Munda Bible
ହରାସେନ୍ପୁଥି 3
ମୁଶାକେ ପାର୍ମେଶ୍ୱାର୍ଆଃ କେନେଡ଼ା
ଏନ୍ ଦିପିଲିରେ ମୁଶା ମିଦିୟନ୍ରେନ୍ ଆୟାଃ ହୟାଁର୍ ଯିଥ୍ରୋ ନୁତୁମ୍ ଯାଜାକ୍ରାଃ ମିଣ୍ଡିକକେ ଗୁପି ତାଇକେନା। ମୁସିଙ୍ଗ୍ ଇନିଃ ଗୋଟ୍କକେ ବିର୍ ପାରମ୍କେଦ୍ତେ ପାର୍ମେଶ୍ୱାର୍ଆଃ ବୁରୁ ହୋରେବ୍ତେ ସେଟେର୍ୟାନା। ଏନ୍ତାଃରେ ପ୍ରାଭୁଆଃ ମିଆଁଦ୍ ଦୁଁତ୍ ଚୁପାଦ୍ରାଃ ସେଙ୍ଗେଲ୍ ଜୁନୁଲ୍ରେ ମୁଶାତାଃରେ ଉଦୁବେନ୍ୟାନା। ମୁଶା ଏନ୍ ଚୁପାଦ୍କେ ଜୁଲଃତାନ୍ ନେଲ୍କେଦା, ମେନ୍ଦ ଏନ୍ ଚୁପାଦ୍ କା ଅଣ୍ଡରଃତାନା। ଏନ୍ତେ ମୁଶା କାଜିକେଦାଏ, “ଆଇଙ୍ଗ୍ ହେପାଦ୍ତେ ସେନ୍ୟାନ୍ଲଃ ନେ ଆକ୍ଦାନ୍ଦାଅ ବିଷାଏକେ ନେଲେୟାଇଙ୍ଗ୍, ଚୁପାଦ୍ ଚିଲ୍କାତେ କା ଅଣ୍ଡରଃତାନା।”
ପ୍ରାଭୁ ମୁଶାକେ ଚୁପାଦ୍ ହେପାଦ୍ତେ ହିଜୁଃତାନ୍ ନେଲ୍କେଦ୍ତେ ପାର୍ମେଶ୍ୱାର୍ ଚୁପାଦ୍ଏତେ ମୁଶାକେ କାଜିକିୟା, “ଏ ମୁଶା, ଏ ମୁଶା !”
ମୁଶା କାଜିରୁହାଡ଼୍କିୟାଏ, “ହେ ପ୍ରାଭୁ ଆଇଙ୍ଗ୍ ନେତାଃରେ ମେନାଇୟାଁ।”
ଏନ୍ତେ ଇନିଃ କାଜିକିୟାଏ, “ଆମ୍ ନେ ହେପାଦ୍ତେ ଆଲମ୍ ହିଜୁଃଆ, ଆମାଃ କାଟାହେତେ ଖାର୍ପାତାମାଃ ହଲେଜେମେ, ଚିୟାଃଚି ଆମ୍ ଅକ ଠାୟାଦ୍ରେ ତିଙ୍ଗୁଆକାନାମ୍ ଏନା ପାବିତାର୍ ଅତେ ତାନାଃ।” ଇନିଃ ଆଡଃଗି କାଜିକିୟାଏ, “ଆଇଙ୍ଗ୍ ଆମାଃ ପୁର୍ଖାହାଡ଼ାମ୍କଆଃ ପାର୍ମେଶ୍ୱାର୍, ଆବ୍ରାହାମ୍, ଇସାକ୍, ଓଡ଼ୋଃ ଯାକୁବ୍ଆଃ ପାର୍ମେଶ୍ୱାର୍ ତାନିଙ୍ଗ୍।” ମୁଶା ଆୟାଃ ମେଦ୍ମୁହାଁଡ଼୍କେ ହାରୁବ୍କେଦା, ଚିଆଃଚି ଇନିଃ ପାର୍ମେଶ୍ୱାର୍କେ ନେଲ୍ ନାଗେନ୍ତେ ବରକେଦା।
ଏନ୍ତେ ପ୍ରାଭୁ ପାର୍ମେଶ୍ୱାର୍ କାଜିକେଦାଏ, “ଆଇଙ୍ଗ୍ ମିସାର୍ ଦିଶୁମ୍ରେ ତାଇନ୍ତାନ୍ ଆଇଁୟାଃ ହଡ଼କଆଃ ସାସାତିକେ ନେଲାକାଦାଇଙ୍ଗ୍ ଓଡ଼ୋଃ ରାଇଜ୍ ଚାଲାଅତାନ୍କଆଃ ସିଗିଦ୍ ହରାତେ ଇନ୍କୁଆଃ ରାନାଃ ଆୟୁମ୍କାଦାଇଙ୍ଗ୍। ଆଇଙ୍ଗ୍ ଇନ୍କୁଆଃ ହାସୁ ଦୁକୁ ସାରିକାଦାଇଙ୍ଗ୍। ଏନାମେନ୍ତେ ଆଇଙ୍ଗ୍ ଇନ୍କୁକେ ମିସାର୍ରେନ୍ ହଡ଼କଆଃ ତିଃଇଏତେ ବାଞ୍ଚାଅକଆଇଙ୍ଗ୍। ଆଇଙ୍ଗ୍ ମିସାର୍ ଦିଶୁମ୍ଏତେ ଇନ୍କୁକେ ଅଡଙ୍ଗ୍ ଆଉକେଦ୍କଲଃ ମିଆଁଦ୍ ବୁଗିନ୍ ଦିଶୁମ୍ତେ ଇଦିକଆଇଙ୍ଗ୍। ଏନା ତଆ ହୁରୁମ୍ସୁକୁ ଲିଙ୍ଗିୟଃତାନ୍ ଦିଶୁମ୍ତାନାଃ, ଏନ୍ତାଃରେ ଜେତା ହାସୁ ଦୁକୁ କା ତାଇନାଃ। ଏନା କିନାନିୟ, ହିତ୍ତିୟ, ଇମୋରିୟ, ପିରିଷିୟ, ହିବ୍ବୀୟ ଓଡ଼ୋଃ ଯିବୁଷିୟ ହଡ଼କ ତାଇନଃତାନ୍ ଠାୟାଦ୍ ତାନାଃ। ଆଇଙ୍ଗ୍ ଇସ୍ରାଏଲ୍ ହଡ଼କଆଃ ରାନାଃ ଆୟୁମ୍କାଦାଇଙ୍ଗ୍, ଓଡ଼ୋଃ ମିସାର୍ରେନ୍ ହଡ଼କ ଇନ୍କୁଆଃ ଚେତାନ୍ରେ ଅକ କା ସାହାତିଙ୍ଗ୍ କାମି ରିକାକାଦାକ, ଏନା ଆଇଙ୍ଗ୍ ନେଲାକାଦିଙ୍ଗ୍। ଆଇଙ୍ଗ୍ ଆମ୍କେ ଫାରୋତାଃ କୁଲ୍ମେତାନାଇଙ୍ଗ୍ ଓଡ଼ୋଃ ଆଇଁୟାଃ ଇସ୍ରାଏଲ୍ ହଡ଼କକେ ଏନ୍ ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକମେ।”
ମେନ୍ଦ ମୁଶା ପାର୍ମେଶ୍ୱାର୍କେ କାଜିକିୟା, “ଆଇଙ୍ଗ୍ ଅକଏ ତାନିଙ୍ଗ୍ ଯେ ଫାରୋଆଃ ହେପାଦ୍ ସେନ୍କେଦ୍ତେ ଇସ୍ରାଏଲ୍ ହଡ଼କକେ ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକଆଇଙ୍ଗ୍ ?”
ପାର୍ମେଶ୍ୱାର୍ କାଜିକେଦାଏ, “ଆଇଙ୍ଗ୍ ଆମାଃଲଃ ତାଇନାଇଙ୍ଗ୍, ଆଇଙ୍ଗ୍ ଆମ୍କେ କୁଲ୍ମେତାନାଇଙ୍ଗ୍, ଏନାରାଃ ଚିହ୍ନା ନେଆଁତାନାଃ, ମିସାର୍ଏତେ ଆଇଁୟାଃ ହଡ଼କକେ ବାଞ୍ଚାଅ ଆଉକେଦ୍କ ତାୟମ୍ତେ, ଆପେ ନେ ବୁରୁରେ ପାର୍ମେଶ୍ୱାର୍ଆଃ ସେୱା ଓଡ଼ୋଃ ସୁନୁସାର୍ କାମି ରିକାୟାପେ।”
ମେନ୍ଦ ମୁଶା ପାର୍ମେଶ୍ୱାର୍କେ କାଜିକିୟା, “ଆଇଙ୍ଗ୍ ଇସ୍ରାଏଲ୍ ହଡ଼କଆଃ ହେପାଦ୍ ସେନ୍କେଦ୍ତେ ଇନ୍କୁକେ ଆପେୟାଃ ପୁର୍ଖାହାଡ଼ାମ୍କଆଃ ପାର୍ମେଶ୍ୱାର୍ ଆଇଙ୍ଗ୍କେ ଆପେତାଃ କୁଲାକାଦିୟାଁ ମେନ୍ତେ କାଜିକରେଦ, ଇନ୍କୁ ଆଇଙ୍ଗ୍କେ କୁଲିୟାଁକ, ଇନିୟାଃ ନୁତୁମ୍ ଚିନାଃ ତାନାଃ ? ଇମ୍ତା ଆଇଙ୍ଗ୍ ଇନ୍କୁକେ ଚିନାଃ କାଜିରୁହାଡ଼୍କଆଇଙ୍ଗ୍ ?”
ପାର୍ମେଶ୍ୱାର୍ ମୁଶାକେ କାଜିକିୟା, “ଆଇଙ୍ଗ୍ ଆଇଙ୍ଗ୍ଗି ତାନିଙ୍ଗ୍। ଆମ୍ ଇସ୍ରାଏଲ୍ ହଡ଼କକେ କାଜିକମ୍, ‘ଇନିଃ ଇନିଃଗି ତାନିଃ, ଓଡ଼ୋଃ ଆଇଙ୍ଗ୍କେ ଆପେତାଃ କୁଲାକାଦିୟାଁଏ।’” ପାର୍ମେଶ୍ୱାର୍ ମୁଶାକେ ଆଡଃଗି କାଜିକିୟା, “ଆମ୍ ଇସ୍ରାଏଲ୍ ହଡ଼କକେ କାଜିକମ୍, ‘ଆପେୟାଃ ପୁର୍ଖାହାଡ଼ାମ୍କଆଃ ପାର୍ମେଶ୍ୱାର୍, ଆବ୍ରାହାମ୍ଆଃ ପାର୍ମେଶ୍ୱାର୍, ଇସାକ୍ଆଃ ଓଡ଼ୋଃ ଯାକୁବ୍ଆଃ ପାର୍ମେଶ୍ୱାର୍ ଅକଏଚି ପ୍ରାଭୁ ତାନିଃ, ଇନିଃଗି ଆଇଙ୍ଗ୍କେ ଆପେତାଃ କୁଲାକାଦିୟାଁ। ଆଇଁୟାଃ ନେ ନୁତୁମ୍ ଜାନାଅ ଜାନାଅରାଃ ନୁତୁମ୍ ତାନାଃ। ନେ ନୁତୁମ୍ ହରାତେ ଆଇଙ୍ଗ୍ ପିଢ଼ି ପିଢ଼ି ଜାକେଦ୍ ପାହାମଃଆଇଙ୍ଗ୍।’
“ଜୁ, ସେନଃମେ ଓଡ଼ୋଃ ଇସ୍ରାଏଲ୍ରେନ୍ ଆଗୁଆଇକକେ କେଡ଼ାହୁଣ୍ଡିକେଦ୍ତେ ନେ'କାଜି କାଜିକମେ, ‘ପ୍ରାଭୁ, ଆପେୟାଃ ପୁର୍ଖାହାଡ଼ାମ୍କଆଃ ପାର୍ମେଶ୍ୱାର୍, ଆବ୍ରାହାମ୍, ଇସାକ୍ ଓଡ଼ୋଃ ଯାକୁବ୍ଆଃ ପାର୍ମେଶ୍ୱାର୍ ଆଇଁୟାଃତାଃରେ ଉଦୁବେନ୍ୟାନା’ ଓଡ଼ୋଃ କାଜିକିୟାଁ, ‘ମିସାର୍ରେନ୍ ହଡ଼କ ଆପେୟାଃ ଚେତାନ୍ରେ ରିକାତାନ୍ ବିଷାଏକ ନେଲାକାଦାଇଙ୍ଗ୍। ଆଇଙ୍ଗ୍ ଆପେକେ ମିସାର୍ରେନ୍ ହଡ଼କଆଃ ସାସାତିହେତେ ବାଞ୍ଚାଅକେଦ୍ତେ ଆଉ ନାଙ୍ଗ୍ କିରିୟାକାଦାଇଙ୍ଗ୍, ଓଡ଼ୋଃ ଆପେକେ କିନାନିୟ, ହିତ୍ତିୟ, ଇମୋରିୟ, ପିରିଷିୟ, ହିବ୍ବୀୟ ଓଡ଼ୋଃ ଯିବୁଷିୟ ହଡ଼କଆଃ ଦିଶୁମ୍ତେ ଇଦିପେୟାଇଙ୍ଗ୍, ଏନ୍ ଦିଶୁମ୍ ତଆ ହୁରୁମ୍ସୁକୁ ଲିଙ୍ଗିୟଃତାନ୍ ଦିଶୁମ୍ ତାନାଃ।’
“ଇସ୍ରାଏଲ୍ରେନ୍ ପ୍ରାଚିନ୍କ ଆମାଃ କାଜି ଆୟୁମେୟାକ। ଏନ୍ତେ ଆମ୍ ଓଡ଼ୋଃ ପ୍ରାଚିନ୍କଲଃ ମିସାର୍ରେନ୍ ରାଜା ଫାରୋତାଃ ସେନ୍କେଦ୍ତେ କାଜିପେ, ‘ଏବ୍ରୀ ହଡ଼କଆଃ ପ୍ରାଭୁ ପାର୍ମେଶ୍ୱାର୍ଲଃ, ଆଲେୟାଃ ନେପେଲ୍ ହବାକାନା। ଏନାମେନ୍ତେ ବିନ୍ତିମେ ତାନାଲେ, ନାହାଁଃ ଆଲେୟାଃ ପ୍ରାଭୁ ପାର୍ମେଶ୍ୱାର୍ଆଃ ଉଦ୍ଦେଶ୍ରେ ଦାଣେଁ ରାକାବ୍ ନାଙ୍ଗ୍ ବିର୍ତେ ଆପିମାରେୟାଃ ହରା ଆଲେକେ ସେନ୍ ରିକାଲେମ୍। ମେନ୍ଦ ଆଇଙ୍ଗ୍ ସାରିତାନାଇଙ୍ଗ୍ ପୁରାଃ ପେଡ଼େୟାନ୍ନିଆଃ ତିଃଇ, ମିସାର୍ରେନ୍ ରାଜାରାଃ ବିରୁଧ୍ରେ ଆଉରି ବିରିଦ୍ ଜାକେଦ୍ ଇନିଃ ଆପେକେ କାଏ ସେନ୍ଇଚିପେୟା। ଏନାମେନ୍ତେ ଆଇଙ୍ଗ୍ ତିଃଇ ଜିଲିଙ୍ଗ୍କେଦ୍ଲଃ ପୁରାଃ ଆକ୍ଦାନ୍ଦାଅ କାମିକ ରିକାକେଦ୍ତେ ମିସାର୍ରେନ୍ ହଡ଼କକେ ସାସାତି ରିକାକଆଇଙ୍ଗ୍। ଏନ୍ତେ ଇନିଃ ଆପେକେ ସେନ୍ ଇଚିପେୟା।
“‘ଆପେ ମିସାର୍ଏତେ ଅଡଙ୍ଗ୍ ଇମ୍ତା ସାମା ତିଃଇଗି ଆଲପେ ସେନ୍ ମେନ୍ତେ ଆଇଙ୍ଗ୍ ମିସାର୍ରେନ୍ ହଡ଼କକେ ଆପେୟାଃ ନାଙ୍ଗ୍ ଲିବୁଇ ରିକା ଇଚିକଆଇଙ୍ଗ୍। ସବେନ୍ ଇସ୍ରାଏଲ୍ରେନ୍ କୁଡ଼ି, ଆୟାଃ ଆପ୍ନାଃ ହପର୍ଜାପାଃରେନ୍ କୁଡ଼ି ଓଡ଼ୋଃ ଆୟାଃ ଅଡ଼ାଃରେ ତାଇନ୍ତାନ୍ କୁଡ଼ିତାଃଏତେ ସୋନା, ରୁପା ଓଡ଼ୋଃ ଗନଙ୍ଗ୍ଆଁନ୍ ଲିଜାଃ ଆସି ଇଦିୟାଏ। ଏନ୍ତେ ଇନିଃ ଆମ୍କେ ଓଡ଼ୋଃ ଆମାଃ ହନ୍ଗାଁଣାକକେ ଏନ୍ ସବେନାଃଏ ତୁସିଙ୍ଗ୍କଆ। ନେ ଲେକାତେ ଆପେ ମିସାର୍ରେନ୍ ହଡ଼କକେ ରେଃକ୍କଆପେ।’”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.