedwu. Kitmacalo Won ceng oora, an bene aorowu.” 22Ka owaco man, ci oywe ikomgi, ci owaco ki gin ni, “Wugam Cwiny Maleng. 231 Ka wugonyo bal pa ngat mo, ci dong kibigonyo; ka pe wugonyo bal pa ngat mo, ci dong pe kibigonyo.”

Tomaci okwero ye

24Tomaci, ngat acel ikin jo apar wiye aryo, ma kilwongo ni Bangi, onongo pe botgi ikare ma Yecu obino. 25Ci Lupwonye mukene gutite ni, “Waneno Rwot.” Ento en odok iye ki gin ni, “Ka pe aneno poyo me cumar i cinge, kiketo nyig cinga iwang poyo me cumar, kiketo cinga i lakngete, pe abiye kadi matidi mo.”

26Ka nino aboro okato, lupwonyene dok gubedo i ot, Tomaci bene onongo tye kwedgi. Onongo gucego dogola, ento Yecu obino, ocung idyergi, ci owaco ni, “Kuc obed kwedwu.” 27Lacen owaco bot Tomaci ni, “Cwal nyig cingi kany, inen cinga; rye cingi iket i lakngeta; pe i bed ki akalakala, ento bed ma i ye.” 28Tomaci ogamo ni, “In i Rwoda ki Lubangana” 29Yecu openye ni, “Pien inena omiyo iye? Tye ki gum dano ma pe guneno, ma guye.”

Lok ma omiyo kicoyo buk man

30Yecu otiyo lanyut mapol inyim lupwonyene, ma pe kicoyogi i buk man. 31Ento magi kicoyo wek wuye ni, Yecu en Kricito ma Lubanga oyero, Wod pa Lubanga, ci ka wuye, wek wubed ki kwo inyinge.