Jon 9

Yecu ocango laco ma kinywalo ma wange oto

1Ikare ma Yecu onongo tye kakato ki i yoo, ci oneno dano mo ma kinywalo ma wange oto. 2Ci Lupwonyene gupenye ni, “Lapwony, anga ma obalo, laco man, kece nyo lunyodone, ma omiyo kinywale ma wange oto?” 3Yecu ogamo ni, “Laco man pe obalo, kadi lunyodone bene, ento man otime wek tic pa Lubanga onen ikome. 4Myero watii tic pa ngat ma oora ma ceng pud tye; dyewor bibino ma ngat mo pe twero tic. 51 Ka pud atye i lobo, an a dero me lobo.” 6Ka Yecu oloko lok man, ci ongulu laa piny, ka orubu ki ngom, ci owiro ki wang laconu. 7Owace ni, “Citi, ilwok i kut me Ciloam” (ma te loke ni, Ma kioro). En ocito olwoko wange, ci odwogo ma wange dong neno piny. 8Luwote ki jo mayam ginene kun kwayo lim guwaco ni, “Man pe laco ma onongo bedo kun kwayo limi?” 9Jo mogo guwaco ni, “En kikome”; ento jo mukene ni, “Pe, ento cal kwede acala.” Ci laconu ogamo ni, “An enu, do!” 10Ci dano gupenye ni, “Wangi oyabe ningning?” 11Ci en ogamo ni, “Dano ma kilwongo nyinge ni Yecu aye orubu ngom, owiro ki wanga, ci ocika ni, ‘Cit ilwok i Ciloam.’ Ci ka acito, alwoko, acako neno piny.” 12Dok gupenye ni, “En tye kwene?” Ci en ogamo ni, “Pe angeyo.”

Luparicayo guyenyo kit ma kicango kwede lawange oto

13Ci gukelo dano mayam wange otoni bot Luparicayo. 14Nino ma Yecu orubu ngom iye, ci oyabo ki wange, onongo ceng Cabit. 15Ci Luparicayo dok gupenye ni, “Wangi oyabe ningning?” En odok ki gin iye ni, “En owiro ngom i wanga, alwoko, ci aneno piny.” 16Luparicayo mogo guwaco ni, “Dano man pe oa ki bot Lubanga, pien pe gwoko ceng Cabit.” Ento jo mukene guwaco ni, “Dano ma labalo twero tiyo lanyut marom man?” Omiyo apokapoka obedo ikin gi. 17Dok gupenyo dano mayam onongo wange otoni ni, “In itamo lok ango ikome, pien oyabo wangi?” En odok iye ni, “En lanebi.”

18Ento Lujudaya pe guye ni meno aye laco mayam onongo wange otoni, dok bene ni dong neno piny, nio ka kilwongo lunyodo pa dano ma kiyabo wangeni. 19Ci Luparicayo gupenyogi ni, “Man aye latinwu ma wuwaco ni kinywale ma wange otoni? Gin ango ma omiyo dong en neno piny kombedi?” 20Ci lunyodone gudok iye ni, “Wangeyo ni man latinwa, dok yam kinywale ma wange oto. 21Ento kit ma en ocako neno ki piny kombedini, pe wangeyo; dok wan pe wangeyo ngat ma oyabo wange. Wupenye; en dong dit, en bilok pire kene.” 22Lunyodone guwaco lok man pien gulworo Lujudaya, pien onongo Lujudaya guporo lok kacel ni, ka ngat mo otucu ni Yecu en Kricito ma Lubanga oyero, ci kibiryeme woko ki i kacoke. 23En aye gin ma omiyo lunyodone guwaco ni, “En dong dit, wupenye.”

24Pi lok man omiyo gulwongo dano mayam wange otoni tyen me aryo, kun giwace ni, “Mi deyo bot Lubanga; wan wangeyo ni dano man labalo.”

25En ogamo ni, “Ka en labalo, pe angeyo; gin acel keken ma angeyo, en aye ni, yam onongo wanga oto, ento kombedi dong aneno piny.” 26Gin gupenye ni, “En otimi ningning? Oyabo wangi ningning?” 27En odok ki gin iye ni, “Dong atitiwu con, wun pe wuwinyo. Pingo dok pud wumito winyo odoco? Wun bene wumito doko lupwonyene, ce?” 28Ci guyete kun giwaco ni, “In giri aye lapwonyene ento wan giwa lupwonye pa Moses. 29Wangeyo ni Lubanga yam oloko ki Moses, ento dano man pe wangeyo kama oa iye.” 30Dano ca odok iye ni, “Man lok me aura tutwal! Wun pe wungeyo kama en oa iye, kun en oyabo wanga! 31Wangeyo ni Lubanga pe winyo lubalo, ento ka ngat ma woro Lubanga, dok tiyo gin ma en mito, Lubanga winye. 32Ma naka yam peya owinye ni ngat mo oyabo wang dano mo ma kinywale ma wange oto. 33Ka kono dano man onongo pe oa ki bot Lubanga, kono pe otwero timo gin mo wa ki acel.” 34Ci gugamo doge ni, “In ma kinywali i bal kekeni bene ipwonywa?” Ci guryeme woko.

Towang me cwiny

35Ka Yecu owinyo ni kiryeme woko, ci onongo laconu, ci openye ni, “In iye Wod pa dano?” 36En odok iye ni, “En anga, ladit, wek aye en?” 37Ci Yecu owace ni, “Dong inene, en aye ngat matye kalok kwedini.” 38En owaco ni, “Aye, Rwot”; ci owore. 39Yecu owace ni, “An abino i lobo kangolo kop, wek jo ma pe neno piny gunen, ki jo maneno gudok lutowang.” 40Ci Luparicayo mogo ma onongo cok kwede guwinyo lok man. Ci gupenye ni, “Wan bene wangwa oto ce?” 41Ci Yecu odok iye ni, “Ka onongo wun wangwu oto, kono pe wutye ki bal; ento wun wuwaco ni, ‘Wan waneno piny’; pimeno balwu pud tye gire.”