Munda Bible
ହରାସେନ୍ପୁଥି 18
ଯିଥ୍ରୋଆଃ ମୁଶାତାଃ ସେନ୍ହରା
ପାର୍ମେଶ୍ୱାର୍ ମୁଶା ଓଡ଼ୋଃ ଇସ୍ରାଏଲ୍ ହଡ଼ ନାଗେନ୍ତେ ଅକ୍ନାଃ ରିକାକାଦାଏ ଓଡ଼ୋଃ ପ୍ରାଭୁ ଚିଲ୍କା ଇନ୍କୁକେ ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକାଦ୍କଆ, ନେ ସବେନ୍ ବିଷାଏ ମୁଶାରାଃ ହୟାଁର୍ତେ ଯିଥ୍ରୋ ଅକଏଚି ମିଦିୟନ୍ ହଡ଼କଆଃ ଯାଜାକ୍ ତାଇକେନାଏ, ଇନିଃ ଆୟୁମ୍କେଦାଏ। ଏନ୍ତେ ମୁଶାରାଃ ହୟାଁର୍ତେ ଯିଥ୍ରୋ ମୁଶାରାଃ କୁଡ଼ି ସିପୋରା, ଇନିଃକେ ସିଦାରେ ଏଙ୍ଗା ଅଡ଼ାଃତେ କୁଲାକାଇ ତାଇକେନାଏ, ଓଡ଼ୋଃ ମୁଶାରାଃ ବାରିଆ ହନ୍କଡ଼ା ହେତେ ମୁଶା ମିଆଦ୍ କଡ଼ା ହନ୍ଆଃ ନୁତୁମ୍ ଗେର୍ଶୋମ୍1 ଦହକେଦା, ଚିଆଃଚି “ଆଇଙ୍ଗ୍ ଏଟାଃ ଦିଶୁମ୍ରେନ୍ ତାଇନଃ ଲେକା ତାନିଙ୍ଗ୍।” ଓଡ଼ୋଃ ମିଆଦ୍ କଡ଼ା ହନ୍ଆଃ ନୁତୁମ୍ ଇଲିୟାଜାର୍2 ଦହକେଦା, ଚିଆଃଚି “ଆଇଁୟାଃ ଆପୁକଆଃ ପାର୍ମେଶ୍ୱାର୍ ଆଇଁୟାଃ ଦେଙ୍ଗାନିଃ, ଇନିଃ ଫାରୋଆଃ ତାରାଉଡ଼ି ହେତେ ବାଞ୍ଚାଅ ଲିୟାଁଏ।” ମୁଶାରାଃ କୁଡ଼ି ଓଡ଼ୋଃ ବାରାନ୍ ହନ୍କଡ଼ା କିନ୍କେ ଆୟାଃ ହୟାଁର୍ତେ ଯିଥ୍ରୋ ମୁଶାତାଃ ମିସାତେ ଇଦିକେଦ୍କଆ, ଅକତାଃରେ ମୁଶା ପାର୍ମେଶ୍ୱାର୍ଆଃ ବିର୍ରେ ଡେରା କାଦ୍ତାଇନା। ଯିଥ୍ରୋ ମୁଶାତାଃ କାଜିକୁଲ୍କେଦା, ଆଇଙ୍ଗ୍ ଆମାଃ ହୟାଁର୍ ଯିଥ୍ରୋ, ଆମାଃ କୁଡ଼ି ଓଡ଼ୋଃ ବାରାନ୍ ହନ୍କଡ଼ାକିନ୍ଲଃ ଆମାଃ ହେପାଦ୍ତେ ହିଜାକାନାଲେ। ଏନ୍ତେ ମୁଶା ଆୟାଃ ହୟାଁର୍ତେକେ ନେପେଲ୍ ନାଗେନ୍ତେ ବାହାରିତେ ଅଡଙ୍ଗ୍ୟାନା ଓଡ଼ୋଃ ଇନିଃକେ ଜହାର୍ ଓଡ଼ୋଃ ଚଅଃ'କିୟାଏ। ଏନ୍ତେ ଇନ୍କୁ ମିହୁଡ଼୍ ଆଡଃମିହୁଡ଼୍ରାଃ ଜୀଉସୁକୁ ବିଷାଏରେ କୁପୁଲିୟାନାକ ଓଡ଼ୋଃ ଇନ୍କୁ କୁମ୍ବାରେ ବଲୟାନା। ମୁଶା ଆୟାଃ ହୟାଁର୍ତେକେ ସବେନ୍ ହବାକାନ୍ତେୟାଃ କାଜିକିୟା, ଚିଲ୍କା ପ୍ରାଭୁ ଇସ୍ରାଏଲ୍ କଆଃ ନାଗେନ୍ତେ ଫାରୋଲଃ ଓଡ଼ୋଃ ମିସାର୍ରେନ୍କଲଃ ଚିନାଃ ରିକାଲେ, ହରାରେ ଇସ୍ରାଏଲ୍ ହଡ଼କ ଚିଲ୍କା ଦୁକୁ ସାସାତି ନାମ୍କେଦା ଓଡ଼ୋଃ ପ୍ରାଭୁ ଚିଲ୍କା ଇସ୍ରାଏଲ୍କକେ ମିସାର୍ ହେତେ ବାନ୍ଚାଅ କେଦ୍କଆ। ଯିଥ୍ରୋ ନେ ସବେନ୍ କାଜି ଆୟୁମ୍କେଦ୍ତେ ରାସ୍କାୟାନା, ଚିଆଃଚି ପ୍ରାଭୁ ଇସ୍ରାଏଲ୍କକେ ମିସାର୍ରେନ୍ ହଡ଼କଆଃ ତିଃଇଏତେ ବାନ୍ଚାଅ କାଦ୍କଆଏ। ଓଡ଼ୋଃ ଯିଥ୍ରୋ କାଜିକେଦାଏ, “ପ୍ରାଭୁଆଃ ଧାଇନ୍ ହବାଅଃକା,” ଅକଏଚି ଫାରୋ ରାଜାଏତେ ଓଡ଼ୋଃ ମିସାର୍ରେନ୍ ହଡ଼କଆଃ ତିଃଇଏତେ ବାନ୍ଚାଅ କେଦ୍କଆ। ଆଇଙ୍ଗ୍ ନାହାଁଃ ସାରିକେଦାଇଙ୍ଗ୍ ଯେ ପ୍ରାଭୁ ସବେନ୍ ମାହାପୁରୁଏତେ ମାରାଙ୍ଗ୍ ତାନିଃ। ଇନିଃ ଏନ୍ ହଡ଼କଲଃ ଏନ୍ଲେକାଗି ରିକାକେଦାଏ, ଅକନ୍କ ଇସ୍ରାଏଲ୍ ହଡ଼କଲଃ ଚିଲ୍କା ରିକା ତାଇକେନା। ଏନ୍ତେ ମୁଶାରାଃ ହୟାଁର୍ତେ ଯିଥ୍ରୋ ପାର୍ମେଶ୍ୱାର୍ଆଃ ଉଦ୍ଦେଶ୍ରେ ଉରୁବ୍ଦାଣେଁ ଓଡ଼ୋଃ ଏଟାଃ ଦାଣେଁକ ରାକାବ୍କେଦା। ଓଡ଼ୋଃ ହାରୁନ୍ଲଃ ଇସ୍ରାଏଲ୍ରେନ୍ ସବେନ୍ ପ୍ରାଚିନ୍କ ହିଜୁଃକେଦ୍ତେ ପାର୍ମେଶ୍ୱାର୍ଆଃ ଆୟାର୍ରେ ମୁଶାରାଃ ହୟାଁର୍ତେ ଯିଥ୍ରୋଲଃ ଜମ୍କେଦାକ।
ନ୍ୟାୟ ବିଚାର୍ନିଃ ସାଲା
ଏଟାଃ ହୁଲାଙ୍ଗ୍ ମୁଶା ହଡ଼କଆଃ ବିଚାର୍ ରିକା ନାଗେନ୍ତେ ଦୁବ୍ୟାନା ଓଡ଼ୋଃ ହଡ଼କ ସେତାଃ ହେତେ ସିଙ୍ଗି ହାସୁର୍ ଜାକେଦ୍ ମୁଶାରାଃ ଆୟାର୍ରେ ତିଙ୍ଗୁୟାନାକ। ମୁଶା ନେଆଁକ ରିକା ତାଇକେନାଏ ଇମ୍ତାଙ୍ଗ୍, ମୁଶାରାଃ ହୟାଁର୍ତେ ଏନ୍ ସବେନାଃ ନେଲ୍କେଦ୍ତେ କାଜିକେଦା, “ଆମ୍ ହଡ଼କଆଃ ନାଗେନ୍ତେ ନେଆଁ ଚିନାଃ ରିକା ତାନାମେ ? ଆମ୍ ଏସ୍କାର୍ଗି ଚିନାଃ ମେନ୍ତେ ବିଚାର୍ ନାଗେନ୍ତେ ଦୁବାକାନାମ୍ ଓଡ଼ୋଃ ହଡ଼କ ସେତାଃ ହେତେ ସିଙ୍ଗି ହାସୁର୍ ଜାକେଦ୍ ଆମାଃ ଆୟାର୍ରେ ତିଙ୍ଗୁକାନାକ ?”
ମୁଶା ଆୟାଃ ହୟାଁର୍ତେକେ କାଜିକିୟା, “ହଡ଼କ ଆଇଁୟାଃ ହେପାଦ୍ତେ ପାର୍ମେଶ୍ୱାର୍ଆଃ ବିଚାର୍ ସାରି ନାଙ୍ଗ୍ ହିଜୁଃତାନାକ ଓଡ଼ୋଃ ଇନ୍କୁଆଃ ଥାଲାରେ ଜେତ୍ନାଃ ହବାଅଃରେ ଆଇଙ୍ଗ୍ତାଃ ହିଜୁଃଆକ ଓଡ଼ୋଃ ଆଇଙ୍ଗ୍ ଇନ୍କୁଆଃ ଥାଲାରେ ଅକଏ ଠାଉକାନିଃ, କା ଠାଉକାନିଃ ତାନିଃ, ଏନା ବିଚାର୍କେଦ୍ତେ ପାର୍ମେଶ୍ୱାର୍ଆଃ ହୁକୁମ୍ ଓଡ଼ୋଃ ନିୟାମ୍ ଇନ୍କୁକେ କାଜିକତାନାଇଙ୍ଗ୍।”
ଏନ୍ତେ ମୁଶା ହୟାଁର୍ତେକେ କାଜିକିୟା, “ଆମାଃ ନେ କାମି ରିକାତେୟାଃ ବୁଗିନ୍ ନାହାଁଲାଃ। ନେଆଁ ହରାତେ ଆମ୍ ଓଡ଼ୋଃ ନେ ହଡ଼କ ହଗି ଲାଗାକଆଃକ, ଚିଆଃଚି ନେ କାମି ଆମାଃ ନାଗେନ୍ତେ ପୁରାଃ ହାମ୍ବାଲ୍ ତାନା, ଏସ୍କାର୍ ନେଆଁ କାମ୍ ରିକା ଦାଡ଼ିୟା। ଏନାମେନ୍ତେ ଆଇଁୟାଃ କାଜି ଆୟୁମେମେ, ଆଇଙ୍ଗ୍ ଆମ୍କେ ଅକ୍ନାଃ ଇତୁମେୟାଇଙ୍ଗ୍ ଏନାରେ ପାର୍ମେଶ୍ୱାର୍ ଆମାଃଲଃ ତାଇନଃକା। ଆମ୍ ନେ ହଡ଼କଆଃ ନାଗେନ୍ତେ ପାର୍ମେଶ୍ୱାର୍ ଆୟାର୍ରେ ତାଇନ୍ମେ ଇନ୍କୁଆଃ କାଜି ପାର୍ମେଶ୍ୱାର୍କେ ଉଦୁବାଇମେ। ଆମ୍ ଇନ୍କୁକେ ପାର୍ମେଶ୍ୱାର୍ଆଃ ନିୟାମ୍ ଇତୁକମେ ଓଡ଼ୋଃ ଇନ୍କୁଆଃ ଲାଗାତିଙ୍ଗ୍ ହରା ଓଡ଼ୋଃ ଲାଗାତିଙ୍ଗ୍ କାମିକ ଉଦୁବାକମେ। ଆଡଃଗି ଆମ୍ ନେ ହଡ଼କଆଃ ଭିତାର୍ ହେତେଗି କାମିଦାଡ଼ି ଆଗୁଆଇନିଃ ଓଡ଼ୋଃ ପାର୍ମେଶ୍ୱାର୍କେ ବରଆଇତାନ୍, ସାର୍ତି ଓଡ଼ୋଃ ଟାକା ସିକା କା ହାୟାତାନ୍ ହଡ଼କକେ ସାଲାକମ୍। ଇନ୍କୁକେ ହଡ଼କଆଃ ଚେତାନ୍ରେ ମିଦ୍ ହାଜାର୍, ମିଦ୍ ସାଅ, ବାର୍ହିସି ଗେଲ୍ ଓଡ଼ୋଃ ଗେଲ୍ ହଡ଼କଆଃ ଲେକା ଦହକୁମେ। ଓଡ଼ୋଃ ଇନ୍କୁ ସବେନ୍ ଇମ୍ତାଙ୍ଗ୍ ହଡ଼କଆଃ ବିଚାର୍ ରିକାୟା, ଓଡ଼ୋଃ କା ରିକା ଦାଡ଼ିତେୟାଃ ନାଗେନ୍ତେ ଆମାଃ ହେପାଦ୍ତେ ହିଜୁଃକା, ଓଡ଼ୋଃ ହୁପୁଡିଙ୍ଗ୍ ହୁପୁଡିଙ୍ଗ୍ କାଜିକ ଆକଗି ବିଚାରେକାକ, ଏନ୍ତେ ଆମାଃ ଚେତାନ୍ରେୟାଃ ବାହାରମ୍ କାଟିଃଗି ହବାଅଃଆ ଚିଆଃଚି ନେ ବାହାରମ୍ ଇନ୍କୁ ହଗି ଆମାଃଲଃ ଗଅଃୟାକ। ଆପେ ନେ'ଲେକାପେ ରିକାଏ ରେଦ, ଓଡ଼ୋଃ ଏନା ପାର୍ମେଶ୍ୱାର୍ଆଃ ହୁକୁମ୍ ତାନାଃ ରେଦ, ଆପେ ସବେନାଃମ୍ ସାହାତିଙ୍ଗ୍ ଦାଡ଼ିୟା। ଓଡ଼ୋଃ ନେ ହଡ଼କ ଜୀଉସୁକୁତେ ଆକଆଃ ଅଡ଼ାଃ ସେଟେର୍ ଦାଡ଼ିୟାକ।”
ମୁଶା ଆୟାଃ ହୟାଁର୍ତେୟାଃ କାଜି ମାନାତିଙ୍ଗ୍କେଦ୍ତେ ସବେନ୍ କାମି ଏନ୍ଲେକାଗି ରିକାକେଦା। ଏନ୍ତେ ମୁଶା ସବେନ୍ ଇସ୍ରାଏଲ୍ ହଡ଼କଆଃ ଥାଲାଏତେ ହାକିମ୍କକେ ସାଲାକେଦ୍କଆ। ଇନ୍କୁକେ ହାଜାର୍କଆଃ ଗମ୍କେ, ମିଦ୍ଶାଅ କଆଃ ଗମ୍କେ, ବାର୍ହିସି ଗେଲ୍ କଆଃ ଗମ୍କେ, ଗେଲ୍କଆଃ ଗମ୍କେ ଥାଲାରେ ବିଚାର୍ନିଃ ବାଇକେଦ୍କଆ। ଏନ୍ ଲେକାତେ ଇନ୍କୁ ହଡ଼କଆ ବିଚାର୍ କେଦାକ ଓଡ଼ୋଃ କା ବିଚାର୍ ଦାଡ଼ିତେୟାଃ ନାଗେନ୍ତେ ମୁଶା ହେପାଦ୍ତେ ହିଜୁଃୟାନା, ଓଡ଼ୋଃ ହୁପୁଡିଙ୍ଗ୍ ହୁପୁଡିଙ୍ଗ୍ ବିଚାର୍ ଇନ୍କୁ ଆକଗି ରିକାକେଦା।
ଏନ୍ତେ ମୁଶା ଆୟାଃ ହୟାଁର୍ତେକେ ବିଦାକିଆ ଓଡ଼ୋଃ ଇନିଃ ଆୟାଃ ଆପ୍ନାଃ ଦିଶୁମ୍ତେ ରୁହାଡ଼୍ୟାନା।
Source notes (2)
- Footnote ନେ ଠାୟାଦ୍ରେ ତାଇନ୍ତାନ୍ନିଃ
- Footnote ପାର୍ମେଶ୍ୱାର୍ ଆଇଁୟାଃ ଦେଙ୍ଗାନିଃ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.