Jon 4

Yecu ki dako me Camaria

1Luparicayo guwinyo ni Yecu tye ka loko dano mapol kun kibatijagi me doko lupwonyene, makato pa Jon. 2Ento Yecu kikome aye pe obatija dano, ento lupwonyene aye gubatijagi. 3Ci ka Yecu owinyo lok man, ci oa ki i lobo Judaya, odok i Galilaya; 4kun ngolo ki i Camaria. 51 Ka oo Camaria, ci ocito i taun mo ma nyinge Cukar, ma onongo cok ki poto ma Yakobo yam omiyo bot wode Yucepu. 6Wang it pa Yakobo onongo tye kunu; ikare ma Yecu ool ki wot, ci obedo piny inget wang it. Onongo dong tye kakine cawa abicel.

7Dako mo me Camaria obino katwomo pii. Ci Yecu owace ni, “Kong imiya pii amati.” 8Ento lupwonyene onongo gucito i taun kawilo cam. 9Ci dako Lacamaria ogamoni, “In Lajudaya ipenya pii ningning, ma kun an a dako me Camaria?” Pien Lujudaya pe giribo kikopo ki atabu ki Lacamaria. 10Yecu odok iye bot dakonu ni, “Kono yam ingeyo mot ma Lubanga miyo, dok ka kono iniang ikom ngat ma kwayi pii amatani, kono ikwayo en, kono omiyo ki in pii me kwo.” 11Ci dakonu odoke iye ni, “Ladit, in pe itye ki gitwomo pii, wang it bene tut. Ibinongo pii meno mamiyo kwo ki kwene? 12Kwarowa Yakobo yam omiyowa wang it man, ma omato piine, en ki lutinone ki lwak lime. In itamoni idit ikato kwarowa Yakobo ce?” 13Ci Yecu odoke iye ni, “Dano ducu ma mato pii man, orwo dok bineke aye; 14ento dano ma bimato pii ma an abimiye, orwo pe bineke nino ducu. Pii ma an abimiye, bidoko wang it ma gunye i iye nio wa i kwo ma pe tum.” 15Ci dakonu okwaye ni, “Ladit, miya pii meno wek orwo pe dok oneka, wek pe dok abed kabino wa kany katwomo pii.”

16Ci Yecu owace ni, “Cit ilwong cwari, ci idwog kany.” 17Dako meno odoke iye ni, “An cwara pe.” Ci Yecu owaco ki dakonu ni, “Iwaco kakare ni cwari pe. 18Yam ibedo ki co abic, man ma kombedi itye kwedeni bene pe cwari. Man iwaco giri kakare.” 19Ci dakonu owace ni, “Ladit, anenoni in giri lanebi. 20Kwariwa yam giworo Lubanga iwi got man, ento wun wuwaco ni kabedo ma myero kiwor iye Lubanga tye i Jerucalem.” 21Ci Yecu ogamo dog dakonu ni, “Dako, ye loka; kare bibino ma pe wubiworo Won iwi got man, kadi i Jerucalem. 22Wun wuworo gin ma pe wungeyo, wan waworo gin ma wangeyo, pien lare oa ki bot Lujudaya. 23Ento kare bibino, dok bene dong oo, ma jo ma woro Lubanga i ada gibiworo Won i cwiny ki ada, pien Won yenyo jo macalo meno me wore. 24Lubanga en cwiny, jo ma wore myero guwore i cwiny ki ada.” 25Dakonu owace ni, “Angeyo ni Meciya bibino” en ma kilwongo Kricito ma Lubanga oyero. “En bibino, ci bititiwa lok ducu.” 26Yecu odoke iye ni, “An a en ma loko kwedini.”

27Cutcut lupwonyene gubino. Ci guuru pien gunongo en tye kalok ki dako, ento pe tye ngat mo ikin gi ma owaco ki dakonu ni, “Imito gin ango?” Nyo me penyo Yecu ni, “Pingo iloko kwede?” 28Ci dakonu oweko agulu piine, odok cen i taun, ci owaco bot dano ni, 29“Wubin, wunen laco moni ma otita gin ducu mayam atiyo. Man mono pe en aye Kricito ma Lubanga oyero?” 30Ci dano gua ki i taun, gucito bot Yecu.

31I kinenu lupwonyene gubako doggi bote kun giwaco ni, “Lapwony, kong icam ba.” 32Ento en owaco ki gin ni, “Atye ki cam ma acamo ma wun pe wungeyo.” 33Omiyo lupwonyene gupenye keken gi ni, “Ngati mo okele cam ce?” 34Ci Yecu owaco botgi ni, “Cama en aye tiyo gin ma ngat ma oora mito, ki cobo tice. 35Wun Lujudaya wutye ki lok ma wuwaco ni, ‘Dong odong dwe angwen keken me cako kac.’ Ento atitiwu ni, wuloke wunen poto maber; wek wunen kit ma cam dong ocek kwede me akaya. 36Ngat ma kayo kac dong kitye kacule mucarane, ci en guru nyig cam pi kwo ma pe tum, wek laco kodi ki lakayone igi obed yom kacel. 37Pien carolok man tye kakare ni, ‘Laco kodi pat, ki lakac bene pat.’ 38Ceng aorowu ka kayo kac i poto mayam pe wucane ka coyo iye kodi; jo mukene gucane iye, ento wun aye wunongo magoba i canegi.”

39Lucamaria mapol ma i taun meno guye Yecu pi lok pa dakonu, pien en onongo owaco ki gin ni, “Laco man otita gin ducu mayam an atiyo.” 40Ci Lucamaria gubino bote, gukwaye ni kong myero obed kwedgi; ci en orii kunu pi nino aryo. 41Jo mukene mapol guye en pi loke. 42Ci guwaco bot dakonu ni, “Kombedi pe waye pi loki ma itito botwani keken, ento pien dong wawinyo giwa ki itwa, dok watyeko niang ni, adada laco man en aye Lalar me lobo.”

Yecu ocango latin pa ladit

43Lacen ma nino aryo meno okato, Yecu ocito i Galilaya. 442 Pien Yecu kikome onongo otito ni, “Pe tye lanebi mo ma kiworo i lobo tugi.” 453 Ka Yecu obino i Galilaya, ci Lugalilaya gujole, pien guneno gin ducu ma en otiyo i Jerucalem ikare me karama, pien gin bene ceng gucito kakwero Karama me Kato. 464

Ci Yecu dok odok cen i Kana me Galilaya kama yam en oloko iye pii odoko kongo bwino. Yam onongo tye latic mo madit i kal pa rwot ma kom wode lit i Kapernaum. 47Ka owinyo ni Yecu oa i Judaya, obino i Galilaya, ci ocito obako doge bote ni obin ocang wode, pien onongo dong cok to. 48Yecu odoke iye ni, “Wun pe wubiye loka kadi matidi mo ka pe wuneno lanyut ki tango.” 49Latic madit owace ni, “Ladit, bin ma peya latina oto.” 50Ci Yecu owace ni, “Cit giri, wodi bikwo.” Dano meno oye lok ma Yecu owace, ci ocito. 51Ka pud tye i yo, ci orwate ki lutice. Ci guwace ni, “Latini dong kome okee woko.” 52Ci en openyogi cawa mene ma twone ocako dok cen iye, ci gin gugamo ni, “Laworo cawa abiro aye lyeto oa ki ikome.” 53Ci wone oniang ni meno aye cawa ma Yecu owace iye ni, “Wodi bikwo.” Omiyo en ki jo ma i ode ducu guye. 54Man obedo lanyut me aryo ma Yecu otiyo ikare ma oa ki i Judaya, ci ocito i Galilaya.