Munda Bible
ହରାସେନ୍ପୁଥି 35
ରୁଡ଼ୁନ୍ରାଃ ନିୟାମ୍ ମାନାତିଙ୍ଗ୍
ଏନ୍ତେ ମୁଶା ଇସ୍ରାଏଲ୍ ହଡ଼କଆଃ ସବେନ୍ ସାମାଜ୍ରେନ୍ ହୁଣ୍ଡିକେଦ୍ତେ କାଜିକେଦା, “ପ୍ରାଭୁ ଆପେକେ ନେ ସବେନ୍ ଆନ୍ଚୁ ମାନାତିଙ୍ଗ୍ ନାଙ୍ଗ୍ ଆଚୁକାଦାଏ। ତୁରିୟା ହୁଲାଙ୍ଗ୍ କାମିନାଙ୍ଗ୍, ମେନ୍ଦ ଏୟା ହୁଲାଙ୍ଗ୍ ଆପେୟାଃ ନାଗେନ୍ତେ ପାବିତାର୍ ହୁଲାଙ୍ଗ୍ ହବାଅଃଆ, ଏନା ପ୍ରାଭୁଆଃ ନାଗେନ୍ତେ ପୁରାଃ ମାରାଙ୍ଗ୍ ରୁଡ଼ୁନ୍ ହୁଲାଙ୍ଗ୍ ହବାଅଃଆ, ଜେତାଏ ଏନ୍ ହୁଲାଙ୍ଗ୍ରେ କାମିନିଃ ଗନଏଃ ସାଜାଇ ନାମେୟାଏ। ରୁଡ଼ୁନ୍ ହୁଲାଙ୍ଗ୍ ଆପେୟାଃ ଅଡ଼ାଃରେ ସେଙ୍ଗେଲ୍ ଆଲପେ ଜୁଲେଆ।”
କୁମ୍ବା ନାଗେନ୍ତେ ଦାନ୍ ରାକାବ୍ତେୟାଃ
(ହରାସେନ୍ପୁଥି ୨୫:୧-୯)
ମୁଶା ଇସ୍ରାଏଲ୍ ସାମାଜ୍ରେନ୍ ସବେନ୍ ହଡ଼କକେ କାଜିକେଦ୍କଆ, “ପ୍ରାଭୁ ନେ ଆନ୍ଚୁ ଏମାକାଦାଏ। ଆପେ ପ୍ରାଭୁଆଃ ନାଙ୍ଗ୍ ଆପ୍ନାଃଏତେ ଦାନ୍ ହୁଣ୍ଡିପେ, ଅକନ୍କ ଆପ୍ନାଃ ଇଛା ସାନାଙ୍ଗ୍ତେ ପ୍ରାଭୁ ନାଙ୍ଗ୍ ଦାନ୍ ଆଉ ସାନାଙ୍ଗ୍ଆଃକ, ଇନ୍କୁ ସୋନା, ରୁପା ଓଡ଼ୋଃ ପିତ୍ତାଲ୍, ନିଲିୟା, ବାଇଗିନିୟା, ଆରାଃ ଓଡ଼ୋଃ ପୁଣ୍ଡି ନିରାଲ୍ ଲିଜାଃ ଓଡ଼ୋଃ ମେରମ୍ ଉବ୍, ମାୟୋମ୍କାନ୍ ମିଣ୍ଡି ଉହୁର୍, ଲେବେଃ ଉହୁର୍ ଓଡ଼ୋଃ ବାବୁଲ୍ ଦାରୁ, ଓଡ଼ୋଃ ଦିଆ ନାଙ୍ଗ୍ ଅଲିଭ୍ ସୁନୁମ୍, ଆଭିଷେକ୍ ସୁନୁମ୍ ଓଡ଼ୋଃ ଧୁଆନ୍ ଉରୁବେ ନାଗେନ୍ତେ ବୁଗିନ୍ ସହାନ୍ତେୟାଃ, ଏଫୋଦ୍ ଓଡ଼ୋଃ ବୁକୁପାଟା ଜଡ଼େନ୍ ନାଗେନ୍ତେ ଗୋମେଦକ୍ ଗନଙ୍ଗ୍ଆଁନ୍ ଦିରି।
“ଆପେ ହେତେ ସବେନ୍ ସେଣାଁନ୍କ ହିଜୁଃକେଦ୍ତେ ପ୍ରାଭୁଆଃ ଆଚୁକାଦ୍ କାମି କାମିପେ। ଏନାଦ ନେପେଲ୍ କୁମ୍ୱା ଓଡ଼ୋଃ ଏନାରେୟାଃ କୁମ୍ବା, ଏନାରେୟାଃ ହାରୁବ୍ତେୟାଃ, ଆକୁସି, ତାକ୍ତା, ଅର୍ଗଡ଼୍, ଖୁଣ୍ଟୁ ଓଡ଼ୋଃ କାଟା, ଏନ୍ତେ ରାଜିନାମା ବାକାସ୍ ଓଡ଼ୋଃ ଏନାରେୟାଃ ଗଅଃତେୟାଃ ଓଡ଼ୋଃ ପାପ୍ଛାମା ହାରୁବ୍ତେୟାଃ ଓଡ଼ୋଃ ଦାନାଙ୍ଗ୍ ଲିଜାଃ ମେଜ୍, ଏନାରାଃ ଗଅଃତେୟାଃ, ସବେନ୍ ବାସାନ୍, ପ୍ରାଭୁଭୋଜ୍ ହଲଙ୍ଗ୍ ଦିଆ ନାଗେନ୍ତେ ଦିଆ ଦହ ଖୁଣ୍ଟୁ, ଏନାରାଃ ଦିଆ, ଏନାରାଃ ବାସାନ୍ ଓଡ଼ୋଃ ଏନାରାଃ ସୁନୁମ୍, ଓଡ଼ୋଃ ଉରୁବେ ନାଗେନ୍ତେ ବେଦି ଓଡ଼ୋଃ ଏନାରେୟାଃ ଗଅଃତେୟାଃ ଓଡ଼ୋଃ ଆଭିଷେକ୍ ସୁନୁମ୍ ଓଡ଼ୋଃ ଉରୁବେ ନାଗେନ୍ତେ ବୁଗିନ୍ ସହାନ୍ତେୟାଃ ଓଡ଼ୋଃ କୁମ୍ବାରାଃ ଦୁଆର୍ ଦାନାଙ୍ଗ୍ ଲିଜାଃ, ଓଡ଼ୋଃ ଉରୁବ୍ଦାଣେଁ ବେଦି ଓଡ଼ୋଃ ଏନାରେୟାଃ ପିତ୍ତାଲ୍ରାଃ ଜାଲମ୍ ଓଡ଼ୋଃ ଏନାରେୟାଃ ଗଅଃତେୟାଃ ଓଡ଼ୋଃ ଏନାରେୟାଃ ସବେନ୍ ବାସାନ୍, ତିଃଇ ଆବୁଙ୍ଗ୍ତେୟାଃ ଓଡ଼ୋଃ ଏନାରେୟାଃ ତିଙ୍ଗୁତେୟାଃ। ରାଚାରେୟାଃ ଦାନାଙ୍ଗ୍ ଲିଜାଃ, ଏନାରେୟାଃ ଖୁଣ୍ଟୁ, ଏନାରେୟାଃ କାଟା, ରାଚା ଦୁଆର୍ରେୟାଃ ଦାନାଙ୍ଗ୍ ଲିଜାଃ, ଓଡ଼ୋଃ ଏନାରେୟାଃ ଖିଲା, ରାଚାରେୟାଃ ଖିଲା ଓଡ଼ୋଃ ଏନ୍ ବାରାନାଃରେୟାଃ ବାଏହାର୍, ଓଡ଼ୋଃ ପାବିତାର୍ ଠାୟାଦ୍ରେ ସେୱା ନାଗେନ୍ତେ ସିଙ୍ଗାର୍ ଲିଜାଃ, ହାରୁନ୍ ଯାଜାକ୍ଆଃ ପାବିତାର୍ ଲିଜାଃ ଓଡ଼ୋଃ ଆୟାଃ ହନ୍କଆଃ ଯାଜାକ୍ କାମିରାଃ ଲିଜାଃ।”
ହଡ଼କ ଆକଆଃ ରାକାବ୍ତେୟାଃ
ଏନ୍ତେ ଇସ୍ରାଏଲ୍ ସାମାଜ୍ରେନ୍ ସବେନ୍ ହଡ଼କ ମୁଶାତାଃ ସେନଃୟାନାକ। ଇନ୍କୁ ଆପ୍ନାଃ ଇଛା ସାନାଙ୍ଗ୍ ଲେକା ନେପେଲ୍ କୁମ୍ବା ବାଇ ନାଙ୍ଗ୍, ଏନାରାଃ ସୁନୁସାର୍ ସବେନ୍ କାମି ଓଡ଼ୋଃ ପାବିତାର୍ ଲିଜାଃ ନାଗେନ୍ତେ ପ୍ରାଭୁଆଃ ଉଦ୍ଦେଶ୍ରେ ଦାନ୍ ଆଉକେଦାକ। ଓଡ଼ୋଃ କଡ଼ା ଓଡ଼ୋଃ କୁଡ଼ି ଚିମିନ୍ଗି ଆପ୍ନାଃ ସାନାଙ୍ଗ୍ ଲେକା ତାଇନ୍ତାନ୍କ, ଇନ୍କୁ ହିଜୁଃକେଦ୍ତେ ହଟଃରାଃ, ମୁହୁଁରାଃ, ଲୁତୁର୍ରାଃ ଓଡ଼ୋଃ ସାର୍ସାର୍ରେ ସୋନାରାଃ ସିଙ୍ଗାରେନ୍ତେୟାଃ ଆଉକେଦାକ, ସବେନ୍କ ପ୍ରାଭୁ ନାଗେନ୍ତେ ଏନ୍ ସୋନାକେ ଝୁଲାଅରାଃ ଦାନ୍ ଲେକା ରାକାବ୍କେଦା। ଓଡ଼ୋଃ ଅକଏତାଃ ନିଲିୟା, ବାଇଗିନିୟା, ଆରାଃ, ପୁଣ୍ଡି ନିରାଲ୍ ଲିଜାଃ, ମେରମ୍ ଉବ୍, ମାୟୋମ୍କାନ୍ ମିଣ୍ଡି ଉହୁର୍ ଓଡ଼ୋଃ ଲେବେଃ ଉହୁର୍ ତାଇନ୍କେନା,ଏନା ଇନ୍କୁ ଆଉକେଦା। ଓଡ଼ୋଃ ଅକଏ ରୁପା ଚାଏ ପିତ୍ତାଲ୍ ଦାନ୍ ରାକାବ୍କେଦାଏ, ଇନିଃ ପ୍ରାଭୁଆଃ ନାଗେନ୍ତେ ଆଉକେଦା ଓଡ଼ୋଃ ଅକଏତାଃ ବାବୁଲ୍ ଦାରୁ ସେୱା ନାଗେନ୍ତେ ତାଇକେନା, ଇନିଃ ଏନା ଆଉକେଦାଏ। ସବେନ୍ ସେଣାଁନ୍ କୁଡ଼ିକ ଆପାନ୍ ଆପାନ୍ ତିଃଇରେ ସୁତାମ୍ ବାଇକେଦ୍ତେ ନିଲିୟା, ବାଇଗିନିୟା, ଆରାଃ, ପୁଣ୍ଡି ନିରାଲ୍ ସୁତାମ୍କ ଆଉକେଦା। ଓଡ଼ୋଃ ଅକନ୍ କୁଡ଼ିକ ଆକଆଃ ମନ୍ରେ ସେଣାଁ ତାଇନ୍କେନା ଇନ୍କୁ ସବେନ୍ ମେରମ୍ ଉବ୍ରାଃ ସୁତାମ୍ ବାଇକେଦା। ଓଡ଼ୋଃ ଆଗୁଆଇକ ଏଫୋଦ୍ ଓଡ଼ୋଃ ବୁକୁପାଟା ନାଗେନ୍ତେ ଗୋମେଦକ୍ ଗନଙ୍ଗ୍ଆଁନ୍ ଦିରି ସରଃକାନ୍ ମଣି, ଇନ୍କୁ ଦିଆ ଓଡ଼ୋଃ ଆଭିଷେକ୍ ନାଙ୍ଗ୍ ଅଲିଭ୍ ସୁନୁମ୍ ଏନ୍ତେ ବୁଗିନ୍ ସହାନ୍ ନାଙ୍ଗ୍ ଧୁଆନ୍ ଆଉକେଦାକ। ଇସ୍ରାଏଲ୍ରେନ୍ କଡ଼ା ଓଡ଼ୋଃ କୁଡ଼ିକ ଆକଆଃ ଆପ୍ନାଃ ଇଛାତେ ପ୍ରାଭୁଆଃ ନାଙ୍ଗ୍ ଦାନ୍ ଆଉକେଦାକ। ଇନ୍କୁ ସବେନ୍କ ମୁଶାକେ ଏମାକାଇ ପ୍ରାଭୁଆଃ କାନାଜି ଲେକାତେ ସବେନ୍ କାମି ରିକାକେଦାକ।
ତାଇନଃ ଅଡ଼ାଃ ବାଇ
(ହରାସେନ୍ପୁଥି ୩୧:୧-୧୧)
ମୁଶା ଇସ୍ରାଏଲ୍ ହନ୍କକେ କାଜିକେଦ୍କଆ, “ପ୍ରାଭୁ ଯିହୁଦା କିଲିରେନ୍ ହୁର୍ରାଃ ଜାଇହନ୍ ଉରିରାଃ ହନ୍କଡ଼ା ବାସ୍ଲେଲ୍କେ କେଡ଼ାକାଇୟା। ଓଡ଼ୋଃ ଇନିଃକେ ପାର୍ମେଶ୍ୱାର୍ ଆତ୍ମାରେ ପେରେଃ କେଦ୍ତେ ସେଣାଁ, ସାରିଉରୁମ୍ ଓଡ଼ୋଃ କିଲିମିଲି କାମିକରାଃ ପେଡ଼େଃ, ବୁଗିନ୍ ବୁଗିନ୍ କାମି, ସୋନା, ରୁପା, ଓଡ଼ୋଃ ପିତ୍ତାଲ୍ରାଃ କାମି, ସରଃକାନ୍ ଗନଙ୍ଗ୍ଆଁନ୍ ଦିରି ଓଡ଼ୋଃ ଦାରୁରେ ଖୋଦା ରିକାରାଃ କାମିରେ ଇନିଃକେ ପେରେଃକିୟା। ଓଡ଼ୋଃ ଦାନ୍ କିଲିରେନ୍ ଆହିଷାମାକ୍ରାଃ ହନ୍ ଅହଲିୟାବ୍କେ ଇତୁରେୟାଃ ପେଡ଼େଃ ଏମ୍କିୟାଏ। ଦିରି ଓଡ଼ୋଃ ଦାରୁରେ ଖୋଦାକାମିନିଃ ଲେକା ଇନ୍କିନ୍କେ ନିଲିୟା, ବାଇଗିନିୟା, ଆରାଃ ଓଡ଼ୋଃ ପୁଣ୍ଡି ନିରାଲ୍ ସୁତାମ୍ରାଃ କାମି, ହେଗି ସବେନ୍ କାମି ନାଗେନ୍ତେ ପାର୍ମେଶ୍ୱାର୍ ଇନ୍କିନ୍କେ ସେଣାଁତେ ପେରେଃ କେଦ୍କିନା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.