Munda Bible
ହରାସେନ୍ପୁଥି 19
ସିନାଇ ବୁରୁ ହେପାଦ୍ରେ ଇସ୍ରାଏଲ୍ ହଡ଼କ
ଇସ୍ରାଏଲ୍ ହଡ଼କ ମିସାର୍ ଦିଶୁମ୍ହେତେ ଅଡଙ୍ଗ୍ୟାନ୍ଲଃ ଆପି ମାହିନାରାଃ ସିଦା ହୁଲାଙ୍ଗ୍ରେ ଇନ୍କୁ ସିନାଇ ବୁରୁରେ ସେଟେର୍ୟାନାକ। ଇସ୍ରାଏଲ୍ ହଡ଼କ ରଫିଦିମ୍ଏତେ ଅଡଙ୍ଗ୍ୟାନ୍ଲଃ ସିନାଇ ବିର୍ତାଃ ସେଟେର୍ୟାନ୍ଚି ଇନ୍କୁ ସିନାଇ ବୁରୁ ଲାତାର୍ରେ କୁମ୍ବା ବାଇକେଦାକ। ଏନ୍ତେ ପାର୍ମେଶ୍ୱାର୍ଆଃ ବୁରୁତେ ରାକାବ୍ୟାନ୍ଚି ପ୍ରାଭୁଆଃ ହେପାଦ୍ତେ ସେନ୍ୟାନା।
ଏନ୍ତାଃରେ ପ୍ରାଭୁ ମୁଶାକେ କେଡ଼ାକେଦ୍ତେ କାଜିକିୟା, ଯାକୁବ୍ଆଃ କୁଟୁମ୍କକେ ଓଡ଼ୋଃ ଇସ୍ରାଏଲ୍କକେ ଆଇଁୟାଃ ନେ ବାଚାନ୍ କାଜିୟାକମେ। “ଆପେ ନେଲାକାଦାପେ ଆଇଙ୍ଗ୍ ମିସାର୍ରେନ୍କକେ ଚିନାଃଇଙ୍ଗ୍ ରିକାକେଦ୍କଆ ଓଡ଼ୋଃ ଆପେକେ ମିସାର୍ ହେତେ ବାଜ୍ ଅଡ଼େରାଃ ଆପ୍ରବ୍ରେ ଆଇଙ୍ଗ୍ତାଃ ଆଉଲେଦ୍ପେଆ। ଏନାମେନ୍ତେ ଆଇଁୟାଃ ଆନ୍ଚୁ ଆୟୁମ୍ ଓଡ଼ୋଃ ରାଜିନାମା ସବେନାଃ ମାନାତିଙ୍ଗ୍ରେଦ ଆପେ ସବେନ୍ ହଡ଼କଆଃଏତେ ଆଇଁୟାଃ ହଡ଼ପେ ହବାଅଃଆପେ ଚିଆଃଚି ଗଟା ଦିଶୁମ୍ ଆଇଁୟାଃ ତାନା। ଆପେ ଆଇଙ୍ଗ୍ ନାଗେନ୍ତେ ଯାଜାକ୍ କଆଃ ରାଇଜ୍ ଓଡ଼ୋଃ ପାବିତାର୍ ହଡ଼କ ହବାଅଃଆ।” ନେ ସବେନାଃ କାଜି ଆମ୍ ଇସ୍ରାଏଲ୍କକେ କାଜିୟାକମେ। ଏନ୍ତେ ମୁଶା ସବେନ୍ ପ୍ରାଚିନ୍କକେ କେଡ଼ା କେଦ୍ତେ ହୁଣ୍ଡିକେଦ୍କଆ ଓଡ଼ୋଃ ପ୍ରାଭୁ କାଜିୟାକାଦ୍ ସବେନ୍ ହୁକୁମ୍ ଇନ୍କୁକେ କାଜିକେଦ୍କଆ। ଇନ୍କୁ ମିସାତେ କାଉରିତାନ୍ଲଃ କାଜିକେଦା, “ଆଲେ ପ୍ରାଭୁଆଃ ସବେନ୍ ହୁକୁମ୍କ ମାନାତିୟାଁଃଲେ।” ମୁଶା ଇନ୍କୁଆ ନେ କାଜି ପ୍ରାଭୁକେ ସେନ୍ କେଦ୍ତେ କାଜିକିୟା।
ଓଡ଼ୋଃ ପ୍ରାଭୁ ମୁଶାକେ କାଜିକିୟା, “ଆଇଙ୍ଗ୍ ଆମାଃ ହେପାଦ୍ତେ ନୁବାଃ ରିମିଲ୍ରେ ହିଜୁଆଃ। ଚିମ୍ତାଙ୍ଗ୍ ଆଇଙ୍ଗ୍ ଆମାଃଲଃ ଜାଗାରେୟା ଇମ୍ତାଙ୍ଗ୍ ସବେନ୍କ ଆୟୁମ୍ କେଦ୍ତେ ହଡ଼କ ଆମାଃ ଚେତାନ୍ରେ ବିଶ୍ୱାସେୟା।”
ଏନ୍ତେ ମୁଶା ହଡ଼କଆ ସବେନ୍ କାଜି ପାର୍ମେଶ୍ୱାର୍କେ କାଜିକିୟା। ଏନ୍ତେ ପ୍ରାଭୁ ମୁଶାକେ କାଜିକିୟା, “ହଡ଼କଆ ହେପାଦ୍ତେ ସେନ୍ କେଦ୍ତେ ତିସିଙ୍ଗ୍ ଓଡ଼ୋଃ ଗାପା ଇନ୍କୁକେ ପାବିତାର୍କମେ। ଇନ୍କୁ ଆକଆଃ ଲିଜାଃ ସବେନାଃ ଫାର୍ଚି ରିକାଏକା। ଓଡ଼ୋଃ ଆପି ହୁଲାଙ୍ଗ୍ ଜାକେଦ୍ ଇନ୍କୁ ସେକାଡ଼ଃକାକ ଚିଆଃଚି ନେ ହୁଲାଙ୍ଗ୍ ପ୍ରାଭୁ ସିନାଇ ବୁରୁରେ ଆଡ଼୍ଗୁନାଏ ଓଡ଼ୋଃ ଇନ୍କୁ ପ୍ରାଭୁକେ ନେଲ୍ ଦାଡ଼ିୟାକ। ଓଡ଼ୋଃ ଆମ୍ ସିମ୍ନା ବାଇକେଦ୍ତେ ହଡ଼କକେ କାଜିକମେ, ଜେତାଏ ନେ ସିମ୍ନାକେ ଆଲକାଏ ଜୁଟିଦେ ଚାଏ ବୁରୁ ଚେତାନ୍ ଆଲକାଏ ରାକାବ୍କା। ଜେତାଏ ଏନ୍ ବୁରୁକେ ଜୁଟିଦ୍ତାରେ, ଇନିଃକେ ଦିରିତେ ଚିଦ୍ଗି ଗଏଃ ଲାଗାତିୟାଁ। ଜେତାଏୟାଃ ତିଃଇ ଇନିଃକେ କାଏ ଜୁଟିଦିଆ, ମେନ୍ଦ ଇନିଃ ସାର୍ତିଗି ଦିରିଲଃ ଚିଦ୍ଗି ଗଜଃଆଏ ଚାଏ ଧାନୁ ଚିଆରିଲଃ ତୁଇଙ୍ଗ୍ ଗଜଃଆଏ। ଜାଁତୁ ହବାଅଃ ଚାଏ ମାନୱା, ଜେତାଏ କାକ ବାଞ୍ଚାଅଃଆ। ବିଙ୍ଗୁଲ୍ବାଜା ସାଡ଼ିୟଃ ଇମ୍ତା, ହଡ଼କ ବୁରୁ ଜାକେଦ୍ ବିରିଦ୍ ହିଜୁଃଆକ।”
ଏନ୍ତେ ମୁଶା ବୁରୁହେତେ ଆଡ଼୍ଗୁୟାନ୍ଲଃ ହଡ଼କକେ ପାବିତାର୍ ନାଙ୍ଗ୍ ହେପାଦ୍ତେ ସେନ୍ୟାନା ଓଡ଼ୋଃ ହଡ଼କ ଆକଆଃ ସବେନ୍ ଲିଜାଃ ନୁରାକେଦାକ। ଓଡ଼ୋଃ ମୁଶା ହଡ଼କକେ କାଜିକେଦ୍କଆ, “ଆପେ ଆପି ହୁଲାଙ୍ଗ୍ ଜାକେଦ୍ ସେକାଡ଼୍ ତାଇନ୍ପେ ଓଡ଼ୋଃ ଆପେୟାଃ କୁଡ଼ିକଲଃ ହଡ଼୍ମରାଃ ନାତା ଆଲପେ ଦହଏଆ।”
ଆପିଆ ହୁଲାଙ୍ଗ୍ରାଃ ସେତାଃରେ ମିଆଦ୍ ନୁବାଃ ରିମିଲ୍ ହିଜୁଃଲେନା ଓଡ଼ୋଃ ରିମିଲ୍ ସାଡ଼ିଲଃ ହିଚିର୍ ହୁମ୍ଆ କେଦ୍ତେ ଏନା ବୁରୁ ଚେତାନ୍ରେ ହାରୁବ୍ୟାନା ଓଡ଼ୋଃ ବିଙ୍ଗୁଲ୍ ସାଡ଼ି ପୁରାଃଗି ଆୟୁମ୍ୟାନା। ହଡ଼କ ବରତେ କୁମ୍ବାତେ ବଲୟାନା। ଏନ୍ତେ ମୁଶା ହଡ଼କକେ କୁମ୍ବା ହେତେ ଅଡଙ୍ଗ୍ କେଦ୍ତେ ପାର୍ମେଶ୍ୱାର୍ଲଃ ନେପେଲ୍ ନାଗେନ୍ତେ ଇନ୍କୁକେ ବୁରୁତେ ଇଦିକେଦ୍କଆ। ସିନାଇ ବୁରୁ ସୁକୁଲ୍ତେ ପେରେଃ ତାଇକେନା ଚିଲ୍କା ଚିମ୍ନି ହେତେ ସୁକୁଲ୍ ଅଡଙ୍ଗ୍ଅଃ ଲେକା ବୁରୁରେ ସୁକୁଲ୍ ଅଡଙ୍ଗ୍ ତାଇକେନା। ଚିଆଃଚି ପ୍ରାଭୁ ସେଙ୍ଗେଲ୍ ଗାଡ଼ିରେ ବୁରୁରେ ଆଡ଼୍ଗୁକାନ୍ ତାଇକେନା ଏନାମେନ୍ତେ ବୁରୁ ପୁରାଃଗି ହିଲାଅଃ ତାଇକେନା। ବିଙ୍ଗୁଲ୍ ସାଡ଼ି ପୁରାଃଗି ବାଢ଼ାଅ ଇଦିୟାନା ଓଡ଼ୋଃ ମୁଶା ପାର୍ମେଶ୍ୱାର୍କେ ଅକ୍ନାଃ କୁଲିତାଇକେନା ଏନା ପାର୍ମେଶ୍ୱାର୍ ରିମିଲ୍ ସାଡ଼ିଲେକାଏ କାଜିତାଇକେନା। ଏନ୍ତେ ପ୍ରାଭୁ ସିନାଇ ବୁରୁରେ ଆଡ଼୍ଗୁ କେଦ୍ତେ ମୁଶାକେ କେଡ଼ାକିଆଏ ଓଡ଼ୋଃ ମୁଶା ବୁରୁ ଚେତାନ୍ତେ ସେନ୍ୟାନା। ଓଡ଼ୋଃ ପ୍ରାଭୁ ମୁଶାକେ କାଜିକିୟା, “ଆମ୍ ଲାତାର୍ତେ ସେନ୍କେଦ୍ତେ ହଡ଼କକେ ଚେତାଅକମେ ଯେ ଇନ୍କୁ ଆଇଙ୍ଗ୍କେ ନେଲ୍ ନାଗେନ୍ତେ ଆଇଁୟାଃତାଃତେ ଆଲକାକ ହିଜୁଃକା। ମେନ୍ଦ ଇନ୍କୁ କାଜି କା ମାନାତିଙ୍ଗ୍ କେଦ୍ତେ ଆଇଁୟାଃତାଃ ହିଜୁଃଆ ତାବ୍ଦ ଜିଅନଃଆ।” ଅକନ୍ ଯାଜାକ୍କ ପ୍ରାଭୁଆଃ ହେପାଦ୍ତେ ହିଜୁଃତାନା, ଇନ୍କୁ ଆପାନ୍କେ ପାବିତାର୍ ହବାଅଃକାକ, କା'ରେଦ ଇନ୍କୁ ସାଜାଇକ ନାମେୟା।
ଏନ୍ତେ ମୁଶା ପ୍ରାଭୁକେ କାଜିକିୟା, “ଆମ୍ ଆଇଙ୍ଗ୍କେ ହୁକୁମ୍ ଏମ୍କେଦ୍ତେ କାଜିକାଇଙ୍ଗ୍ ତାଇକେନାମ୍ ଯେ, ବୁରୁରେ ସିମ୍ନା ବାଇକେଦ୍ତେ ଏନାକେ ପାବିତାର୍ ରିକାଏମେ ଏନାମେନ୍ତେ ହଡ଼କ ସିନାଇ ବୁରୁତେ ହିଜୁଃ କାକ ଦାଡ଼ିୟା।”
ପ୍ରାଭୁ ମୁଶାକେ କାଜିକିୟା, “ଆଡ଼୍ଗୁନ୍ମେ ଓଡ଼ୋଃ ହାରୁନ୍ଲଃ ବୁରୁ ଚେତାନ୍ତେ ହିଜୁଃବେନ୍ ମେନ୍ଦ ଯାଜାକ୍କ ଓଡ଼ୋଃ ହଡ଼କ ଆଇଁୟାଃ ହେପାଦ୍ତେ ସିମ୍ନା ପାରମ୍ କେଦ୍ତେ ଆଲକା ହିଜୁଃକା, କାରେଦ ଆଇଙ୍ଗ୍ ଇନ୍କୁକେ ସାଜାଇ ଏମାକଆ।” ଏନାମେନ୍ତେ ମୁଶା ବୁରୁ ହେତେ ଆଡ଼୍ଗୁ କେଦ୍ତେ ହଡ଼କଆ ହେପାଦ୍ ସେନ୍ୟାନା ଓଡ଼ୋଃ ନେ ସବେନ୍ କାଜି କାଜିକେଦ୍କଆ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.