Munda Bible
ହରାସେନ୍ପୁଥି 27
ପିତ୍ତାଲ୍ରାଃ ବେଦୀ
“ଆମ୍ ବାବୁଲ୍ ଦାରୁରାଃ ମିଆଁଦ୍ ବେଦି ବାଇୟେମେ, ଏନାରାଃ ଜିଲିଙ୍ଗ୍ ମଣେଁ ମୁକା, ଚାକାର୍ ମଣେଁ ମୁକା ଓଡ଼ୋଃ ସାଲାଙ୍ଗି ଆପି ମୁକା ହବାଅଃକା। ଓଡ଼ୋଃ ଏନାରାଃ ଚାରିଓ କଚାରେ ଦିରିଙ୍ଗ୍ ବାଇୟେମେ, ଏନ୍ ଦିରିଙ୍ଗ୍ ବେଦିରାଃ ମିଦ୍ ହିସା ହବାଅକା, ଓଡ଼ୋଃ ଏନା ପିତ୍ତାଲ୍ତେ ହାରୁବେମେ। ତରେକ୍ ଅଡଙ୍ଗ୍ ନାଗେନ୍ତେ ବେଲ୍ଚା, ଡୁବ୍ନି ଓଡ଼ୋଃ ଜାନୁମ୍ ଚାମୁଚ୍ ଓଡ଼ୋଃ ସେଙ୍ଗେଲ୍ ଦହ ତେୟାଃ, ନେ ସବେନାଃ ପିତ୍ତାଲ୍ରାଃ ବାଇୟେମେ। ଓଡ଼ୋଃ ପିତ୍ତାଲ୍ରାଃ ମିଆଦ୍ ଜାଲମ୍ ବାଇୟେମେ ଓଡ଼ୋଃ ଏନାରାଃ ଉପୁନ୍ କଚାରେ ପିତ୍ତାଲ୍ରାଃ ଉପୁନ୍ ଠୁ ଗୋଲ୍ ତେୟାଃ ବାଇୟେମେ। ବେଦିରାଃ ଲାତାର୍ରାଃ ଥାଲା ହିସା ଜାକେଦ୍ ତେବାଗଃ ଲେକା ଏନ୍ ଜାଲମ୍କେ ଦହେମେ। ବେଦି ନାଗେନ୍ତେ ବାବୁଲ୍ ଦାରୁରାଃ ଖୁଁଟା ବାଇ କେଦ୍ତେ ଏନାରାଃ ଚେତାନ୍ରେ ପିତ୍ତାଲ୍ତେ ହାରୁବେମେ। ଓଡ଼ୋଃ ବେଦିକେ ଗଅଃ ନାଗେନ୍ତେ ଏନାରାଃ ବାରାନ୍ସାଃ ଗୋଲ୍ ତେୟାଃରେ ଏନ୍ ବାହାରମ୍ ତାଇନ୍କା। ଆମ୍ ବେଦିକେ ସାମାଗି ଦହ କେଦ୍ତେ ଆମ୍କେ ବୁରୁରେ ଚିଲ୍କା ଉଦୁବାକାନ୍ ତାଇକେନା ଏନ୍ଲେକା ତାକ୍ତାତେ ବାଇୟେମେ।
କୁମ୍ବାରେୟାଃ ରାଚା
“ଏନ୍ତେ ଆମ୍ ଅଡ଼ାଃରାଃ ରାଚା ବାଇକେଦ୍ତେ, ଏନ୍ ରାଚାରାଃ ଦାକ୍ଷିଣ୍ସାଃ ସୁତାମ୍ତେ ମଣେଁ ହିସି ମୁକା ନିରାଲ୍ ଦାନାଙ୍ଗ୍ ଲିଜାଃ ବାଇୟେମେ। ଏନାରାଃ ଖୁଁଟା ମିଦ୍ ହିସି ଓଡ଼ୋଃ ତିଙ୍ଗୁ ତେୟାଃ ମିଦ୍ ହିସି ଠୁ ପିତ୍ତାଲ୍ରାଃ ବାଇୟେମେ ଓଡ଼ୋଃ ଖୁଁଟାରାଃ ଆକୁସି ଓଡ଼ୋଃ ଗୋଲ୍ ତେୟାଃ ରୁପାରାଃ ହୁକ୍ ବାଇୟେମେ। ନେ'ଲେକାଗି ଉତ୍ତାର୍ସାଃ ମଣେଁ ହିସି ଜିଲିଙ୍ଗ୍ ଦାନାଙ୍ଗ୍ ଲିଜାଃ ବାଇୟେମେ, ଏନାରାଃ ମିଦ୍ ହିସି ଖୁଁଟା ଓଡ଼ୋଃ ମିଦ୍ ହିସି ତିଙ୍ଗୁ ତେୟାଃ ପିତ୍ତାଲ୍ରାଃ ବାଇୟେମେ ଓଡ଼ୋଃ ଖୁଁଟାରାଃ ଆକୁସି ଓଡ଼ୋଃ ଗୋଲ୍ ତେୟାଃ ରୁପାରାଃ ବାଇୟେମେ। ଓଡ଼ୋଃ ରାଚାରାଃ ଚାକାର୍ ନାଗେନ୍ତେ ସିଙ୍ଗି ହାସୁର୍ସାଃ ବାର୍ ହିସି ଗେଲ୍ ମୁକା ଦାନାଙ୍ଗ୍ ଲିଜାଃ, ଏନାରାଃ ଗେଲ୍ ଖୁଁଟା ଓଡ଼ୋଃ ଗେଲ୍ ତିଙ୍ଗୁ ତେୟାଃ ବାଇୟେମେ। ସିଙ୍ଗିତୁରଃସାଃ ରାଚାରାଃ ଚାକାର୍ ବାର୍ ହିସି ଗେଲ୍ ମୁକା ବାଇୟେମେ। ସିଙ୍ଗିତୁରଃସାଃ ଗେଲ୍ ମଣେଁ ମୁକା ଦାନାଙ୍ଗ୍ ଲିଜାଃ ଓଡ଼ୋଃ ଆପିଆ ଖୁଁଟା ଓଡ଼ୋଃ ଆପିଆ ତିଙ୍ଗୁ ତେୟାଃ ବାଇୟେମେ। ଓଡ଼ୋଃ ଏଟାଃସାଃ ଗେଲ୍ ମଣେଁୟା ଦାନାଙ୍ଗ୍ ଲିଜାଃ ଓଡ଼ୋଃ ଆପିଆ ଖୁଁଟା ଓଡ଼ୋଃ ଆପିଆ ତିଙ୍ଗୁ ତେୟାଃ ବାଇୟେମେ। ରାଚାରାଃ ଦାନାଙ୍ଗ୍ ଲିଜାଃ ମିଦ୍ ହିସି ମୁକା ହବାଅଃକା, ଏନ୍ ଦାନାଙ୍ଗ୍ ଲିଜାଃ ନାଗେନ୍ତେ ନିରାଲ୍ ଲିଜାଃରାଃ ନିଲିୟା, ବାଇଗିନିୟା, ଆରାଃ ସୁତାମ୍ତେ ଓଡ଼ୋଃ ଉଇଙ୍ଗ୍କାନ୍ ପୁଣ୍ଡି ନିରାଲ୍ ସୁତାମ୍ତେ ସୁଇଲଃ ରଅଃକେଦ୍ତେ ବାଇୟେମେ ଓଡ଼ୋଃ ଉପୁନିୟା ଠୁ ଖୁଁଟା ଓଡ଼ୋଃ ଉପୁନିୟା ଠୁ ତିଙ୍ଗୁତେୟାଃ ତାଇନ୍କା। ରାଚାରାଃ ସବେନ୍ ଖୁଁଟା ରୁପାରାଃ ତଲଃକା ଓଡ଼ୋଃ ଏନାରେୟାଃ ତିଙ୍ଗୁ ତେୟାଃ ପିତ୍ତାଲ୍ରାଃ ବାଇୟେମେ। ରାଚା ମଣେଁ ହିସି ମୁକା ଜିଲିଙ୍ଗ୍ ଓଡ଼ୋଃ ସବେନ୍ସାଃ ବାର୍ହିସି ଗେଲ୍ ମୁକା ଚାକାର୍ ଓଡ଼ୋଃ ମଣେଁ ମୁକା ସାଲାଙ୍ଗି ଓଡ଼ୋଃ ଉଇଙ୍ଗ୍କାନ୍ ନିରାଲ୍ ସୁତାମ୍ତେ ଓଡ଼ୋଃ ତିଙ୍ଗୁ ତେୟାଃ ପିତ୍ତାଲ୍ରାଃ ବାଇୟେମେ। କୁମ୍ବାରାଃ ସବେନ୍ ସୁସାର୍ କାମିତାନ୍ ଜିନିଷ୍କ, ଖିଲା ଓଡ଼ୋଃ ରାଚାରାଃ ସବେନ୍ ଖିଲାକ ପିତ୍ତାଲ୍ରାଃ ହବାଅଃକା।
ଦିଆରାଃ ଯାତାନ୍
(ଲେବୀ ୨୪:୧-୪)
“ଓଡ଼ୋଃ ସବେନ୍ ହୁଲାଙ୍ଗ୍ ଦିଆ ଜୁଲଃ ନାଗେନ୍ତେ ପେରାଅକାନ୍ ଫାର୍ଚି ଅଲିଭ୍ ସୁନୁମ୍ ଆଇଙ୍ଗ୍ତାଃ ଆଉୱେକାକ ମେନ୍ତେ ଇସ୍ରାଏଲ୍ ହନ୍କକେ ଆଚୁକମେ। ହାରୁନ୍ ଓଡ଼ୋଃ ଆୟାଃ ହନ୍କ ନେପେଲ୍ କୁମ୍ବାରେ ରାଜିନାମା ବାକାସ୍ରାଃ ସାମ୍ନାଙ୍ଗ୍ରେ ହାକାକାନ୍ ଦାନାଙ୍ଗ୍ ଲିଜାଃ ରାଚାରେ ସିଙ୍ଗିହାସୁରଃ ହେତେ ସିଙ୍ଗିତୁରଃ ଜାକେଦ୍ ପ୍ରାଭୁଆଃ ସାମ୍ନାଙ୍ଗ୍ରେ ଜୁଲ୍କେଦ୍ତେ ଦହେକାକ, ନେ ନିୟାମ୍ ଇସ୍ରାଏଲ୍ ହନ୍କଆଃ ନାଗେନ୍ତେ ଜାନାଅଗି ତାଇନା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.