Munda Bible
ହରାସେନ୍ପୁଥି 25
ପାବିତାର୍ ଠାୟାଦ୍ ନାଗେନ୍ତେ ଦାନ୍ ରାକାବ୍
ପ୍ରାଭୁ ପାର୍ମେଶ୍ୱାର୍ ମୁଶାକେ କାଜିକିୟା, “ଆମ୍ ଇସ୍ରାଏଲ୍ ହଡ଼କକେ ଆଇଁୟାଃ ନାଗେନ୍ତେ ଦାନ୍ ଆଉ ନାଙ୍ଗ୍ କାଜିକମେ, ଏନ୍ ଦାନ୍ ଆକଆଃ ମନ୍ସୁରୁଦ୍ରେୟାଃ ସୁକୁତେ ଏମ୍ତେୟାଃ ଆପେ ଆଇଙ୍ଗ୍ ନାଗେନ୍ତେ ତେଲାଏପେ। ଆପେ ଇନ୍କୁତାଃଏତେ ନେ ସବେନ୍ ଦାନ୍କ ତେଲାଏପେ, ସୋନା, ରୁପା, ପିତାଲ୍, ହାରିୟାର୍ ରାଙ୍ଗ୍, ବାଇଗିନିୟା ରାଙ୍ଗ୍, ଆରାଃ ରାଙ୍ଗ୍ରାଃ ଉନ୍, ପୁଣ୍ଡି ରାଙ୍ଗ୍ରାଃ ନିରାଲ୍ ଲିଜାଃ ଓଡ଼ୋଃ ମେରମ୍ ଉବ୍, ଆରାଃ ମିଣ୍ଡିରାଃ ଉହୁର୍, ଲେବେଃ ଉହୁର୍ ଓଡ଼ୋଃ ବାବୁଲ୍ ଦାରୁ, ଦିଆ ନାଗେନ୍ତେ ଅଲିଭ୍ ସୁନୁମ୍, ଆଭିଷେକ୍ ଏମ୍ରାଃ ସୁନୁମ୍ ଓଡ଼ୋଃ ବୁଗିନ୍ ସହାନ୍ ଧୁଆନ୍, ଏଫୋଦ୍ ଓଡ଼ୋଃ ବୁକୁପାଟା ନାଗେନ୍ତେ ଗୋମେଦକ୍ ମତି ଓଡ଼ୋଃ ଗନଙ୍ଗ୍ଆଁନ୍ ଦିରି, ନେ ସବେନ୍ ଦାନ୍ ଇନ୍କୁତାଃଏତେ ତେଲାଏମେ। ଇନ୍କୁ ଆଇଁୟାଃ ନାଗେନ୍ତେ ମିଆଁଦ୍ ପାବିତାର୍ ଠାୟାଦ୍ ବାଇୟେକାକ, ଏନାରେ ଆଇଙ୍ଗ୍ ଇନ୍କୁଆଃ ଥାଲାରେ ତାଇନାଇଙ୍ଗ୍। ଆଇଙ୍ଗ୍ ଉଦୁବାମେ ଲେକା ପାବିତାର୍ କୁମ୍ବା ଓଡ଼ୋଃ ଏନାରେୟାଃ ସବେନ୍ ଜିନିଷ୍କରାଃ ନାପ୍ ବାଇୟେମେ।
ରାଜିନାମା ବାକ୍ସା
(ହରାସେନ୍ପୁଥି ୩୭:୧-୯)
“ଇନ୍କୁ ମିଆଁଦ୍ ବାବୁଲ୍ ଦାରୁରାଃ ରାଜିନାମା ବାକ୍ସା ବାଇୟେକାକ, ଏନାରାଃ ଜିଲିଙ୍ଗ୍ ବାର୍ ମୁକା ମିଦ୍ ବିତା, ଚାକାର୍ ମିଦ୍ ମୁକା ମିଦ୍ ବିତା ଓଡ଼ୋଃ ସାଲାଙ୍ଗି ମିଦ୍ ମୁକା ମିଦ୍ ବିତା ତାଇନ୍କା। ଓଡ଼ୋଃ ଏନାରେୟାଃ ଭିତାର୍ ଓଡ଼ୋଃ ବାହାରିରେ ଫାର୍ଚି ସୋନାତେ ଜଲମେମେ ଓଡ଼ୋଃ ଏନାରେୟାଃ ଚେତାନ୍ ସାଃ ରାଃ ଗେନା ଗେନା ଚାରିଓସାଃରେ ସୋନାତେ ସିଙ୍ଗାର୍ ବିୟୁର୍ରେମେ। ସୋନାରେୟାଃ ଉପୁନିୟାଠୁ ଗଅଃ ତେୟାଃ ଉପୁନିୟା କାଟା ନାଙ୍ଗ୍ ବାଇୟେମେ ଓଡ଼ୋଃ ବାରାନ୍ସାଃ ବାରିୟା ଲେକା ଗଅଃ ତେୟାଃ ତାଇନ୍କା। ଓଡ଼ୋଃ ବାବୁଲ୍ ଦାରୁରେୟାଃ ବାରିୟା ଆଡା ବାଇୟେମେ ଓଡ଼ୋଃ ସୋନାତେ ହାରୁବେମେ। ଓଡ଼ୋଃ ବାକାସ୍କେ ଗଅଃ ନାଗେନ୍ତେ ବାକାସ୍ରାଃ ବାରାନ୍ସାଃ ଗୋଲ୍ଗି ଲାଗାଅକାନ୍ ତେୟାଃରେଗି ଗଅଃତେୟାଃ ତୁସିଙ୍ଗ୍ତାମେ। ଏନ୍ ଗଅଃତେୟାଃ ବାକାସ୍ରାଃ ଲାଗାଅକାନ୍ ଗୋଲ୍ ତେୟାଃରେ ତୁସିଙ୍ଗ୍ ତାଇନ୍କା ଏନାକେ ଆଲମ୍ ରାଡ଼ାଏୟା। ଓଡ଼ୋଃ ଆଇଙ୍ଗ୍ ଆମ୍କେ ଆଚୁକାନ୍ ଅକ ଅନଲ୍ ଏମାମେୟାଇଙ୍ଗ୍ ଏନାକେ ବାକାସ୍ରେ ଦହେମେ।
“ଆମ୍ ଫାର୍ଚି ସୋନାରାଃ ପାପ୍ ଛାମା ହାରୁବ୍ ବାଇୟେମେ ଏନାରାଃ ଜିଲିଙ୍ଗ୍ ବାର୍ ମୁକା ମିଦ୍ ବିତା ଓଡ଼ୋଃ ଚାକାର୍ ମିଦ୍ ମୁକା ମିଦ୍ ବିତା ତାଇନ୍କା। ଆମ୍ ସୋନାରାଃ ବାରିଆ କିରୁବ୍ ବାଇକିନ୍ମେ, ଏନା ମାର୍ତୁଲ୍ଲଃ ଦାଲ୍କେଦ୍ତେ ବାଇୟେମେ ଓଡ଼ୋଃ ପାପ୍ ହାରୁବ୍ରେୟାଃ ବାରାନ୍ସାଃରେ ଦହକିନ୍ମେ। ମିଆଁଦ୍ କିରୁବ୍କେ ନେ ଟୁଣ୍ଡୁରେ ଓଡ଼ୋଃ ଏଟାଃ କିରୁବ୍କେ ହାନ୍ ଟୁଣ୍ଡୁରେ ଦହକିନ୍ମେ, ବାରାନ୍ କିରୁବ୍କିନ୍କେ ପାପ୍ ହାରୁବ୍ରେୟାଃ ବାରାନ୍ସାଃରେ ଦହକିନ୍ମେ। ଓଡ଼ୋଃ କିରୁବ୍କିନାଃ ଆପ୍ରବ୍ ଚେତାନ୍ କେଦ୍ତେ ପାପ୍ ହାରୁବ୍ରେ ତାଇନ୍କା, କିରୁବ୍କିନାଃ ମେଦ୍ ମୁହାଡ଼୍ ପାପ୍ ହାରୁବ୍ସାଃରେ ତାଇନ୍କା। ଆମ୍ ନିୟାମ୍ ବାକାସ୍ ଚେତାନ୍ରେ ପାପ୍ ହାରୁବ୍ ଦହେମେ ଓଡ଼ୋଃ ଆମ୍କେ ଆଚୁକାନ୍ ଅକ ନିୟାମ୍ ଅନଲ୍ ଏମାମେୟାଇଙ୍ଗ୍ ଏନା, ଏନ୍ ନିୟାମ୍ ବାକାସ୍ ଭିତାର୍ରେ ଦହେମେ। ଓଡ଼ୋଃ ଆଇଙ୍ଗ୍ ଆମାଲଃ ଏନ୍ ଠାୟାଦ୍ରେଇଙ୍ଗ୍ ନେପେଲା ଓଡ଼ୋଃ ନିୟାମ୍ ବାକାସ୍ରାଃ ଚେତାନ୍ରେ ତାଇନ୍କାନ୍ କିରୁବ୍କିନାଃ ଥାଲା ହେତେ ଆମାଃଲଃ ଜାଗାରେୟାଇଙ୍ଗ୍ ଓଡ଼ୋଃ ଇସ୍ରାଏଲ୍ ହନ୍କଆଃ ବିଷାଏରେ ଆଇଁୟାଃ ସବେନ୍ ଆନ୍ଚୁ ଉଦୁବାମେୟାଇଙ୍ଗ୍।
ହଲଙ୍ଗ୍ରାଃ ମେଜ୍
(ହରାସେନ୍ପୁଥି ୩୭:୧୦-୧୬)
“ଆମ୍ ବାବୁଲ୍ ଦାରୁରାଃ ମିଆଦ୍ ମେଜ୍ ବାଇୟେମେ ଏନାରାଃ ଜିଲିଙ୍ଗ୍ ବାର୍ ମୁକା, ଚାକାର୍ ମିଦ୍ ମୁକା ଓଡ଼ୋଃ ସାଲାଙ୍ଗି ମିଦ୍ ମୁକା ମିଦ୍ ବିତା ତାଇନ୍କା। ଫାର୍ଚି ସୋନାତେ ଏନାକେ ହାରୁବେମେ ଓଡ଼ୋଃ ଏନାରାଃ ଚାରିଓସାଃ ସୋନାରାଃ କାଥି ବାଇୟେମେ। ଓଡ଼ୋଃ ଏନାରାଃ ଚାରିଓସାଃ ଉପୁନ୍ ସାର୍ସାର୍ ରେୟାଃ ପାଟ୍ରି ବାଇ ବିୟୁରେମେ ଓଡ଼ୋଃ ଏନ୍ ପାଟ୍ରିରାଃ ଚାରିଓସାଃ ସୋନାତେ କାଥି ବାଇୟେମେ। ସୋନାରାଃ ଚାର୍ଠୁ ଗଅଃ ତେୟାଃ ବାଇ କେଦ୍ତେ ଚାର୍ଠୁ କଚାରାଃ ଚାରିଓସାଃରେ କାଟା ଦହେମେ। ମେଜ୍କେ ଗଅଃ ନାଗେନ୍ତେ ଗୋଲ୍ ଭିତାର୍ରେ ତାଇନ୍ ତେୟାଃ ବାହାରମ୍କେ ଏନ୍ ପାଟ୍ରି ହେପାଦ୍ରେ ତାଇନ୍କା। ଓଡ଼ୋଃ ମେଜ୍କେ ଗଅଃ ନାଗେନ୍ତେ ବାବୁଲ୍ ଦାରୁରାଃ ବାହାରମ୍ ବାଇକେଦ୍ତେ ସୋନାରେ ହାରୁବେମେ। ଓଡ଼ୋଃ ଥାଡ଼ି, ଲଟା, କାର୍ଛୁଲ୍ ଓଡ଼ୋଃ ଦୁଲ୍ ନାଗେନ୍ତେ ଡୁଭା ବାଇୟେମେ, ନେ ସବେନାଃ ଫାର୍ଚି ସୋନାତେ ବାଇୟେମେ। ଆମ୍ ଆଇଁୟାଃ ଆୟାର୍ରେ ସବେନ୍ ଇମ୍ତାଙ୍ଗ୍ ଏନ୍ ମେଜ୍ ଚେତାନ୍ରେ ପ୍ରାଭୁଭୋଜ୍ ହଲଙ୍ଗ୍ ଦହେମେ।
ଦିଆ ଦହ ଖୁଣ୍ଟୁ
(ହରାସେନ୍ପୁଥି ୩୭:୧୭-୨୪)
“ଆମ୍ ମାର୍ତୁଲ୍ଲଃ ଦାଲ୍କେଦ୍ତେ ଫାର୍ଚି ସୋନାରାଃ ମିଆଁଦ୍ ଦିର୍କା ବାଇୟେମେ, ଓଡ଼ୋଃ ଏନାରାଃ କାଟା, ଡାନମ୍, କତ ଓଡ଼ୋଃ ବାହାକ ସବେନାଃ ମିଦ୍ କେଚାଃତେ ବାଇୟେମେ। ଦିର୍କା ହେତେ ତୁରିୟା ଠୁ କତ ଅଡଙ୍ଗ୍ଅଃକା, ଆପିଆ କତ ଜମ୍ସାଃ ଓଡ଼ୋଃ ଆପିଆ କତ ଲେଙ୍ଗାସାଃ ତାଇନ୍କା। ଏନାରାଃ ସବେନ୍ କତରେ ମୁମ୍ଫାଲି ବାହାରେୟାଃ ଆପିୟା ଡେମ୍ବକାନ୍, କଢ଼ ଓଡ଼ୋଃ ବାହା ତାଇନାଃ। ଏନ୍ ମାର୍ସାଲ୍ଦାରୁ ଏତେ ଅଡଙ୍ଗ୍କାନ୍ ତୁରିୟା କତରେ ନେ'ଲେକା ହବାଅଃଆ। ମେନ୍ଦ ମାର୍ସାଲ୍ଦାରୁରେ ମୁମ୍ଫାଲି ବାହା ଉପୁନିୟା ଡେମ୍ବକାନ୍, କଢ଼ ଓଡ଼ୋଃ ବାହା ତାଇନାଃ। ଓଡ଼ୋଃ ଏନ୍ ମାର୍ସାଲ୍ ଦାରୁଏତେ ଅକନ୍ ତୁରିୟା କତ ଅଡଙ୍ଗ୍କାନ୍ ତାଇକେନା, ଏନ୍ ବାବାରିୟା କତରେୟାଃ ଲାତାର୍ରେ ମିମିଆଦ୍ କଢ଼ ଅଡଙ୍ଗ୍ୟାନା। ଏନ୍ତେ ଏନାରେୟାଃ ହିସା କତ ଓଡ଼ୋଃ କଢ଼ ହବାଅଃଆ। ଏନା ମାର୍ତୁଲ୍ଲଃ ଦାଲ୍କେଦ୍ତେ ଫାର୍ଚି ସୋନାତେ ବାଇୟେମେ। ଓଡ଼ୋଃ ଆମ୍ ଏନା ନାଗେନ୍ତେ ଏୟାଠୁ ଦିଆ ଦହ ନାଙ୍ଗ୍ ମିଆଁଦ୍ ଖୁଣ୍ଟୁ ବାଇୟେମେ, ଏନ୍ତେ ହଡ଼କ ଏନ୍ ଦିଆକେ ଜୁଲ୍ଲେରେ, ଏନାରାଃ ହେପାଦ୍କ ମାସ୍କାଲଃଆ। ଓଡ଼ୋଃ ଫାର୍ଚି ସୋନାତେ ଏନାରାଃ ଚିମ୍ଠା ଏନ୍ତେ ଆଙ୍ଗରା ଅଡଙ୍ଗ୍ କାର୍ଛୁଲ୍ ବାଇୟେମେ। ନେ ମାସ୍କାଲ୍ ଦାରୁ ଓଡ଼ୋଃ ଏନାରେୟାଃ ସବେନ୍ ଜିନିଷ୍କ ମିଦ୍ ତାଲନ୍ତ୍1 ଫାର୍ଚି ସୋନାତେ ବାଇୟେମେ। ଚିର୍ଗାଲ୍ ତାଇନ୍ମେ, ବୁରୁରେ ଆମ୍କେ ଅକନ୍ ନାମୁନା ଉଦୁବ୍କାନ୍ ତାଇକେନା, ଏନ୍ଲେକାଗି ସବେନାଃ ବାଇୟେମେ।
Source notes (1)
- Footnote ୩୩ କେ.ଜି
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.