Munda Bible
ହରାସେନ୍ପୁଥି 17
ଦିରିଏତେ ଦାଆଃ
ଏନ୍ତେ ଇସ୍ରାଏଲ୍ ସାମାଜ୍ରେନ୍ ସବେନ୍ ହଡ଼କ ସିନ୍ ନୁତୁମ୍ ବିର୍ଏତେ ସେସେନ୍ ଏଟେଦ୍କେଦାକ। ଓଡ଼ୋଃ ପ୍ରାଭୁଆଃ ହୁକୁମ୍ ଲେକାତେ ସାଲାକାନ୍ ଠାୟାଦ୍ ରଫିଦିମ୍ରେ କୁମ୍ବା ବାଇକେଦାକ। ମେନ୍ଦ ହଡ଼କ ଏନ୍ତାଃରେ ନୁଁ ନାଗେନ୍ତେ ଦାଆଃ କାକ ନାମ୍କେଦା। ଏନାମେନ୍ତେ ହଡ଼କ ମୁଶାଲଃ କାପ୍ଜିକେଦ୍ତେ କାଜିକେଦାକ, “ଆଲେକେ ନୁଏଁ ନାଗେନ୍ତେ ଦାଆଃ ଏମାଲେମେ, ଆଲେ ଦାଆଃ ନୁଇଁୟାଲେ।”
ଏନ୍ତେ ମୁଶା ଇନ୍କୁକେ କାଜିକେଦ୍କଆ, “ଆପେ ଆଇଁୟାଃଲଃ ଚିନାଃମେନ୍ତେ ଏପେଗେର୍ ତାନାପେ ? ଓଡ଼ୋଃ ଚିଆଃ ମେନ୍ତେ ପ୍ରାଭୁକେ ବିନିଡ଼ାଅ ତାନାପେ ?”
ମେନ୍ଦ ହଡ଼କ ପୁରାଃଗି ଦାଆଃ ତେତାଙ୍ଗ୍ ହରାତେ ଇନ୍କୁ ମୁଶାରାଃ ବିରୁଧ୍ରେ ଚୁପ୍ରା ତାନ୍ଲଃ କାଜିକିୟା, “ଚିନାଃମେନ୍ତେ ଆମ୍ ଆଲେକେ, ଆଲେୟାଃ ହନ୍କକେ ଓଡ଼ୋଃ ଆସୁଲ୍ ଜାଁତୁକକେ ମିସାର୍ ଦିଶୁମ୍ ଏତେ ନେତାଃରେ ତେତାଙ୍ଗ୍ତେ ଗଜଃ ନାଗେନ୍ତେ ଆଉୱାକାଦ୍ ଲେୟାମ୍ ?”
ଏନ୍ତେ ମୁଶା ପ୍ରାଭୁତାଃରେ ବିନ୍ତିତାନ୍ଲଃ କାଜିକେଦା, “ଆଇଙ୍ଗ୍ ନେ ହଡ଼କ ନାଗେନ୍ତେ ଚିନାଃ ରିକାୟା ? ଇନ୍କୁ ଆଇଙ୍ଗ୍କେ ଦିରିତେ ଗଗଏଃ ନାଙ୍ଗ୍ ସାନାଙ୍ଗ୍ତାନା।”
ଏନ୍ତେ ପ୍ରାଭୁ ମୁଶାକେ କାଜିକିୟା, “ଆମ୍ ଅକନ୍ ସଟାତେ ନିଲ୍ ନାହିଁରାଃ ଦାଆଃକେ ଜୁଟିଦ୍ ତାଇକେନାମ୍, ଏନ୍ ସଟାକେ ସାବ୍କେଦ୍ତେ ଇସ୍ରାଏଲ୍ରେନ୍ ଚିମିନ୍ ପ୍ରାଚିନ୍ ହଡ଼କକେ ଗାତିରେ ଇଦିକେଦ୍ତେ ଇସ୍ରାଏଲ୍ ହଡ଼କଆଃ ଆୟାର୍ ଆୟାର୍ ସେନଃମେ। ନେଲେମେ, ଆଇଙ୍ଗ୍ ହୋରେବ୍ରେୟାଃ ଏନ୍ ସେରେଙ୍ଗ୍ ଚେତାନ୍ରେ ଆମାଃ ଆୟାର୍ରେଇଙ୍ଗ୍ ତିଙ୍ଗୁନା। ଆମ୍ ଏନ୍ ସେରେଙ୍ଗ୍କେ ହୁମାଃଲେରେ, ଏନାଏତେ ଦାଆଃ ଅଡଙ୍ଗ୍ଅଃଆ ଓଡ଼ୋଃ ହଡ଼କ ଏନା ନୁଁ ଦାଡ଼ିୟାକ।” ଏନ୍ତେ ମୁଶା ଇସ୍ରାଏଲ୍ରେନ୍ ପ୍ରାଚିନ୍କଆଃ ଆୟାର୍ରେ ଏନ୍ ଲେକାଗି ରିକାକେଦା।
ମୁଶା ଏନ୍ ଠାୟାଦ୍କେ ମସାଃ1 ଓଡ଼ୋଃ ମିରିବା2 ନୁତୁମ୍ ଦହକେଦା। ଚିଆଃଚି ଇସ୍ରାଏଲ୍ ହଡ଼କଆଃ ଏପ୍ରାଙ୍ଗ୍ ହରାତେ ପ୍ରାଭୁ ଆଲେଲଃ ମେନାଇୟା ଚି କାହା, ଏନା କାଜିକେଦ୍ତେ ପ୍ରାଭୁକେ ବିଡ଼ାଅକିୟାକ।
ଅମାଲେକିୟ ହଡ଼କଲଃ ଲାଡ଼ାଇ
ଅମାଲେକ୍ ହଡ଼କ ହିଜୁଃକେଦ୍ତେ ରଫିଦିମ୍ରେ ଇସ୍ରାଏଲ୍ ହଡ଼କଲଃ ଲାଡ଼ାଇୟାନାକ। ଏନ୍ତେ ମୁଶା ଯିହୋଶୁୟକେ କାଜିକିୟା, “ଆମ୍ ଆଲେ ନାଗେନ୍ତେ କଡ଼ାକକେ ସାଲାକେଦ୍ତେ ଅମାଲେକ୍ ହଡ଼କଲଃ ଲାଡ଼ାଇ ନାଗେନ୍ତେ ସେନ୍ମେ। ଗାପା ଆଇଙ୍ଗ୍ ଆଇଁୟାଃ ତିଃଇରେ ପାର୍ମେଶ୍ୱାର୍ଆଃ ସଟା ସାବ୍କେଦ୍ତେ ବୁରୁ ଚୁଟିରେ ତିଙ୍ଗୁନାଇଙ୍ଗ୍।” ଯିହୋଶୁୟ ମୁଶାରାଃ କାଜି ଲେକାତେ ଅମାଲେକ୍ ହଡ଼କଲଃ ଲାଡ଼ାଇୟାନାଏ। ଏନ୍ ଦିପିଲିରେ ମୁଶା, ହାରୁନ୍ ଓଡ଼ୋଃ ହୁର୍ ବୁରୁ ଚେତାନ୍ତେ ସେନଃୟାନାକିନ୍। ଚିମ୍ତା ମୁଶା ଆୟାଃ ତିଃଇ ଚେତାନ୍ ଉଠାଅକେଦ୍ତେ ତାଇନଃ ଇମ୍ତା ଇସ୍ରାଏଲ୍ ହଡ଼କ ଜିତାଅଃ ତାଇକେନାକ ଓଡ଼ୋଃ ମୁଶା ଆୟାଃ ତିଃଇକେ ଲାତାରେତାନ୍ ତାଇକେନ୍ ଇମ୍ତା ଅମାଲେକ୍ ହଡ଼କ ଜିତାଅଃ ତାଇକେନାକ। ମେନ୍ଦ ଘାଡ଼ିକାଦ୍ ତାୟମ୍ତେ ମୁଶାରାଃ ତିଃଇ ଟାଟାଏକିୟା। ଏନାମେନ୍ତେ ହାରୁନ୍ ଓଡ଼ୋଃ ହୁର୍ ମିଆଁଦ୍ ଦିରି ଆଉକେଦ୍ତେ ମୁଶା ଆୟାର୍ରେ ଦହକେଦ୍କିନା ଓଡ଼ୋଃ ମୁଶା ଏନାରେ ଦୁବ୍ୟାନା। ଏନ୍ତେ ହାରୁନ୍ ଓଡ଼ୋଃ ହୁର୍ ମିପିଆଦ୍ ତିଃଇ ସାବ୍ କେଦାକିନ୍। ନେ'ଲେକାତେ ସିଙ୍ଗି ହାସୁର୍ ଜାକେଦ୍ ଇନିୟାଃ ତିଃଇ କା ଲିକୁଇଃୟାନା ରିମ୍କେଦ୍ତେଗି ତାଇନ୍ୟାନା। ଓଡ଼ୋଃ ଯିହୋଶୁୟ ଆୟାଃ ସାଲାକାନ୍ ହଡ଼କ ଅମାଲେକ୍ ହଡ଼କକେ ତାରାଉଡ଼ିତେ ହାରାଅ କେଦ୍କଆକ।
ଏନ୍ତେ ପ୍ରାଭୁ ମୁଶାକେ କାଜିକିୟା, “ନେ ଲାଡ଼ାଇ ହବାକାନ୍ ତେୟାଃକେ ପାହାମେ ନାଗେନ୍ତେ ମିଆଁଦ୍ ଅନଲ୍ ପୁଥି ମାଣ୍ଡାଏମେ। ନେଆଁକେ ଯିହୋଶୁୟକେ ପାଢ଼ାଅକେଦ୍ତେ ଉଦୁବାଇମେ। ଆଇଙ୍ଗ୍ ଅମାଲେକ୍ ହଡ଼କକେ ନେ ଅତେ ଦିଶୁମ୍ହେତେ ପୁରାଗି ଜିଅନ୍ କଆଇଙ୍ଗ୍।” ମୁଶା ମିଆଁଦ୍ ବେଦି ବାଇକେଦ୍ତେ ଏନାରାଃ ନୁତୁମ୍ “ଯିହୋବା-ନିଷି3” ମେନ୍ଲେରେ, ପ୍ରାଭୁ ଆଇଁୟାଃ ଝାଣ୍ଡା ମେନ୍ତେ ମାଣ୍ଡାଅକେଦା। ମୁଶା କାଜିକେଦା, “ପ୍ରାଭୁ କିରିୟା କାଦାଏ ଅମାଲେକ୍ ହଡ଼କଲଃ ପିଢ଼ି ଜାକେଦ୍ ଲାଡ଼ାଇୟା।”
Source notes (3)
- Footnote ବିଡ଼ାଅ
- Footnote ଏପ୍ରାଙ୍ଗ୍
- Footnote ପ୍ରାଭୁ ଆଇଁୟାଃ ଝାଣ୍ଡା
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.