Jon 8

Dako ma kimako katimo abor

1Dano ducu gudok paco ento Yecu ocito wa iwi got Jeituni. 2Orwone odiko con Yecu dok odok i Ot pa Lubanga. Jo ducu gucoke bote, ci en obedo piny, ci opwonyogi. 3Lupwonycik ki Luparicayo gukelo dako mo ma kimako katimo abor ci gukete idyere. 4Guwace ni, “Lapwony, dako man kimako katimo abor, kinonge iye kikome. 51 I Cik Moses ocikowa ni, dano macalo man myero kicel woko ki gweng. In kono ingolo ningning?” 6Gin guwaco lok man pi teme, wek ginong lok ma gibidote kwede. Ento Yecu okule piny, ocoyo ingom ki lwete. 7Ka gumede kapenye, en oile malo, ci owaco botgi ni, “Ngat mo ikinwu ma peke ki bal okwong cele ki gweng.” 8En dok okule piny, ci ocoyo ingom ki lwete. 9Ka guwinyo lok man, ci guket ki acel acel, kun ocake ki ikom jo madito; ci Yecu odong kene gin ki dakonu ma ocung inyime. 10Ci Yecu oile, ci openyo dakonu ni, “Gin kono gitye kwene? Pe tye ngat mo ma ongolo kop oloyi?” 11Ci dakonu ogamo ni, “Pe tye ngat mo ladit.” Yecu owaco ni, “An bene pe abingolo kop loyi. Cit giri; ento cake tin pe dok ibal.”

Yecu en dero me lobo

122

Yecu dok oloko ki Luparicayo kun waco ni, “An a dero pa dano ducu me lobo; ngat ma luba pe biwot i colpiny, ento bibedo ki dero me kwo.” 133 Ci Luparicayo gukwero loke woko kun giwace ni, “In giri itucu lok me caden ikomi kekeni, dok caden ma i tucu ikomini pe me ada.” 14Ci Yecu odok ki gin iye ni, “Kadi bed an atucu lok me caden ikoma kekena, ento lok ma atucuni tye me ada, pien an angeyo kama aa iye, ki kama acito iye, ento wun pe wungeyo kama aa iye, ki kama acito iye. 15Wun wungolo kop malube ki kit pa dano, ento an pe angolo kop ikom ngat mo. 16Kadi bed angol kop, ento kop ma an angolo tye atir, pien pe angolo kop kena, ento an angolo kop kacel ki ngat ma oora. 17I cikwu kicoyo ni, lok me caden pa dano aryo kace orwate bedo ada. 18An atucu lok me caden ikoma kekena, dok bene Wora ma oora bene cadena.”

19Ci Luparicayo gupenye ni, “Woru tye kwene?” Ci Yecu odok ki gin iye ni, “Wun pe wungeyo an, dok bene pe wungeyo Wora. Kono onongo wungeya, kono wungeyo Wora bene.” 20Yecu oloko lok man ikare ma pwonyo dano i Ot pa Lubanga, matye cok ki kama kigwoko iye lim tyer, ento pe tye ngat mo ma omake, pien karene onongo peya oromo.

Kama acito iye wun pe wutwero cito iye

21Yecu dok owaco ki gin ni, “An abicito woko. Wun wubiyenya, ento wubito i balwu. Kama acito iye, wun pe wutwero cito iye.” 22Piman Lujudaya guwaco ni, “En bineke kene ce, pien waco ni, ‘Kama acito iye wun pe wutwero cito iye’?” 23Ci Yecu owaco botgi ni, “Wun jo ma kinywalowu piny i lobo kany, ento an aa ki malo; wun jo me lobo kany, ento an pe a dano me lobo. 24En ma omiyo awaco botwu ni, wun wubito i balwu. Ada wubito i balwu ka pe wuye ni An aye a En.” 25Ci gupenyeni, “In anga?” Yecu odok ki gin iye ni, “An a ngat mayam atitiwu con nia i acaki. 26Atye ki lok mapol me aloka ikomwu, ki kop mapol me angola; ento ngat ma oora en me ada, ma omiyo atito ki jo ma i lobo gin madong awinyo ki bote.” 27Pe guniang ni en tye ka titigi pi Lubanga Won. 28Omiyo Yecu owaco ki gin ni, “Ka dong wutingo Wod pa dano malo me aneka ikom yat, ci wubiniang ni An aye a En, dok ni pe atiyo gin mo pira kena, ento aloko gin ma Wora opwonya iye. 29Ngat ma oora tye kweda; pe oweka kena, pien nino ducu atiyo gin ma iye mito.” 30Jo mapol ma guwinye kaloko lok man guye en.

Lok me ada bigonyowu

31Yecu owaco bot Lujudaya ma guye en ni, “Ka wumoko i loka, ci wun lupwonyena adada; 32miyo wubingeyo lok me ada, ci lok me ada bigonyowu.” 334 Ci gudoke iye ni, “Wan likwayo pa Abraim; ma naka yam peya wabedo opii pa ngat mo. Pingo dong in iwaco ni, ‘Kibigonyowu’?”

34Ci Yecu odok ki gin iye ni, “Adada awaciwu ni, dano ducu ma timo bal, nongo bedo mere i dic me te loc me bal kit macalo opii bedo i dic me te loc pa rwode. 35Opii pe bedo latin ma i ot pi nakanaka, ento latin anywali ma laco bedo gire latin ma i ot pi nakanaka. 36Piman, kace Wod ogonyowu ci wubibedo agonya atika. 37Angeyo ni wun likwayo pa Abraim; ento wumito neka, pien pe wuye pwony ma apwonyowu kwede. 38An aloko gin ma aneno ki bot Wora, ento wun wutiyo gin ma wuneno ki bot wonwu.”

39Ci gudoke iye ni, “Abraim en wonwa.” Ento Yecu owaco ki gin ni, “Ka onongo wun lutino pa Abraim, kono wun bene wutiyo kit tic acel ma Abraim otiyo. 40An atye katitiwu lok me ada ma awinyo ki bot Lubanga; ento kombedi wun wumito neka woko. Abraim yam pe otiyo kitmeno do! 41Wun wutye katiyo gin ma wonwu otimo.” Ci gudok iye bote ni, “Wan pe kinywalowa i abor; watye ki wonwa acel keken, en aye Lubanga.” 42Ento Yecu ogamo doggi ni, “Kono Lubanga wonwu, kono wumara, pien an aa ki bot Lubanga, kombedi dong atye kany; pe abino pira kena, en aye oora. 43Wungeyo gin ango ma oweko pe wutwero niang lok ma an awaco botwu? Pien pe wutwero ye lok ma an atito botwu. 44Wun wua ki bot wonwu, Catan, wumito cobo gin ma wonwu mito. Nia i acaki piny en con laneko, dok pe ocung i ada, pien lok me ada pe i iye. Ka en loko lok goba, nongo en loko malube ki kite, pien en lagoba, dok bene en won goba. 45Ento an aloko lok ada en ma omiyo wun pe wuye an. 46Anga matye ikinwu matwero moko lok me bal ikoma? Ka atito lok me ada, pingo pe wuye an? 47Ngat ma oa ki bot Lubanga winyo lok pa Lubanga. Gin ma omiyo wun pe wuwinyo, pien pe wua ki bot Lubanga.”

Yecu ki Abraim

48Lujudaya gudoke iye ni, “Wan nene pe wawaco kakare ni, in Lacamaria, dok itye ki cen?” 49Ci Yecu odok ki gin iye ni, “An pe atye ki cen; ento aworo Wora, wun pe wuwora. 50An pe ayenyo deyona pira kena; ento tye ngat mo matye ka yenyone pira dok bene en aye bingolo kop atir pira. 51Ento adada awaco botwu ni, ka ngat mo lubu loka, ci pe bito matwal.” 52Ci Lujudaya gudoke iye ni, “Kombedi dong waniang ni itye ki cen ada! Abraim yam oto, ki lunebi bene guto, ento in iwaco ni, ‘Ka ngat mo lubu loka, ci pe bibilo to matwal.’ 53In idit ikato kwarowa Abraim, ma ceng otoni? Lunebi bene guto do! In ikete ni in anga?” 54Yecu ogamo ni, “Ka aketo deyo ikoma kena, deyona mwa; Wora aye keto deyo ikoma, en ma wun wuwaco ni Lubangawuni. 55Wun pe wungeye; ento an angeye. Ka kono awaco ni pe angeye, kono adoko lagoba macalo wun; ento an angeye, dok alubu loke. 56Kwarowu Abraim yam obedo ki yomcwiny ni ebineno ninona; ci oneno, dok cwinye obedo yom matek.” 57Ci Lujudaya guwace ni, “In ma mwakani bene peya oromo pyerabici, ci iwaconi ineno Abraim?” 58Yecu ogamo doggi ni, “Adada awaciwu ni, ma Abraim pud pe, onongo dong an atye.” 59Omiyo gukwanyo got me cele; ento Yecu okane, ci okato woko ki i Ot pa Lubanga.