Jon 13

Yecu olwoko tyen lupwonyene

1Ma peya nino madit me Karama me Kato oo, Yecu onongo ngeyo ni cawane dong oromo me weko lobo man me dok bot Won. En yam onongo omaro jone matye i lobo man; dok omarogi nio i agiki. 2Yecu ki lupwonyene onongo pud gitye kacamo cam me otyeno. Catan onongo dong oketo tam i cwiny Juda wod pa Cimon me Keriot me dobe. 3Yecu onongo ngeyo ni Won otyeko miyo jami ducu i cinge, dok ni ea ki bot Lubanga, dok bene ebidok bot Lubanga. 4Ci oa malo ki i dog cam, olunyu kanyine oketo tenge, ci okwanyo taulo, otweyo i pyere. 5Oonyo pii i becen, ci ocako lwoko tyen lupwonyene, ka yaka dunyu ki taulo ma otweyo i pyere.

6Ka en oo bot Cimon Petero, ci Petero openye ni, “Rwot, in kulu aye ibilwoko tyena?” 7Ento Yecu odoke iye ni, “In pe ingeyo gin ma an atye katiyo, ento ibiniang lacen.” 8Ci dok Petero owace ni, “In pe ibilwoko tyena matwal.” Ento Yecu odoke iye ni, “Ka pe alwoko tyeni, ci nongo pe inywako kacel kweda.” 9Cimon Petero owace ni, “Rwot, pe dong ilwok tyena keken, ento cinga ki wiya bene!” 10Ci Yecu owace ni, “Ngat madong olwoke, pe dong myero olwok kome, ento kono tyene keken, pien nongo kome ducu leng. Wun ducu komwu dong leng nikwanyo ngat acel keken.” 11En onongo ongeyo ngat ma obidobe; en aye gin ma omiyo en owaco ni, “Wun ducu pe komwu leng.” 121

Ka dong otyeko lwoko tyen gi, ci okwanyo kanyine, ci odok i kabedone, ka yaka openyogi ni, “Wuniang gin ma atimo ikomwu? 13Wulwonga ni Lapwony dok ni Rwot; meno tye atir, pien meno aye an kikome. 14Ka an ma Rwotwu ki Lapwonywu, alwoko tyenwu, wun bene myero wulwok tyenwu kekenwu. 15An dong anyutiwu lanen, wek wun bene wutim gin ma an atimo ikomwu. 162 Adada awaciwu ni, latic pe bedo dit makato ladite, ngat ma kioro pe dit kato ngat ma oore. 17Ka wungeyo lok man, ci wubibedo ki yomcwiny ka wutiyogi. 183 Pe aloko man ikom wun ducu. An angeyo jo madong atyeko yerogi. Ento wek ginacoya ocobe kakare, ni, ‘Ngat ma camo cam kacel kweda oloko tere ikoma.’ 19Kombedi atitiwu lok man ma peya otime, wek ka bitime, wuye ni an a en. 204 Adada awaciwu ni, ngat ma jolo dano ma an aoro, nongo ojolo an; ngat ma jolo an, nongo ojolo ngat ma oora.”

Yecu otito ni kibidobe

(Mat 26:20-25; Mar 14:17-21; Luk 22:21-23)

21I ngeye ma Yecu oloko lok man, cwinye onongo dong obale woko. Ci oloko atyer kamaleng ni, “Adada awaciwu ni, ngat acel ikinwu obidoba.” 22Ci Lupwonye gunene keken gi, ento pe guniang ngat ma en oloko ikomeni. 23Ngat acel ikin lupwonye, en ma Yecu maro, onongo obedo cok i kanget Yecu. 24Ci Cimon Petero ogwele, ci openye ni, “Tuciwa ngat ma en oloko ikome.” 25Ci lapwonye meno olyane macok ite it Yecu ci openye ni, “Anga, Rwot?” 26Ci Yecu ogamo ni, “Ka alutu mugati i dek, ci ngat ma abimiyo boteni en aye en.” Ka dong olutu mugati i dek, ci omiyo bot Juda wod pa Cimon me Keriot. 27Cut ma Juda ogamo, ci Catan otugi donyo i iye. Ci Yecu owace ni, “Tim gin ma i mito timoni oyoto.” 28Pe tye ngat mo i dog cam ma oniang gin ma omiyo Yecu oloko lok man bot Juda. 29Ento Juda onongo obedo lagwok kicaa limgi, omiyo jo mogo gutamo ni, Yecu owace ni ocit owil jami mamite pi nino me kwero karama madit, nyo ni myero omii gin mo bot lucan. 30Ka Juda otyeko camo mugati ma kimiyeni, ci okato woko cut. Piny onongo dong col.

Cik manyen ma Yecu omiyo

31Ikare ma Juda dong okato woko, ci Yecu owaco ni, “Kombedi dong deyo ma kiketo ikom Wod pa dano binen kamaleng, dok deyo pa Lubanga binen ikome. 32Ka kiketo deyo ikom Lubanga pire, ci Lubanga bene biketo deyo ikom Wod pa Dano, en biketo deyo ikome cut. 335 Lutino adunu, pud atye kwedwu pi kare manok. Wubiyenya, ento macalo ceng atito bot Lujudaya, kitmeno atitiwu bene kombedi ni, ‘Kama acito iye, wun pe wutwero bino iye.’ 346 Amiyowu cik manyen, ni, wumare kekenwu; wumare kekenwu kit macalo an amarowu. 35Piman dano ducu bingeyo ni wun lupwonyena, ka wumare ikinwu.”

Yecu otito ni Petero bikwere

(Mat 26:31-35; Mar 14:27-31; Luk 22:31-34)

36Cimon Petero openye ni, “Rwot, in ibicito kwene?” Ci Yecu ogamo ni, “Kama acito iye, pe itwero luba kombedi, ento ibiluba lacen.” 37Petero dok openye ni, “Rwot, pingo pe atwero lubi kombedi? Abimiyo kwona piri.” 38Ci Yecu ogamo ni, “Ibimiyo kwoni pira? Adada awaci ni, twon gweno pe bikok, nio ka kong ikwera tyen adek.”