Munda Bible
ହରାସେନ୍ପୁଥି 13
ମୁତ୍କୁଲ୍ ହନ୍କେ ପ୍ରାଭୁତାଃ ଜିମା
ଏନ୍ତେ ପ୍ରାଭୁ ପାର୍ମେଶ୍ୱାର୍ ମୁଶାକେ କାଜିକିୟା, “ଇସ୍ରାଏଲ୍ ହନ୍କଆଃ ଥାଲାରେ ହଡ଼ ଚାଏ ଜାଁତୁ ହବାଃଅ, ସବେନ୍ ମୁତ୍କୁଲ୍ ହନ୍କକେ ପାବିତାର୍କପେ ଓଡ଼ୋଃ ଆଇଙ୍ଗ୍କେ ଏମାଇଙ୍ଗ୍ପେ, ଚିଆଃଚି ଇନ୍କୁ ଆଇଁୟାଃ ତାନ୍କ।”
ସାବାଃ ହଲଙ୍ଗ୍ ପାରାବ୍
ଏନ୍ତେ ମୁଶା ହଡ଼କକେ କାଜିକେଦ୍କଆ, “ଆପେ ଅକ ହୁଲାଙ୍ଗ୍ ଦାସିରାଃ ତନଲ୍ହେତେ ରାଡ଼ାୟାନ୍ଲଃ ମିସାର୍ ଦିଶୁମ୍ଏତେ ଅଡଙ୍ଗ୍ ହିଜୁଃୟାନାପେ, ଏନ୍ ହୁଲାଙ୍ଗ୍କେ ଆଲପେ ରିଡ଼ିଙ୍ଗ୍ୟେଁଆ, ଚିଆଃଚି ପ୍ରାଭୁ ପୁରାଃ ପେଡ଼େଃତେ ଆପେକେ ଅଡଙ୍ଗ୍ ଆଉକେଦ୍ପେୟା। ଏନ୍ ହୁଲାଙ୍ଗ୍ ସୋଡ଼ା ମେସାକାନ୍ ଜେତା ହଲଙ୍ଗ୍ ଆଲପେ ଜମେୟାଁ। ଆପେ ଆବିବ୍ ମାହିଁନାରାଃ ନେ ହୁଲାଙ୍ଗ୍ଗି ମିସାର୍ ବାଗିକେଦ୍ତେ ଅଡଙ୍ଗ୍ୟାନାପେ। ଅକନ୍ ଦିଶୁମ୍ କିନାନିୟ, ହିତ୍ତିୟ, ଇମୋରିୟ, ହିବ୍ବୀୟ ଓଡ଼ୋଃ ଯିବୁଷିୟ ହଡ଼କଆଃ ତାନାଃ, ଏନ୍ ଦିଶୁମ୍କେ ଆପେକେ ଏମାପେ ନାଗେନ୍ତେ ପ୍ରାଭୁ ଆପେୟାଃ ପୁର୍ଖା ହାଡ଼ାମ୍କତାଃରେ ବାନାର୍ସା ଏମାକାଦ୍ ତାଇକେନାଏ, ଏନ୍ ତଆ ହୁରୁମ୍ସୁକୁ ଲିଙ୍ଗିୟଃତାନ୍ ଦିଶୁମ୍ତେ ଇନିଃ ଆପେକେ ଆଉପେୟା, ଇମ୍ତା ଆପେ ସବେନ୍ ବାରାଷ୍ ନେ ମାହିଁନାକେ ପାରାବ୍ ଲେକା ମାନାତିଙ୍ଗ୍ପେ ଓଡ଼ୋଃ ସୁନୁସାର୍ କାମି ରିକାଏପେ। ଏୟା ହୁଲାଙ୍ଗ୍ ଜାକେଦ୍ ଆପେ ସାବାଃ ହଲଙ୍ଗ୍ ଜମେପେ ଓଡ଼ୋଃ ଏୟା ହୁଲାଙ୍ଗ୍ରେ ପ୍ରାଭୁଆଃ ମାଇନଃ ରିକା ନାଗେନ୍ତେ ପାରାବ୍ ମାନାତିଙ୍ଗ୍ପେ। ଏନ୍ ଏୟା ହୁଲାଙ୍ଗ୍ ଜାକେଦ୍ ସାବାଃ ହଲଙ୍ଗ୍ ଜମେପେ ଓଡ଼ୋଃ ଆପେତାଃରେ ସାବାଃ ହଲଙ୍ଗ୍ ବାଗିକେଦ୍ତେ ଏଟାଃ ହଲଙ୍ଗ୍ ଆଲକା ନେଲଃକା, ଚାଏ ଆପେୟାଃ ଗଟା ଦିଶୁମ୍ରେ କାଟିଃ ହଗି ସୋଡ଼ା ଆଲକା ନେଲଃକା। ଏନ୍ ହୁଲାଙ୍ଗ୍ ଆପେ ଆପେୟାଃ ହନ୍କେ କାଜିକପେ, ‘ମିସାର୍ଏତେ ଅଡଙ୍ଗ୍ ହିଜୁଃ ଇମ୍ତା ପ୍ରାଭୁ ଆଲେଲଃ ଅକନ୍ କାମି ରିକାକାଦ୍ ତାଇକେନାଏ, ଏନାକେ ପାହାମେ ନାଗେନ୍ତେ ନେଆଁ ମାନାତିୟଁଃ ତାନା।’ ପ୍ରାଭୁଆଃ ବିଧିବିଧାନ୍ ଜେ'ଲେକା ଆପେୟାଃ ମଚାରେ ତାଇନାଃ, ଏନାମେନ୍ତେ ନେଆଁ ଚିହ୍ନାଁ ଲେକା ଆପେୟାଃ ତିଃଇରେ ଓଡ଼ୋଃ ପାହାମେ ନାଗେନ୍ତେ ମଲଙ୍ଗ୍ ଥାଲାରେ ତାଇନଃକା। ଚିଆଃଚି ପ୍ରାଭୁ ଆୟାଃ ପୁରାଃ ପେଡ଼େୟାନ୍ ତିଃଇତେ ଆପେକେ ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକେଦ୍ପେୟା। ଏନାମେନ୍ତେ ଆପେ ସବେନ୍ ବାରାଷ୍ ନେ ପାରାବ୍କେ ଏନ୍ ସାଲାକାନ୍ ହୁଲାଙ୍ଗ୍ରେଗି ମାନାତିଙ୍ଗ୍ପେ।
ମୁତ୍କୁଲ୍ ହନ୍
“ପ୍ରାଭୁ ଆପେଲଃ ଓଡ଼ୋଃ ଆପେୟାଃ ପୁର୍ଖା ହାଡ଼ାମ୍କଲଃ ବାନାର୍ସା ରିକାକାଦ୍ ଲେକାଗି, ଇନିଃ କିନାନ୍ରେନ୍ ହଡ଼କଆଃ ଦିଶୁମ୍ ଇଦିକେଦ୍ତେ ଆପେକେ ଏନା ଏମାପେଆଏ, ଇମ୍ତା ଆପେ ମୁତ୍କୁଲ୍ କଡ଼ାହନ୍ ଚାଏ ସବେନ୍ ଜାଁତୁରାଃ ମୁତ୍କୁଲ୍ ପେଠା ହନ୍କେ ପ୍ରାଭୁଆଃ ନାଗେନ୍ତେ ଦାଣେଁ ଏମିପେ। ଚିଆଃଚି ସବେନ୍ ମୁତ୍କୁଲ୍ ପେଠା ହନ୍ ପ୍ରାଭୁଆଃ ତାନ୍କ। ମିଆଁଦ୍ ମିଣ୍ଡିହନ୍ ଏମ୍କେଦ୍ତେ ଗାଧାରାଃ ମୁତ୍କୁଲ୍ ହନ୍ ମୁକ୍ଲାଅକପେ, ଓଡ଼ୋଃ କାପେ ମୁକ୍ଲାଅତାନ୍ ରେଦ ଇନିୟାଃ ହଟଃ ହଁଣେୟାଦ୍ ତାଇପେ। ମେନ୍ଦ ଆପେୟାଃ ହନ୍କଆଃଏତେ ସବେନ୍ ମୁତ୍କୁଲ୍ କଡ଼ାହନ୍କକେ ମୁକ୍ଲାଅକପେ।
“ହିଜୁଃ ଦିପିଲିରେ ଆପେୟାଃ ହନ୍କ ନେ ବିଷାଏରେୟାଃ ମୁଣ୍ଡି ଆପେକେ କୁଲିପେରେକ ଆପେ ଇନ୍କୁକେ କାଜିରୁହାଡ଼୍କପେ, ‘ପ୍ରାଭୁ ଆୟାଃ ପେଡ଼େୟାନ୍ ତିଃଇଲଃ ଆବୁକେ ଦାସିରେୟାଃ ତନଲ୍ଏତେ ରାଡ଼ାକେଦ୍ଲଃ ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକାଦ୍ବୁଆ। ଫାରୋ ଆୟାଃ ମନ୍ସୁରୁଦ୍ କେଟେଦ୍କେଦ୍ତେ ଆଲେକେ କାଏ ସେନ୍ ଇଚିକେଦ୍ ହରାତେ, ପ୍ରାଭୁ ମିସାର୍ରେନ୍ ହଡ଼ ଓଡ଼ୋଃ ଜାଁତୁକଆଃ ସବେନ୍ ମୁତ୍କୁଲ୍ ହନ୍କକେ ଗଏଃକେଦ୍କଆ। ଏନାମେନ୍ତେ ଆଲେ ସବେନ୍ ଜାଁତୁକଆଃ ପେଠା ମୁତ୍କୁଲ୍ ହନ୍କକେ ପ୍ରାଭୁଆଃ ନାଗେନ୍ତେ ଦାଣେଁ ରାକାବ୍କ ତାନାଲେ। ମେନ୍ଦ ଆଲେୟାଃ ମୁତ୍କୁଲ୍ କଡ଼ାହନ୍କକେ ମୁକ୍ଲାଅକ ତାନାଲେ।’ ନେ ବିଧିବିଧାନ୍ ଚିହ୍ନାଁ ଲେକା ଆମାଃ ତିଃଇରେ ଓଡ଼ୋଃ ମଲଙ୍ଗ୍ ଥାଲାରେ ତାଇନଃକା, ଚିଆଃଚି ପ୍ରାଭୁ ଆବୁକେ ଆୟାଃ ପେଡ଼େୟାନ୍ ତିଃଇଲଃ ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକାଦ୍ବୁଆ।”
ରିମିଲ୍ରେୟାଃ ଖୁଣ୍ଟୁ ଓଡ଼ୋଃ ସେଙ୍ଗେଲ୍ରେୟାଃ ଖୁଣ୍ଟୁ
ଏନ୍ତେ ଫାରୋ ଇସ୍ରାଏଲ୍ ହଡ଼କକେ ସେନ୍ ଇଚିକେଦ୍କଆ। ମିସାର୍ଏତେ କିନାନ୍ ଦିଶୁମ୍ ସେନ୍ ନାଙ୍ଗ୍ ପାଲେଷ୍ଟାଇନ୍ ହଡ଼କଆଃ ଦିଶୁମ୍ ହରାତେ ସେନ୍ରେ ନାଡ଼େଃ ହବାକାନ୍ତେୟାଃ, ଏନ୍ରେୟ ପାର୍ମେଶ୍ୱାର୍ ଏନ୍ ହରାରେ ଇନ୍କୁକେ କାଏ ଇଦିକେଦ୍କଆ। ଚିଆଃଚି ପାର୍ମେଶ୍ୱାର୍ କାଜିକେଦା, “ହବାସାକାଅଃଆ ହଡ଼କ ଲାପ୍ଡ଼ାଇ ନେଲେୟାକ ଇମ୍ତା ଆକଆଃ ମନ୍ ବାଦ୍ଲାଅକେଦ୍ତେ ରୁହାଡ଼୍କଆଃକ।” ଏନାମେନ୍ତେ ଇସ୍ରାଏଲ୍ ହଡ଼କ ଲାଡ଼ାଇ ନାଙ୍ଗ୍ ସେକାଡ଼୍କେଦ୍ତେ ମିସାର୍ଏତେ ଅଡଙ୍ଗ୍ୟାନ୍ ରେୟ, ପାର୍ମେଶ୍ୱାର୍ ଇନ୍କୁକେ ବିର୍ ହରା ଇଦିକେଦ୍ତେ ବିୟୁର୍କେଦ୍କଆଏ ଓଡ଼ୋଃ ଆରାଃ ଦରେୟାସାଃତେ ସୁତୁଃ ଇଦିକେଦ୍କଆ।
ମୁଶା ଯୋଷେଫ୍ଆଃ ହଡ଼୍ମ ଜାଙ୍ଗ୍ ଆୟାଃଲଃ ଇଦିକେଦାଏ, ଚିଆଃଚି ଯୋଷେଫ୍ ଇସ୍ରାଏଲ୍ ହଡ଼କକେ ବାନାର୍ସାକେଦ୍ତେ କାଜିକାଦ୍କ ତାଇକେନାଏ, “ପାର୍ମେଶ୍ୱାର୍ ଆପେକେ ସାର୍ତିଗି ଦେଙ୍ଗାପେୟା, ଇମ୍ତା ଆପେ ଆଇଁୟାଃ ଜାଙ୍ଗ୍କେ ନେ ଠାୟାଦ୍ଏତେ ଆପେଲଃ ଇଦିପେ।”
ଇନ୍କୁ ସୁକ୍କୋତ୍ଏତେ ସେନ୍ ହରାକେଦ୍ଲଃ ବିର୍ରେ ତାଇକାନ୍ ଏଥମ୍ରେ କୁମ୍ବା ବାଇକେଦାଏ। ଇନ୍କୁ ନିଦା ଓଡ଼ୋଃ ସିଙ୍ଗି ହରାସେନ୍ ଦାଡ଼ିୟାଃକ ମେନ୍ତେ, ସିଙ୍ଗିରେ ରିମିଲ୍ ଖୁଣ୍ଟୁ ଓଡ଼ୋଃ ନୁବାଃ ଇମ୍ତା ସେଙ୍ଗେଲ୍ ଖୁଣ୍ଟୁଲଃ ପ୍ରାଭୁ ଇନ୍କୁକେ ଆୟାର୍ ଇଦିକେଦ୍କଆ। ଇନିଃ ହଡ଼କଆଃ ଆୟାର୍ଏତେ ସିଙ୍ଗି ଇମ୍ତା ରିମିଲ୍ ଖୁଣ୍ଟୁକେ ଓଡ଼ୋଃ ନୁବାଃ ଇମ୍ତା ସେଙ୍ଗେଲ୍ ଖୁଣ୍ଟୁକେ କାଏ ଆତମ୍କେଦା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.