Jon 6

Yecu opito jo alip abic

(Mat 14:13-21; Mar 6:30-44; Luk 9:10-17)

1Lacen inge man, Yecu ocito loka nam Galilaya, ma en aye nam me Tiberia. 2Lwak madwong gulube, pien ceng guneno lanyut ma en otiyo ikom lutwo. 3Yecu oito malo iwi got, ci obedo piny kunu kacel ki lupwonyene. 4Karama me Kato, ma en nino madit pa Lujudaya, onongo dong cok. 5Ka Yecu oilo wange, ci oneno lwak madwong matye kabino bote, ci openyo Pilipo ni, “Wabiwilo cam ki kwene wek jo man gucam?” 6En oloko lok man pi teme, pien en kikome onongo ngeyo gin ma ebitiyo. 7Pilipo odoke iye ni, “Bimite cente makato denari miya aryo wek cam orom ngat acel acel manoknok.” 8Ngat acel ikin lupwonyene, en Anderiya omin Cimon Petero, owace ni, 9“Latin awobi mo tye kany, matye ki mugati abic me cayiri, ki rec aryo. Ento magi pe biromo lwak marom man” 10Ci Yecu owaco ni, “Wuwek lwak gubed piny.” Lum onongo olot madwong adada ikabedo meno. Ci dano gubedo piny; ci onongo tye co ma welgi romo alip abic. 11Lacen Yecu okwanyo mugati, opwoyo, ci opoko bot jo ma gubedo piny, ki rec bene, kit macalo gimito. 12Ka dong guyeng, ci Yecu owaco bot lupwonyene ni, “Wucok ngide ma odong, wek cam mo pe olanye.” 13Ci gucoko ngide, opongo aduku apar wiye aryo ki ikom mugati abic me cayiri ma lwak gucamo odong. 14Ka lwak guneno lanyut ma en otiyo, guwaco ni, “Adada, man en lanebi meno ma omyero obin i loboni.”

15Ka Yecu oniang ni gimito bino kamake tektek pi kete me bedo Rwot, ci olwi, ocito iwi got kakene.

Yecu owoto iwi pii nam

(Mat 14:22-33; Mar 6:45-52)

16Ka piny oyutu, ci lupwonyene gucito i dog nam, 17gudonyo i yeya, gucako ngolo nam me cito Kapernaum. Piny onongo dong col, ento Yecu onongo peya obino botgi. 18Nam otinge pi yamo ma onongo tye kakodo. 19Ka onongo dong gucero yeya gucito kama bore romo mairo adek nyo angwen, ci guneno Yecu ka tye kawot iwi nam ki tyene kun bino i yeya, ci lworo omakogi. 20Ento en owacigi ni, “Pe wulwor, an enu!” 21Omiyo guye odonyo i yeya. Cutcut yeya oo iwi tera kama gitye kacito iye.

Lwak guyenyo Yecu

22Orwone jo ma onongo gudong loka nam tungcel guneno ni yeya acel keken aye odong kunu. Gin gungeyo ni Yecu pe oito i yeya kacel ki lupwonyene, ento lupwonyene ceng gucito ken gi. 23Kadi bed kumeno, yeya mukene ma gia Tiberia gubino cok ki kabedo kama dano gucamo iye mugati ingeye ma Rwot otyeko miyo pwoc. 24Ka lwak guneno ni Yecu pe kunu, kadi wa lupwonyene bene, gin ki komgi guito i yeya, ci gucito Kapernaum kayenyo Yecu.

Yecu en mugati me kwo

25Ka lwak gunongo Yecu loka nam tung ca, ci gupenye ni, “Lapwony, ibino kany awene?” 26Yecu odok ki gin iye ni, “Adada awaciwu ni, wutye ka yenya pe ni pien yam wuneno lanyut, ento ni pien wucamo mugati, wuyeng. 27Pe wutii pi cam ma top wokoni, ento pi cam ma rii nio wa i kwo ma pe tum, ma Wod pa dano bimiyowu; pien Lubanga Won oketo lanen mere ikome.” 28Gin dok gupenye ni, “Myero watim gin ango wek watii tic pa Lubanga?” 29Ci Yecu odok iye botgi ni, “Tic ma Lubanga mito ni wutim en aye ni wubed ki niye ikom ngat ma en ooro.” 30Ci Gupenye ni, “Lanyut ango ma in ibitiyo, wek wanen, ci waye in? Tic ango ma in ibitiyo? 311 Kwariwa yam gucamo mugati i tim, kit ma kiwaco i ginacoya ni, ‘Omiyogi mugati me acama ma oa ki i polo.’” 32Yecu ogamo doggi ni, “Adada awaciwu ni, Moses yam pe omiyowu mugati ma oa ki i polo; ento Wora en aye miyowu mugati me ada nia ki i polo. 33Pien mugati pa Lubanga en mugati ma bino piny nia ki i polo, mamiyo kwo ki lobo.” 34Ci lwak guwace ni, “Rwot, miwa mugati meno nino ducu.”

35Ci Yecu owaco botgi ni, “An a mugati me kwo; ngat ma bino bota, kec pe bineke; ngat ma ye an, orwo pe dok bineke matwal. 36Ento yam atito botwu ni, wun dong wunena, ento pe wuye. 37Dano ducu ma Wora omiya bibino bota; ngat ma bino bota, pe abiryeme. 38Pien dong pe alor piny ki i polo katiyo gin ma iya mito pira kena, ento katiyo gin ma ngat mayam oora mito. 39Man obedo mit pa ngat ma oora, ni ikom dano ducu ma en omiya pe ngat mo orweny, ento acergi woko ducu inino me agiki. 40Pien wora mito ni dano ducu maneno Wod, ma ye en, myero gunong kwo ma pe tum; ci an abicerogi woko inino me agiki.”

41Lujudaya gungur ikome pien owaco ni, “An a mugati ma olor piny nia i polo.” 42Ci guwaco ni, “Man pe Yecu, wod pa Yucepu, ma wone ki mine wangeyo? Pingo en dok waco ni, ‘An alor piny nia i polo’?” 43Ci Yecu odok iye ki gin ni, “Pe wungur ikinwu kenwu. 44Dano mo pe twero bino bota, ka Wora mayam oora pe okele bota, ci an bene abicere woko inino me agiki. 452 Kicoyo i buk pa lunebi ni, ‘Lubanga bipwonyogi ducu.’ Dano ducu ma winyo lok ki bot Won, ce omako loke, bino bota. 46Pe ni ngat mo yam oneno Won kono ngat mayam oa ki bot Lubanga en aye oneno Won. 47Adada awaciwu ni, ngat ma ye an tye ki kwo ma pe tum. 48An a mugati me kwo. 49Kwariwu yam gucamo mana i tim, ento guto woko. 50Man en mugati ma lor piny nia i polo, ma ka dano mo ocamo, pe bito. 51An a mugati makwo, ma olor piny nia i polo; ka ngat mo ocamo mugati man, en bibedo kwo nakanaka. Mugati ma abimiyo en aye koma, ma amiyo wek lobo obed ki kwo.”

52Man omiyo Lujudaya guero pyem ikin gi keken gi, kun giwaco ni, “Dano man twero miyowa kome me acama ningning?” 53Ci Yecu owacigi ni, “Adada awaciwu ni, ka pe wucamo kom Wod pa dano, dok bene ka pe wumato remone, ci pe wubibedo ki kwo i iwu. 54Ngat ma camo koma, dok bene mato remona, tye ki kwo ma pe tum, ci an abicere woko inino me agiki. 55Pien koma en cam me ada, dok remona en ginamata me ada. 56Ngat ma camo koma, dok bene mato remona, bedo i an, dok an bene abedo i en. 57Macalo Won makwo ceng oora, kun an abedo kwo pi Won, kitmeno ngat ma cama bikwo bene pira. 58Man en mugati ma olor piny nia i polo, pe kit mugati mayam kwariwu gucamo, ci lacen guto woko; ento ngat ma camo mugati man bibedo kwo nakanaka.” 59Yecu oloko lok magi ikare ma en pwonyo i kacoke i Kapernaum.

Lok me kwo ma pe tum

60Lupwonyene mapol guwinyo lok man ci guwaco ni, “Man lok matek; anga matwero lubune?” 61Ento Yecu ongeyo ki i cwinye kene ni lupwonyene gitye kangur ikom lok man, ci openyogi ni, “Lok man obalo tamwu woko ce? 62Bibedo ningning ka kono wuneno Wod pa dano kun ito me dok kama yam en tye iye con? 63Gin mamiyo kwo en aye Cwiny pa Lubanga, teko me kom pe konyo gin mo; lok ducu ma awaciwu gin aye kelo kwo pien a ki bot Cwiny Maleng. 64Ento tye jo mogo ikinwu ma pe giye.” Pien nia i acaki Yecu onongo ngeyo jo meno ma pe ye, ki ngat ma bidobe. 65En dok owaco ni, “Man en gin ma omiyo ceng atitiwu ni, pe tye ngat mo matwero bino bota, ka Won pe oye ni otime.”

66Cake ikare meno, lupwonyene mapol gudok cen, pe dok gubedo kawot kacel kwede. 67Piman Yecu openyo jone apar wiye aryoni ni, “Wun bene wumito dok cen?” 68Ci3 Cimon Petero ogamo doge ni, “Rwot, wabicito bot anga? In itye ki lok me kwo ma pe tum. 69Wan waye, dok watyeko niang ni, in i ngat Maleng pa Lubanga.” 70Ci Yecu odok ki gin iye ni, “Ceng pe ayerowu wun apar wiye aryo? Ento ngat acel ikinwu pa Catan.” 71En onongo oloko ikom Juda wod pa Cimon me Keriot, ngat acel ikin jonu apar wiye aryoni, ma bidobe.