Munda Bible
ହରାସେନ୍ପୁଥି 23
ନ୍ୟାୟ ବିଚାର୍
“ହସଡ଼କାଜି ଆଲମ୍ କାଜିୟା। ହସଡ଼ ଗାୱା ହବା କେଦ୍ତେ ଏତ୍କାନ୍ ହଡ଼କେ ଆଲମ୍ ଦେଙ୍ଗା। ଏତ୍କାନ୍ କାମି ରିକା ନାଗେନ୍ତେ ପୁରାଃ ହଡ଼କକେ ଆଲମ୍ ଅତଙ୍ଗ୍କଆ। ଓଡ଼ୋଃ ବିଚାର୍ ରିକାନାଗେନ୍ତେ ବିଚାର୍କେ ବାଗ୍ଡ଼ାଅଃ ନାଗେନ୍ତେ ପୁରାଃ ହଡ଼କଆ ତାୟମ୍ରେ ସେନ୍କେଦ୍ତେ ବିରୁଧ୍ ଆଲମ୍ ରିକାୟା। ଗାରିବ୍ ହଡ଼ରାଃ ନାଗେନ୍ତେ କାଚାଇରିରେ ହସଡ଼ ଗାୱା ଆଲମ୍ ଏମେୟା।
“ଆମାଃ ବାଇରି ରାଃ ଉରିକ୍ ଚାଏ ଗାଧା ହରା ଆଦଃ ରେଦ ଇନିଃକେ ଆୟାଃତାଃ ଇଦି ବାଗିମେ। ଆମାଃ ବାଇରିଆଃ ଗାଧା କେ ହାମ୍ବାଲ୍ତେ ଅତେରେ ଉୟୁଗଃ ତେୟାଃ ନେଲି ରେଦ ଆମ୍ ଇନିଃକେ ଆଲମ୍ ବାଗିୟା, ଆମ୍ ଇନିଃକେ ଏନ୍ତାଃରେ ଦେଙ୍ଗାଇମେଁ।
“ରେଙ୍ଗେଃତାନ୍ ହଡ଼ରାଃ ବିଚାର୍ରେ କାପାଟ୍ ଆଲମ୍ ରିକାୟା। ହସଡ଼ କାଜିକଏତେ ଆପାନ୍କେ ସାଙ୍ଗିନ୍ରେ ଦହନ୍ମେ ଓଡ଼ୋଃ ଗୁହ୍ନାଁ କା ରିକାତାନ୍ନିଆଃ ଓଡ଼ୋଃ ଧାର୍ମାନ୍ ହଡ଼ରାଃ ନକ୍ସାନ୍ ଆଲମ୍ ରିକାଃ। ଚିୟାଃଚି ଏତ୍କାନ୍ନିଃକେ ଛାମା କାଇଙ୍ଗ୍ ଏମାଇୟା। ଘୁସ୍ ଆଲମ୍ ତେଲାଏ, ଚିଆଃଚି ଘୁସ୍ ଇଦି ହଡ଼ରାଃ ମେଦ୍ କାଣାଁତାଃଏ ଓଡ଼ୋଃ ସାର୍ତି ନେଲ୍ କାଏ ଦାଡ଼ିୟା। ଧାର୍ମାନ୍ ହଡ଼କଆଃ କାଜିକେ ବାଦ୍ଲାଅତାଃ।
“ଆମ୍ ଏଟାଃ ଦିଶୁମ୍ରେନ୍ ହଡ଼କକେ ଆଲମ୍ ସିଗିଦ୍କଆଃ ଚିୟାଃଚି ଇନ୍କୁଆଃ ମନ୍ସୁରୁଦ୍କେ ସାରିୟା କାଦା। ଚିଆଃଚି ଆମ୍ ହଗି ମିସାର୍ ଦିଶୁମ୍ରେ ଏଟାଃ ଦିଶୁମ୍ରେନ୍ ଲେକା ତାଇକେନାମ୍।
ଏୟା ସିର୍ମା ଓଡ଼ୋଃ ଏୟା ହୁଲାଙ୍ଗ୍
“ଆମ୍ ତୁରିୟା ବାରାଷ୍ ଜାକେଦ୍ ଲୟଙ୍ଗ୍ରେ ହିତା ହେରେମେଁ ଓଡ଼ୋଃ ଏନାଏତେ ଅମନ୍ ଜଅ କେ ହୁଣ୍ଡିକେଦ୍ତେ ଦହେମେ। ମେନ୍ଦ ଏୟା ବାରାଷ୍ରେ ଲୟଙ୍ଗ୍ରେ ଜେତାନ୍ ହିତା ଆଲମ୍ ହେରାଃ ଏନାକେ ସାମା ଅତେ ଲେକା ଦହେମେଁ। ଏନାରେ ରେଙ୍ଗେଃତାନ୍ ହଡ଼କ ଜମେୟାଃକ ନାମେୟା, ଇନ୍କୁ ଅକଆଃ ସାରେଃ ଦହେୟା, ଏନାକେ ବିର୍ରେନ୍ ଜାଁତୁକ ଜମେୟାଁ। ଓଡ଼ୋଃ ଏନ୍ ଲେକାଗି ଦାଖ୍ବାକ୍ଡ଼ିକେ ଓଡ଼ୋଃ ଅଲିଭ୍ ଦାରୁକେ ରିକାଏମେ।
“ତୁରିୟା ହୁଲାଙ୍ଗ୍ ଜାକେଦ୍ କାମିମେ ଓଡ଼ୋଃ ଏୟା ହୁଲାଙ୍ଗ୍ ରୁଡ଼ୁନ୍ମେ। ତାବ୍ଦ ଆମାଃ ଉରିକ୍ ଓଡ଼ୋଃ ଗାଧା ସବେନ୍ ଦାସି ରୁଡ଼ୁନ୍କ ନାମେୟା। ଓଡ଼ୋଃ ଆମାଃ କାମ୍ଡ଼ି ରାଃ କଡ଼ାହନ୍ ଓଡ଼ୋଃ ଏଟାଃ ଦିଶୁମ୍ରେନ୍ ହଡ଼କ ହଗି ରୁଡ଼ୁନ୍କ ନାମେୟା।
“ଅକ କାଜିକ ଆପେକେ କାଜିୟା କାଦା,ଏନାକେ ମାନାତିଙ୍ଗ୍ମେ ଓଡ଼ୋଃ ଏଟାଃ ମାହାପୁରୁକକେ ଆଲମ୍ ସେୱା ଚି ଇନିୟାଃ ନୁତୁମ୍ ଆମାଃ ମଚାତେ ଆଲମ୍ କାଜିୟା।
ଆପିୟା ମାରାଙ୍ଗ୍ ପାରାବ୍
(ହରାସେନ୍ପୁଥି ୩୪:୧୮-୨୬; ଉଦୁବ୍ରୁହାଡ଼୍ ୧୬:୧-୧୭)
“ମିଦ୍ ବାରାଷ୍ ଭିତାର୍ରେ ଆପିସା ଆଇଁୟାଃ ନୁତୁମ୍ତେ ପାରାବ୍ ମାନାତିଙ୍ଗ୍ ରିକାଏପେ। ସାବାଃ ହଲଙ୍ଗ୍ରେୟାଃ ପାରାବ୍ ମାନାତିଙ୍ଗ୍ପେ, ନେ ପାରାବ୍ ଆବିବ୍ ମାହିଁନା ରେୟାଃ ସାଲାକାନ୍ ଦିପିଲିରେ ଏୟା ହୁଲାଙ୍ଗ୍ ଜାକେଦ୍ ସାବାଃ ହଲଙ୍ଗ୍ ଜମେପେ, ଚିଆଃଚି ନେ ମାହିନା ଆପେ ମିସାର୍ ଦିଶୁମ୍ ଏତେ ଅଡଙ୍ଗ୍ କେଦ୍ତେ ହିଜୁଃଲେନାପେ, ଏନାମେନ୍ତେ ଜେତା ହଡ଼ ବେଗାର୍ ଦାଣେଁ ସାବ୍କେଦ୍ତେ ଆଇଁୟାଃତାଃତେ ଆଲକାଏ ହିଜୁଃକା।
“ଓଡ଼ୋଃ ଆପେ ଇରଃରେୟାଃ ପାରାବ୍, ଅକଆଃଚି ଲୟଙ୍ଗ୍ରେ ହେର୍ତେୟାଃରାଃ ଇରଃ ଜ'ରେୟାଃ ପାରାବ୍ ମାନାତିଙ୍ଗ୍ମେ। ଓଡ଼ୋଃ ବାରାଷ୍ରାଃ ଟୁଣ୍ଡୁରେ ଲୟଙ୍ଗ୍ଏତେ ଜ'ହୁଣ୍ଡିରେୟାଃ ପାରାବ୍ ମାନାତିଙ୍ଗ୍ମେ। ବାରାଷ୍ରେ ଆପିସା ଆମାଃ ସବେନ୍ କଡ଼ାହନ୍କ ପ୍ରାଭୁ ପାର୍ମେଶ୍ୱାର୍ଆଃ ଆୟାର୍ରେ ହୁଣ୍ଡିନାଃକ।
“ଆଇଁୟାଃ ନାଗେନ୍ତେ ଦାଣେଁ ରାକାବେ ରେୟା ଜାଁତୁରାଃ ମାୟୋମ୍ରେ ଜେତାନ୍ ଦାଖ୍ରାସି ଲେକାନ୍ ବିଷାଏକେ ଆଲମ୍ ମେସାଏ। ଓଡ଼ୋଃ ଦାଣେଁ ରାକାବ୍ ରେୟା ଇତିଲ୍କେ ଏଟାଃ ହୁଲାଙ୍ଗ୍ ସେତାଃ ଜାକେଦ୍ ଆଲମ୍ ଦହୟା।
“ଆମାଃ ଅତେରେ ହେରାକାନ୍ ହିତାରାଃ ସିଦା ଜ ପ୍ରାଭୁ ପାର୍ମେଶ୍ୱାର୍ଆଃ ଅଡ଼ାଃତେ ଆଉୱେମେ।
“ମେରମ୍ହନ୍କେ ଏଙ୍ଗାରାଃ ତଆ ମେସାକେଦ୍ତେ ଆଲମ୍ ଆନ୍ଦାଃଏୟା।
କିରିୟା ଓଡ଼ୋଃ ଆଚୁ
“ନେଲେମେ, ଆଇଙ୍ଗ୍ ଆମ୍କେ ହରାରେ ବାଞ୍ଚାଅଃ ନାଗେନ୍ତେ ଓଡ଼ୋଃ ଆମ୍କେ ଆଇଁୟାଃ ବାଇୟାକାଦ୍ ଠାୟାଦ୍ତେ ଆମ୍କେ ଆଉ ସେଟେର୍ ନାଗେନ୍ତେ ଆମାଃ ଆୟାର୍ରେ ମିଆଦ୍ ଦୁଁତ୍କେ କୁଲିୟା, ଏନ୍ ଦୁଁତ୍ରାଃ କାଜି ମାନାତିଙ୍ଗ୍ମେ ଓଡ଼ୋଃ ଚିହୁଟ୍କେଦ୍ତେ ତାଇନ୍ମେ, ଇନିୟାଃ ବିରୁଧ୍ରେ ଗୁହ୍ନାଁ ଆଲମ୍ ରିକାୟା, ଇନିଃ ଆମାଃ ପାପ୍ କାଏ ଛାମାଏୟା, ଚିଆଃଚି ଇନିଃତାଃରେ ଆଇଁୟାଃ ନୁତୁମ୍ ମେନାଃ। ମେନ୍ଦ, ସାର୍ତିଗି ଆମ୍ ଏନ୍ ଦୁଁତ୍ରାଃ କାଜିରେ ମନ୍ ଏମେୟା, ଓଡ଼ୋଃ ଆଇଙ୍ଗ୍ ଅକନ୍ କାଜି କାଜିୟା ଏନ୍ଲେକା ରିକାଏ ରେଦ ଆଇଙ୍ଗ୍ ଆମାଃ ବାଇରିକଆଃ ବାଇରି ଓଡ଼ୋଃ ଖିସ୍ତାନ୍କଆଃ ଖିସ୍ନିଃ ହବାଅଃଇଙ୍ଗ୍। ଚିୟାଃଚି ଆଇଁୟାଃ ଦୁଁତ୍ ଆମାଃ ଆୟାର୍ରେ ସେନ୍କେଦ୍ତେ ଆମ୍କେ ଇମୋରିୟ, ହିତ୍ତିୟ, ପିରିଷିୟ, କିନାନିୟ, ହିବ୍ବୀୟ ଓଡ଼ୋଃ ଯିବୁଷିୟକଆଃ ଦିଶୁମ୍ତେ ଆଉମେୟା ଓଡ଼ୋଃ ଆଇଙ୍ଗ୍ ଇନ୍କୁକେ ଜିଅନ୍କଆ। ଆମ୍ ଇନ୍କୁଆଃ ମାହାପୁରୁକକେ ଅମ୍ବାକେଦ୍ତେ ଆଲମ୍ ଜହାର୍କଆ ଓଡ଼ୋଃ ଇନ୍କୁଆଃ ସୁନୁସାର୍ ଆଲମ୍ ରିକା, ଇନ୍କୁ କାମିତାନ୍ କାମି ଲେକା ଆଲମ୍ ରିକାଏୟା। ମେନ୍ଦ ଇନ୍କୁଆଃ ବାଇୟାକାନ୍ ମାହାପୁରୁକକେ ଓଡ଼ୋଃ ଖୁଁଟା ସବେନ୍ ପୁରାଗି ଜିଅନ୍ତାମେ। ଆପେ ଆପେୟାଃ ପ୍ରାଭୁ ପାର୍ମେଶ୍ୱାର୍ଆଃ ସେୱା ରିକାଏପେ, ଏନାରେ ଇନିଃ ଆପେୟାଃ ଜମେୟାଃ ଓଡ଼ୋଃ ନୁଏଁ ତେୟାଃରେ ଆଶିଷ୍ ଏମେୟାଏ ଓଡ଼ୋଃ ଆଇଙ୍ଗ୍ ଆପେୟାଃ ଥାଲାଏତେ ଦୁକୁହାସୁ ଆତମ୍ ରିକାୟା। ଆମାଃ ଦିଶୁମ୍ରେ ଜେତାଏୟାଃ ହାମ୍ବାଲ୍ରୋୱାତେୟାଃ ହାନି କା ହବାଅଃଆ, ଓଡ଼ୋଃ ଜେତାଏ ଟଣିଟ୍ କାକ ହବାଅଃଆ, ଆଇଙ୍ଗ୍ ଆମ୍କେ ପୁରାଃ ବାୟାସ୍ ଏମାମେୟାଇଙ୍ଗ୍।
“ଆମାଃ ଆୟାର୍ରେ ଆଇଁୟାଃ ବରୱାନ୍ କାଜିକେ କୁଲିୟାଇଙ୍ଗ୍ ଓଡ଼ୋଃ ଆମ୍ ଅକ ହଡ଼କତାଃ ସେଟେରାମ୍, ଇନ୍କୁକେ ଆକ୍ବାକାଅକଆ ଓଡ଼ୋଃ ଆମାଃ ବାଇରିକକେ ସାଙ୍ଗିନ୍କଆ। ଆଇଙ୍ଗ୍ ତୁମ୍ବ୍ଲିକକେ ଆମାଃ ଆୟାର୍ରେଇଙ୍ଗ୍ କୁଲ୍କଆ, ଓଡ଼ୋଃ ଆମାଃ ଆୟାର୍ଏତେ ହିବ୍ବୀୟ, କିନାନିୟ, ହିତ୍ତିୟକକେ ହାର୍ ସାଙ୍ଗିନ୍କଆ। ଆମାଃ ଆୟାର୍ ଏତେ ଇନ୍କୁକେ ମିଦ୍ ବାରାଷ୍ରେ କାଇଙ୍ଗ୍ ହାର୍ ଅଡଙ୍ଗ୍ କଆ କା'ରେଦ ଦିଶୁମ୍ ସିଃସଏଃକଆଃ ଓଡ଼ୋଃ ବିର୍ରେନ୍ ଜାଁତୁକ ଆମାଃ ବିରୁଧ୍ରେ ପସାଅଃଆ। ଆମ୍ ଆଉରି ପସା ଜାକେଦ୍ ଓଡ଼ୋଃ ଦିଶୁମ୍ ଆଉରି ଆକ୍ତେୟାର୍ ଜାକେଦ୍ ଇନ୍କୁକେ ମାଡ଼ି ମାଡ଼ିତେ ହାର୍ ଅଡଙ୍ଗ୍ କଆ। ଆଇଙ୍ଗ୍ ସୁଫ୍ ଦରେୟାଏତେ ପାଲେଷ୍ଟାଇନ୍ ହଡ଼କଆଃ ଦରେୟା ଜାକେଦ୍ ଓଡ଼ୋଃ ବିର୍ହେତେ ଇଉଫ୍ରାଟିସ୍ ଗାଡ଼ା ଜାକେଦ୍ ଆମାଃ ସିମ୍ନା ବାଇୟାଏ, ଚିୟାଃଚି ଏନ୍ ଦିଶୁମ୍ରେନ୍ ହଡ଼କକେ ଆମାଃ ତିଃଇରେ ଜିମାକଆ ଓଡ଼ୋଃ ଆମାଃ ଆୟାର୍ଏତେ ହାର୍ ଅଡଙ୍ଗ୍କଆ। ଆମ୍ ଇନ୍କୁଲଃ ଚାଏ ଇନ୍କୁଆଃ ମାହାପୁରୁକଲଃ ଜେତାନ୍ ରାଜିନାମା ଆଲମ୍ ରିକାୟା। ଆମ୍ ଇନ୍କୁକେ ଆମାଃ ଦିଶୁମ୍ରେ ତାଇନ୍ ନାଗେନ୍ତେ ଆଲମ୍ ଆଚୁକଆ କା'ରେଦ ଇନ୍କୁ ଆମ୍କେ ଆଇଁୟାଃ ବିରୁଧ୍ରେ ପାପ୍ ରିକା ନାଗେନ୍ତେ ଆଚୁମେୟାଁକ। ଓଡ଼ୋଃ ଆମ୍ ଇନ୍କୁଆଃ ମାହାପୁରୁକକେ ସେୱା ରିକାକରେ, ଏନା ଆମାଃ ନାଗେନ୍ତେ ଫାଁସ୍ରି ଲେକା ହବାଅଃଆ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.