Munda Bible
ହରାସେନ୍ପୁଥି 4
ପାର୍ମେଶ୍ୱାର୍ ମୁଶାକେ ଆକ୍ଦାନ୍ଦାଅ ପେଡ଼େଃ ଏମଃ
ଏନ୍ତେ ମୁଶା ପ୍ରାଭୁକେ କାଜିରୁହାଡ଼୍କିୟା, “ନେଲେମେ, ଇନ୍କୁ ଆଇଙ୍ଗ୍ରେ କାକ ବିଶ୍ୱାସେୟା, ଆଇଁୟାଃ କାଜି କାକ ଆୟୁମେୟା। ମେନ୍ଦ ଇନ୍କୁ କାଜିୟାଁକ, ‘ପ୍ରାଭୁ ଆମ୍ତାଃ କାଏ ଉଦ୍ବାକାନା।’”
ଏନ୍ତେ ପ୍ରାଭୁ ମୁଶାକେ କାଜିକିୟା, “ଆମାଃ ତିଃଇରେ ଚିନାଃ ମେନାଃ ?” ମୁଶା କାଜିରୁହାଡ଼୍କିୟାଏ, “ମିଆଁଦ୍ ସଟା।”
ପ୍ରାଭୁ କାଜିକିୟାଏ, “ସଟାକେ ଅତେରେ ହୁରାଙ୍ଗ୍ତାମେ।” ମୁଶା ସଟାକେ ଅତେରେ ହୁରାଙ୍ଗ୍ ତାନ୍ଲଃଗି, ସଟା ବିଙ୍ଗ୍ ବାଇୟାନା ଓଡ଼ୋଃ ମୁଶା ଏନ୍ତାଃଏତେ ନିର୍ୟାନା। ପ୍ରାଭୁ ମୁଶାକେ କାଜିକିୟା, “ଆମାଃ ତିଃଇ ଜିଲିଙ୍ଗ୍କେଦ୍ତେ ଇନିୟାଃ ଚାଆଃଲମ୍କେ ସାବେମେ।” ଏନ୍ତେ ମୁଶା ତିଃଇ ଜିଲିଙ୍ଗ୍କେଦ୍ତେ ବିଙ୍ଗ୍କେ ସାବ୍କିୟା ଓଡ଼ୋଃ ଆୟାଃ ତିଃଇରେ ଆଡଃମିସା ସଟା ବାଇୟାନା। ପ୍ରାଭୁ କାଜିକିୟାଏ, “ଏନ୍ ଲେକା ରିକାଏ ରେଦମ୍ ଇନ୍କୁ ବିଶ୍ୱାସ୍ ରିକାୟାକ ଯେ, ଆକଆଃ ପୁର୍ଖାହାଡ଼ାମ୍ ଆବ୍ରାହାମ୍, ଇସାକ୍ ଓଡ଼ୋଃ ଯାକୁବ୍ଆଃ ପାର୍ମେଶ୍ୱାର୍ ଆମାଃତାଃ ଉଦୁବାକାନାଏ।”
ଏନ୍ତେ ପ୍ରାଭୁ ମୁଶାକେ କାଜିକିୟା, “ଆମାଃ ତିଃଇକେ ତୁସିଙ୍ଗ୍ଲିଜାଃ ଭିତାର୍ ଇଦିକେଦ୍ତେ କୁଡ଼ାମ୍ରେ ଦହଏମେ।” ମୁଶା ଆୟାଃ ତିଃଇକେ କୁଡ଼ାମ୍ରେ ଦହକେଦ୍ତେ ବାହାରି ଅଡଙ୍ଗ୍କେଦାଏ ଇମ୍ତା ଆୟାଃ ତିଃଇ ନାଗେଘାଅରେ ବାରାଫ୍ ଲେକା ପୁଣ୍ଡିଗି ହବାୟାନା।
ପ୍ରାଭୁ କାଜିକିୟାଏ, “ଆମାଃ ତିଃଇକେ ଆଡଃମିସା ତୁସିଙ୍ଗ୍କାନ୍ ଲିଜାଃ ଭିତାର୍ ଇଦିକେଦ୍ତେ କୁଡ଼ାମ୍ରେ ଦହଏମେ।” ମୁଶା ଏନ୍ ଲେକାଗି ଆଡଃମିସା ତିଃଇ ତାୟାଃକେ କୁଡ଼ାମ୍ରେ ଦହକେଦ୍ତେ ଅଡଙ୍ଗ୍କେଦ୍ଚି ଆୟାଃ ତିଃଇ ସିଦା ଲେକାଗି ବୁଗିଲେକା ନେଲ୍ୟାନା। ଏନ୍ତେ ପ୍ରାଭୁ କାଜିକିୟାଏ, “ଆମ୍କେ ଇନ୍କୁ ପାହିଲା ଆକ୍ଦାନ୍ଦାଅ କାମିରାଃ ଚିହ୍ନା ରିକାକାଦ୍ତେୟାଃ ନେଲ୍କେଦ୍ତେ କାକ ବିଶ୍ୱାସ୍ମେ ରେଦ, ଏଟାଃ ଆକ୍ଦାନ୍ଦାଅ କାମିରାଃ ଚିହ୍ନାଁରେ ବିଶ୍ୱାସ୍ମେୟାଁକ। ମେନ୍ଦ ନେ ବାରାନ୍ ଆକ୍ଦାନ୍ଦାଅ କାମିରାଃ ଚିହ୍ନା ନେଲ୍କେତେୟଗି, ଇନ୍କୁ କାକ ବିଶ୍ୱାସେୟା ରେଦ, ଚାଏ ଆମାଃ କାଜିରେ କାକ ଆୟୁମେରେଦ, ନିଲ୍ ନାହିଁରାଃ କାଟିଃଲେକା ଦାଆଃ ଆଉକେଦ୍ତେ ରହଡ଼୍ ଅତେରେ ଦୁଲେମେ ଓଡ଼ୋଃ ଏନ୍ ଦାଆଃ ମାୟୋମ୍ ହବାକେନଃଆ।”
ମେନ୍ଦ ମୁଶା ପ୍ରାଭୁ ପାର୍ମେଶ୍ୱାର୍କେ କାଜିକିୟା, “ହେ ପ୍ରାଭୁ, ଆଇଙ୍ଗ୍ ବୁଗିନ୍ କାଜି ଦାଡ଼ିନିଃ ନାହାଁଲାଇଙ୍ଗ୍, ଓଡ଼ୋଃ ସିଦା ହଗି ଚିଉଲାଅ କାଇଙ୍ଗ୍ କାଜିକାଦା। ଆମ୍ ଆଇଙ୍ଗ୍ଲଃ ଜାଗାର୍କେଦ୍ ତାୟମ୍ତେ ହଗି ଆଇଙ୍ଗ୍ ବୁଗିନ୍ କାଜି ଦାଡ଼ିନିଃ ନାହାଁଲିଙ୍ଗ୍। ଆଇଙ୍ଗ୍ କାଜି କା ଦାଡ଼ିନିଃ ତାନିଙ୍ଗ୍, ଓଡ଼ୋଃ ତଥ ଲେକା ଜାଗାର୍ରାଃଇଙ୍ଗ୍।”
ପ୍ରାଭୁ ପାର୍ମେଶ୍ୱାର୍ ମୁଶାକେ କାଜିକିୟା, “ଅକଏ ହଡ଼ରାଃ ମଚା ବାଇୟାକାଦାଏ ? ଓଡ଼ୋଃ ଅକଏ ଇନିଃକେ କନ୍ଦା, ଭାଏଁରା ଓଡ଼ୋଃ କାଣାଁ ରିକାଇନିଃ ତାନିଃ ? ଚିଆଃ ଆଇଙ୍ଗ୍ ପ୍ରାଭୁ ଇନିଃକେ କାଇଙ୍ଗ୍ ରିକାଃ ? ନାହାଁଃ, ଆମ୍ ଜୁଃ ସେନଃମେ, ଆଇଙ୍ଗ୍ ଆମ୍କେ ଜାଗାର୍ ରିକା ନାଙ୍ଗ୍ ପେଡ଼େଃ ଏମାମେୟାଇଙ୍ଗ୍ ଓଡ଼ୋଃ ଚିନାଃ କାଜିୟାମେ, ଏନା ଆଇଙ୍ଗ୍ ଆମ୍କେ ଉଦୁବାମେୟାଇଙ୍ଗ୍।”
ମେନ୍ଦ ମୁଶା କାଜିରୁହାଡ଼୍କିୟାଏ, “ହେ ପ୍ରାଭୁ, ଦାୟାକେଦ୍ତେ ଆମ୍ ଏଟାଃନିଃକେ କୁଲିମେ।”
ଏନ୍ତେ ପ୍ରାଭୁ ମୁଶାକେ ଖିସ୍କେଦ୍ତେ କାଜିକିୟା, “ଚିଆଃ ଆମାଃ ହାଗା ହାରୁନ୍ ଲେବୀ କିଲିରେନ୍ ନାହାଁଃଲିଃ ? ଇନିଃ ବୁଗିନ୍ କାଜି ଦାଡ଼ିନିଃ ତାନିଃ ମେନ୍ତେଇଙ୍ଗ୍ ସାରିତାନା। ନେଲେମେ, ଇନିଃ ଆମାଃଲଃ ନେପେଲ୍ ନାଙ୍ଗ୍ ହିଜୁଃତାନାଏ ଓଡ଼ୋଃ ଆମ୍କେ ନେଲ୍କେଦ୍ତେ ରାସ୍କାଅଃଆ। ଆମ୍ ଇନିଃକେ ସବେନ୍ କାଜି କାଜିୟାଇମେ ଓଡ଼ୋଃ ଜାଗାର୍ତେୟାଃ ଉଦୁବାଇମେ। ଜାଗାର୍ ନାଗେନ୍ତେ ଆଇଙ୍ଗ୍ ଆବେନ୍ ବାରାନ୍କିନ୍କେ ଦେଙ୍ଗାବେନାଃଇଙ୍ଗ୍ ଓଡ଼ୋଃ ଚିନାଃ ରିକା ଲାଗାତିୟାଁଃ ଏନା ଇତୁବେନାଇଙ୍ଗ୍। ଇନିଃ ଆମାଃ ସାଃଏତେ ଆଇଁୟାଃ ହଡ଼କଲଃ ଜାଗାର୍ରେୟାଏ। ଇନିଃ ଆମ୍ କାଜିତେୟାଃ କାଜିୟାଏ ଓଡ଼ୋଃ ଆମ୍ ଆୟାଃତାଃରେ ପାର୍ମେଶ୍ୱାର୍ଆଃ କାଜିନିଃ ହବାଅଃଆମ୍। ମେନ୍ଦ ଆମ୍ ଆମାଃ ନେ ସଟାକେ ତିଃଇରେ ସାବ୍କେଦ୍ତେ ସେନଃମେ ଓଡ଼ୋଃ ନେଆଁ ହରାତେ ଆକ୍ଦାନ୍ଦାଅ କାମିରାଃ ଚିହ୍ନାକ ରିକାଏୟାମେ।”
ମୁଶାରାଃ ମିସାର୍ ଦିଶୁମ୍ତେ ହିଜୁଃରୁହାଡ଼୍
ଏନ୍ତେ ମୁଶା ଆୟାଃ ହୟାଁର୍ ଯିଥ୍ରୋତାଃ ରୁହାଡ଼୍କେଦ୍ତେ କାଜିକିୟା, “ମିସାର୍ରେ ଆଇଁୟାଃ କୁଟୁମ୍ କୁପୁଲ୍କ ତିସିଙ୍ଗ୍ ଜାକେଦ୍ ମେନାକଆଚି ବାନଃ, ଏନା ନେଲ୍ ନାଗେନ୍ତେ ଦାୟାକେଦ୍ତେ ଆଇଙ୍ଗ୍କେ ସେନ୍ ଇଚିଙ୍ଗ୍ମେ।” ଯିଥ୍ରୋ କାଜିକିୟାଏ, “ଆଶିଷ୍ମେ ତାନାଇଙ୍ଗ୍ ଜୀଉସୁକୁତେ ସେନଃମେ।”
ପ୍ରାଭୁ ମିଦିୟନ୍ ଦିଶୁମ୍ରେ ମୁଶାକେ କାଜିକାଇ ତାଇକେନା, “ମିସାର୍ ଦିଶୁମ୍ତେ ରୁହାଡ଼୍ ନାଙ୍ଗ୍ ଆଲମ୍ ବରଏୟା। ଅକନ୍କ ଆମ୍କେ ଗଗଏଃ ସାନାଙ୍ଗ୍ ତାଇକେନାକ ଇନ୍କୁ ଗଏଃୟାନାକ।” ଏନ୍ତେ ମୁଶା ଆୟାଃ କୁଡ଼ି ଓଡ଼ୋଃ ହନ୍କକେ ଗାଧା ଚେତାନ୍ରେ ଦୁବ୍କେଦ୍ତେ ମିସାର୍ ଦିଶୁମ୍ତେ ସେନଃ ନାଙ୍ଗ୍ ଅଡଙ୍ଗ୍ୟାନାଏ ଓଡ଼ୋଃ ଆୟାଃ ତିଃଇରେ ପାର୍ମେଶ୍ୱାର୍ଆଃ ଏନ୍ ସଟା ସାବ୍କେଦ୍ତେ ରୁହାଡ଼୍ୟାନା।
ପ୍ରାଭୁ ମୁଶାକେ କାଜିକିୟା, “ଆମ୍କେ ଅକ ଆକ୍ଦାନ୍ଦାଅ କାମି ରିକା ନାଙ୍ଗ୍ ପେଡ଼େଃ ଏମାକାଦ୍ମାଇଙ୍ଗ୍, ମିସାର୍ ଦିଶୁମ୍ତେ ରୁହାଡ଼ାଃମେ ଇମ୍ତା ଏନ୍ ସବେନ୍ କାମି ଫାରୋରାଃ ଆୟାର୍ରେ ରିକାଏମେ, ମେନ୍ଦ ଇନିଃ ହଡ଼କକେ କାଏ ସେନ୍ ଇଚିକଆ ଚିଆଃଚି ଆଇଙ୍ଗ୍ ଇନିୟାଃ ମନ୍ସୁରୁଦ୍କେ କେଟେଃ ରିକାଏୟାଇଙ୍ଗ୍।” ଏନ୍ତେ ଆମ୍ ଫାରୋକେ କାଜିମେ, “ପ୍ରାଭୁ ନେ'ଲେକା କାଜିତାନାଏ, ‘ଇସ୍ରାଏଲ୍ ଆଇଁୟାଃ ମୁତ୍କୁଲ୍ ହନ୍ ତାନିଃ, ଆଇଁୟାଃ ସୁନୁସାର୍ କାମି ରିକା ନାଙ୍ଗ୍ ସେନ୍ ଇଚିମେ ମେନ୍ତେଇଙ୍ଗ୍ କାଜିକାଦ୍ମା। ମେନ୍ଦ ଆମ୍ ଇନିଃକେ କାମ୍ ସେନ୍ ଇଚିରେଦ, ଆଇଙ୍ଗ୍ ଆମାଃ ମୁତ୍କୁଲ୍ ହନ୍କେ ଗଏଃତାଇୟାଇଙ୍ଗ୍।’”
ହରାସେନ୍ ଇମ୍ତା ମୁଶା ମିଆଁଦ୍ ତାଇନଃ ଠାୟାଦ୍ରେ ରୁଡ଼ୁୟାନା। ଏନ୍ତାଃରେ ପ୍ରାଭୁ ମୁଶାକେ ନେଲ୍କେଦ୍ତେ ଗଏଃ ନାଙ୍ଗ୍ ଚେଷ୍ଟାକେଦାଏ। ନେଆଁ ନେଲ୍କେଦ୍ତେ ସିପୋରା ମିଆଁଦ୍ ଲେସେର୍ ଦିରି ସାବ୍କେଦ୍ଲଃ ଆୟାଃ ହନ୍ତେକଡ଼ାକେ ଖାତ୍ନାଅକିୟା ଓଡ଼ୋଃ ମୁଶାରାଃ କାଟାରେ ଜୁଟିଦ୍କେଦ୍ଲଃ କାଜିକିୟାଏ, “ସାର୍ତିଗି ଆମ୍ ଆଇଁୟାଃ ଦୁଲାଡ଼୍ କଡ଼ା ତାନ୍ମେ।” ଏନ୍ତେ ପ୍ରାଭୁ ମୁଶାକେ ବାଗିକିୟା। ନେ ଖାତ୍ନାଅରାଃ ନିୟାମ୍ ହରାତେ ସିପୋରା କାଜିକାଦ୍ ତାଇକେନାଏ, “ଆମ୍ ଦୁଲାଡ଼୍ କଡ଼ା ତାନ୍ମେ।”
ଏନ୍ତେ ପ୍ରାଭୁ ହାରୁନ୍କେ କାଜିକିୟା, “ଆମ୍ ମୁଶାଲଃ ନେପେଲ୍ ନାଙ୍ଗ୍ ବିର୍ତେ ସେନଃମେ।” ଏନ୍ତେ ହାରୁନ୍ ପାର୍ମେଶ୍ୱାର୍ଆଃ ବୁରୁତେ ସେନଃୟାନ୍ଲଃ, ଏନ୍ତାଃରେ ମୁଶାଲଃ ନେପେଲ୍ୟାନାଏ ଓଡ଼ୋଃ ଇନ୍କିନ୍ ମିହୁଡ଼୍ ଆଡଃମିହୁଡ଼୍ଲଃ ଚଅଃୟାନାକିନ୍। ପ୍ରାଭୁ ପାର୍ମେଶ୍ୱାର୍ ମୁଶାକେ ଅକ୍ନାଃ ଜାଗାର୍ ନାଙ୍ଗ୍ କୁଲାକାଇ ତାଇକେନାଏ ଓଡ଼ୋଃ ଅକ ଆକ୍ଦାନ୍ଦାଅ କାମିରାଃ ଚିହ୍ନା ରିକା ନାଙ୍ଗ୍ ଆଚୁକାଇ ତାଇକେନାଏ, ଏନ୍ ସବେନ୍ ବିଷାଏ ମୁଶା ହାରୁନ୍କେ ଉଦୁବ୍କିୟା।
ଏନ୍ତେ ମୁଶା ଓଡ଼ୋଃ ହାରୁନ୍ ସେନ୍କେଦ୍ତେ ଇସ୍ରାଏଲ୍ରେନ୍ ପ୍ରାଚିନ୍କକେ ହୁଣ୍ଡିକେଦ୍ କଆକିନ୍। ପ୍ରାଭୁ ମୁଶାକେ କାଜିକାଇ ସବେନ୍ କାଜି, ହାରୁନ୍ ଇସ୍ରାଏଲ୍ରେନ୍ ସବେନ୍ ହଡ଼କକେ କାଜିକେଦ୍କଆ ଓଡ଼ୋଃ ଇନ୍କୁଆଃ ଆୟାର୍ରେ ଆକ୍ଦାନ୍ଦାଅ କାମିରାଃ ଚିହ୍ନାକ ରିକାକେଦା। ନେଆଁ ହରାତେ ହଡ଼କ ବିଶ୍ୱାସ୍କେଦାକ ଓଡ଼ୋଃ ପ୍ରାଭୁ ଇସ୍ରାଏଲ୍ ହଡ଼କ ନାଙ୍ଗ୍ ଉଡ଼ୁଃତାନାଏ ଓଡ଼ୋଃ ଆକଆଃ ଦୁକୁ ସାସାତି ନେଲାକାଦାଏ ମେନ୍ତେ ଇନ୍କୁ ଆୟୁମ୍କେଦାକ ଇମ୍ତା, ଇନ୍କୁ ବହଃ ତିରୁବ୍କେଦ୍ତେ ଆୟାଃ ସେୱା ରିକାକେଦାକ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.