ହରାସେନ୍ପୁଥି
Exodus
Introduction from this edition
ମୁଶା ନାବୀଙ୍କ ଲିଖିତ ଯାତ୍ରା ପୁସ୍ତକ
ମୁଶା ନାବୀ ଅଲାକାଦ୍ ହରାସେନ୍ରେୟାଃ ପୁଥି
ପାରିଚାଏ
ମୁଶା ନାବୀରାଃ ହରାସେନ୍ ପୁଥି ଆବ୍ରାହାମ୍ଆଃ ପାରିବାର୍କଆଃ ବାଖ୍ରିରେୟାଃ ଇତିହାସ୍କେ ଅଲ୍ ଆଉଃତାନା, ଅକ୍ନାଃଚି ଏନେଟେଦ୍ ପୁଥିଏତେ ସୁରୁକାନ୍ ତାଇକେନା। ହରାସେନ୍ରାଃ ମୁଣ୍ଡି ହବାଅଃତାନା, “ଅଡଙ୍ଗ୍ଅଃ” ନେଆଁ ଇସ୍ରାଏଲ୍ ଦିଶୁମ୍ଏତେ ମିସାର୍ ଦିଶୁମ୍ତେ ସେନଃ ନାଙ୍ଗ୍ ଅଡଙ୍ଗ୍ତେୟାଃ ବୁଝାଅଃତାନା, ଅକ୍ନାଃଚି ପାର୍ମେଶ୍ୱାର୍ ଆବ୍ରାହାମ୍କେ ବାନାର୍ସା ଏମାକାଇ ତାଇକେନାଏ। ରିତିରିୱାଜ୍ ଲେକାତେ ପାଣ୍ଡିତ୍କ ବିଶ୍ୱାସ୍ ରିକାଃକ ଯେ, ହରାସେନ୍ ପୁଥିକଏତେ ଚିମିନ୍ତେୟାଃ ମୁଶା ନାବୀଆଃ ହରାତେ ଅଲାକାନା ମେନ୍ତେ ନେ ପୁଥିରେଗି ସାରି ଦାଡ଼ିୟଃତାନା। ହରାସେନ୍ ପୁଥି ୨୪:୪ ରେ କାଜିୟାଃ ଯେ, ମୁଶା ଚିଲ୍କା ପୁଥିରାଃ ଚିମିନ୍ ହିସାକ ଅଲାକାଦାଏ। ଯିହୋଶୁୟ ୮:୩୧ ରେ ଅଲାକାନ୍ତେୟାଃ ହରାସେନ୍ ପୁଥି ୨୦:୨୫ ରେ ଅଲାକାନ୍ ଆନ୍ଚୁକେ ଉଦୁବାଃଏ ଓଡ଼ୋଃ ନେଆଁ କାଜିକାନା ଯେ, ମୁଶା ନାବୀଆଃ ନିୟାମ୍ ପୁଥିକରେ ଅଲାକାନା। ନାୱା ନିୟାମ୍ରେ ମୁଶା ନାବୀଆଃ ହରାତେ ଅଲାକାନା ମେନ୍ତେ ପୁରାଃସାଃ କାଜିକାନା। ଚୁପାଦ୍ରେ ଜୁଲଃତାନ୍ ଘାଟ୍ନା ବିଷାଏରେ କାଜିୟାବୁ, ନେଆଁ ମୁଶା ନାବୀଆଃ ପୁଥିରେ ଅଲାକାନା, ମାର୍କ ୧୨:୨୬। ଇସ୍ରାଏଲ୍ ହଡ଼କ ମିସାର୍ ଦିଶୁମ୍ଏତେ ଅଡଙ୍ଗ୍ଅଃତେୟାଃ ଲାଗ୍ଭାଗ୍ ୟୀଶୁଆଃ ଜାନାମ୍ ସିଦାରେ ୧୩୦୦ ଚାଏ ୧୪୦୦ ବାରାଷ୍ କରେ ହବାକାନ୍ ତାଇକେନା, ୧ ରାଜା ୬:୧ ରେ କାଜିକାନା ଯେ, ସୁଲିମାନ୍, ଇସ୍ରାଏଲ୍ ହଡ଼କଆଃ ରାଜା ହବାଅଃରାଃ ଉପୁନିୟା ବାରାଷ୍ରାଃ ୪୮୦ ବାରାଷ୍ ସିଦାରେ ନେ ହରାସେନ୍ ଘାଟ୍ନା ହବାକାନ୍ ତାଇକେନା।
ଆବ୍ରାହାମ୍, ଇସାକ୍, ଓଡ଼ୋଃ ଯାକୁବ୍କେ ପାର୍ମେଶ୍ୱାର୍ ଚିଲ୍କା ବାନାର୍ସା ଏମାକାଦ୍କ ତାଇକେନାଏ, ଏନା ନେ ହରାସେନ୍ ପୁଥିରେ ଉଦୁବାକାନା। ନେଆଁ ଆବ୍ରାହାମ୍ଆଃ କିଲି, ଇସ୍ରାଏଲ୍ ଜାତିକେ ମିସାର୍ ଦିଶୁମ୍ଏତେ ପାର୍ମେଶ୍ୱାର୍ଆଃ ପୁରାଃ ପେଡ଼େଃତେ ବାଞ୍ଚାଅ ଆଉକାଦ୍କଆ ଏନ୍ ବିଷାଏରେ କାଜିୟାଃ, ହରାସେନ୍ ପୁଥି ୧ ଆଧ୍ୟାୟ ହେତେ ୧୨ ଆଧ୍ୟାୟ ଜାକେଦ୍। ଏନ୍ତାଃଏତେ ପାର୍ମେଶ୍ୱାର୍ ଆୟାଃ ହଡ଼କକେ ସିନାଇ ବୁରୁ ଲାତାର୍ତେ ଇଦି ସେଟେର୍ କେଦ୍କଆ, ଏନ୍ତାଃରେ ଇନିଃ ଇସ୍ରାଏଲ୍ ହଡ଼କ ମାନାତିଙ୍ଗ୍ ରିକା ନାଙ୍ଗ୍ ମୁଶାକେ ପୁରାଃ ନିୟାମ୍କ ଏମ୍କିୟାଏ, ହରାସେନ୍ ପୁଥି ୧୨ ଆଧ୍ୟାୟ ଏତେ ୧୯ ଆଧ୍ୟାୟ। ନେ ନିୟାମ୍କରେ ଇନ୍କୁକେ ଚିଲ୍କା କାମି ରିକା ଲାଗାତିୟାଁ, ଇନ୍କୁକେ ଚିଲ୍କା ଦାଣେଁ ଏମ୍ ଲାଗାତିୟାଁ ଓଡ଼ୋଃ କୁମ୍ବା ବାଇନାଙ୍ଗ୍ ଜିଲିଙ୍ଗ୍ ଚାକାର୍ ଉନୁଦୁବ୍ ଏମାଦ୍କଆଏ, କୁମ୍ବାରେ ସୁନୁସାର୍ ରିକାନାଙ୍ଗ୍ ଜାହାଜ୍ ଓଡ଼ୋଃ ଏଟାଃ ଏଟାଃ ଜିନିଷ୍କ ଏନ୍ତେ ଯାଜାକ୍କଆଃ ବିଶେଷ୍ ତୁସିଙ୍ଗ୍ ଲିଜାଃକ ବିଷାଏରେ ଉଦୁବ୍କାନା, ହରାସେନ୍ ପୁଥି ୨୦ ଆଧ୍ୟାୟ ହେତେ ୩୧ ଆଧ୍ୟାୟ। ଏନ୍ତେ ମିଆଦ୍ ବରୱାନ୍ ଲାଡ଼ାଇ ତାୟମ୍ତେ ଇସ୍ରାଏଲ୍ ହଡ଼କ ମିଆଦ୍ ଦାମୁର୍ରାଃ ମୁରୁତ୍ ବାଇକିୟାକ, ମୁଶା ନାବୀ ଆଡଃମିସା ପାର୍ମେଶ୍ୱାର୍ଲଃ ନେପେଲ୍ୟାନାଏ, ହରାସେନ୍ ପୁଥି ୩୨ ଆଧ୍ୟାୟ ଏତେ ୩୩ ଆଧ୍ୟାୟ। ପୁଥିରାଃ ଟୁଣ୍ଡୁ ହିସାରେ, ଆବୁ ପାଢ଼ାଅକାଦାବୁ ଯେ ସିଦାରେ ଉଦୁବାକାନ୍ ଜିନିଷ୍କ ଚିଲ୍କା ବାଇୟାକାନ୍ ତାଇକେନା, ହରାସେନ୍ ପୁଥି ୩୩ ଆଧ୍ୟାୟ ଏତେ ୪୦ ଆଧ୍ୟାୟ।
ପୁଥି ଭିତାର୍ରେ ତାଇକାନ୍ କାଜି
୧. ମିସାର୍ ଦିଶୁମ୍ରେ ଇସ୍ରାଏଲ୍ ହଡ଼କଆଃ ତନଲ୍ଦାସି । ୧:
୨. ମୁଶା ନାବୀଆଃ ପାରିଚାଏ ଓଡ଼ୋଃ ପାର୍ମେଶ୍ୱାର୍ଆଃ ହଡ଼କକେ ବାଞ୍ଚାଅକ ନାଙ୍ଗ୍ ମୁଶା ନାବୀକେ କେଡ଼ାଅଃ ଜାକେଦ୍ ଆୟାଃ ଜୀଦାନ୍ ବିଷାଏରେ ଅଲାକାନା । ୨-୪
୩. ପାର୍ମେଶ୍ୱାର୍ ଆପ୍ନାଃ ହଡ଼କକେ ମିସାର୍ ଦିଶୁମ୍ଏତେ ଓଡ଼ୋଃ ଫାରୋଆଃ ସିପାଇ କତାଃଏତେ ବାଞ୍ଚାଅକ ନାଙ୍ଗ୍ ଆୟାଃ ପେଡ଼େୟାନ୍ ଆକ୍ଦାନ୍ଦାଅ କାମି ଓଡ଼ୋଃ ସାଙ୍କାଟ୍ କୁଲ୍କେଦା । ୫:୧୫
୪. ଇସ୍ରାଏଲ୍ ହଡ଼କ ସିନାଇ ବୁରୁତେ ସେନ୍ହରା । ୧୫:୨୨-୧୯:
୫. ଇସ୍ରାଏଲ୍ ହଡ଼କଆଃ ବାଞ୍ଚାଅଃ ନାଙ୍ଗ୍ ଓଡ଼ୋଃ ପାର୍ମେଶ୍ୱାର୍କେ ସୁନୁସାର୍ ରିକାରେୟାଃ ଆନାଚୁ ପାର୍ମେଶ୍ୱାର୍ଆଃ ହରାତେ ମୁଶା ନାବୀକେ ନିୟାମ୍ ଏମ୍ୟାନା । ୨୦-୩୧
୬. ଇସ୍ରାଏଲ୍ ହଡ଼କ ମୁଶା ନାବୀଆଃ ହାଗା ହାରୁନ୍କେ ମିଆଦ୍ ସୋନାରେନ୍ ଦାମୁର୍ରାଃ ମୁରୁତ୍ ବାଇ ଇଚିକେଦ୍ତେ ଆୟାଃ ସୁନୁସାର୍ ରିକାକେଦ୍ତେ ପାର୍ମେଶ୍ୱାର୍ଆଃ ବିରୁଧ୍ରେ କାମି ରିକାକେଦାକ । ୩୨:
୭. ମୁଶା ପାର୍ମେଶ୍ୱାର୍ଆଃ ମାନାରାଙ୍ଗ୍ ନେଲ୍କେଦାଏ, ଇସ୍ରାଏଲ୍ ହଡ଼କକେ ପାର୍ମେଶ୍ୱାର୍ଆଃ ନିୟାମ୍ ବିଷାଏରେ ଓଡ଼ୋଃ କୁମ୍ବା, ନିୟାମ୍ ବାକ୍ସା, ସୁନୁସାର୍ ରିକା ନାଙ୍ଗ୍ ଏଟାଃ ଏଟାଃ ଲାଗାତିଙ୍ଗ୍ ବିଷାଏକ ଓଡ଼ୋଃ ଯାଜାକ୍ରାଃ ତୁସିଙ୍ଗ୍ ଲିଜାଃ ବିଷାଏରେ ଅଲାକାନା । ୩୩-୪୦
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.