Jon 21

Yecu onen bot lupwonye abiro

1Lacen ingeye, Yecu dok onyute bot lupwonyene i dog nam Tiberia. En onyute kit man: 2Cimon Petero, Tomaci ma kilwongo ni Bangi, Natanael me Kana me Galilaya, lutino pa Jebedayo ki jo aryo mukene ikin lupwonyene onongo gitye kacel. 31 Cimon Petero owaco ki gin ni, “Atye kacito kamako rec.” Ci gin gugamo doge ni, “Wan bene wabicito kwedi.” Ci gucito, gudonyo i yeya; ento i dyewor meno pe gumako gin mo.

4Ka piny pud oru aruya, ci Yecu obino ocung iwi tera, ento lupwonyene pe gungeyo ni meno Yecu. 5Ci Yecu openyogi ni, “Lurema, wunongo dek mo twal?” Ci gudoke iye ni, “Pe”. 62 Ci en owacigi ni, “Wubol obwo tung lacuc me yeya ci wubinongo rec.” Ci gubolo obwo ento tingone ongayogi woko pi pol pa rec. 7Ci Lapwonye meno ma Yecu maro owaco ki petero ni, “Meno Rwot!” Ka Cimon Petero owinyo ni meno Rwot, ci odwalo bongone, pien onongo ogonyogi woko pi tic, ci okwore i nam. 8Ento lupwonye mukene gubino i yeya, kun giywayo obwo ma opong ki rec, pien onongo pe gibor ki wi tera, mito romo tyen miya acel.

9Ka dong gukati woko iwi tera, ci guneno mac miri kunu, ma kiketo rec iwiye, ki mugati. 10Ci Yecu owacigi ni, “Wukel rec mogo ma pud wumako amakani.” 11Ci Cimon Petero oito i yeya, oywayo obwo, ci okelo iwi tera, kun opong ki rec madito, miya acel ki pyere abic wiye adek. Kadi bed gipol ento obwo pe oyec. 12Ci Yecu owacigi ni, “Wubin kacam.” Pe tye ngat mo ikin lupwonye ma odiyo cwinye me penye ni, “In anga?” Pien gungeyo ni en Rwot. 13Yecu obino, okwanyo mugati, ci opoko ki gin, ki rec bene kitmeno. 14Man obedo tyen me adeke ma Yecu onyute kwede bot lupwonyene, madong en ocer ki ikin jo ma oto.

Yecu gin ki Petero

15Ka dong gutyeko cam, ci Yecu openyo Cimon Petero ni, “Cimon wod pa Jon, in imara makato joni ducu?” Ci Petero ogamo ni, “Eyo, Rwot, in ingeyo ni an amari.” Ci ocike ni, “Kwa lutino romina.” 16Yecu dok openye tyen me aryo ni, “Cimon wod pa Jon, in imara?” Petero dok ogamo ni, “Eyo Rwot, in ingeyo ni an amari.” Ci Yecu ocike ni, “Gwok romina.” 17Yecu dok openye tyen me adeke ni, “Cimon wod pa Jon, in imara?” Ci cwiny Petero obale pien Yecu openye tyen me adeke ni, “Imara?” Ci Petero owace ni, “Rwot, in ingeyo jami ducu; in ingeyo ni an amari.” Ci Yecu ocike ni, “Kwa romina. 18Adada awaci ni, ka in pud itye awobi, ci itweyo bongoni keni, iwoto icito kama i mito; ento ka dong itii, ci ibimito kony ki bot ngat mukene wek otweni bongoni, dok bene biteri kama pe i mito.” 19Yecu owaco man pi nyutu kit to ma Petero bito kwede ci biketo deyo ikom Lubanga. Ka Yecu oloko lok man, ci owace ni, “Luba.”

Yecu gin ki Lapwonye me amara

203

Ka Petero oloke, ci oneno lapwonye meno ma Yecu maro kun lubugi, en aye ngat ma ceng obedo cok adada ki Yecu i dog cam me otyeno, ma owaco ni, “Rwot, anga ma bidobi?” 21Ka Petero onene, ci openyo Yecu ni, “Rwot, danoni kono?” 22Ci Yecu owace ni, “Ka amito ni en orii nio ka abidwogo, ci ilaro ango iye kono? In luba.” 23Lok man oywek ikin utmego, ni lapwonye man pe bito; ento Yecu onongo pe owaco ni en pe bito, ento ni, “Ka amito ni en orii nio ka abidwogo, ci ilaro ango iye kono?”

24Man aye lapwonye ma obedo caden ikom lok magi, dok ocoyogi; wan bene wangeyo ni lok ma en obolo obedo ada.

Lok me agiki

25Tye bene gin mukene mapol ma Yecu otiyo. Ka onongo kicoyogi ki acel acel, atamo ni kono lobo kulu pe otwero romo buk ma kicoyo.