Munda Bible
ହରାସେନ୍ପୁଥି 6
ଏନ୍ତେ ପ୍ରାଭୁ ମୁଶାକେ କାଜିକିୟା, “ନାହାଁଃ, ଫାରୋରାଃ ଚେତାନ୍ରେ ଆଇଙ୍ଗ୍ ଚିନାଃ ରିକାଏୟାଇଙ୍ଗ୍, ଏନା ନେଲେୟାମ୍। ଆଇଁୟାଃ ପୁରାଃ ପେଡ଼େୟାନ୍ ତିଃଇ ହରାତେ ଇନିଃ ଇନ୍କୁକେ ସେନ୍ ଇଚିକଆ ଓଡ଼ୋଃ ଆଇଁୟାଃ ପୁରାଃ ପେଡ଼େୟାନ୍ ତିଃଇ ହରାତେ ଇନିଃ ଆଇଃଗି ଇନ୍କୁକେ ନେ ଦିଶୁମ୍ଏତେ ହାର୍ଅଡଙ୍ଗ୍କଆ।”
ମୁଶାକେ ପାର୍ମେଶ୍ୱାର୍ଆଃ କେନେଡ଼ା
ପାର୍ମେଶ୍ୱାର୍ ମୁଶାଲଃ ଜାଗାର୍କେଦ୍ତେ କାଜିକେଦା, “ଆଇଙ୍ଗ୍ ଯିହୋବା1 ପ୍ରାଭୁ ତାନିଙ୍ଗ୍। ଆଇଙ୍ଗ୍ ଆବ୍ରାହାମ୍, ଇସାକ୍ ଓଡ଼ୋଃ ଯାକୁବ୍ତାଃରେ ପୁରାଃ ପେଡ଼େୟାନ୍ ପାର୍ମେଶ୍ୱାର୍ ମେନ୍ତେ ଆପାନ୍କେ ଉଦୁବ୍କାନ୍ ତାଇକେନାଇଙ୍ଗ୍। ମେନ୍ଦ ଆଇଙ୍ଗ୍ ଯିହୋବା ନୁତୁମ୍ରେ ଆପାନ୍କେ କାଇଙ୍ଗ୍ ଉଦୁବ୍କାନ୍ ତାଇକେନା। ଅକ ଦିଶୁମ୍ରେ ଇନ୍କୁ ତାଇନଃ ତାଇକେନାକ, ଏନ୍ କିନାନ୍ ଦିଶୁମ୍କେଗି ଇନ୍କୁକେ ଏମାକଆଇଙ୍ଗ୍ ମେନ୍ତେ ରାଜିନାମା ତଲାକାଦ୍ ତାଇକେନାଇଙ୍ଗ୍। ମିସାର୍ ହଡ଼କଆଃ ନାଙ୍ଗ୍ ଦାସିକାନ୍ ଇସ୍ରାଏଲ୍ ହଡ଼କଆଃ ପୁରାଃଗି ହାମ୍ବାଲ୍ କାମି ଓଡ଼ୋଃ ରାନାଃ ଆୟୁମ୍କାଦାଇଙ୍ଗ୍ ଓଡ଼ୋଃ ଆଇଁୟାଃ ରାଜିନାମା ପାହାମ୍ କାଦାଇଙ୍ଗ୍। ଏନାମେନ୍ତେ ଆମ୍ ଇସ୍ରାଏଲ୍ ହଡ଼କକେ କାଜିକମେ, ‘ଆଇଙ୍ଗ୍ ପ୍ରାଭୁ ତାନିଙ୍ଗ୍, ଆଇଙ୍ଗ୍ ଆପେକେ ମିସାର୍ ହଡ଼କଆଃ ନାଙ୍ଗ୍ ଦାସିକାନ୍ କାମିଏତେ ରାଡ଼ାପେୟାଇଙ୍ଗ୍ ଓଡ଼ୋଃ ଦାସିଏତେ ବାଞ୍ଚାଅପେୟାଇଙ୍ଗ୍। ଆଇଙ୍ଗ୍ ତିଃଇ ଜିଲିଙ୍ଗ୍କେଦ୍ତେ ପୁରାଃ ଆକ୍ଦାନ୍ଦାଅକାମି ହରାତେ ଇନ୍କୁକେ ସାଜାଇ ଏମ୍କେଦ୍ତେ ଆପେକେ ବାଞ୍ଚାଅପେୟାଇଙ୍ଗ୍। ଆପେ ଆଇଁୟାଃ ହଡ଼ପେ ହବାଅଃଆ ଓଡ଼ୋଃ ଆଇଙ୍ଗ୍ ଆପେୟାଃ ପାର୍ମେଶ୍ୱାର୍ ହବାଅଃଆଇଙ୍ଗ୍। ଆପେକେ ମିସାର୍ ହଡ଼କଆଃ ଦାସିକାନ୍ ତନଲ୍ଏତେ ରାଡ଼ାଅଃଆପେ, ଇମ୍ତା ଆଇଙ୍ଗ୍ ଆପେୟାଃ ପ୍ରାଭୁ ତାନିଃ ମେନ୍ତେପେ ସାରିୟା। ଆଇଙ୍ଗ୍ ଅକ ଦିଶୁମ୍କେ ଏମଃ ନାଗେନ୍ତେ ଆବ୍ରାହାମ୍, ଇସାକ୍ ଓଡ଼ୋଃ ଯାକୁବ୍ତାଃରେ ତିଃଇ ରିମ୍କେଦ୍ତେ କିରିୟାକାଦ୍ ତାଇକେନାଇଙ୍ଗ୍। ଆଇଙ୍ଗ୍ ଏନ୍ ଦିଶୁମ୍ତେଇଙ୍ଗ୍ ଇଦିପେୟା ଓଡ଼ୋଃ ଏନ୍ ଦିଶୁମ୍କେ ଆପେୟାଃ ଆକ୍ତେୟାର୍ ଲେକା ଏମାପେୟାଇଙ୍ଗ୍। ଆଇଙ୍ଗ୍ ପ୍ରାଭୁ ତାନିଙ୍ଗ୍।’”
ମୁଶା ନେ ସବେନ୍ ବିଷାଏ ଇସ୍ରାଏଲ୍ ହଡ଼କତାଃରେ କାଜିକେଦା, ମେନ୍ଦ ଇନ୍କୁ ଆକଆଃ ଦୁକୁ ଓଡ଼ୋଃ ହାମ୍ବାଲ୍ କାମି ହରାତେ ମୁଶାରାଃ କାଜି କାକ ଆୟୁମ୍କେଦା।
ଏନ୍ତେ ପ୍ରାଭୁ ମୁଶାକେ କାଜିକିୟା, “ଜୁ, ମିସାର୍ରେନ୍ ରାଜା ଫାରୋତାଃ ସେନ୍କେଦ୍ତେ କାଜିମେ, ‘ଆମାଃ ଦିଶୁମ୍ଏତେ ଇସ୍ରାଏଲ୍ ହଡ଼କକେ ସେନ୍ ଇଚିକମେ।’”
ମେନ୍ଦ ମୁଶା ପ୍ରାଭୁକେ କାଜିକିୟା, “ଇସ୍ରାଏଲ୍ ହଡ଼କଦ ଆଇଁୟାଃ କାଜି କାକ ଆୟୁମ୍ତାନା, ତାବ୍ଦ ଫାରୋ ଆଇଁୟାଃ କାଜି ଆୟୁମେୟାଁ ମେନ୍ତେ ଆଇଙ୍ଗ୍ ଚିଲ୍କାଇଙ୍ଗ୍ ଆସ୍ରାଏୟା ? ଆଇଙ୍ଗ୍ଦ ବୁଗିନ୍ ଜାଗାର୍ କାଇଙ୍ଗ୍ ସାରିୟା।”
ନେ'ଲେକା ପ୍ରାଭୁ ପାର୍ମେଶ୍ୱାର୍ ମୁଶା ଓଡ଼ୋଃ ହାରୁନ୍କେ ଇସ୍ରାଏଲ୍ ହଡ଼କଆଃ ବିଷାଏରେ ଓଡ଼ୋଃ ମିସାର୍ରେନ୍ ରାଜା ଫାରୋରାଃ ବିଷାଏରେ କାଜିକେଦ୍ତେ ଇସ୍ରାଏଲ୍ ହଡ଼କକେ ମିସାର୍ଏତେ ଅଡଙ୍ଗ୍ ଆଉନାଙ୍ଗ୍ ଇନ୍କିନ୍କେ ହୁକୁମ୍କେଦ୍କିନା।
ମୁଶା ଓଡ଼ୋଃ ହାରୁନ୍ଆଃ କୁଟୁମ୍କ
ଯାକୁବ୍ରାଃ ମୁତ୍କୁଲ୍ ହନ୍କଡ଼ା ରୁବେନ୍ରାଃ ହନ୍କ ହବାଅଃତାନା, ହନୋକ୍, ପଲୁ, ହିସ୍ରୋନ୍ ଓଡ଼ୋଃ କାର୍ମି। ନେ'ସବେନ୍କ ରୁବେନ୍ କିଲିରେନ୍ ତାନ୍କ। ଶିମିୟୋନ୍ରାଃ ହନ୍କଡ଼ା ଯିମୁଏଲ୍, ଯାମିନ୍, ଓହଦ୍, ଯାଖିନ୍, ସୋହର୍ ଓଡ଼ୋଃ କିନାନ୍ରେନ୍ କୁଡ଼ିରାଃ ହନ୍କଡ଼ା ଶୌଲ୍, ନେ ସବେନ୍କ ଶିମିୟୋନ୍ କିଲିରେନ୍ ତାନ୍କ। ଲେବୀ ୧୩୭ ବାରାଷ୍ ଜାକେଦ୍ ଜୀହିଦ୍ ତାଇକେନାଏ। ଓଡ଼ୋଃ ଆୟାଃ ହନ୍କଆଃ ନୁତୁମ୍ ଗେର୍ଶୋନ୍, କହାତ୍ ଓଡ଼ୋଃ ମରାରି। ଆକଆଃ ଆକଆଃ କିଲି ଲେକାତେ ଗେର୍ଶୋନ୍ରାଃ ହନ୍କ ହବାଅଃତାନା ଲିବ୍ନି ଓଡ଼ୋଃ ଶିମୟି। କହାତ୍ ୧୩୩ ବାରାଷ୍ ଜାକେଦ୍ ଜୀହିଦ୍ ତାଇକେନାଏ ଓଡ଼ୋଃ ଆୟାଃ ହନ୍କଆଃ ନୁତୁମ୍ ହବାଅଃତାନା ଅମ୍ରମ୍, ଯିଷ୍ହର୍, ହିବ୍ରୋଣ୍ ଓଡ଼ୋଃ ଉଷିୟେଲ୍। ମରାରିରାଃ ହନ୍ ହବାଅଃତାନାକିନ୍ ମହଲି ଓଡ଼ୋଃ ମୁଶି। ଇନ୍କିନ୍ କିଲି ଲେକାତେ ଲେବୀ କିଲିରେନ୍ ତାନ୍କିନ୍।
ଅମ୍ରମ୍ ୧୩୭ ବାରାଷ୍ ଜାକେଦ୍ ଜୀହିଦ୍ ତାଇକେନାଏ ଓଡ଼ୋଃ ଅମ୍ରମ୍ ଆୟାଃ ଆପୁତେୟାଃ ମିଶି ଯୋକେବଦ୍କେ ଆଣ୍ଦିୟାନା ଓଡ଼ୋଃ ଇନିୟାଃ ହରାତେ ମୁଶା ଓଡ଼ୋଃ ହାରୁନ୍ ଜାନାମ୍ୟାନାକିନ୍। ଯିଷ୍ହର୍ରାଃ ହନ୍କ ହବାଅଃତାନା, କୋରହ, ନେଫଗ୍ ଓଡ଼ୋଃ ସିଖ୍ରୀ। ଉଷିୟେଲ୍ରାଃ ହନ୍କ ହବାଅଃତାନା, ମିଶାୟେଲ୍, ଇଲିଷାଫନ୍ ଓଡ଼ୋଃ ସିଥ୍ରି।
ହାରୁନ୍ ନହଶୋନ୍ରାଃ ମିଶିତେ ଅମ୍ମିନାଦବ୍ରାଃ ହନ୍ତେକୁଡ଼ି ଇଲିଶେବାକେ ଆଣ୍ଦିୟାନା ଓଡ଼ୋଃ ଇନିୟାଃ ହରାତେ ନାଦବ୍, ଅବିହୁ, ଇଲିୟାଜାର୍ ଓଡ଼ୋଃ ଇଥାମର୍ ନେ ସବେନ୍କ ଜାନାମ୍ୟାନା। କୋରହରାଃ ହନ୍କ ହବାଅଃତାନା, ଅସିର୍, ଇଲ୍କାନା ଓଡ଼ୋଃ ଅବିୟାସଫ୍। ନିକୁ କୋରହ କିଲିରେନ୍ ତାନ୍କ। ହାରୁନ୍ଆଃ ହନ୍ତେକଡ଼ା ଇଲିୟାଜାର୍, ଫୁଟିୟେଲ୍ରାଃ ମିଆଦ୍ ହନ୍କୁଡ଼ିକେ ଆଣ୍ଦିୟାନା ଓଡ଼ୋଃ ଇନିଃ ଫିନ୍ହସ୍କେ ଜାନାମ୍କିୟା। ଲେବୀ କିଲି ଲେକାତେ ଇନିଃ ଆକଆଃ କିଲିରେନ୍ ଆଗୁଆଇ ହବାୟାନାଏ।
ନେ ହାରୁନ୍ ଓଡ଼ୋଃ ମୁଶାକେ ପ୍ରାଭୁ କାଜିକାଦ୍କିନ୍ ତାଇକେନା, “ଇସ୍ରାଏଲ୍ ହଡ଼କକେ ଆକଆଃ ଆପ୍ନାଃ ଝୁଣ୍ଡ୍ ଲେକାଗି ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକବେନ୍।” ନେ ହାରୁନ୍ ଓଡ଼ୋଃ ମୁଶାଗି ଇସ୍ରାଏଲ୍ ହଡ଼କକେ ମିସାର୍ ଦିଶୁମ୍ହେତେ ଅଡଙ୍ଗ୍ ଇଦିନାଙ୍ଗ୍ ମିସାର୍ରେନ୍ ରାଜା ଫାରୋଲଃ ଜାଗାର୍କାଦ୍ ତାଇକେନାକିନ୍।
ମୁଶା ଓଡ଼ୋଃ ହାରୁନ୍କେ ପାର୍ମେଶ୍ୱାର୍ଆଃ ଆନାଚୁ
ପ୍ରାଭୁ ପାର୍ମେଶ୍ୱାର୍ ମୁଶାକେ ମିସାର୍ରେ କାଜିକିୟା, ଏନ୍ ହୁଲାଙ୍ଗ୍ ପ୍ରାଭୁ ମୁଶାକେ ନେ କାଜି କାଜିକିୟା, “ଆଇଙ୍ଗ୍ ପ୍ରାଭୁ ତାନିଙ୍ଗ୍, ଆଇଙ୍ଗ୍ ଆମ୍କେ ଅକ୍ନାଃ କାଜିମାଇଙ୍ଗ୍, ଏନା ମିସାର୍ରେନ୍ ରାଜା ଫାରୋକେ କାଜିମେ।”
ମେନ୍ଦ ମୁଶା ପ୍ରାଭୁକେ କାଜିକିୟା, “ଆଇଙ୍ଗ୍ଦ ବୁଗିନ୍ ଜାଗାର୍ କାଜି କାଇଙ୍ଗ୍ ସାରିୟା, ତାବ୍ଦ ଫାରୋ ଚିନାଃମେନ୍ତେ ଆଇଁୟାଃ କାଜି ଆୟୁମେୟା ?”
Source notes (1)
- Footnote ପ୍ରାଭୁ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.