Jon 7

Yecu ki omegine

1I nge man, Yecu obedo kawot ikin Galilaya; pe omito cito i Judaya, pien Lujudaya onongo gimito neke. 21 Nino madito me kwero Kayo kac pa Lujudaya onongo cok. 3Ci omegine guwace in, “A ki kany, icit i Judaya, wek lupwonyeni gunen tic ma in itiyo. 4Pe tye dano mo ma tiyo tic i mung, ka en kikome mito ni dano gungeye. Kit ma itye katiyo tic magi, nyute keni wek wilobo ducu gungeyi.” 5Pien kadi omegine kikome bene onongo pe guye en. 6Ci Yecu owacigi ni, “Karena pud peya oo, ento karewu nino ducu tye. 7Lobo pe twero kwerowu, ento okwero an, pien an atucu lok ikome, ni tice ducu racu. 8Wun wucit kakwero nino madito; an pe abicito inino madito magi, pien karena peya oromo maber.” 9Yecu oloko lok man botgi, ci odong i Galilaya.

Yecu inino me karama me Kac

10Ento ka omegine dong gutyeko cito pi nino madito, ci en bene ocito, pe atyer, ento i mung. 11Lujudaya gubedo kayenye inino madito kun gipenyo ni, “En tye kwene?” 12Lwak onongo gitye ki nguru ikome tutwal. Jo mukene guwaco ni, “En gire dano maber,” ento jo mukene ni, “Pe, en rwenyo lwak.” 13Ento pe tye ngat mo ma waco nyinge kamaleng, pien onongo gilworo Lujudaya.

14Ka dong oo i dye nino madito, ci Yecu ocito i ot pa Lubanga, ci ocako pwonyo dano. 15Lujudaya guuru, kun giwaco ni, “Dano man onongo ngec madwong kit man ningning, kun bene pe okwano?” 16Yecu odok iye ki gin ni, “Pwony ma apwonyoni pe obedo mera kikoma, ento pa ngat ma ceng oora. 17Ka ngat mo mito tiyo gin ma Lubanga mito, en biniang kace pwony man oa ki bot Lubanga, nyo ka aloko pira kena. 18Ngat ma loko pire kene yenyo deyone pire kene. Ento ngat ma yenyo deyo pi ngat ma oore, bedo ki ada dok bene gin ma pe atir pe i en. 19Moses ceng pe omiyowu cik? Ento pe tye ngat mo ikinwu ma gwoko cik. Pingo wumito neka?” 20Lwak gudok iye ni, “In giri itye ki cen! Anga ma mito neki?” 21Yecu ogamo doggi ni, “Yam atiyo tic acel, ci wun ducu wuuru. 222 Moses ceng omiyowu cik me lire, kadi bed pe oa ki bot Moses, ento ki bot kwariwu, ci wun bene wuliro dano i ceng Cabit. 233 Ka kiliro latin awobi i ceng Cabit, wek pe kitur cik pa Moses, ci pingo iwu wang ikoma pi cango dano i ceng Cabit? 24Pe wungol kop pi neno ki wang, ento wungol kop atir.”

Man mono aye Kricito?

25Jo mogo me Jerucalem guwaco ni, “Man pe laco ma kimito nekoni? 26Nen, en tye kalok kamaleng, ento gin bene gipeke kaloko lok mo marac ikome. Luloc tika giniang ni man en Kricito ma Lubanga oyero? 27Ento wan wangeyo kama dano man oa iye; ka Kricito binen, pe tye dano mo ma bingeyo kama en oa iye.” 28Ikare ma Yecu obedo ka pwony i Ot pa Lubanga, en odange, kun penyo ni, “Wun tika wungeya, dok wungeyo kama an aa iye? An pe abino pira kena. Ngat ma oora en me ada, wun pe wungeye. 29Ento an angeye, pien aa ki bote, en aye oora.” 30Ci gumito make, ento pe tye ngat mo ma oketo cinge ikome, pien karene onongo peya oromo. 31Ento jo mapol ikin lwak guye en ci guwaco ni, “Ka Kricito ma Lubanga oyero binen, ci en mono bitiyo lanyut mapol makato ma dano man tiyo?”

Kicwalo acikari kamako Yecu

32Luparicayo guwinyo ka lwak tye kangur ikom Yecu, omiyo ajwaki madito pa Lubanga ki Luparicayo gucwalo acikari kamake. 33Ci Yecu owaco ni, “Pud dok abibedo kwedwu pi kare manok, lacen abidok bot ngat mayam oora. 34Wubiyenya, ento pe wubinonga, pien kama abedo iye, wun pe wutwero oo iye.” 35Ci Lujudaya gupenye keken gi ni, “Dano man mito cito kweneka, ma wan pe wabinongeni? En mito cito bot jo mewa ma guket ata ikin jo Grik, ka pwonyo jo Grik ce? 36Man teloke ningo, ni, ‘Wubiyenya, ento pe wubinonga,’ dok ni, ‘Kama abedo iye, wun pe wutwero oo iye’?”

Kulu me pii mamiyo kwo

374

Inino me agiki me karama, ma en aye nino madit, Yecu oa malo, ci odange, kun waco ni, “Ngat ma orwo pii neko, en myero obin bota. 385 Ngat ma ye an myero omati, kit macalo ginacoya waco, ‘Kulu me pii mamiyo kwo bimol nia i iye.’” 39Yecu oloko lok man ikom Cwiny Maleng, ma jo ma giye en binongo. Ikare meno onongo Cwiny Maleng peya kimiyo, pien onongo Yecu peya kiketo deyo ikome.

Apokapoka ikin lwak

40Ka guwinyo lok magi, ci jo mogo ikin lwak guwaco ni, “Adada, nye man en lanebi kikome.” 41Ci jo mukene guwaco ni, “Man gire Kricito ma Lubanga oyero.” Ento jo mukene dok guwaco ni, “Kricito ma Lubanga oyero pe a ki i Galilaya! 426 Pien ginacoya tito ni, Kricito ma Lubanga oyero a ki i anywali pa Daudi, ki i Beterekem, i taun mayam Daudi bedo iye” 43Pimeno apokapoka obedo ikin lwak pire. 44Jo mogo ikin gi gumito make, ento pe tye ngat mo ma oketo cinge ikome.

Ludito pa Lujudaya pe guye Yecu

45Acikari gudok cen bot ajwaki madito pa Lubanga ki Luparicayo. Ci gupenyogi ni, “Pingo pe wukele?” 46Ci acikari gugamo doggi ni, “Pe tye ngat mo mayam oloko macalo dano man.” 47Ci Luparicayo gudok iye botgi ni, “Wun bene kityeko rwenyowu woko ce? 48Dong mono wunongo ngat mo ikin luloc nyo ikin Luparicayo ma guye en? 49Ento lwak man ma kwiya cik pa Moses dong kicenogi woko.” 507 Nikodemo mayam ocito bot Yecu, ma en bene ngat acel ikin Luparicayo, openyogi ni, 51“Cik mewa mono ye ni kingol kop ikom dano ka peya kiwinyo lok ma a ki idoge, wek kiniang ikom gin ma en timo?” 52Ci gudoke iye ni, “In bene ia ki i Galilaya ce? Kong iyeny i ginacoya ci ibineno ni pe tye lanebi mo ma bia ki i Galilaya.” [53Ci ngat acel acel odok i ode.]