Jon 2

Nyom i Kana me Galilaya

1Inino me adeke nyom mo obedo i Kana, i taun me Galilaya. Min Yecu onongo tye kunu, 2Yecu ki lupwonyene bene kilwongogi i nyom meno. 3Ka kongo bwino otum, min Yecu owaco ki Yecu ni, “Kongo bwinogi dong otum woko.” 4Ci Yecu odoke iye ni, “Mego, in aye ma pe iwaca gin ma omyero atii. Cawana pud peya oromo.” 5Ci mine ociko lutic ni, “Wutim gin ducu ma en biwaciwu.” 6I gang nyom kunu onongo tye dak pii me got abicel ma kicibo pi kit yo me lwok me lonye pa Lujudaya. Dak acel acel onongo gwoko pii maromo lita miya acel. 7Yecu owacigi ni, “Wuony pii i dak.” Ci guonyo opong woko libyeny. 8Ci Yecu dok wacigi ni, “Dong wutwom, wuter bot ladit me nyom.” Ci gutero pii meno. 9Ka ladit me nyom obilo pii madong oloke odoko bwino, ci pe ongeyo kama oa iye (ento lutic ma gutwomo pii keken aye onongo gingeyo). Piman ladit me nyom olwongo lanyom, 10ci owace ni, “Dano ducu kong kwongo miyo ki lwak bwino mamit; ka dong dano gumato oromogi, ka lacen kikelo ma pe mit tutwale. Ento in ikano mere bwino mamit nio wa kombedi.” 11Yecu otiyo Lanyut meno mukwongo i Kana matye i Galilaya, kun nyutu kwede deyone; ci lupwonyene guye en. 121

Lacen inge nino manok, Yecu ocito i Kapernaum kacel ki mine ki omegine ki lupwonyene; gurii kunu pi nino manok.

Yecu ocito i Ot pa Lubanga

132

Karama me Kato pa Lujudaya onongo dong tye cok, omiyo Yecu ocito i Jerucalem. 14I Ot pa Lubanga onongo tye iye jo ma cato dyangi ki romi ki amam, ki lulok cente ma gubedo piny. 15Yecu okedo anino ogwil matino, ci oryemogi ducu woko ki i Ot pa Lubanga, kacel ki romi ki twoni. Oketo lim pa lulok cente, kun coro mejagi ryebe piny. 16Ci ociko lucat amam ni, “Teru jami magi woko, pe wulok Ot pa Wora odok cuk.” 173 Ci lupwonyene gupo lok mayam kicoyo ni, “Arima pi odi lyel icwinya calo mac.” 18Piman Lujudaya gupenye ni, “Lanyut ango ma ibinyutu ki wan wek wange kit twero ango ma itye kwede me tiyo jami magi?” 194 Yecu ogamo doggi ni, “Wumuk Ot pa Lubanga man woko, ci abigerone odoco inino adek.” 20Ci lujudaya guwace ni, “Ot pa Lubanga man kigero pi mwaka pyere angwen wiye abicel kulu. In ibigerone inino adek keken?” 21Ento en onongo loko pi kome ma Ot pa Lubangani. 22Ci madong kicere ki ikin jo ma oto, lupwonyene gupo ni yam owaco lok man; ci guye ginacoya ki lok mayam Yecu oloko.

Yecu ngeyo kit kwo pa dano ducu

23Ka onongo Yecu tye i Jerucalem inino madit me Karama me Kato, jo mapol guketo niyegi ikom nyinge pien guneno lanyut ma en obedo katiyogi. 24Ento Yecu kikome pe obedo ki gen ikomgi, 25pien en ngeyo jo ducu, pe omito ni ngat mo otit lok ikom dano mo bote, pien en kikome ngeyo gin matye i cwiny dano.