Munda Bible
ହରାସେନ୍ପୁଥି 1
ମିସାର୍ରେ ଇସ୍ରାଏଲ୍ ହଡ଼କଆଃ ସାସାତି
ଯାକୁବ୍ ଓଡ଼ୋଃ ଆୟାଃ ଅକ ହନ୍କ ଆପ୍ନାଃ ଆପ୍ନାଃ କୁଟୁମ୍କକେ ସାବ୍କେଦ୍ତେ ମିସାର୍ ଦିଶୁମ୍ତେ ହିଜୁଃଲେନାକ, ଇନ୍କୁଆଃ ନୁତୁମ୍ ହବାଅଃତାନା, ରୁବେନ୍, ଶିମିୟୋନ୍, ଲେବୀ ଓଡ଼ୋଃ ଯିହୁଦା, ଇଷାଖର୍, ସବ୍ଲୁନ୍ ଓଡ଼ୋଃ ବେଞ୍ଜାମିନ୍, ଦାନ୍, ନପ୍ତାଲି, ଗାଦ୍ ଓଡ଼ୋଃ ଆସେର୍। ଏନ୍ ଦିପିଲିରେ ଯାକୁବ୍ଆଃ ହରାତେ ଆପିହିସି ଗେଲ୍ ଝାନ୍ କିଲି ଜାନାମାକାନ୍ ତାଇକେନାକ, ମେନ୍ଦ ଯୋଷେଫ୍ ସିଦାରେଗି ମିସାର୍ ଦିଶୁମ୍ରେ ତାଇକେନା। ଏନ୍ତେ ଯୋଷେଫ୍, ଆୟାଃ ହାଗାକ ଓଡ଼ୋଃ ସିଦା ପିଢ଼ିରେନ୍ ସବେନ୍ ହଡ଼କ ଗଏଃୟାନାକ। ମେନ୍ଦ ଇସ୍ରାଏଲ୍ରେନ୍ କିଲିକ ହାରା ପସାୟାନ୍ଲଃ ପୁରାଃଗି ପେଡ଼େଃୟାନାକ ଓଡ଼ୋଃ ଗଟା ମିସାର୍ ଦିଶୁମ୍ରେ ପେରେଃୟାନାକ।
ଏନ୍ତେ ମିଆଦ୍ ନାୱା ରାଜା ମିସାର୍ ଦିଶୁମ୍ରେ ରାଇଜ୍କେଦା, ମେନ୍ଦ ଇନିଃ ଯୋଷେଫ୍ ବିଷାଏରେ କାଏ ସାରି ତାଇକେନା। ଇନିଃ ଆୟାଃ ହଡ଼କକେ କାଜିକେଦ୍କଆ, “ନେ ଇସ୍ରାଏଲ୍ ହଡ଼କକେ ନେଲ୍କୁପେ, ଇନ୍କୁ ଆବୁଏତେ ଥିମ୍ବା ଓଡ଼ୋଃ ପୁରାଃ ପେଡ଼େୟାନ୍ଗି ମେନାକଆ। ଇନ୍କୁ ଆଲକାକ ପସାଅଃକା ଓଡ଼ୋଃ ଲାଡ଼ାଇ ଇମ୍ତା ଇନ୍କୁ ଆବୁଆଃ ବାଇରିକଲଃ ମେସାକେଦ୍ତେ ଆବୁଲଃ ଆଲକାକ ଲାଡ଼ାଇକା ଓଡ଼ୋଃ ମିସାର୍ ଦିଶୁମ୍ଏତେ ଆଲକାକ ନିର୍କା, ଏନାମେନ୍ତେ ଦଲା ଆବୁ ଇନ୍କୁଲଃ ସେଣାଁନ୍ତେ ଜାଗାରେୟାବୁ।” ଏନାମେନ୍ତେ ଇନ୍କୁକେ ହାମ୍ବାଲ୍ କାମି ଏମ୍କେଦ୍ତେ ସାସାତିକ ନାଙ୍ଗ୍ ଇନ୍କୁଆଃ ଚେତାନ୍ରେ କାମିରାଃ ହାକିମ୍କକେ ଦହକେଦ୍କଆକ ଓଡ଼ୋଃ ଫାରୋ ରାଜା ନାଗେନ୍ତେ ପିଥୋମ୍ ଓଡ଼ୋଃ ରାମିଷେଷ୍ତାଃରେ ଭାଣ୍ଡାର୍ରାଃ ନାଗାର୍ ବାଇକେଦାକ। ମେନ୍ଦ ଇନ୍କୁ ଇସ୍ରାଏଲ୍ ହଡ଼କକେ ଚିମିନ୍ ପୁରାଃ ଥିମ୍ବା ସାସାତିକେଦ୍କଆକ, ଇମିନାଙ୍ଗ୍ ଥିମ୍ବା ହାରା ପସାକେଦ୍ତେ ପାସ୍ରାଅ ୟାନାକ। ନେଆଁ ନେଲ୍କେଦ୍ତେ ମିସାର୍ ହଡ଼କ ପୁରାଃଗି ବରକେଦାକ। ଏନାମେନ୍ତେ ମିସାର୍ ହଡ଼କ ଇସ୍ରାଏଲ୍ ହଡ଼କକେ ପୁରାଃଗି ହାମ୍ବାଲ୍ କାମି ରିକା ନାଙ୍ଗ୍ ଆଚୁକେଦ୍କଆକ। ଲସଦ୍, ଇଟା ଓଡ଼ୋଃ ଲୟଙ୍ଗ୍ରାଃ କାମିକ ପୁରାଃ କେଟେଃ ହାମ୍ବାଲ୍ କାମିତେ ଓଡ଼ୋଃ ସୁନୁସାର୍ କାମିତେ ଇନ୍କୁକେ ପୁରାଃଗି ସିଗିଦ୍କେଦ୍କଆକ। ମିସାର୍ ହଡ଼କ ଇସ୍ରାଏଲ୍ ହଡ଼କଆଃ ଚେତାନ୍ରେ ଦାୟା ଓଡ଼ୋଃ ଲିନିବୁଇ କାକ ରିକାକେଦ୍କଆ।
ଏନ୍ତେ ମିସାର୍ରେନ୍ ରାଜା ଶିଫ୍ରା ଓଡ଼ୋଃ ପୁହା ନୁତୁମ୍ ବାରିୟା ଏବ୍ରୀ କୁସ୍ରେନ୍ କୁଡ଼ିକିନ୍କେ କାଜିକେଦ୍କିନା, “ଆବେନ୍ ଏବ୍ରୀ କୁଡ଼ିକଆଃ କୁସ୍ରେନ୍ କାମିତାନ୍ ଦିପିଲିରେ ବୁଗିୟଃତାନ୍ ଠାୟାଦ୍ରେ ଇନ୍କୁକେ ନେଲ୍କଆବେନ୍ ଇମ୍ତା କଡ଼ାହନ୍ ଜାନାମଃରେ ଗଏଃ ତାକୁବେନ୍ ଓଡ଼ୋଃ କୁଡ଼ିହନ୍ ଜାନାମଃରେ ଜୀନିଦ୍ଗି ଦହକବେନ୍।” ମେନ୍ଦ ଏନ୍ ବାରାନ୍ କୁସ୍ରେନ୍କିନ୍ ପାର୍ମେଶ୍ୱାର୍କେ ବରତାଇକେନ୍ ହରାତେ ମିସାର୍ ରାଜାରାଃ ଆନ୍ଚୁ ଲେକା କାକିନ୍ ରିକାକେଦା ଓଡ଼ୋଃ କଡ଼ାହନ୍କକେ ଜୀନିଦ୍ଗି ଦହକେଦ୍କଆକିନ୍। ଏନାମେନ୍ତେ ମିସାର୍ରେନ୍ ରାଜା ଏନ୍ କୁସ୍ରେନ୍ କୁଡ଼ିକିନ୍କେ କେଡ଼ାକେଦ୍ତେ କାଜିକେଦ୍କିନାଏ, “ଆବେନ୍ ନେ'ଲେକା ଚିନାଃ ମେନ୍ତେ ରିକାତାନାବେନ୍ ? ଆବେନ୍ ଚିକାନାଙ୍ଗ୍ କଡ଼ାହନ୍କକେ ଜୀନିଦ୍ଗି ଦହକ ତାନାବେନ୍ ?”
କୁସ୍ରେନ୍ କୁଡ଼ିକିନ୍ ଫାରୋ ରାଜାକେ କାଜିକିୟାକିନ୍, “ଏବ୍ରୀ କୁଡ଼ିକ ମିସାର୍ରେନ୍ କୁଡ଼ିକଆଃ ଲେକା ନାହାଁଲାଃକ, ଇନ୍କୁ ପୁରାଃ ପେଡ଼େୟାନ୍ଗି ମେନାକଆ ଓଡ଼ୋଃ କୁସ୍ରେନ୍ ହିଜୁଃ ସିଦାରେ ହନ୍ ଜାନାମ୍ ଦାଡ଼ି ତାନାକ।” ପାର୍ମେଶ୍ୱାର୍ ଏନ୍ କୁସ୍ରେନ୍ କୁଡ଼ିକିନାଃ ବୁଗିନାଃ ରିକାକେଦାଏ। ଏନାତେ ଇସ୍ରାଏଲ୍ ହଡ଼କ ପୁରାଃଗି ପସାୟାନାକ ଓଡ଼ୋଃ ପୁରାଃଗି ପେଡ଼େୟାନ୍ ହବାୟାନାକ। ଏନ୍ ବାରାନ୍ କୁସ୍ରେନ୍ କୁଡ଼ିକିନ୍ ପାର୍ମେଶ୍ୱାର୍କେ ବର ତାଇକେନ୍ ହରାତେ ପାର୍ମେଶ୍ୱାର୍ ଇନ୍କିନାଃ କିଲିକକେ ପସାକେଦ୍କଆ। ଏନ୍ତେ ଫାରୋ ରାଜା ଆୟାଃ ହଡ଼କକେ ହୁକୁମ୍କେଦ୍କଆ, “ଆପେ ଇସ୍ରାଏଲ୍ରେନ୍ ନାୱା ଜାନାମାକାନ୍ ଏବ୍ରୀ କଡ଼ାହନ୍କକେ ନିଲ୍ ନାହିଁରେ ହୁରାଙ୍ଗ୍କପେ ମେନ୍ଦ କୁଡ଼ି ହନ୍କକେ ଜୀନିଦ୍ ଦହକପେ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.