ଏଜ୍ରା

ଏଜ୍ରା ଭବିଷ୍ୟତବକ୍ତାଙ୍କ ଲିଖିତ ଏଜ୍ରା ପୁସ୍ତକ

ଏଜ୍ରା ନାବୀ ଅଲାକାଦ୍‌ ଏଜ୍ରା ପୁଥି

ପାରିଚାଏ

ଏଜ୍ରା ଓଡ଼ୋଃ ନିହିମିୟା ପୁଥିକରେ କାଜିକାନା ଯେ, ପାରସ୍ୟ ଓଡ଼ୋଃ ବାବିଲୋନ୍‌କେ ତଲ୍‌ୟାନ୍‌ ତାୟମ୍‌ତେ ଇସ୍ରାଏଲ୍‌କେ ଚିଲ୍‌କା ରୁହାଡ଼୍‌ ନାଙ୍ଗ୍‌ କାଜି ଏମ୍‌ୟାନା, ଇନ୍‌କୁ ଚିଲ୍‌କା ଯୀରୁଶାଲେମ୍‌ରେ ପାର୍‌ମେଶ୍ୱାର୍‌ଆଃ ମାନ୍ଦିର୍‌କେ ଆଡଃମିସା ବାଇ ରୁହାଡ଼୍‌କେଦାକ, ଏନ୍‌ ବିଷାୟରେ ଏଜ୍ରା ଧ୍ୟାନ୍‌ ଏମାକାଦ୍‌ ତାଇକେନାଏ। ପୁରାଃ ପାଣ୍ଡିତ୍‌କ ବିଶ୍ୱାସ୍‌ ରିକାଃକ ଯେ, ଏଜ୍ରା ୧ ଓଡ଼ୋଃ ୨ ଇତିହାସ୍‌ ପୁଥି, ଏନ୍ତେ ଏଜ୍ରା ଓଡ଼ୋଃ ନିହିମିୟା ପୁଥି ଅଲାକାଦାଏ। ଏଜ୍ରା ନାହାଁଲିଃ ରେଦ ନେଆଁ ହବାସାକାଅଃଆ ମିହୁଡ଼୍‌ ହଡ଼ ନେ ସାମାନ୍‌ ପୁଥି ଅଲାକାଦାଏ। ଏଜ୍ରା ପୁଥି ୪୪୦ ଖ୍ରୀଷ୍ଟ୍‌ ଜାନାମ୍‌ ସିଦାରେ ଅଲ୍‌ ସାକାଅକାନ୍‌ଗିୟା, ମେନ୍‌ଦ ପୁଥିରାଃ କାଟିଃ ହିସା ଏଟାଃ ଦିପିଲିରେ ଅଲ୍‌ ସାକାଅକାନ୍‌ଗିୟା।

ଏଜ୍ରା ପୁଥି ଉଦୁବାଃଏ ଯେ, ପାର୍‌ମେଶ୍ୱାର୍‌ ଚିଲ୍‌କା ପାରସ୍ୟରେନ୍‌ ରାଜା ସାଇରସ୍‌କେ ଆଡଃମିସା ମାନ୍ଦିର୍‌କେ ବାଇରୁହାଡ଼୍‌ ନାଗେନ୍ତେ ଆଚୁକିୟା। ନେ କାଜି ହଁ ଯିରିମିୟ ନାବି କାଜିକାଦ୍‌ ଆୟାର୍‌କାଜିରେୟାଃ ପୁରା ହବାଅଃରେୟାଃ ତାଇନ୍‌କେନା, ଯିରିମିୟ; ୨୯:୧୦-୧୪। ଚିମିନ୍‌ ବାଇରିକ ତାଇନ୍‌କେନା, ନେ ମାନ୍ଦିର୍‌ ଅଡ଼ାଃ ଆଡଃମିସା ବାଇରୁହାଡ଼୍‌ ନାଗେନ୍ତେ କାଜିକଟଙ୍ଗ୍‌ ରିକାତାନ୍‌ ତାଇକେନାକ ଓଡ଼ୋଃ ଘାଡ଼ିକାଦ୍‌ ଦିପିଲି ନାଗେନ୍ତେ ମାନ୍ଦିର୍‌ ଅଡ଼ାଃ ବାଇୟଃ ତେୟାଃ ଟାହାରାଅକାନ୍‌ ତାଇକେନା। ମେନ୍‌ଦ ଟୁଣ୍ଡୁଃ ଦିପିଲିରେ ପାର୍‌ମେଶ୍ୱାର୍‌ଆଃ ଦେଙ୍ଗାତେ ଇସ୍ରାଏଲ୍‌ ହଡ଼କ ନେଆଁ ଆଡଃମିସା ବାଇରୁହାଡ଼୍‌କେଦାକ। ଏଜ୍ରା ନାବିରାଃ ଆଗୁଆଇ ହରାତେ ଇସ୍ରାଏଲ୍‌ ହଡ଼କ ଆକଆଃ ପାପ୍‌ ଏତେ ମନ୍‌କେ ରୁହାଡ଼୍‌କେଦ୍‌ତେ ହେୟାତିଙ୍ଗ୍‌ କେଦାକ। ପାର୍‌ମେଶ୍ୱାର୍‌ଆଃ ଆନ୍‌ଚୁକେ ମାନାତିଙ୍ଗ୍‌ ନାଗେନ୍ତେ ଆକଆଃ ମିଦ୍‌ମନ୍‌ ହବାଅଃରେୟାଃ ମିଆଦ୍‌ ନାୱା ବାଇୟଃ ତେୟାଃ ନେଲେତାନାବୁ।

ପୁଥି ଭିତାର୍‌ରେ ତାଇକାନ୍‌ କାଜି

୧. ରାଜା ସାଇରସ୍‌ ଇସ୍ରାଏଲ୍‌ ହଡ଼କକେ ଆକଆଃ ଦିଶୁମ୍‌ତେ ରୁହାଡ଼୍‌ ନାଗେନ୍ତେ ହୁକୁମ୍‌ ଏମାଦ୍‌କଆଏ ଓଡ଼ୋଃ ଅକ କୁଟୁମ୍‌କ ରୁହାଡ଼୍‌ୟାନା ଇନ୍‌କୁଆଃ ନୁତୁମ୍‌କ ଅଲ୍‌କେଦା। ୧-୨

୨. ଯୀରୁଶାଲେମ୍‌ରେ ପାର୍‌ମେଶ୍ୱାର୍‌ଆଃ ମାନ୍ଦିର୍‌ ଅଡାଃ ଆଡଃମିସା ବାଇରୁହାଡ଼୍‌ ବିଷାଏରେ ଅଲଃତାନା। ୩-୬

୩. ଏଜ୍ରା ନାବି ଚିଲ୍‌କା କେଦ୍‌ତେ ଇସ୍ରାଏଲ୍‌ ହଡ଼କଲଃ ଯୀରୁଶାଲେମ୍‌ତେ ରୁହାଡ଼୍‌ୟାନା ଏନ୍‌ ବିଷାଏରେ ଉଦୁବେତାନାଏ। ୭-୮

୪. ଏଜ୍ରା ନାବି ଇସ୍ରାଏଲ୍‌ ହଡ଼କକେ ପାର୍‌ମେଶ୍ୱାର୍‌ଲଃ ବାନାର୍‌ସା ରିକାକେଦ୍‌ତେ ଚିଲ୍‌କା ଆୟାର୍‌ତେ ସୁତୁଃ ଇଦିକେଦ୍‌କଆ ଏନ୍‌ ବିଷାଏରେ ଅଲଃତାନା। ୯-୧୦