Jon 10

Carolok ikom Lakwat

1“Adada awaciwu ni, ngat ma pe donyo i dwol romo ki i dogola, ento ito ki kamukene, nongo obedo ngat ma lakwo ki layak; 2ento ngat ma donyo ki i dogola, en lakwat romi kikome. 3Lagwok dogola yabe kika, dok romi bene giwinyo dwone; ci en lwongo romi ki nyinggi, ci terogi woko.

4Ka dong ocwalogi ducu woko, ci en woto telo nyimgi, kun romi gilube, pien gingeyo dwone. 5Pe gilubu welo, ento giringo woko ki bote, pien pe gingeyo dwon welo.” 6Yecu oloko ki gin carolok man, ento pe guniang lok ma en otito botgi.

Yecu en lakwat maber

7Yecu dok owaco ki gin ni, “Adada awaciwu ni, an a dogola me romi. 8Jo ducu mayam gubino ma gukwongo nyima, gin lukwo dok luyak; ento romi pe guwinyo dwon gi. 9An a dogola. Jo ducu ma gidonyo ki bota, gibilare; dok gibidonyo, ka gibikati woko, ci gibinongo cam i olet. 10Lakwo pe bino pi lok mo mukene, ento kono pi kwalo, pi neko ki pi tyeko; ento an abino wek gunong kwo, dok gubed kwede madwong. 11An lakwat maber. Lakwat maber jalo kwone pi romine. 12Ngat ma tiyo pi mucara, ma pe lakwat, ma romi pe mere kikome, ka oneno orudi bino, ci ringo weko romi woko; piman orudi monyogi, ci keyogi woko. 13En ringo woko pien tiyo pi mucara keken, pe paro pi romi. 14An lakwat maber; angeyo romina, gin bene gingeya, 151 kit macalo Won ngeya, an bene angeyo Won; weko amiyo kwona pi romina. 16Atye ki romina mukene bene, ma gipeke i dwol man; omyero akelgi bene, ci gibiwinyo dwona, dok gibibedo lwak acel ki lakwat acel. 17Gin ma omiyo Won mara, pien amiyo kwona wek dok agam odoco. 18Pe tye ngat mo ma kwanyo kwona ki bota; amiyo gira pira kena. Atye ki twero me jalo kwona, dok atye ki twero me dwokone dok odoco. Anongo cik man ki bot Wora.”

19Apokapoka dok obedo ikin Lujudaya pi lok man. 20Ci jo mapol ki ikin gi guwaco ni, “En tye ki cen, opo apoya; pingo wuwinyo loke?” 21Ento jo mukene guwaco ni, “Lok man pe pa dano matye ki cen. Cen twero yabo wang dano ma wange oto?”

Kikwero Yecu

22Ikare meno nino madit me kwero Ot pa Lubanga obedo i Jerucalem. Man otime ikare me cwir, 23ci Yecu onongo tye kawot i Ot pa Lubanga, ite baraja pa Solomon. 24Lujudaya gucoke, gurume idyere, ci gupenye ni, “Ibiweko wabedo ki akalakala naka wa awene? Ka in i Kricito ma Lubanga oyero, ci titiwa atir.” 25Yecu odok ki gin iye ni, “Atyeko titiwu ento wun pe wuye. Tic ma atiyo inying Wora gin cadena. 26Wun pe wuye, pien pe wutye ikin romina. 27Romina giwinyo dwona, an angeyogi, gin luba. 28Ci amiyogi kwo ma pe tum; gin pe bito matwal, dok pe tye ngat mo ma bimayogi ki i cinga. 29Wora ma omiyogi bota dit makato ducu, pe tye ngat mo matwero mayogi ki i cing Won. 30An ki Won wan acel.”

31Ci Lujudaya dok gukwanyo got me cele. 32Ento Yecu owaco botgi ni, “Atyeko nyutiwu tic mabeco mapol ma oa ki bot Won; wumito cela ki got pi tic mene?” 332 Ento Lujudaya gudoke iye ni, “Pe waceli pi tic mo maber, ento pi yeto Lubanga; pien in i dano adana, ento in ikete keni ni in Lubanga.” 343 Ci Yecu ogamo doggi ni, “Pe kicoyo i cik mewu ni, ‘An awaco ni wun lubanga.’ 35Ka en lwongo jo ma lok pa Lubanga obino botgi ni gin lubanga kun ginacoya pe twero ture, 36ci wun wutwero waco ningning bot ngat ma Won olonyo, dok ooro i lobo, ni, ‘Iyeto lubanga,’ pien an awaco ni, ‘An a Wod pa Lubanga’? 37Ka pe atiyo tic pa Wora, ci pe omyero wuye an. 38Ento kace atiyo tice, kadi bed pe wuye an, ento omyero wuye tic ma atiyo; wek wunge dok wuniang ni Won tye i an, ki an bene atye i Won.” 39Gin dok gutemo make, ento en opuce woko ki i cinggi. 404

Ci Yecu dok odok cen loka Jordan, ikabedo kama yam Jon okwongo batija dano iye, ci obedo kunu. 41Ci jo mapol gubino bote kun giwaco ni, “Jon yam pe otiyo lanyut mo ento lok ducu ma Jon otito ikom dano man obedo me ada.” 42Ci jo mapol kunu guketo niyegi ikome.