Munda Bible
ହରାସେନ୍ପୁଥି 40
ନେପେଲ୍ କୁମ୍ବା ବାଇ ଓଡ଼ୋଃ ଆଭିଷେକ୍
ପ୍ରାଭୁ ମୁଶାକେ କାଜିକିୟା, “ଆମ୍ ମାହିନାରାଃ ସିଦା ହୁଲାଙ୍ଗ୍ରେ ନେପେଲ୍ କୁମ୍ବା ବାଇମେ।” ଏନାରେ ରାଜିନାମା ବାକ୍ସା ଦହକେଦ୍ତେ ଦାନାଙ୍ଗ୍ ଲିଜାଃକେ ହାରୁବ୍ ନାଗେନ୍ତେ ଏନାରାଃ ଆୟାର୍ରେ ହାକାତାମ୍। ଏନ୍ତେ ମେଜ୍ ଭିତାର୍ତେ ଆଉକେଦ୍ତେ ଏନାରେ ଚେତାନ୍ରେ ତାଇନଃତେୟାଃକ ଦହେମେ ଓଡ଼ୋଃ ଦିର୍କା ଆଉକେଦ୍ତେ ଏନାରେ ଦିଆକ ଦହେମେ। ରାଜିନାମା ବାକ୍ସା ଆୟାର୍ରେ ସୋନାରାଃ ବେଦି ଦହେମେ ଓଡ଼ୋଃ କୁମ୍ବାରାଃ ଦୁହାର୍ରେ ଦାନାଙ୍ଗ୍ ଲିଜାଃ ହାକାତାମ୍। ନେପେଲ୍ କୁମ୍ବାରାଃ ଦୁହାର୍ ଆୟାର୍ରେ ଉରୁବ୍ଦାଣେଁ ବେଦି ଦହେମେ। ନେପେଲ୍ କୁମ୍ବା ଓଡ଼ୋଃ ବେଦି ଥାଲାରେ ତିଃଇ ଆବୁଙ୍ଗ୍ତେୟାଃ ଦହକେଦ୍ତେ ଏନାରେ ଦାଆଃ ଦହେମେ। ଚାରିଓସାଃ ରାଚା ବାଇୟେମେ ଓଡ଼ୋଃ ରାଚା ଦୁହାର୍ରେ ଦାନାଙ୍ଗ୍ ଲିଜାଃ ହାକାତାମ୍।
“ଏନ୍ତେ ଆଭିଷେକ୍ ସୁନୁମ୍ ଇଦିକେଦ୍ତେ କୁମ୍ବା ଓଡ଼ୋଃ ଏନାରାଃ ସବେନାଃକେ ଏନାଲଃ ପାବିତାର୍ ରିକାଏମେ। ଉରୁବ୍ଦାଣେଁ ବେଦି ଓଡ଼ୋଃ ଏନାରାଃ ସବେନାଃ ଆଭିଷେକ୍ତାମେ, ଏନାରେ ଏନ୍ ବେଦି ପୁରାଃଗି ପାବିତାର୍କଆଃ। ଆଡଃଗି ତିଃଇ ଆବୁଙ୍ଗ୍ତେୟାଃ ଓଡ଼ୋଃ ଏନାରାଃ କାଟାକେ ଆଭିଷେକ୍ କେଦ୍ତେ ପାବିତାର୍ ରିକାଏମେ।
“ଏନ୍ତେ ଆମ୍ ହାରୁନ୍ ଓଡ଼ୋଃ ଆୟାଃ ହନ୍କକେ ନେପେଲ୍ କୁମ୍ବା ହେପାଦ୍ ଆଉକେଦ୍ତେ ଦାଆଃରେ ଉମିନ୍କମେ। ଆଇଁୟାଃ ସେୱା ରେୟା କାମି ନାଗେନ୍ତେ ହାରୁନ୍କେ ପାବିତାର୍ ଲିଜାଃ ତୁସିଙ୍ଗ୍କେଦ୍ତେ ଆଭିଷେକ୍ ରିକାଇମେ। ଆୟାଃ ହନ୍କକେ ଆଉକେଦ୍ତେ କୁର୍ତା ତୁସିଙ୍ଗ୍କମେ। ଇନ୍କୁଆ ଆପୁକେ ଆଭିଷେକ୍ ରିକା ଲେକା ଇନ୍କୁକେ ଆଭିଷେକ୍କମେ, ଏନ୍ତେ ଇନ୍କୁ ଆଇଁୟାଃ ଯାଜାକ୍ କାମି ରିକାୟା, ଏନ୍ ଆଭିଷେକ୍ ଇନ୍କୁଆ ପିଢ଼ି ପିଢ଼ି ଜାନାଅ ଜାକେଦ୍ ଯାଜାକ୍ କାମି ତାଇନା।”
ନେ'ଲେକା ମୁଶା ପ୍ରାଭୁଆଃ ସବେନ୍ ଆଚୁତେୟାଃ ରିକାକେଦା। ଏଟାଃ ସିର୍ମାରେୟାଃ ସିଦା ମାହିନାରାଃ ସିଦା ହୁଲାଙ୍ଗ୍ରେ କୁମ୍ବା ବାଇୟାନା। ମୁଶା କୁମ୍ବା ବାଇକେଦ୍ତେ ଏନାରାଃ କାଟା, ତାକ୍ତା ଦହକେଦ୍ତେ ଖୁଣ୍ଟୁ ତିଙ୍ଗୁକେଦା। ମୁଶା ପ୍ରାଭୁଆଃ ଆଚୁଲେକା, କୁମ୍ବା ଚେତାନ୍ରେ ହାରୁବ୍ତେୟାଃ ପାସ୍ରାଅକେଦା। ଏନ୍ତେ ଇନିଃ ଦିରିରେୟାଃ ରାଜିନାମା ବାକ୍ସା ଭିତାର୍ରେ ଦହକେଦା ଓଡ଼ୋଃ ବାକ୍ସାରେ ବାହାରମ୍ ତୁସିଙ୍ଗ୍କେଦ୍ତେ ଛାମା ହାରୁବ୍ ଚେତାନ୍ରେ ଦହକେଦା। ଏନ୍ତେ ମୁଶା ପ୍ରାଭୁଆଃ ଆଚୁଲେକା ବାକ୍ସାକେ କୁମ୍ବା ଭିତାର୍ ଆଉକେଦା ଓଡ଼ୋଃ ଏନାକେ ଉକୁ ନାଗେନ୍ତେ ଦାନାଙ୍ଗ୍ ଲିଜାଃଲଃ ଅନଲ୍ ବାକ୍ସାକେ ଦାନାଙ୍ଗ୍କେଦା।
ଇନିଃ ତାମ୍ୱୁରାଃ ଉତ୍ତାର୍ସାଃରେ ଦାନାଙ୍ଗ୍ ଲିଜାଃ ବାହାରି ନେପେଲ୍ କୁମ୍ବାରେ ମେଜ୍ ଦହକେଦା। ମୁଶା ପ୍ରାଭୁଆଃ କାଜିଲେକା, ଏନାରାଃ ଚେତାନ୍ରେ ହଲଙ୍ଗ୍ ଦହକେଦା। ଇନିଃ ମେଜ୍ ଆୟାର୍ରେ ଜମ୍ସାଃ ନେପେଲ୍ କୁମ୍ବାରେ ଦିର୍କା ଦହକେଦା। ମୁଶା ପ୍ରାଭୁଆଃ କାଜିଲେକା, ପ୍ରାଭୁଆଃ ଆୟାର୍ରେ ଦିଆ ଜୁଲ୍କେଦା। ଇନିଃ ନେପେଲ୍ କୁମ୍ବାରାଃ ଦାନାଙ୍ଗ୍ ଲିଜାଃ ଆୟାର୍ରେ ସୋନାରାଃ ବେଦି ଦହକେଦା। ପ୍ରାଭୁଆଃ ହୁକୁମ୍ ଲେକାଗି ମୁଶା ଏନାରେ ସହାନ୍ ଧୁପ୍ ଜୁଲ୍କେଦା। ଇନିଃ ନେପେଲ୍ କୁମ୍ବାରାଃ ଦୁହାର୍ରେ ଦାନାଙ୍ଗ୍ଲିଜାଃ ହାକାକେଦା, ଓଡ଼ୋଃ ମୁଶା ପ୍ରାଭୁଆଃ ହୁକୁମ୍ଲେକା ନେପେଲ୍ କୁମ୍ବାରାଃ ଦୁହାର୍ ଆୟାର୍ରେ ଉରୁବ୍ଦାଣେଁ ବେଦି ବାଇକେଦ୍ତେ ଏନ୍ ଚେତାନ୍ରେ ଉରୁବ୍ଦାଣେଁ ଓଡ଼ୋଃ ହିତାଜାଙ୍ଗ୍ରାଃ ଦାନ୍ ରାକାବ୍କେଦାଏ। ଇନିଃ ନେପେଲ୍ କୁମ୍ବା ଓଡ଼ୋଃ ବେଦିରାଃ ଥାଲାରେ ତିଃଇ ଆବୁଙ୍ଗ୍ତେୟାଃ ଦହକେଦ୍ତେ, ଏନାରେ ଦାଆ ପେରେଃକେଦା। ଏନ୍ତେ ମୁଶା, ହାରୁନ୍ ଓଡ଼ୋଃ ଆୟାଃ ହନ୍କ ଏନାରେ ଆକଆଃ ତିଃଇ ଓଡ଼ୋଃ କାଟା ଆବୁଙ୍ଗ୍କେଦା। ପ୍ରାଭୁ ମୁଶାକେ ହୁକୁମ୍କାଇ ଲେକାଗି, ଇନ୍କୁ ନେପେଲ୍ କୁମ୍ବାରେ ବଲଃ ଚାଏ ବେଦି ହେପାଦ୍ ନାଡ଼େଜଃ ଇମ୍ତାଙ୍ଗ୍ ଆବୁଙ୍ଗ୍ଅଃ ତାଇକେନାକ। ଇନିଃ କୁମ୍ବା ଓଡ଼ୋଃ ବେଦିରାଃ ଚାରିଓସାଃ ରାଚା ବାଇକେଦା ଓଡ଼ୋଃ ଦୁହାର୍ରେ ଦାନାଙ୍ଗ୍ ଲିଜାଃ ହାକାକେଦା, ନେଲେକା ମୁଶା ଏନ୍ କାମି ଚାବାକେଦା।
ପ୍ରାଭୁଆଃ ମାନାରାଙ୍ଗ୍
ଏନ୍ତେ ରିମିଲ୍ ନେପେଲ୍ କୁମ୍ବାକେ ହାରୁବ୍କେଦା ଓଡ଼ୋଃ ପ୍ରାଭୁଆଃ ମାନାରାଙ୍ଗ୍ କୁମ୍ବାରେ ପେରେଃୟାନା। ମେନ୍ଦ ମୁଶା ନେପେଲ୍ କୁମ୍ବାରେ କାଏ ବଲ ଦାଡ଼ିୟାନା, ଚିଆଃଚି ରିମିଲ୍ ଏନାରାଃ ଚେତାନ୍ରେ ତାଇନ୍ତାନ୍ଲଃ, ପ୍ରାଭୁଆଃ ମାନାରାଙ୍ଗ୍ କୁମ୍ବାରେ ପେରେଃ ତାଇକେନା। କୁମ୍ବା ଚେତାନ୍ଏତେ, ରିମିଲ୍ ଚିମ୍ତାଙ୍ଗ୍ ଆତମ୍କେନଃ ତାଇକେନ୍ ଇମ୍ତା, ଇସ୍ରାଏଲ୍ ହଡ଼କ ଆୟୁର୍ତେ ହରାସେନ୍ ତାଇକେନାକ। କୁମ୍ବା ଚେତାନ୍ରେ ରିମିଲ୍ ତାଇନଃ ଜାକେଦ୍, ଇନ୍କୁ ଆୟୁର୍ତେ କାକ ସେନ୍ହରାକେଦା। ଇସ୍ରାଏଲ୍କଆଃ ସେନ୍ ହରା ଦିପିଲିରେ ସିଙ୍ଗି ଇମ୍ତାଙ୍ଗ୍ ରିମିଲ୍ ପ୍ରାଭୁଆଃ କୁମ୍ବାକେ ଦାପାଲ୍କେଦା ଓଡ଼ୋଃ ନୁବାଃରେ ସେଙ୍ଗେଲ୍ ଲେକା ନେଲଃୟାନା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.