Munda Bible
ହରାସେନ୍ପୁଥି 2
ମୁଶାରାଃ ଜାନାମ୍
ନେ ଦିପିଲିରେ ଲେବୀ କିଲିରେ ମିଆଦ୍ କଡ଼ା, ଲେବୀ କିଲିରେନ୍ ମିଆଦ୍ କୁଡ଼ିକେ ଆଣ୍ଦିୟାନା। ଓଡ଼ୋଃ ଏନ୍ କୁଡ଼ିରାଃ ହାମ୍ବାଲ୍ରୋୱା ହବାୟାନା ଓଡ଼ୋଃ ମିଆଦ୍ କଡ଼ାହନ୍ ଜାନାମ୍କିୟାଏ। ଏନ୍ କଡ଼ାହନ୍ ସୁଗାଡ଼ାନ୍ଗି ନେଲଃ ତାଇକେନା, ଏନାମେନ୍ତେ ଇନିଃକେ ଆପି ମାହିନା ଜାକେଦ୍ ଉକୁକେଦ୍ତେ ଦହକିୟା। ମେନ୍ଦ ଇନିଃ ଏନ୍ ହନ୍କେ ଥିମ୍ବା ମାହା ଜାକେଦ୍ ଉକୁ କାଏ ଦାଡ଼ିକିଃ ହରାତେ ଇନିଃ ମିଆଁଦ୍ ଖାନ୍ଚି1 ବାଇକେଦ୍ତେ ଏନାରାଃ ଚେତାନ୍ରେ ଜାୟାର୍ ଲେକାନ୍ ସସେଃକ୍ ଜଲମ୍କେଦାଏ ଓଡ଼ୋଃ ଏନାରେ ହନ୍କେ ମାଣ୍ଡାଅକେଦ୍ତେ ନିଲ୍ ନାହିଁ ଦରେୟା ଗେନାରାଃ ସାଉଁଣି ଥାଲାରେ ଦହକିୟା। ଏନ୍ ହନ୍ରାଃ ଦାସା ଚିନାଃ ହବାଅଃଆ ଏନାକେ ନେଲ୍ ନାଗେନ୍ତେ ଏନ୍ ହନ୍ରାଃ ମିଶିତେ ସାଙ୍ଗିନ୍ରେ ତିଙ୍ଗୁକେଦ୍ତେ ନେଲ୍ ତାଇକେନା।
ଫାରୋ ରାଜାରାଃ ହନ୍ତେକୁଡ଼ି ଉମିନ୍ ନାଙ୍ଗ୍ ନିଲ୍ ନାହିଁତେ ସେନ୍କେନା ଓଡ଼ୋଃ ଆୟାଃ କାମ୍ଡ଼ି କୁଡ଼ିକ ନାହିଁ ଗେନାରେ ସେନ୍ବାଡ଼ା ତାଇକେନାକ, ଇମ୍ତାଙ୍ଗ୍ ଇନ୍କୁ ଏନ୍ ଖାନ୍ଚିକେ ଜିମ୍ତୁ ଥାଲାରେ ନେଲ୍କେଦାକ ଓଡ଼ୋଃ ଏନାକେ ଆଉ ନାଗେନ୍ତେ ଆୟାଃ ଦାସି କୁଡ଼ିକେ କୁଲ୍କିୟା। ରାଜାରାଃ ହନ୍ତେକୁଡ଼ି ଏନାକେ ଅଟାଃଆ କେଦାଏ ଓଡ଼ୋଃ ମିଆଦ୍ କଡ଼ାହନ୍କେ ନେଲ୍କିୟାଏ। ଏନ୍ ହନ୍ ରାଆଃ ତାଇକେନାଏ, ଏନାମେନ୍ତେ ଆୟାଃ ଚେତାନ୍ରେ ଦାୟାକେଦ୍ତେ କାଜିକେଦା, “ନିଃ ମିଆଦ୍ ଏବ୍ରୀ ହନ୍ ତାନିଃ।”
ଏନ୍ତେ ହନ୍ଆଃ ମିଶିତେ ଫାରୋରାଃ ହନ୍କୁଡ଼ିତାଃ ସେନ୍କେଦ୍ତେ କାଜିକିୟା, “ଆଇଙ୍ଗ୍ ନେ ହନ୍କେ ତଆ ଆନୁ ନାଙ୍ଗ୍ ମିଆଁଦ୍ ଏବ୍ରୀ ଏଙ୍ଗାକେ କେଡ଼ା ଆଉ ନାଙ୍ଗ୍ ସେନାଇଙ୍ଗ୍ଚି ?”
ଫାରୋରାଃ ହନ୍ତେକୁଡ଼ି କାଜିକିୟାଏ, “ହଁ, ଜୁ ସେନ୍ମେ।” ଏନ୍ତେ ଏନ୍ କୁଡ଼ି ସେନ୍ୟାନ୍ଲଃ ହନ୍ଆଃ ଏଙ୍ଗାତେକେ କେଡ଼ାଆଉକିୟା। ଫାରୋରାଃ ହନ୍ତେକୁଡ଼ି ଏନ୍ କୁଡ଼ିକେ କାଜିକିୟା, “ଆମ୍ ନେ ହନ୍କେ ଆଇଙ୍ଗ୍ ନାଙ୍ଗ୍ ତଆ ଆନୁଇମେ, ଆଇଙ୍ଗ୍ ଆମ୍କେ ଗନଙ୍ଗ୍ ଏମାମେୟାଇଙ୍ଗ୍।” ଏନାରେ ଏନ୍ କୁଡ଼ି ହନ୍କେ ଇଦିକେଦ୍ତେ ତଆ ଆନୁକିୟାଏ। ଚିମ୍ତାଙ୍ଗ୍ କଡ଼ାହନ୍ ହାରା ଦାଡ଼ିୟାନା, ଏନ୍ କୁଡ଼ି କଡ଼ାହନ୍କେ ଫାରୋରାଃ ହନ୍ତେକୁଡ଼ିକେ ଏମ୍କିୟାଏ ଓଡ଼ୋଃ ଆୟାଃ କଡ଼ାହନ୍ ହବାୟାନାଏ। ଇନିଃ କାଜିକେଦାଏ, “ଆଇଙ୍ଗ୍ ନିଃକେ ଦାଆଃଏତେ ତାହୁଇକ୍ ଅଡଙ୍ଗ୍କିୟାଇଙ୍ଗ୍, ଏନାମେନ୍ତେ ଇନିୟାଃ ନୁତୁମ୍ ହବାଅଃତାନା ମୁଶା।”
ମୁଶା ମିଦିୟନ୍ ଦିଶୁମ୍ତେ ନିର୍ୟାନା
ମୁଶା ହାରା ଦାଡ଼ିୟାନ୍ ତାୟମ୍ତେ, ମୁସିଙ୍ଗ୍ ଇନିଃ ଆୟାଃ ହାଗାକତାଃ ସେନଃୟାନାଏ ଓଡ଼ୋଃ ପୁରାଃ ହାମ୍ବାଲ୍ କାମିତେୟାଃ ନେଲ୍କେଦ୍କଆଏ। ଇମ୍ତା ମିସାର୍ରେନ୍ ମିଆଦ୍ ହଡ଼ ମିଆଦ୍ ଏବ୍ରୀ ହଡ଼ଲଃ ଥାପାଃତାନ୍ ମୁଶା ନେଲ୍କିୟାଏ। ମୁଶା ନେତେ ହେନ୍ତେ ନେଲ୍କେଦାଏ ଜେତାଏକେ କା ନେଲ୍କେଦ୍ତେ ଏନ୍ ମିସାର୍ରେନ୍ ହଡ଼କେ ଗଏଃକିୟାଏ ଓଡ଼ୋଃ ଇନିଃକେ ଗିତିଲ୍ରେ ତପାକିୟା। ଏଟାଃ ହୁଲାଙ୍ଗ୍ ଇନିଃ ବାହାରିତେ ଅଡଙ୍ଗ୍ୟାନ୍ଲଃ ଓଡ଼ୋଃ ବାରିୟା ଏବ୍ରୀ ହଡ଼କିନ୍କେ ଥାପାଃତେୟାଃ ନେଲ୍କେଦ୍କିନାଏ ଓଡ଼ୋଃ ଇନିଃ ଏତ୍କାନ୍ ରିକାକାଦ୍ ହଡ଼କେ କାଜିକିୟା, “ଆମ୍ ଚିନାଃ ମେନ୍ତେ ଆମାଃ ଏବ୍ରୀ ହାଗାକେ ହୁମାଗିତାନାମ୍ ?”
ଏନ୍ ହଡ଼ କାଜିରୁହାଡ଼୍କିୟାଏ, “ଅକଏ ଆମ୍କେ ଆଲିଙ୍ଗ୍ୟାଁଃ ଚେତାନ୍ରେ ହାକିମ୍ ଓଡ଼ୋଃ ବିଚାର୍ନିଃ ହବାଅଃରାଃ ଆକ୍ତେୟାର୍ ଏମାକାଦ୍ମାଏ ? ଆମ୍ ଚିଲ୍କା ଏନ୍ ମିସାର୍ରେନ୍ ହଡ଼କେ ଗଏଃକିୟାମେ, ଏନ୍ଲେକାଗି ଆଇଙ୍ଗ୍କେହ ଗଗଏଃ ସାନାଙ୍ଗ୍ତାନାମ୍ଚି ?” ନେଆଁ ଆୟୁମ୍କେଦ୍ତେ ମୁଶା ବରତାନ୍ଲଃ ଆପାନ୍କେଗି କାଜିୟାନା, “ଆଇଙ୍ଗ୍ ଅକ୍ନାଃ ରିକାକାଦ୍ତେୟାଃ ସାର୍ତିଗି ହଡ଼କ ସାରିକେଦା।” ଫାରୋ ନେ କାଜି ଆୟୁମ୍କେଦ୍ତେ ମୁଶାକେ ଗଗଏଃ ନାଗେନ୍ତେ ଚେଷ୍ଟାକେଦା। ମେନ୍ଦ ମୁଶା ଫାରୋ ତାଃଏତେ ନିର୍ୟାନା ଓଡ଼ୋଃ ମିଦିୟନ୍ ଦିଶୁମ୍ରେ ତାଇନଃ ନାଙ୍ଗ୍ ସେନଃୟାନାଏ ଓଡ଼ୋଃ ମିଆଦ୍ କୁଆଁ ନାଡ଼େଃରେ ତାଇୟାନା।
ମିଦିୟନ୍ ଦିଶୁମ୍ରେନ୍ ଯାଜାକ୍ଆଃ ଏୟା ଝାନ୍ ହନ୍କୁଡ଼ି ତାଇକେନାକ, ଇନ୍କୁ ଏନ୍ ଠାୟାଦ୍ତେ ହିଜୁଃୟାନ୍ଲଃ ଆପୁଆଃ ଗୋଟ୍କକେ ଦାଆଃ ଆନୁଁକ ନାଗେନ୍ତେ ଡାଡାକାରେ ଦାଆଃ ପେରେଃକେଦାଏ। ଚିମିନ୍ ଏଟାଃ ମିଣ୍ଡି ଗୁପି ମାହାଁରାକ ହିଜୁଃକେଦ୍ତେ ଇନ୍କୁକେ ହାର୍ଅଡଙ୍ଗ୍କ ତାଇକେନାକ, ମେନ୍ଦ ମୁଶା ବିରିଦ୍ୟାନାଏ ଓଡ଼ୋଃ ଇନ୍କୁକେ ଦେଙ୍ଗାକେଦ୍ତେ ଇନ୍କୁଆଃ ଗୋଟ୍କକେ ଦାଆଃ ଆନୁକେଦ୍କଆଏ। ଏନ୍ତେ ଇନ୍କୁ ଆକଆଃ ଆପୁ ରୁୟେଲ୍ତାଃ ରୁହାଡ଼୍ୟାନାକ, ଇମ୍ତା ଇନିଃ ଇନ୍କୁକେ କୁଲିକେଦ୍କଆ, “ତିସିଙ୍ଗ୍ ଚିଲ୍କା ଆପେ ଜାଲ୍ଦିଗି ରୁହାଡ଼୍ୟାନାପେ ?”
ଇନ୍କୁ କାଜିରୁହାଡ଼୍କିୟାକ, “ମିସାର୍ରେନ୍ ମିଆଁଦ୍ ହଡ଼, ଏଟାଃ ମିଣ୍ଡି ଗୁପି ମାହାଁରାକତାଃଏତେ ବାଞ୍ଚାଅ କେଦ୍ଲେୟା, ଓଡ଼ୋଃ ଆଲେ ନାଗେନ୍ତେ ଦାଆଃ ଥାଇଜ୍କେଦ୍ତେ ଗୋଟ୍କକେ ଦାଆଃ ଆନୁ କେଦ୍କଆଏ।”
ରୁୟେଲ୍ ଆୟାଃ ହନ୍କୁଡ଼ିକକେ କୁଲିକେଦ୍କଆଏ, “ଇନିଃ କତାଃରେ ମେନାଇୟାଃ ? ଚିନାଃ ମେନ୍ତେ ଆପେ ଇନିଃକେ ବାଗିକେଦ୍ତେ ହିଜୁଃୟାନା ? ଇନିଃକେ କେଡ଼ା ଆଉଇପେ, ଇନିଃ ଆବୁଲଃ ଜଜମ୍ ନାଙ୍ଗ୍ ଦୁବାଃଏ।”
ଏନ୍ତେ ମୁଶା, ରୁୟେଲ୍ଆଃ ଅଡ଼ାଃରେ ତାଇନଃ ନାଙ୍ଗ୍ ମାନାତିଙ୍ଗ୍ ୟାନାଏ ଓଡ଼ୋଃ ଆୟାଃ ହନ୍ତେକୁଡ଼ି ସିପୋରାକେ ମୁଶାଲଃ ଆଣ୍ଦିକିୟାଏ। ଏନ୍ତେ ଏନ୍ କୁଡ଼ି ମିଆଦ୍ କଡ଼ାହନ୍କେ ଜାନାମ୍କିୟାଏ ଓଡ଼ୋଃ ମୁଶା ଇନିଃକେ ଗେର୍ଶୋମ୍ ମେନ୍ତେ ନୁତୁମ୍କିୟା, ଚିଆଃଚି ମୁଶା କାଜିକିୟାଏ, “ଆଇଙ୍ଗ୍ ଏଟାଃ ଦିଶୁମ୍ରେନ୍ ହଡ଼ ତାନିଙ୍ଗ୍, ଏଟାଃ ଦିଶୁମ୍ରେ ତାଇନଃ ତାନାଇଙ୍ଗ୍।”
ନେଆଁରାଃ ପୁରାଃ ମାହା ତାୟମ୍ତେ ମିସାର୍ରେନ୍ ରାଜାରାଃ ଗନଏଃ ହବାୟାନା। ଇସ୍ରାଏଲ୍ ହଡ଼କ ଦାସିକାନ୍ ହରାତେ ଆକଆଃ ପୁରାଃ ହାମ୍ବାଲ୍ କାମି ନାଗେନ୍ତେ ସାସାତି, ସିଗିଦ୍ କା ସାହାତିଙ୍ଗ୍କେଦ୍ତେ ରାଆଃକେଦାକ ଓଡ଼ୋଃ ଆକଆଃ ରାଆଃଗେରାଙ୍ଗ୍ ପାର୍ମେଶ୍ୱାର୍ତାଃ ସେଟେର୍ୟାନା। ପାର୍ମେଶ୍ୱାର୍ ଇନ୍କୁଆଃ ରାଆଃଗେରାଙ୍ଗ୍ ଆୟୁମ୍କେଦାଏ, ଓଡ଼ୋଃ ଆବ୍ରାହାମ୍, ଇସାକ୍ ଓଡ଼ୋଃ ଯାକୁବ୍ଲଃ ରିକାକାଦ୍ ରାଜିନାମାକେ ପାହାମ୍କେଦ୍ତେ, ପାର୍ମେଶ୍ୱାର୍ ଇସ୍ରାଏଲ୍ ହଡ଼କକେ ନେଲ୍ କେଦ୍କଆଏ ଓଡ଼ୋଃ ଇନ୍କୁଆଃ ଦୁକୁକେ ଉଡ଼ୁଃକେଦା।
Source notes (1)
- Footnote ଡାଡ୍କା ଲେକାନ୍ ଜିନିଷ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.