Jon 5

Yecu ocango dano i dog kut

1Lacen inge man, Yecu ocito i Jerucalem pi nino madit pa Lujudaya ma onongo tye.

2I Jerucalem, yam tye kut mo ma kilwongo i leb jo Ibru ni Betecaida inget Dogcel me Romo, matye iye bolo abic. 3Lwak lutwo mapol onongo butu iye, lutowang, lungolo ki lugoro, ma gikuru twage me pii. Pien kare mogo lamalaika pa Rwot bino i kut ci twago i pii. 4Piman ngat ma okwongo lute i pii ma pud kitwago atwagani aye cang ki ikom kit two ducu mayam tye ikome. 5Laco mo onongo tye kunu ma two dong orii ikome pi mwaka pyere adek wiye aboro. 6Yecu onene ka obutu piny, dok ongeyo ni en orii kunu pi kare malac, ci openye ni, “Imito icang?” 7Ci latwo ogamo ni, “Ladit, pe atye ki ngat mo kany matwero luta i kut ka pii otwage. Ka atye ka komo me donyo, ngat mukene dok rune oyot kwongo donyo woko.” 8Ci Yecu odoke iye ni, “A malo, ikwany gibutuni, iciti.” 9Cutcut laco meno otugi cang woko; ci okwanyo gibutune, ci ocito gire.

Man otime i ceng Cabit, 101 omiyo Lujudaya guwaco ki laco ma kicangoni ni, “Tin ceng Cabit, piman cik pe ye ni iting gibutuni.” 11Ento en odok iye ki gin ni, “Ngat ma ocanga aye owaca ni, ‘Ting gibutuni iciti.’” 12Ci gupenye ni, “Laco meno ma owaci ni, ‘Ting gibutuni icitini’, en anga?” 13Ento laco ma kicangoni onongo pe ngeyo ngat ma ocange, pien Yecu onongo opuce ki ikin lwak ma opong kunu ci ocito gire woko. 14Lacen Yecu ononge i Ot pa Lubanga, ci owace ni, “Nen, dong icang woko, pe dok i mede katimo bal, wek gin marac makato meno pe opot ikomi.” 15Laconu ocito, otito bot Lujudaya ni, “Yecu aye ocanga.” 16En aye gin ma omiyo Lujudaya gulibo Yecu, pien otimo jami magi i ceng Cabit. 17Ento Yecu odok ki gin iye ni, “Wora tiyo nino ducu, an bene myero atii kitmeno.” 18Lok man omiyo Lujudaya dok gumede kayenyo yo me neke, pe pi turu cik me Cabit keken, ento bene pi lwongo Lubanga ni Wone, kit man miyo en bedo rom ki Lubanga.

Twero pa Wod

19Ci Yecu odok iye ni, “Adada awaciwu ni, Wod pe twero tiyo gin mo pire kene, ento tiyo gin maneno Won tiyo; pien gin ma en tiyo, Wod bene tiyo kitmeno. 20Won maro Wod, ci nyute gin ducu ma en tiyo; dok binyute tic madito makato magi, wek wuur. 21Kitmacalo Won cero jo ma oto, dok miyogi kwo, kitmeno Wod bene miyo kwo bot jo ma en mito. 22Won pe ngolo kop ikom dano mo, ento dong otyeko miyo twer me ngolo kop ducu bot Wod, 23wek dano ducu gumii woro ikom Wod, kit macalo gimiyo woro ikom Won. Ngat ma pe miyo woro ikom Wod, nongo bene pe miyo woro ikom Won ma ceng oore. 24Adada awaciwu ni, dano ma winyo loka, ma ye ngat ma oora, tye ki kwo ma pe tum; pe kibingolo kop ikome, ento dong oa i to, oo i kwo.

25Adada awaciwu ni, kare bibino, dok bene dong oo, ma jo ma oto i cwiny biwinyo iye dwon Wod pa Lubanga; jo ma biwinyo dok biye bikwo. 26Pien macalo kwo a ki bot Won, kitmeno en bene omiyo kwo a ki bot Wod, 27dok bene omiye twer me ngolo kop, pien en Wod pa dano. 28Pe wuur lok man; pien kare bibino ma jo ducu ma oto biwinyo iye dwone 292 ci gibikati woko. Jo ma ceng gutimo maber bidonyo i cer me kwo, ki jo ma ceng gutimo marac gibicer ci kibingolo kop loyogi.

Caden pa Yecu

30An pe atwero tiyo gin mo ki twerona pira kena; angolo kop kit ma awinyo wora waca; kop ma angolo tye atir, pien pe ayenyo yo me tiyo gin ma iya mito pira kena, ento ma ngat ma ceng oora mito. 31Ka abolo lok me caden ikoma kena, ci lok ma abolo pe bedo me ada. 32Tye ngat mukene ma en aye cadena, angeyo ni lok me caden ma en bolo ikoma obedo lok me ada. 333 Wun ceng wucwalo kwena bot Jon, ci en oboliwu lok me ada me caden. 34Pe mite ni kong omyero abed tye ki dano ma gibolo lok me caden ikoma; ento awaciwu lok magi wek wulare. 35Jon yam obedo calo tara ma kicwinyo, ma lyel, dok onongo wumito bedo ki yomcwiny pi kare manok i dero mace. 36Ento atye ki lok me caden ma pire dit makato pa Jon; pien tic ma Won omiya me acoba, aye magi kikome ma atye katiyogi, dok gin aye gubedo caden ikoma ni Won aye oora. 374 Dok Won ma ceng oora en kikome obedo cadena. Wun yam pe wuwinyo dwone, pe wuneno wa calle; 38dok pe wubedo ki loke i iwu, pien pe wuye ngat ma en ooro. 39Wuyenyo i ginacoya, pien wutamo ni i gin wutye ki kwo ma pe tum, kun gin aye caden ma tito lok ikoma. 40Ento wukwero bino bota, wek wulim kwo. 41An pe alimo deyo ki bot dano, 42ento angeyo ni pe wutye ki mar pa Lubanga i iwu. 43An abino inying Wora, ento wun pe wujola; ka ngat mukene obino inyinge kene, wun wubijole. 44Wun wumito ni wulim pak ki bot luwotwu, ento pe wuteme me limo pak ma a ki bot Lubanga ma en acel keken; ci wutwero ye loka ningning kono? 45Pe wutam ni abidotowu bot Won; ngat ma dotowu en aye Moses, ma wun wugeno. 46Ka kono onongo wuye Moses, kono onongo wuye an bene; pien en ocoyo lok ikoma. 47Ento ka pe wuye lok ma en ocoyo, ci wubiye ningning lok ma an atitiwu?”