Munda Bible
ହରାସେନ୍ପୁଥି 20
ଗେଲ୍ ଆନ୍ଚୁ
(ଉଦୁବ୍ରୁହାଡ଼୍ ୫:୧-୨୧)
ପାର୍ମେଶ୍ୱାର୍ ନେ ସବେନ୍ କାଜିକ କାଜିକେଦା, “ଅକଏ ଆପେକେ ମିସାର୍ ଦିଶୁମ୍ରାଃ ତନଲ୍ହେତେ ରାଡ଼ା ଆଉକାଦ୍ପେୟା ଇନିଃ, ଆଇଙ୍ଗ୍ ଏନ୍ ପ୍ରାଭୁ ଆପେୟାଃ ପାର୍ମେଶ୍ୱାର୍ ତାନିଙ୍ଗ୍।”
“ଆପେ ଆଇଙ୍ଗ୍କେ ବାଗିକେଦ୍ତେ ଓଡ଼ୋଃ ଏଟାଃ ମୁରୁତ୍କେ ପାର୍ମେଶ୍ୱାର୍ ମେନ୍ତେ ଆଲପେ ମାନାତିଙ୍ଗ୍ୟାଁଃ।
“ଆପେ ଆପ୍ନାଃ ନାଗେନ୍ତେ ଜେତାନ୍ ମୁରୁତ୍ ଆଲ୍ପେ ବାଇୟା, ସିର୍ମା ଚେତାନ୍ରେନ୍ ଚାଏ ଅତେ ଲାତାର୍ରେନ୍ ଚାଏ ଦାଆଃ ଭିତାର୍ରେନ୍ ତାଇନଃ ଲେକା ଜେତାଏୟାଃ ମୁରୁତ୍ ଆଲ୍ପେ ବାଇୟା। ଆପେ ଇନ୍କୁକେ ଅମ୍ବାକେଦ୍ତେ ଆଲ୍ପେ ଜହାର୍କଆ ଚାଏ ଆଲ୍ପେ ସେୱାକଆ। ଚିଆଃଚି ଆଇଙ୍ଗ୍ ଆପେୟାଃ ପୁରାଃ ମାଇନାନ୍ତେ ପେଡ଼େୟାନ୍ ବାଞ୍ଚାଅନିଃ ପ୍ରାଭୁ ପାର୍ମେଶ୍ୱାର୍ ତାନିଙ୍ଗ୍। ଅକଏ ଆଇଙ୍ଗ୍କେ ହିସିଙ୍ଗା ରିକାଃଏ, ଇନିଃକେ, ଆୟାଃ ହନ୍କକେ ଓଡ଼ୋଃ ଆୟାଃ ଆପି ଉପୁନ୍ ଜାଇହନ୍କ ଜାକେଦ୍ ଆପୁତେୟାଃ ଗୁହ୍ନାଁରେୟାଃ ସାଜାଇ କାମି ଏମଃନିଃ ତାନିଙ୍ଗ୍। ମେନ୍ଦ ଅକନ୍କ ଆଇଙ୍ଗ୍କେ ଦୁଲାଡ଼୍ ରିକାଃକ ଓଡ଼ୋଃ ଆଇଁୟାଃ ଆନ୍ଚୁ ମାନାତିଙ୍ଗ୍ ରିକାଃକ, ଇନ୍କୁଆଃ ହାଜାର୍ ପିଢ଼ି ଜାକେଦ୍ ଆଇଙ୍ଗ୍ ଦାୟା ରିକାନିଃ ତାନିଙ୍ଗ୍।
“ଆମ୍ ପ୍ରାଭୁ ପାର୍ମେଶ୍ୱାର୍ଆଃ ନୁତୁମ୍ ସାମା ସାମାରେ ଆଲମ୍ କାଜିଆ, ଜେତାଏ ପ୍ରାଭୁଆଃ ନୁତୁମ୍ ହସଡ଼୍କେଦ୍ତେ କାଜିୟା, ଇନିଃକେ ଗୁହ୍ନାଁ କା ରିକା ମେନ୍ତେ କା କାଜିଅଃଆ।
“ରୁଡ଼ୁନ୍ ହୁଲାଙ୍ଗ୍କେ ପାବିତାର୍ ମେନ୍ତେ ମାନାତିଙ୍ଗ୍ ନାଙ୍ଗ୍ ଆଲମ୍ ରିଡ଼ିଙ୍ଗ୍ୟେଁଆ। ତୁରିୟା ହୁଲାଙ୍ଗ୍ ଜାକେଦ୍ ନାଲା କାମିକେଦ୍ତେ ଆମାଃ ସବେନ୍ ସୁନୁସାର୍ କାମି ରିକାଏମେ। ମେନ୍ଦ ଏୟା ହୁଲାଙ୍ଗ୍ ପ୍ରାଭୁ ପାର୍ମେଶ୍ୱାର୍ଆଃ ରୁଡ଼ୁନ୍ ହୁଲାଙ୍ଗ୍ ତାନାଃ। ଏନାମେନ୍ତେ ଆମ୍, ଆମାଃ କଡ଼ାହନ୍, କୁଡ଼ିହନ୍, ଦାସି, କାମ୍ଡ଼ି, ଆମାଃ ଜାଁତୁ ଓଡ଼ୋଃ ଆପେୟାଃ ନାଗାର୍ ହେପାଦ୍ରେ ତାଇନଃତାନ୍ ଏଟାଃ ଦିଶୁମ୍ରେନ୍ ହଡ଼କ ଜେତାନ୍ କାମି ଆଲକାକ ରିକାଏକା। ଚିଆଃଚି ପ୍ରାଭୁ ସିର୍ମା, ଅତେ, ଦରେୟା ଓଡ଼ୋଃ ଏନାରେ ତାଇନଃ ସବେନାଃ ତୁରିୟା ହୁଲାଙ୍ଗ୍ରେ ବାଇକେଦା ଓଡ଼ୋଃ ଏୟା ହୁଲାଙ୍ଗ୍ ରୁଡ଼ୁୟାନାଏ। ଏନାମେନ୍ତେ ପ୍ରାଭୁ ରୁଡ଼ୁନ୍ ହୁଲାଙ୍ଗ୍କେ ଆଶିଷ୍ ଏମ୍କେଦ୍ତେ ପାବିତାର୍କେଦାଏ।
“ଆପେ ଆପେୟାଃ ଏଙ୍ଗା ଓଡ଼ୋଃ ଆପୁକିନ୍କେ ମାଇନ୍କିନ୍ପେ। ଏନ୍ତେ ପ୍ରାଭୁ ଆପେୟାଃ ପାର୍ମେଶ୍ୱାର୍ ଆପେକେ ଅକନ୍ ଦିଶୁମ୍ ଏମାପେୟାଏ, ଏନ୍ ଦିଶୁମ୍ରେ ଆପେ ପୁରାଃ ସିର୍ମା ତାଇନାଃପେ।
“ଆପେ ହଡ଼ ଆଲପେ ଗଏଃକଆ।
“ଆପେ ଆଲପେ ଆପାଙ୍ଗିରାଃ।
“ଆପେ କୁମ୍ବୁଡ଼ୁ କାମି ଆଲପେ ରିକାଃ।
“ଆପେ ଆପେୟାଃ ହପର୍ଜାପାଃରେନ୍କଆଃ ବିରୁଧ୍ରେ ବେଦା ଗାୱା ଆଲପେ ଏମାଃ।
“ଆପେ ଆପେୟାଃ ହପର୍ଜାପାଃରେନ୍ ଅଡ଼ାଃକେ ଆଲପେ ହାୟାଅଃଆ। ଆପେ ଆପେୟାଃ ହପର୍ଜାପାଃରେନ୍ କୁଡ଼ିକକେ ଆୟାଃ ଦାସି, କାମ୍ଡ଼ି ଚାଏ ଆୟାଃ ଉରିକ୍ ଚାଏ ଗାଧା ଚାଏ ଇନିୟାଃ ଜେତ୍ନାଃ ଆଲପେ ହାୟାଅଃଆ।”
ହଡ଼କଆଃ ବର
(ଉଦୁବ୍ରୁହାଡ଼୍ ୫:୨୨-୩୩ )
ସବେନ୍ ହଡ଼କ ରିମିଲ୍ ସାଡ଼ି ଓଡ଼ୋଃ ହିଚିର୍ ଓଡ଼ୋଃ ବିଙ୍ଗୁଲ୍ ସାଡ଼ି ଓଡ଼ୋଃ ବୁରୁରେ ସୁକୁଲ୍ ନେଲ୍କେଦା ଇମ୍ତାଙ୍ଗ୍ ହଡ଼କ ବରତେ ଏକ୍ଲାଅକେଦ୍ତେ ସାଙ୍ଗିନ୍ରେ ତିଙ୍ଗୁୟାନା। ଓଡ଼ୋଃ ହଡ଼କ ମୁଶାକେ କାଜିକିୟାକ, ଆମ୍ ଆଲେଲଃ ଜାଗାର୍ ରିକାଏମେ, ଆଲେ ଏନା ଆୟୁମେୟାଲେ, ମେନ୍ଦ ପାର୍ମେଶ୍ୱାର୍ ଆଲେଲଃ ଆଲକାଏ ଜାଗାରେକା, କା'ରେଦ ଆଲେ ଗଜଃଆଲେ।
ମୁଶା ହଡ଼କକେ କାଜିକେଦ୍କଆ, “ଆଲପେ ବରୟା, ଚିଆଃଚି ପାର୍ମେଶ୍ୱାର୍ ଆପେକେ ବିଡ଼ାଅ ନାଗେନ୍ତେ ଓଡ଼ୋଃ ଆପେ ପାପ୍ ଚିଲ୍କା କାପେ ରିକାୟା ଏନାମେନ୍ତେ ପାର୍ମେଶ୍ୱାର୍ ଆୟାଃ ବର ଆପେକେ ଉଦୁବାପେତାନା।” ଏନାମେନ୍ତେ ହଡ଼କ ଏନ୍ ବୁରୁ ହେତେ ସାଙ୍ଗିନ୍ରେ ତିଙ୍ଗୁୟାନା, ମେନ୍ଦ ପାର୍ମେଶ୍ୱାର୍ ଅକ ଠାୟାଦ୍ରେ ତାଇନ୍କେନା, ମୁଶା ପାର୍ମେଶ୍ୱାର୍କେ ନେପେଲ୍ ନାଗେନ୍ତେ ଏନ୍ ସୁକୁଲ୍ ରେୟା ନୁବାଃରେ ପେରେୟାକାନ୍ ବୁରୁତେ ସେନ୍ୟାନା।
ଦାଣେଁ ବେଦିରାଃ ନିୟାମ୍
ପ୍ରାଭୁ ମୁଶାକେ କାଜିକିୟା, “ଆମ୍ ଇସ୍ରାଏଲ୍କକେ କାଜିକମେ ଯେ, ଆଇଙ୍ଗ୍ ସିର୍ମାରେ ତାଇନ୍କେଦ୍ତେ ଆପେଲଃ ଜାଗାର୍କେଦା, ଏନା ଆପେ ନେଲାକାଦାପେ।” ଆପେ ଆଇଁୟାଃଲଃ ମିଦ୍ସାମାନ୍ଗି ଜକା ନାଗେନ୍ତେ ଜେତାନ୍ ମାହାପୁରୁ ଆଲପେ ବାଇୟାଃ, ଆପେ ରୁପା ଚାଏ ସୋନା ରେନ୍ ମାହାପୁରୁ ଆଲପେ ବାଇୟାଃ। ଆପେ ଆଇଁୟାଃ ନାଗେନ୍ତେ ହାସାରାଃ ମିଆଁଦ୍ ବେଦି ବାଇୟେପେ ଓଡ଼ୋଃ ଏନାରେ ଆପେୟାଃ ଗୋଟ୍ରେନ୍ ଜାଁତୁକଆଃ ଉରୁବ୍ଦାଣେଁ ଓଡ଼ୋଃ ମେନେସାରେୟାଃ ଦାନ୍ ରାକାବେପେ। ଆଇଙ୍ଗ୍ ଅକ ଅକ ଠାୟାଦ୍ରେ ଆଇଁୟାଃ ନୁତୁମ୍କେ ମାଇନାନ୍ ରିକାଏୟାଇଙ୍ଗ୍, ଏନ୍ ସବେନ୍ ଠାୟାଦ୍ରେ ଆଇଙ୍ଗ୍ ଆପେତାଃ ହିଜୁଃକେଦ୍ତେ ଆଶିଷ୍ ଏମାପେୟାଇଙ୍ଗ୍ ଓଡ଼ୋଃ ଆପେ ଆଇଙ୍ଗ୍ ନାଙ୍ଗ୍ ଦିରିରେୟାଃ ବେଦି ବାଇୟେ ରେଦପେ, ଏନ୍ ଦିରି ଖଦାକେଦ୍ତେ ଆଲପେ ବାଇୟା। ଚିଆଃଚି ଦିରିକେ ଛେନିଲଃ ହାଦ୍ ହରାତେ, ଏନା ସତ୍ରା ହବାକେନଃଆ। ଓଡ଼ୋଃ ଆପେ ଆଇଁୟାଃ ବେଦି ଚେତାନ୍ତେ ସିଢ଼ିରେ ଆଲପେ ହିଜୁଃଆ, ଚିୟାଃଚି ନେ'ଲେକା ଆଲକା ହବାଅଃକା ଯେ, ଆପେୟାଃ ସାମା ହଡ଼୍ମରେୟାଃ ଉମ୍ବୁଲ୍ ଏନ୍ ବେଦିରେ ଉୟୁଗଃଆ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.