Munda Bible
ଏଜ୍ରା 1
ଯିହୁଦୀକଆଃ ରୁହାଡ଼୍ ନାଗେନ୍ତେ ସାଇରସ୍ ରାଜାରାଃ ଉନୁଦୁବ୍ ଚିଠି
ଯିରିମିୟକେ ଏମାକାନ୍ ପ୍ରାଭୁଆଃ ବାଚାନ୍ ପୁରାଃଅ ନାଗେନ୍ତେ ପାରସ୍ୟରେନ୍ ରାଜା କୋରସ୍ ରାଇଜ୍ତାନ୍ ପାହିଲା ବାରାଷ୍ରେ ପ୍ରାଭୁ ସାଇରସ୍ଆଃ ମନ୍ସୁରୁଦ୍ରେ ଉହାଟ୍ ନାଙ୍ଗ୍ ଏମ୍କିୟାଏ। ଏନାତେ ଇନିଃ ମିଆଁଦ୍ ଉନୁଦୁବ୍ ଚିଠି ଅଲ୍ ଇଚିକେଦ୍ତେ, ଗଟା ରାଇଜ୍ରେ ନେ କାଜି ଉଦୁବ୍ ଇଚିକେଦା, “ପାରସ୍ୟରେନ୍ ରାଜା କୋରସ୍ ନେଆଁ କାଜିତାନା, ସିର୍ମାରେନ୍ ପ୍ରାଭୁ ପାର୍ମେଶ୍ୱାର୍ ଅତେଦିଶୁମ୍ରାଃ ସବେନ୍ ରାଇଜ୍ ଆଇଙ୍ଗ୍କେ ଏମାକାଇଙ୍ଗ୍ୟାଁ ଓଡ଼ୋଃ ଯିହୁଦା ଦିଶୁମ୍ରେୟାଃ ଯୀରୁଶାଲେମ୍ରେ ଆୟାଃ ନାଙ୍ଗ୍ ମିଆଁଦ୍ ବିନ୍ତିଅଡ଼ାଃ ବାଇ ନାଙ୍ଗ୍ ଆଇଁୟାଃ ଚେତାନ୍ରେ ବାହାରମ୍ ଏମାକାଇଙ୍ଗ୍ୟାଁ। ଆପେକଏତେ ଆପେୟାଃ ଜେତା ହଡ଼ ସାନାଙ୍ଗ୍ ରେଦ, ଇନିଃ ଯିହୁଦା ଦିଶୁମ୍ରେୟାଃ ଯୀରୁଶାଲେମ୍ତେ ସେନ୍କା ଓଡ଼ୋଃ ଇସ୍ରାଏଲ୍ରେନ୍ ଅକ ପ୍ରାଭୁ ପାର୍ମେଶ୍ୱାର୍ ଏନ୍ତାଃରେ ମେନାଇୟା, ଇନିୟାଃ ବିନ୍ତିଅଡ଼ାଃ ଆଡଃମିସାଏ ବାଇୟେକା, ଆୟାଃ ପାର୍ମେଶ୍ୱାର୍ ଆୟାଃଲଃ ତାଇନ୍କାଏ। ଓଡ଼ୋଃ ଜେତା ହଡ଼କ ଏଟାଃ ଠାୟାଦ୍ରେ ତାଇନ୍ତାନାକ, ଏନ୍ ଠାୟାଦ୍ରେନ୍ ହଡ଼କ ଯୀରୁଶାଲେମ୍ରେ ତାଇନ୍ତାନ୍ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ନାଙ୍ଗ୍ ଆପ୍ନାଃ ଇଛାସାନାଙ୍ଗ୍ତେ ଏମ୍ତାନ୍ ଦାନ୍ ବାଗିକେଦ୍ତେ ରୁପା, ସୋନା, ରାକାମ୍ ରାକାମ୍ ଜିନିଷ୍ ଓଡ଼ୋଃ ଜାଁତୁ ଏମ୍କେଦ୍ତେ ଇନିଃକେ ଦେଙ୍ଗାଇପେ।”
ଏନ୍ତେ ଯିହୁଦା ଓଡ଼ୋଃ ବେଞ୍ଜାମିନ୍ କିଲିରେନ୍ ଆପୁକଆଃ ପ୍ରାଚିନ୍କ, ଯାଜାକ୍କ ଓଡ଼ୋଃ ଲେବୀ ହଡ଼କ, ଅକ ସବେନ୍ ହଡ଼କଆଃ ମନ୍ସୁରୁଦ୍ରେ ପାର୍ମେଶ୍ୱାର୍ ଉହାଟ୍ ନାଙ୍ଗ୍ ଏମ୍କେଦାଏ, ଇନ୍କୁ ଯୀରୁଶାଲେମ୍ରେ ପ୍ରାଭୁଆଃ ବିନ୍ତିଅଡାଃକେ ଆଡଃମିସା ବାଇରୁହାଡ଼୍ରାଃ ଉଦ୍ଦେଶ୍ରେ ସେନ୍ନାଙ୍ଗ୍ ସେକାଡ଼୍ୟାନାକ। ଇନ୍କୁଆଃ ହପର୍ଜାପାଃରେନ୍ ହଡ଼କ, ଇନ୍କୁକେ ରୁପା ଥାରିୟା ଓଡ଼ୋଃ ସୋନାରାଃ ଜିନିଷ୍କ, ରାକାମ୍ ରାକାମ୍ ଜିନିଷ୍, ଅଡ଼ାଃରେ ଆସୁଲ୍ତାନ୍ ଜାଁତୁ ଓଡ଼ୋଃ ଗନଙ୍ଗ୍ଆଁନ୍ ଜିନିଷ୍କ ଏମ୍କେଦ୍ତେ ଦେଙ୍ଗାକେଦାକ, ଏନାକେ ବାଗିକେଦ୍ତେ ଆପ୍ନାଃ ଇଛାସାନାଙ୍ଗ୍ତେ ହଗି ଏମ୍କେଦାକ।
ଆଡଃଗି ନେବୁଖଦ୍ନେଜର୍ ପ୍ରାଭୁଆଃ ମାନ୍ଦିର୍ରାଃ ଅକ ଜିନିଷ୍କ ଯୀରୁଶାଲେମ୍ଏତେ ଆଉକେଦା ଓଡ଼ୋଃ ଆୟାଃ ମାହାପୁରୁରାଃ ମାନ୍ଦିର୍ରେ ଦହକାଦ୍ ତାଇକେନା, ଏନ୍ ସବେନାଃକେ ରାଜା କୋରସ୍ ଏନ୍ତାଃଏତେ ଆଉ ଇଚିକେଦ୍କଆ। ପାରସ୍ୟରେନ୍ ରାଜା କୋରସ୍ ଆୟାଃ ଆପ୍ନାଃ ଖାଜାନ୍ଚି ମିତ୍ରଦାତ୍ରାଃ ହରାତେ ଏନ୍ ସବେନାଃ ଆଉକେଦା ଓଡ଼ୋଃ ଇନିଃ ଯିହୁଦାରେନ୍ ରାଇଜ୍ ଚାଲାଅତାନ୍ ଶେଶବ୍ଜର୍କେ ଲେକାକେଦ୍ତେ ଏମ୍କିୟା। ଏନ୍ ସବେନାଃରାଃ ତାଲିକା ନେଆଁତାନାଃ, ମିଦ୍ହିସି ଗେଲେୟା ସୋନାରାଃ ଥାଡ଼ି, ମିଦ୍ ହାଜାର୍ ରୁପାରାଃ ଥାଡ଼ି, ମିଦ୍ହିସି ଅରେୟା କାତୁ, ସୋନାରେୟାଃ ମିଦ୍ହିସି ଗେଲେୟା ଡୁଭା, ୪୧୦ ଠୁ ରୁପାରାଃ ହୁପ୍ଡିଙ୍ଗ୍ ରାକାମ୍ରାଃ ଡୁଭା, ୧,୦୦୦ ଠୁ ଏଟାଃ ଏଟାଃ ଡୁଭାକ। ସୋନା ଓଡ଼ୋଃ ରୁପା ସବେନାଃ ମେସାକେଦ୍ତେ ୫,୪୦୦ ତାଇକେନା। ତଲ୍ଇଦିକାନ୍ ହଡ଼କକେ ବାବିଲୋନ୍ଏତେ ଯୀରୁଶାଲେମ୍ତେ ହିଜୁଃ ଇମ୍ତା ଶେଶବ୍ଜର୍ ନେ ସବେନ୍ ଜିନିଷ୍କକେ ଆଉକେଦା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.