Jon 12

Kiwiro Yecu ki moo i Betania

(Mat 26:6-13; Mar 14:3-9)

1Ka odong nino abicel me o i Karama me Kato, ci Yecu obino i Betania, kama Lajaro bedo iye, en ma ceng Yecu ocere ki ikin jo ma otoni. 2Gutede cam me otyeno kunu; Marta obedo kapoko cam, dok Lajaro onongo ngat acel ikin jo ma obedo kwede idog cam. 31 Ci Maliam okwanyo moo ma ngwece kur me wel madwong, moo nard magili, maromo lita acel, ci owiro ki tyen Yecu, kun jwayo tyen Yecu ki yer wiye; ci ngwec moo oromo i ot ducu. 4Ento Juda me Keriot, ngat acel ikin lupwonyene, en ma bidobe, openyo ni, 5“Pingo moo man pe kicato i wel me ciling me ryal alip miya adek, wek kimii bot lucan?” 6En owaco lok man, pe ni en paro pi lucan, ento pien en yam lakwo, dok onongo lagwok kicaa lim, ci en onongo kwalo lim ma kibolo iye woko. 7Ci Yecu owaco ni, “Wuweke mot, wek en okan pi nino me yika. 82 Lucan gitye kwedwu nino ducu, ento an pe abibedo kwedwu nino ducu.”

Kiporo lok me neko Lajaro

9Lwak Lujudaya madwong guniang ni Yecu tye i Betania, ci gubino, pe pi Yecu keken, ento bene pi neno Lajaro ma en ocero ki ikin jo ma otoni. 10Pimeno ajwaki madito pa Lubanga guyubu lok me neko Lajaro bene, 11pien pi Lajaro Lujudaya mapol gua woko ki botgi, ci guye Yecu.

Yecu odonyo i Jerucalem ki kwogo madit

(Mat 21:1-11; Mar 11:1-11; Luk 19:28-40)

12Orwone lwak jo mapol mayam gubino inino Karama me Kato guwinyo ni Yecu tye kabino i Jerucalem. 133 Ci gukwanyo jang otit, gukato kajole, kun gidange ni,

“Ojana!

Lubanga omii gum ikom ngat ma bino inying Rwot,

ma en Rwot pa Icrael!”

14Yecu onongo latin kana ci obedo iwiye; kit macalo kicoyo ni, 154

“Pe wulwor, wun jo me Cion!

Nen, Rwotwu tye kabino botwu,

obedo iwi latin kana.”

16Lupwonyene pe guniang man kong; ento ka dong kiketo deyo ikom Yecu, ci gupo ni ceng kicoyo lok magi ikome, dok ni kitimo tim magi ikome. 17Lwak mayam onongo tye bote ikare ma en lwongo Lajaro ki i lyel me cere ki ikin jo ma oto gutito pire. 18En aye ma omiyo lwak ocito kajole, pien guwinyo ni en otiyo lanyut man. 19Luparicayo guloko keken gi ni, “Pe dong wuneno, pe watwero gin mo! Nen, lobo ducu dong owire woko me lube.”

Lugrik mogo gumito neno Yecu

20Ikin jo mayam gucito kaworo Lubanga inino madit me Karama me Kato i Jerucalem onongo jo mogo Lugrik. 21Jonu gucito bot Pilipo me Betecaida matye i Galilaya, ci guwace ni, “Ladit, wamito neno Yecu.” 22Pilipo ocito, otito bot Anderiya; Anderiya ocito kacel ki Pilipo, gutito bot Yecu. 23Yecu odok ki gin iye ni, “Cawa dong oromo wek kimii deyo ikom Wod pa dano. 24Adada awaciwu ni, nyig ngano ka pe opoto ingom, oto, bedo kene; ento ka oto, ci ceko nyige mapol. 255 Ngat ma maro kwo ne, birwenyone; ngat ma kwero kwo ne i lobo man, bigwoko nio ikom kwo ma pe tum. 26Ka ngat mo mito tic pira, myero oluba; kama an abedo iye, latica bene bibedo kunu; ka ngat mo tiyo pira, ci Won biketo woro ikome.

Yecu oloko pi tone

27Cwinya kombedi dong obale woko. Abiwaco lok ango? Atwero waco ni, Wora, lara ikom cawa man? Pe kumeno, ento pi lok man omiyo ao ikom cawa man me can. 28Wora, ket deyo ikom nyingi.” Ci dwon oa ki i polo ni, “Dong aketo deyo ikome, dok abiketone aye.” 29Ento lwak ma gucung ka ngete guwinyo, ci guwaco ni, “Polo omor.” Dok jo mukene guwaconi, “Lamalaika oloko kwede.” 30Ci Yecu ogamo ni, “Dwon man pe obino pira, ento pirwu. 31Kombedi dong cawa me ngolo kop ikom lobo man; kombedi dong kibituru twero pa lalo lobo man woko. 32An ka kitinga kun kiila malo ki i lobo, ci abikelo dano ducu bota.” 33En oloko lok man pi nyutu kit to ma en bito kwede 346 Ci lwak gugamo doge ni, “Wan wawinyo ki i cik ni Kricito ma Lubanga oyero bedo nakanaka. In dok iwaco ningning ni, ‘Wod pa dano myero kitinge malo?’ Wod pa dano man en anga?” 35Ci Yecu owaco botgi ni, “Dero pud tye ikinwu pi kare manok. Wuwot ma kun wutye ki dero, wek piny macol pe ongukwu. Ngat ma woto i piny macol pe ngeyo kama cito iye. 36Ka pud wutye ki dero, ci wuye dero, wek wudok lutino me dero.”

Lujudaya pe guketo niyegi ikom Yecu

Ka Yecu oloko lok man, ci opoke ki botgi, okane woko ki botgi. 37Kadi bed otiyo lanyut marom meno inyimgi, pe guketo niyegi ikom en. 387 Man otime wek lok pa lanebi Icaya ocobe kakare, ni,

“Rwot, anga ma oye lok ma watito?

Dok anga ma Rwot onyutu tekone bote?”

39Man en gin ma omiyo pe gitwero ye,

pien Icaya dok owaco ni, 408

“Lubanga oneko wanggi,

dok odingo wigi,

wek pe gunen ki wanggi,

pe bene guniang,

wek gin pe guloke gudwog bota wek acanggi.”

41Icaya owaco lok man pien oneno deyo mere, ci oloko pire. 42Kadi bed kitmeno, jo mapol ma ikin luloc bene guye en, ento pi lworo Luparicayo omiyo pe gutucu, wek pe kiryemgi woko ki i kacoke. 43Gin onongo gimaro deyo ma dano keto ikomgi makato ma Lubanga miyo.

Ngolo kop ma a ki i lok pa Yecu

44Yecu oloko ki dwon malongo kun waco ni, “Ngat ma ye an, nongo pe oye an keken, ento nongo bene oye ngat ma oora. 45Ngat ma onena, nongo oneno ngat ma oora. 46An abino i lobo pi bedo dero me lobo, wek dano ducu ma ye an owek bedo i piny macol. 47Ka dano mo winyo loka ce pe mako me lubune, an pe angolo kop ikome; pien pe abino kangolo kop ikom lobo, ento abino kalaro lobo. 48Ngat ma kwera, ma pe winyo loka, tye ki ngat ma bingolo kop ikome; lok ma aloko bingolo kop ikome inino me agiki. 49Pien pe aloko pira kena: Won ma oora, en kikome aye omiya cik, i gin ma myero awac ki ma myero alok. 50Angeyo ni cike en kwo ma pe tum; pimeno gin ma awaco, awaco kit macalo Won oloko bota.”