Jon 11

To pa Lajaro

11

Ikare meno onongo tye dano mo ma kome lit i Betania ma nyinge Lajaro. Betania obedo gang ma Maliam gin ki lamine Marta bedo iye. 22 Man aye Maliam mayam owiro tyen Rwot ki moo, ka dok ojwayo tyene ki yer wiye; omine Lajaro aye onongo kome lit. 3Nyimegine gucwalo kwena bote kun giwaco ni, “Rwot, laremi ma imaroni kome lit.” 4Ento ka Yecu owinyo kwena man ci owaco ni, “Two man pe obino pi neke, ento pi kelo deyo bot Lubanga, wek oloke odok gin mamiyo deyo bot Wod pa Lubanga.”

5Yecu yam maro Marta ki lamine ki Lajaro. 6Ento ka owinyo kwena ni Lajaro kome lit, ci dok ogale pi nino aryo ikabedo ma onongo en tye iye. 7Lacen owaco bot lupwonyene ni, “Wadoku cen dok i Judaya.” 8Ci Lupwonyene gudoke iye ni, “Lapwony, Lujudaya nene gumito celo in ki got, ento man in dok i mito dok cen kunu?” 9Yecu ogamo ni, “Cawa me dyeceng pe tye apar wiye aryo? Ka ngat mo woto i dyeceng, ci en pe cato, pien neno dero me lobo man. 10Ento ka ngat mo woto dyewor, ci cato, pien dero pe i iye.” 11Ci Yecu owaco kit man, ka dok lacen owaco botgi ni, “Laremwa Lajaro dong onino woko, ento abicito wek acit acoye ki iwang nino.” 12Ci Lupwonyene guwace ni, “Rwot, ka en onino anina, ci en bibedo maber.” 13Yecu onongo oloko pi to pa Lajaro, ento lupwonyene gutamo ni en oloko pi yweyo me nino. 14Lacen Yecu otito atir botgi ni, “Lajaro dong otyeko to woko; 15ento cwinya yom pirwu pien en oto ma onongo an pe atye kunu, wek wun wuye. Dong wacitu bote.” 16Ci Tomaci ma te loke ni, Bangi owaco bot lupwonye luwote ni, “Wan bene wacitu, wek wato wunu kacel kwede.”

Yecu en nicer ki kwo

17Ikare ma Yecu oo kunu, ci onongo ni Lajaro dong orii i lyel nino angwen. 18Betania onongo cok ki Jerucalem, mito romo mairo aryo; 19ci jo mapol ikin Lujudaya onongo gubino bot Marta ki Maliam kakweyo cwinygi pi omin gi. 20Ka Marta owinyo ni Yecu tye kabino, ci ocito, oromo kwede, ento Maliam odong, obedo i ot. 21Ci Marta owaco bot Yecu ni, “Rwot, kono nene ibedo tye kany, kono omera pe oto. 22Dok bene angeyo ni gin ducu ma ibilego ki bot Lubanga kombedi en bimiyi.” 23Ci Yecu owace ni, “Omeru obicer obibedo kwo.” 24Ci Marta ogamo doge ni, “Angeyo ni en bicer i cer me nino me agiki.” 25Ci Yecu owace ni, “An nicer ki kwo; ngat ma ye an, kadi bed oto, en dok bikwo; 26dok dano ducu makwo ma ye an, pe bito matwal. In iye lok man?” 27En odok iye ni, “Eyo Rwot; dong aye ni in i Kricito ma Lubanga oyero, Wod pa Lubanga, ma omyero obin i lobo.”

Yecu okok

28I ngeye ma Marta oloko lok man, ci ocito olwongo lamine Maliam ci okwile ni, “Lapwony tye kany, en tye kalwongi.” 29Ka Maliam owinyo lok man, ci oa aruya me cito bote. 30Yecu onongo peya oo i gang meno, ento onongo pud tye kama Marta oromo kwede iye. 31Ka Lujudaya ma onongo gitye bote i ot kakweyo cwinye guneno Maliam oa malo aruya me kato woko, ci gulubu kore, pien onongo gutamo ni en obicito iwi lyel kakoko kunu. 32Ka Maliam oo kama Yecu tye iye, onene, ci opoto piny katyene, kun wace ni, “Rwot, kono nene onongo ibedo tye kany, kono omera pe oto.” 33Yecu onene ka kok, wa ki kit ma Lujudaya bene gukok kwede, ci ocur ki cwercwiny madit. 34Ci openyogi ni, “Wukano kome kwene?” Ci gudoke iye ni, “Rwot, bin inen.” 35Ci Yecu okok. 36Omiyo Lujudaya guwaco ni, “Nen, yam mare mada.” 37Ento jo mogo ikin gi guwaco ni, “En ceng oyabo wang lutowang onongo pe twero gengo Lajaro ka to?”

Yecu ocero Lajaro

38Yecu dok owinyo cwercwiny madit tutwal, ci ocito iwi lyel; lyel meno onongo yam obedo boro got, ma kiloro doge ki got. 39Ci Yecu owaco ni, “Wukwanyu got woko cen.” Ento Marta lamin latoni owaconi, “Rwot, kombedi dong kome ngwe, pien orii ilyel nino angwen kulu.” 40Ento Yecu odoke iye ni, “Nakanen pe awaci ni, ka iye, ci ibineno deyo pa Lubanga?” 41Ci dano gukwanyo got woko. Ci Yecu oilo wange malo, ci owaco ni, “Aba, apwoyi pien dong i winya. 42An angeyo con ni in i winya kare ducu, ento awaco lok man pi lwak ma gucung kangeta kany, wek guye ni in aye ma iora.” 43Ka dong owaco lok man, ci odange ki dwon malongo ni, “Lajaro, kati woko!” 44Ci en ma onongo otoni okati woko, kun onongo kiriyo cinge ki tyene ki bongo yik, dok wange bene onongo pud oboone woko ki bongonu. Ci Yecu owaco ki gin ni, “Wugonye woko wek owoti.”

Kipiro lok me neko Yecu

(Mat 26:1-5; Mar 14:1-2; Luk 22:1-2)

45Jo mapol ikin Lujudaya ma gubino kacel ki Maliam, ka guneno gin ma Yecu otiyo, ci guye en. 46Ento jo mukene ikin gi gucito bot Luparicayo, ci gutito botgi gin ma Yecu otiyo. 47Omiyo ajwaki madito pa Lubanga ki Luparicayo gulwongo kacoke pa lutela, ci guwaco ni, “Wabitimo gin ango? Pien dano man tye katiyo lanyut mapol. 48Ka waweke kitmeno, ci dano biye en, ci jo Roma bibino, gibiketo kabedowa maleng wa ki rokwa woko.” 49Ento ngat acel ikin gi, ma nyinge Kayapa, ma en ajwaka madit i mwaka meno, owaco ki gin ni, “Wun pe wungeyo gin mo kadi matidi mo. 50Dok pe wutamo ni bibedo ber botwu ka dano acel oto pi lwak, wek pe kityek rokwa woko ducu?” 51Ento Kayapa pe owaco lok man pire kene, ento pi bedo ajwaka madit i mwaka meno ceng en otito macalo lanebi ni Yecu bito pi rok pa Lujudaya. 52En pe otito lok nebi pi rok meno keken, ento wek ocok rok mukene ducu ma i lobo ma guket ata, me bedo lutino pa Lubanga, wek oribgi gudok acel. 53Ci ocake inino meno ludito pa Lujudaya guribo doggi me neke.

54Pimeno Yecu pe dok obedo kawot kamaleng ikin Lujudaya, ento oa ki kunu, ocito i lobo macok ki tim, i taun ma kilwongo Epraim; ci obedo kunu ki lupwonyene.

55Ka kare me Karama me Kato pa Lujudaya onongo dong tye cok, ci Lujudaya mapol gua ki ikin lobogi ci gucito i Jerucalem ma peya Karama me Kato oromo, wek gucob cik me lonyegi inyim Lubanga. 56Guyenyo Yecu, kun giloko keken gi ma gucung i Ot pa Lubanga ni, “Wutamo ningning? Nyo en pe bibino pi nino madit ba?” 57Ajwaki madito pa Lubanga ki Luparicayo onongo dong guciko dano ni, ka ngat mo ongeyo kama en tye iye, myero onyutigi, wek gimake woko.