Munda Bible
ହରାସେନ୍ପୁଥି 36
“ବାସ୍ଲେଲ୍ ଓଡ଼ୋଃ ଅହଲିୟାବ୍ ଓଡ଼ୋଃ ସବେନ୍ ସେଣାଁନ୍କ ପ୍ରାଭୁ ଆଚୁକାଦ୍ କାମିକ କାମିଆ ଓଡ଼ୋଃ ପ୍ରାଭୁଆଃ ପାବିତାର୍ ଠାୟାଦ୍ରାଃ ବାବାଇରେୟାଃ ସେଣାଁ ଓଡ଼ୋଃ ସାରିଉରୁମ୍ତେୟାଃ ଏମାକାଦ୍କଆଏ।”
ହଡ଼କ ଆଉୱାକାଦ୍ ପୁରାଃ ଦାନ୍
ଏନ୍ତେ ମୁଶା ବାସ୍ଲେଲ୍, ଅହଲିୟାବ୍ ଓଡ଼ୋଃ ପ୍ରାଭୁତାଃଏତେ ମନ୍ରେ ସେଣାଁ ନାମାକାଦ୍ ଏଟାଃ ସବେନ୍ ସେଣାଁନ୍ ହଡ଼କକେ ଏନ୍ କାମି ଏଟେଦ୍ ନାଙ୍ଗ୍ କେଡ଼ାକେଦ୍କଆଏ। ପାବିତାର୍ ଠାୟାଦ୍କେ ବାବାଇ ନାଙ୍ଗ୍ ଇସ୍ରାଏଲ୍ ହଡ଼କ ଆଉକାଦ୍ ସବେନ୍ ଦାନ୍କେ ଇନ୍କୁ ମୁଶାତାଃଏତେ ତେଲାକେଦାକ। ଏନ୍ରେୟ ହଡ଼କ ସବେନ୍ ହୁଲାଙ୍ଗ୍ ସେତାଃ ଇଦାନ୍ରେ ଆକଆଃ ଆପ୍ନାଃ ଇଛାତେ ଦାନ୍ ଆଉ ତାଇକେନାକ। ପାବିତାର୍ ଠାୟାଦ୍ରେ କାମିତାନ୍ ସବେନ୍ ସେଣାଁନ୍କ ଆକଆଃ କାମି ବାଗି କେଦ୍ତେ ମୁଶାତାଃ ହିଜୁଃୟାନାକ, ଓଡ଼ୋଃ ମୁଶାକେ କାଜିକିୟା, “ପ୍ରାଭୁ ଅକନ୍ କାମିକ ରିକା ନାଙ୍ଗ୍ ଆଚୁକାଦାଏ, ହଡ଼କ ଏନ୍ କାମି ରିକା ନାଗେନ୍ତେ ଲାଗାତିଙ୍ଗ୍ ହେତେ ଆଦ୍କାକ ଆଉୱେତାନା।”
ଏନ୍ତେ କୁମ୍ବାରାଃ ସବେନ୍ସାଃରେ ମୁଶା ହୁକୁମ୍ ଏମ୍କେଦ୍ତେ କାଜି ଇଚିକେଦାଏ, “କଡ଼ା ଚାଏ କୁଡ଼ି ପାବିତାର୍ ଠାୟାଦ୍ ନାଗେନ୍ତେ ଓଡ଼ୋଃ ଦାନ୍ ଆଲପେ ଆଉଇୟା।” ଏନ୍ତେ ହଡ଼କ ଜେତ୍ନାଃ କାକ ଆଉକେଦା। ଚିଆଃଚି ସବେନ୍ କାମି ଚାବା ନାଗେନ୍ତେ ଇନ୍କୁତାଃ ରାକାବ୍ ତେୟାଃ ପୁରାଃଗି ତାଇକେନା।
କୁମ୍ବା ବାଇ
(ହରାସେନ୍ପୁଥି ୨୬:୧-୩୭)
ଏନ୍ତେ କୁମ୍ବା ବାଇତାନ୍ ଚିମିନ୍ ସେଣାଁନ୍ ହଡ଼କ ପାବିତାର୍ କୁମ୍ବା ବାଇ ଏଟେଦ୍କେଦାକ। ଓଡ଼ୋଃ ଏନ୍ ସବେନ୍ ସେଣାଁନ୍କ ନିଲିୟା, ବାଇଗିନିୟା ଓଡ଼ୋଃ ଆରାଃ ନିରାଲ୍ ଲିଜାଃରାଃ ଗେଲେୟା ଦାନାଙ୍ଗ୍ ଲିଜାଃତେ କୁମ୍ବା ବାଇକେଦାକ ଓଡ଼ୋଃ ଗେଲେୟା ଆଚ୍ରା ବାଇକେଦାକ। ଓଡ଼ୋଃ ଏନ୍ ଲିଜାଃରେ କିରୁବ୍କଆଃ ଖଦାକାନ୍ତେୟାଃ ଏମ୍କେଦାକ। ସବେନ୍ ଦାନାଙ୍ଗ୍ ଲିଜାଃ ମିଦ୍ ହିସି ଇରାଲିୟା ମୁକା ଜିଲିଙ୍ଗ୍ ଓଡ଼ୋଃ ଉପୁନିୟା ମୁକା ଚାକାର୍ ମିଦ୍ ସାମାନ୍ଗି ତାଇକେନା। ଓଡ଼ୋଃ ମଣେଁୟା ଦାନାଙ୍ଗ୍ ଲିଜାଃ ମିଦ୍ଗି ତଲ୍ କେଦାଏ ଓଡ଼ୋଃ ଏନ୍କାଗି ଆଡଃଗି ମଣେଁୟା ଦାନାଙ୍ଗ୍ ଲିଜାଃ ମିଦ୍ ସାମାନ୍ଗି ତଲ୍ କେଦାଏ। ଓଡ଼ୋଃ ସିଦା ଦାନାଙ୍ଗ୍ ଲିଜାଃରାଃ ଟୁଣ୍ଡୁ ଜଡ଼େନ୍ ଠାୟାଦ୍ରେ ନିଲିୟା ସୁତାମ୍ତେ ଫାଁସ୍ରି ବାଇୟେମେ ଓଡ଼ୋଃ ଏଟାଃ ଦାନାଙ୍ଗ୍ ଲିଜାଃରାଃ ଜଡ଼େନ୍ ଠାୟାଦ୍ରେ ଏନ୍ ଲେକା ରିକାଏମେ। ସିଦା ଦାନାଙ୍ଗ୍ ଲିଜାଃରାଃ ଜଡ଼େନ୍ ଠାୟାଦ୍ରେ ପାଚାସ୍ ଫାଁସ୍ରି ବାଇୟେମେ ଓଡ଼ୋଃ ଏଟାଃ ଦାନାଙ୍ଗ୍ ଲିଜାଃରାଃ ଜଡ଼େନ୍ ଠାୟାଦ୍ରେ ପାଚାସ୍ ଫାଁସ୍ରି ବାଇୟେମେ, ଏନ୍ ଫାଁସ୍ରି ମିଦ୍ ଏଟାଃଲଃ ସାମ୍ନାଙ୍ଗ୍ରେ ତାଇନ୍କା। ପାଚାସ୍ ଆକୁସି ସୋନାଲଃ ମିଆଦ୍ ଦାନାଙ୍ଗ୍ ଲିଜାଃ ଏଟାଃଲଃ ଜଡ଼େନ୍ କେଦ୍ତେ ମିଆଦ୍ ନେପେଲ୍ କୁମ୍ୱା ହବାଅଃଆ।
“ଏନ୍ ନେପେଲ୍ କୁମ୍ୱା ଚେତାନ୍ରେ ହାରୁବ୍ କୁମ୍ବା ନାଗେନ୍ତେ ମେରମ୍ ଉହୁର୍ରାଃ ଗେଲ୍ ମିଆଦ୍ ଠୁ ଦାନାଙ୍ଗ୍ ଲିଜାଃ ବାଇୟେମେ।” ଏନ୍ ସବେନାଃ ଦାନାଙ୍ଗ୍ ଲିଜାଃରାଃ ଜିଲିଙ୍ଗ୍ ହିସି ଗେଲ୍ ମୁକା ଚାକାର୍ ଉପୁନିୟା ମୁକା ମିଦ୍ ସାମାନ୍ଗି ତାଇନ୍କା। ମଣେୟାଁ ଦାନାଙ୍ଗ୍ ଲିଜାଃକେ ମିଦ୍ଗି ଓଡ଼ୋଃ ତୁରିୟା ଦାନାଙ୍ଗ୍ ଲିଜାଃକେ ଏଟାଃଗି ଜଡ଼େନ୍ କେଦ୍ତେ ମିସାତେ ଫାର୍କାରେ ଦହେମେ ଓଡ଼ୋଃ ତୁରିୟା ଦାନାଙ୍ଗ୍ ଲିଜାଃ କୁମ୍ବାରାଃ ସାମ୍ନାଙ୍ଗ୍ରେ ତାଇନା। ଓଡ଼ୋଃ ତାୟମ୍ ତଲାକାନ୍ ଦାନାଙ୍ଗ୍ ଲିଜାଃରାଃ ଜଡ଼େନ୍ରେ ବାର୍ ହିସି ଗେଲ୍ ଫାଁସ୍ରି ଓଡ଼ୋଃ ଏଟାଃ ଦାନାଙ୍ଗ୍ ଲିଜାଃରେହଗି ବାର୍ ହିସି ଗେଲ୍ ଫାଁସ୍ରି ବାଇକେଦା। ଓଡ଼ୋଃ ପିତ୍ତାଲ୍ରାଃ ବାର୍ ହିସି ଗେଲ୍ ଆକୁସି ବାଇୟେମେ ଓଡ଼ୋଃ ଏନାକେ ଫାଁସ୍ରିରେ ବଲ କେଦ୍ତେ କୁମ୍ବା ଜଡ଼େନେମେ ଓଡ଼ୋଃ ଏନା ମିଆଦ୍ କୁମ୍ବା ହବାଅଃଆ। ଏନ୍ତେ କୁମ୍ବା ନାଗେନ୍ତେ ଆରାଃ ରାଙ୍ଗ୍ କାନ୍ ମିଣ୍ଡି ଉହୁର୍ତେ ମିଆଦ୍ ହାରୁବେ ତେୟାଃ ବାଇୟେମେ ଓଡ଼ୋଃ ଏନାରେୟାଃ ଚେତାନ୍ରେ ଓଡ଼ୋଃ ମିଆଦ୍ ଲେବେଃ ଉହୁର୍ତେ ହାରୁବେ ତେୟାଃ ବାଇକେଦା।
ଇନିଃ କୁମ୍ବା ନାଗେନ୍ତେ ବାବୁଲ୍ ଦାରୁରାଃ ତାକ୍ତାତେ ତିଙ୍ଗୁ ତେୟାଃ ବାଇକେଦା। ମିମିଆଦ୍ ତାକ୍ତା ଗେଲ୍ ମୁକା ଜିଲିଙ୍ଗ୍ ଓଡ଼ୋଃ ଚାକାର୍ ମିଦ୍ ମୁକା ମିଦ୍ ବିତା ତାଇନ୍କା। ମିମିଆଦ୍ ତାକ୍ତା ମିଆଦ୍ ଏଟାଃଲଃ ତଲଃ ନାଙ୍ଗ୍ ବାବ୍ରିୟା ନେ'ଲେକା ଅଡ଼ାଃରାଃ ସବେନ୍ ତାକ୍ତା ନାଗେନ୍ତେ ବାଇକେଦା। ଓଡ଼ୋଃ ଅଡ଼ାଃ ବାଇ ନାଗେନ୍ତେ ଜମ୍ସାଃରେ ବାର୍ ହିସି ଠୁ ତାକ୍ତା ବାଇକେଦା। ଓଡ଼ୋଃ ଏନ୍ ମିଦ୍ ହିସି ତାକ୍ତା ଲାତାର୍ରେ ବାର୍ ହିସି ରୁପାରାଃ ତିଙ୍ଗୁ ତେୟାଃ ବାଇୟେମେ, ମିମିଆଦ୍ ତାକ୍ତା ନାଗେନ୍ତେ ବାରିଆ ଲେକା ତିଙ୍ଗୁ ତେୟାଃ ବାଇକେଦା। ନେପେଲ୍ କୁମ୍ୱାରାଃ ଲେଙ୍ଗାସାଃ ନାଗେନ୍ତେ ମିଦ୍ ହିସି ତାକ୍ତା ବାଇକେଦା। ମିଆଦ୍ ତାକ୍ତା ଲାତାର୍ରେ ବାରିଆ ତିଙ୍ଗୁ ତେୟାଃ ଲେକା, ସବେନ୍ ତାକ୍ତା ନାଙ୍ଗ୍ ବାର୍ ହିସି ତିଙ୍ଗୁ ତେୟାଃ ବାଇୟେମେ। ଇନିଃ କୁମ୍ୱାରାଃ ସିଙ୍ଗିହାସୁର୍ରାଃ ତାୟମ୍ସାଃ ନାଗେନ୍ତେ ତୁରିୟା ଠୁ ତାକ୍ତା ବାଇକେଦା। ଓଡ଼ୋଃ ସିଙ୍ଗିହାସୁର୍ରାଃ ତାୟମ୍ସାଃ ବାରାନ୍ କଚାରେ ବାରିଆ ତାକ୍ତା ଦହକେଦା। ନେ କଚାରେ ତାଇନଃ ତାକ୍ତାକ ଲାତାର୍ ହେତେ ଚେତାନ୍ସାଃ ଜାକେଦ୍ ମିଦ୍ତାଃଗି ଜଡ଼େନ୍ କେଦାଏ, ନେଲେକା ବାରାନ୍ କଚାରେ ତାଇନଃ ବାରାନ୍ ତାକ୍ତା ନେ'ଲେକାଗି ଜଡ଼େନ୍ କେଦାଏ। ଆଠ୍ ଠୁ ତାକ୍ତା ଓଡ଼ୋଃ ଗେଲ୍ ତୁରିୟା ରୁପାରାଃ ତିଙ୍ଗୁ ତେୟାଃ ହବାଅଃଆ, ମିଆଦ୍ ତାକ୍ତା ଲାତାର୍ରେ ବାରିଆ ତିଙ୍ଗୁ ତେୟାଃ ଲେକା ଏଟାଃ ତାକ୍ତା ଲାତାର୍ କରେ ହଗି ବାରିଆ ତିଙ୍ଗୁ ତେୟାଃ ହବାଅଃଆ।
ଓଡ଼ୋଃ ଆମ୍ ବାବୁଲ୍ ଦାରୁରାଃ ଖୁଁଟା ବାଇୟେମେ ଓଡ଼ୋଃ ଅଡ଼ାଃରାଃ ନେ'ସାଃଏତେ ମଣେଁ ଠୁ ଖୁଁଟା ଏଟାଃ ସାଃ ମଣେଁ ଠୁ ଖୁଁଟା ଓଡ଼ୋଃ ଅଡ଼ାଃରାଃ ସିଙ୍ଗିହାସୁର୍ସାଃ ତାୟମ୍ରେ ମଣେଁଠୁ ଖୁଁଟା ଦହକେଦା। ଥାଲାରାଃ ଖୁଁଟା ତାକ୍ତାରାଃ ନେ'ସାଃ ହେତେ ହାନ୍ ଟୁଣ୍ଡୁ ଜାକେଦ୍ ବାଇକେଦା। ଓଡ଼ୋଃ ଇନ୍କୁ ଏନ୍ ସବେନ୍ ପାଟାକେ ସୋନାତେ ଜଲମ୍କେଦାକ ଓଡ଼ୋଃ ଆର୍ଗାଡ଼୍କେ ସାବ୍ ନାଗେନ୍ତେ ସୋନାରାଃ ହାଁସ୍ଲି ବାଇକେଦାକ। ଓଡ଼ୋଃ ଏନ୍ ଆର୍ଗାଡ଼୍କେ ହଁଗି ସୋନାତେ ଜଲମ୍କେଦାକ।
ଏନ୍ତେ ଇନ୍କୁ ନିଲିୟା, ବାଇଗିନିୟା ଓଡ଼ୋଃ ଆରାଃ ରାଙ୍ଗ୍ରାଃ ନିରାଲ୍ ସୁତାମ୍ତେ ବାଇୟାକାନ୍ ନାରାମ୍ ଲିଜାଃରାଃ ପାର୍ଦା ବାଇକେଦାକ ଓଡ଼ୋଃ ଏନାରେ ଆପ୍ରବ୍ ତାଇନ୍ କିରୁବ୍କକେ ବାଇକେଦ୍କଆକ। ଇନିଃ ଏନାକେ ବାବୁଲ୍ ଦାରୁ ରେୟାଃ ସୋନାତେ ହାରୁବ୍ କେଦ୍ତେ ଚାର୍ ଠୁ ଖୁଣ୍ଟୁ ଚେତାନ୍ରେ ହାକାକେଦ୍ତେ ଏନାରାଃ ରୁପାରାଃ ଚାର୍ ଠୁ ତିଙ୍ଗୁ ତେୟାଃରେ ସୋନାରାଃ ଆକୁସିକ ଦହକେଦା। ପାବିତାର୍ କୁମ୍ବାରାଃ ଦୁହାର୍ ନାଗେନ୍ତେ ନିଲିୟା ରାଙ୍ଗ୍ବିରାଙ୍ଗ୍ ଦାନାଙ୍ଗ୍ ଲିଜାଃ ବାଇକେଦା, ଏନା ନିଲିୟା, ବାଇଗିନିୟା ଓଡ଼ୋଃ ଆରାଃ ସୁତାମ୍ତେ ଓଡ଼ୋଃ ଉଇଙ୍ଗ୍କାନ୍ ପୁଣ୍ଡି ନିରାଲ୍ ସୁତାମ୍ତେ ରଅଃକାନ୍ ତାଇନ୍କେନା। ଏନ୍ ହାରୁବେ ତେୟାଃ ଲିଜାଃ ନାଗେନ୍ତେ ମଣେଁ ଠୁ ବାବୁଲ୍ ଦାରୁରାଃ ଖୁଣ୍ଟୁ ବାଇ କେଦ୍ତେ ସୋନାତେ ହାରୁବ୍କେଦା ଓଡ଼ୋଃ ସୋନାତେ ଏନାକେ ଆକୁସି ରିକାକେଦା, ଏନା ନାଗେନ୍ତେ ପିତ୍ତାଲ୍ରାଃ ମଣେଁ ଠୁ ତିଙ୍ଗୁ ତେୟାଃ ତାଇନ୍କେନା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.