Munda Bible
ଏଜ୍ରା 10
ହଡ଼କ ଆକଆଃ ପାପ୍ ନାଗେନ୍ତେ ହେୟାତିଙ୍ଗ୍
ଏଜ୍ରା ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ସାମ୍ନାଙ୍ଗ୍ରେ ଅମ୍ବାକେଦ୍ତେ ବିନ୍ତି, ପାପ୍ ନାଗେନ୍ତେ ହେୟାତିଙ୍ଗ୍ ଓଡ଼ୋଃ ଏୟମ୍ ତାଇକେନ୍ ଇମ୍ତା, ଇସ୍ରାଏଲ୍ରେନ୍ କଡ଼ା, କୁଡ଼ି ଓଡ଼ୋଃ ହନ୍ଗାଁଣା ସବେନ୍କ ଆୟାଃ ଚାରିଓସାଃରେ ହୁଣ୍ଡିୟାନାକ, ଏନ୍ତେ ଇନ୍କୁହଗି ପୁରାଃଗି ରାଆଃକେଦାକ। ଏନ୍ତେ ଏଲମ୍ଆଃ କିଲିରେନ୍ ଯିହିୟେଲ୍ରାଃ ହନ୍ତେକଡ଼ା ଶିଖନିୟ, ଏଜ୍ରାକେ କାଜିକିୟା, “ଆଲେ ଏଟାଃ ଜାତିରେନ୍ କୁଡ଼ିକକେ ଆଣ୍ଦିକାନ୍ ହରାତେ ଆବୁଆଃ ପାର୍ମେଶ୍ୱାର୍ଆଃ ସାନାର୍ତିରାଃ ଆନ୍ଚୁ ବିରୁଧ୍ରେ କା ପାତିୟାର୍ରଃ ଲେକାନ୍ କାମି ରିକାକାଦାଲେ, ଏନ୍ରେୟ ଇସ୍ରାଏଲ୍ ନାଙ୍ଗ୍ ଭାର୍ସା ମେନାଃ। ନାହାଁଃ ଆବୁ ଆମାଃ ଓଡ଼ୋଃ ଆଲେୟାଃ ପାର୍ମେଶ୍ୱାର୍ଆଃ ଆନ୍ଚୁକେ ବରଭାକ୍ତିତାନ୍ ହଡ଼କଆଃ ଉହାଟ୍ ଲେକାତେ ଏଟାଃ ଜାତିରେନ୍ କୁଡ଼ିକକେ ଓଡ଼ୋଃ ଇନ୍କୁଆଃ ହନ୍କକେ ସାଙ୍ଗିନ୍କ ନାଙ୍ଗ୍ ଆବୁଆଃ ପାର୍ମେଶ୍ୱାର୍ଲଃ ରାଜିନାମା ବାଇୟଃକା। ବିରିଦ୍ମେ, ନେଆଁ ରିକାରେୟାଃ ବାହାରମ୍ ଆମ୍କେ ଏମଃତାନା ଓଡ଼ୋଃ ଆଲେ ହଗି ଆମ୍କେ ଦେଙ୍ଗାମେୟାଁଲେ। ଏନାତେ ଆମ୍ ବେଗାର୍ ବରତାନ୍ଲଃ ନେ କାମି ରିକାଏମେ।”
ଏନ୍ତେ ଏଜ୍ରା ବିରିଦ୍ୟାନ୍ଲଃ ଇନିୟାଃ କାଜି ଲେକାତେ କାମି ରିକାନାଙ୍ଗ୍ ଯାଜାକ୍କଆଃ ଆଗୁଆଇକକେ, ଲେବୀ ହଡ଼କକେ ଓଡ଼ୋଃ ସବେନ୍ ଇସ୍ରାଏଲ୍ ହଡ଼କକେ କିରିୟା ଇଚିକେଦ୍କଆ। ଏନ୍ତେ ଇନ୍କୁ ସବେନ୍କ କିରିୟାକେଦାକ। ଏଜ୍ରା ପାର୍ମେଶ୍ୱାର୍ଆଃ ମାନ୍ଦିର୍ଅଡ଼ାଃ ସାମ୍ନାଙ୍ଗ୍ଏତେ ଅଡଙ୍ଗ୍ୟାନାଏ ଓଡ଼ୋଃ ଇଲିୟାଶିବ୍ରାଃ ହନ୍ତେକଡ଼ା ଯିହୋହାନନ୍ରାଃ କୁଠାତେ ସେନଃୟାନା। ଏନ୍ତାଃରେ ଏଜ୍ରା ବେଗାର୍ ଜମ୍ ନୁଁ'କେଦ୍ତେ ମିଦ୍ନୁବାଃ ତାଇନ୍ୟାନାଏ, ଚିଆଃଚି ଇନିଃ ଦାସିୟଃ ତନଲ୍ଏତେ ରୁହାଡ଼ାକାନ୍ ହଡ଼କଆଃ କା ପାତିୟାର୍ରଃ ଲେକାନ୍ ଚାଇଲ୍ ଚାଲାନ୍ ନାଗେନ୍ତେ ଏୟମ୍ ତାଇକେନା।
ଦାସିୟଃ ତନଲ୍ଏତେ ରୁହାଡ଼୍କାନ୍ ହଡ଼କକେ ଯୀରୁଶାଲେମ୍ରେ ହୁଣ୍ଡିୟଃ ନାଗେନ୍ତେ ଯିହୁଦା ଓଡ଼ୋଃ ଯୀରୁଶାଲେମ୍ରେ ଉଦୁବ୍ୟାନା। ଇସ୍ରାଏଲ୍ରେନ୍ ଆଗୁଆଇକ ଓଡ଼ୋଃ ପ୍ରାଚିନ୍କଆଃ ଉହାଟ୍ ଲେକାତେ ଜେତାଏ ଆପି ହୁଲାଙ୍ଗ୍ରେ କାଏ ହିଜୁଃ ରେଦ, ଆୟାଃ ସବେନ୍ ସାମ୍ପାତି ଇଦିୟଃଆ ଓଡ଼ୋଃ ହିଜୁଃ ରୁହାଡ଼୍କାନ୍ ଇସ୍ରାଏଲ୍ ସାମାଜ୍ଏତେ ଇନିଃକେ ଆତମଃଆ ମେନ୍ତେ ବିଚାର୍ ହବାୟାନା। ଆପି ହୁଲାଙ୍ଗ୍ରେ ଦାସିୟଃ ତନଲ୍ଏତେ ହିଜୁଃ ରୁହାଡ଼୍କାନ୍ ଯିହୁଦା ଓଡ଼ୋଃ ବେଞ୍ଜାମିନ୍ କିଲିରେନ୍ ସବେନ୍ ହଡ଼କ ଯୀରୁଶାଲେମ୍ରେ ହୁଣ୍ଡିୟାନାକ। ଏନା ଅରେୟା ମାହିଁନାରାଃ ମିଦ୍ହିସି ହୁଲାଙ୍ଗ୍ ତାଇକେନା ଓଡ଼ୋଃ ସବେନ୍ ହଡ଼କ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ସାମ୍ନାଙ୍ଗ୍ରାଃ ଛାଉର୍ରେ ଦୁବାକାନ୍ ତାଇକେନାକ। ଇନ୍କୁ ନେ ହୁଣ୍ଡିୟଃରାଃ ଦୁନୁବ୍ ଓଡ଼ୋଃ ପୁରାଃଗି ଦାଆଃ ଗାମା ହରାତେ ସବେନ୍କ ଏକ୍ଲାଅଃ ତାଇକେନାକ।
ଏନ୍ତେ ଯାଜାକ୍ ଏଜ୍ରା ବିରିଦ୍କେଦ୍ତେ ଇନ୍କୁକେ କାଜିକେଦ୍କଆ, “ଆପେ କା ପାତିୟାର୍ରଃ ଲେକାନ୍ କାମି ରିକାକେଦ୍ତେ ସାନାର୍ତିରାଃ ଆନ୍ଚୁ କାପେ ମାନାତିଙ୍ଗ୍ ଓଡ଼ୋଃ ଏଟାଃ ଜାତିରେନ୍ କୁଡ଼ିକକେ ଆଣ୍ଦିକେଦ୍ତେ ଇସ୍ରାଏଲ୍ରାଃ ଗୁହ୍ନାଁ ପସାକାଦାପେ। ନାହାଁଃ ଆପେୟାଃ ପୁର୍ଖା ହାଡ଼ାମ୍କଆଃ ପ୍ରାଭୁ ପାର୍ମେଶ୍ୱାର୍ଆଃ ସାହାରାଅ ରିକାତାନ୍ଲଃ ଆୟାଃ ସାମ୍ନାଙ୍ଗ୍ରେ ଗୁହ୍ନାଁ ହେୟାତିଙ୍ଗ୍କେଦ୍ତେ ଆୟାଃ ଇଛାସାନାଙ୍ଗ୍ ମାନାତିଙ୍ଗ୍ପେ। ଆପେୟାଃ ଚାରିଓସାଃରେନ୍ ହଡ଼କତାଃଏତେ ଓଡ଼ୋଃ ଆପେୟାଃ ଏଟାଃ ଜାତିରେନ୍ କୁଡ଼ିକତାଃଏତେ ସାଙ୍ଗିନ୍ରେ ତାଇନ୍ପେ।” ଇମ୍ତା ଗଟା ସାମାଜ୍ କାଉରିକେଦ୍ତେ କାଜିକେଦାକ, “ଆବେନ୍ ଆଲେୟାଃ ବିଷାଏରେ କାଜିକେଦ୍ ଲେକାଗି, ଆଲେକେ ରିକା ଲାଗାତିଙ୍ଗ୍ୟାଁଃ। ମେନ୍ଦ ନେତାଃରେ ହଡ଼କ ପୁରାଃଗି ମେନାକଆ ଓଡ଼ୋଃ ଦାଆଃ ପୁରାଃଗି ଗାମାତାନା, ଏନାତେ ଆଲେ ବାହାରିରେ ତିଙ୍ଗୁ କାଲେ ଦାଡ଼ିୟା। ନେଆଁ ମୁସିଙ୍ଗ୍ ବାର୍ସିଙ୍ଗ୍ରେ କା ହବା ଦାଡ଼ିୟଃଆ, ଚିଆଃଚି ଆଲେ ନେ ବିଷାଏରେ ପୁରାଃଗି ଗୁହ୍ନାଁ ରିକା କାଦାଲେ। ଏନାତେ ଗଟା ସାମାଜ୍ ନାଗେନ୍ତେ ଆଲେୟାଃ ଆଗୁଆଇକ ବାହାରମ୍ ଗଅଃଏକାକ। ନେ ବିଷାଏରେ ଆବୁଆଃ ପାର୍ମେଶ୍ୱାର୍ଆଃ ପୁରାଃ ଖିସ୍ ଆଲେତାଃଏତେ ଆଉରି ସାଙ୍ଗିନଃ ଜାକେଦ୍, ଅକନ୍କ ଏଟାଃ ଜାତିରେନ୍ କୁଡ଼ିକକେ ଆଣ୍ଦିକାନାକ, ଏନ୍ ସବେନ୍କ ଠାହାରାଅକାନ୍ ନେଣ୍ଡାରେ ନାଗାର୍ରେନ୍ ଆଗୁଆଇ ଓଡ଼ୋଃ ପ୍ରାଚିନ୍କଲଃ ହିଜୁଃକାକ।” ମଶୁଲ୍ଲମ୍ ଓଡ଼ୋଃ ଲେବୀରେନ୍ ଶବ୍ବ୍ଥୟରାଃ ଦେଙ୍ଗାତେ। ଏସାହେଲ୍ରାଃ ହନ୍ତେକଡ଼ା ଯୋନାଥନ୍ ଓଡ଼ୋଃ ତିକ୍ବହରାଃ ହନ୍ତେକଡ଼ା ଯହସିୟ, ନେ ବାରାନ୍କିନ୍ ଏସ୍କାର୍ ନେଆଁରାଃ ବିରୁଧ୍ରେ ତିଙ୍ଗୁୟାନାକିନ୍।
ଏନାତେ ଦାସିୟଃ ତନଲ୍ଏତେ ହିଜୁଃ ରୁହାଡ଼୍କାନ୍ ହଡ଼କ, ଏନ୍ ଉହାଟ୍କାଦ୍ ଲେକାଗି ରିକାକେଦାକ। ଏଜ୍ରା ଯାଜାକ୍ ମିପିୟାଦ୍ କିଲିଏତେ ମିହୁଡ଼୍ ଲେକା ଆଗୁଆଇ, ଇନ୍କୁଆଃ ନୁତୁମ୍ ଲେକାତେ ସାଲାକେଦ୍କଆ। ଗେଲ୍ ମାହିଁନାରାଃ ପାହିଲା ହୁଲାଙ୍ଗ୍ଏତେ ଇନ୍କୁ ଏନ୍ ବିଷାଏରେ ଦାଣାଁନାମ୍ରାଃ କାମି ଏଟେଦ୍କେଦାକ। ଓଡ଼ୋଃ ପାହିଲା ମାହିଁନାରାଃ ପାହିଲା ହୁଲାଙ୍ଗ୍ ଏଟାଃ ଜାତିରେନ୍ କୁଡ଼ିକକେ ଆଣ୍ଦିକାନ୍ ହଡ଼କକେ ଦାଣାଁନାମ୍ରାଃ କାମି ଚାବାକେଦାକ।
ଏଟାଃ ଦିଶୁମ୍ରେନ୍ କୁଡ଼ିକକେ ଆଣ୍ଦିକାନ୍ କଡ଼ାକଆଃ ତାଲିକା
ଯାଜାକ୍କଆଃ କିଲିକଏତେ ଅକନ୍କ ଏଟାଃ ଜାତିରେନ୍ କୁଡ଼ିକକେ ଆଣ୍ଦିକାନ୍ ତାଇକେନାକ, ଇନ୍କୁଆଃ ତାଲିକା; ଯୋଷାଦକରାଃ ହନ୍ତେକଡ଼ା ଯେଶୁୟରାଃ କିଲିକଏତେ ମାସେୟ,ଏଲିୟାଜାର୍, ଯାରିବ୍ ଓଡ଼ୋଃ ଗଦଲିୟ। ନେ ହଡ଼କ ଆକଆଃ କୁଡ଼ିକକେ ବାଗିକଆଲେ ମେନ୍ତେ କାଜି ଏମ୍କେଦାକ, ଓଡ଼ୋଃ ଆକଆଃ ଗୁହ୍ନାଁ ନାଗେନ୍ତେ ଆକଆଃ ମିଣ୍ଡି ଗୋଟ୍ଏତେ ମିପିଆଦ୍ ମିଣ୍ଡି, ଗୁହ୍ନାଁରେୟାଃ ଦାଣେଁ ରାକାବ୍କେଦ୍କଆକ।
ଇମ୍ମେର୍ରାଃ କିଲିକଏତେ ହନାନି ଓଡ଼ୋଃ ଜେବଦିୟ,
ହାରିମ୍ରାଃ କିଲିକଏତେ ମାସେୟ, ଏଲିୟ, ଶମୟିୟ, ଯିହିୟେଲ୍ ଓଡ଼ୋଃ ଉଷୀୟ; ପଶ୍ହୁର୍ରାଃ କିଲିକଏତେ ଏଲିୟନାୟ, ମାସେୟ, ଇଶ୍ମାୟେଲ୍, ନଥନେଲ୍, ଯୋଷାବଦ୍ ଓଡ଼ୋଃ ଏଲିଶାୟ। ଲେବୀକଏତେ ଯୋଷାବଦ୍, ଶିମୟି ଓଡ଼ୋଃ କେଲାୟ, ଇନିୟାଃ ଏଟାଃ ନୁତୁମ୍ କଲିଟ୍, ପେଥାହିୟ, ଯିହୁଦା ଓଡ଼ୋଃ ଏଲିୟାଜାର୍; ଦୁରାଙ୍ଗ୍ ହଡ଼କଏତେ ଇଲିୟାଶିବ୍। ଦୁହାର୍ ହର ହଡ଼କଏତେ ଶଲ୍ଲୁମ୍, ତେଲେମ୍ ଓଡ଼ୋଃ ଊରି। ଏଟାଃ ଇସ୍ରାଏଲ୍ ହଡ଼କଏତେ ପାରୋଶ୍ କିଲିରେନ୍ ରମିୟ, ଇଜ୍ଜିୟ, ମଲ୍କିୟ, ମିୟାମିନ୍, ଏଲିୟାଜାର୍, ମଲ୍କିୟ ଓଡ଼ୋଃ ବନାୟ। ଏଲମ୍ କିଲିକଏତେ ମତ୍ତନିୟ, ଜିଖରିୟ, ଯିହିୟେଲ୍, ଅବ୍ଦି, ଯିରିମୋତ୍ ଓଡ଼ୋଃ ଏଲିୟ। ସତ୍ତୁର୍ କିଲିକଏତେ ଏଲିୟନାୟ, ଇଲିୟାଶିବ୍, ମତ୍ତନିୟ, ଯିରିମୋତ୍, ଜାବଦ୍ ଓଡ଼ୋଃ ଅଜିଜା। ବେବୟ କିଲିକଏତେ ଯିହୋହାନନ୍, ହନାନିୟ, ଜାବ୍ବୟ ଓଡ଼ୋଃ ଅଥ୍ଲୟ। ବାନିରାଃ କିଲିକଏତେ ମଶୁଲ୍ଲମ୍, ମଲ୍ଲୁକ୍, ଅଦାୟ, ଯାଶୁବ୍, ଶାଲ୍ ଓଡ଼ୋଃ ଯିରିମୋତ୍। ପହତ୍ ମୋୟାବ୍ କିଲିକଏତେ ଅଦନ୍, କେଲାଲ୍, ବନାୟ, ମାସେୟ, ମତ୍ତନିୟ, ବଜାଲେଲ୍, ବେନୁୟି ଓଡ଼ୋଃ ମନାସି। ହାରିମ୍ କିଲିକଏତେ ଏଲିୟାଜାର୍, ଇଶିୟ, ମଲ୍କିୟ, ଶମୟିୟ, ଶିମିୟନ୍, ବେଞ୍ଜାମିନ୍, ମଲ୍ଲୁକ୍ ଓଡ଼ୋଃ ଶେମାରିୟ। ହଶୁମ୍ରାଃ କିଲିକଏତେ ମତ୍ତନୟ, ମତ୍ତତ୍ତ, ଜାବଦ୍, ଏଲିଫେଲତ୍, ଯିରେମୟ, ମନାସି, ଶିମୟି। ବାନିରାଃ କିଲିକଏତେ ମାଦୟ, ଅମ୍ରାମ୍ ଓଡ଼ୋଃ ଉୟେଲ୍, ବନାୟ, ବେଦିୟ, କେଲୁହି, ବନିୟ, ମରେମୋତ୍, ଇଲିୟାଶିବ୍; ମତ୍ତନିୟ, ମତ୍ତନୟ ଓଡ଼ୋଃ ଯାଶୟ। ବାନି ଓଡ଼ୋଃ ବେନୁୟି କିଲିଏତେ ଶିମୟି, ଶେଲିମିୟ, ନାଥନ୍, ଅଦାୟ, ମକ୍ନଦ୍ବୟ, ଶାଶୟ, ଶାରୟ; ଅସ୍ରେଲ୍, ଶେଲିମିୟ, ଶେମାରିୟ, ଶଲ୍ଲୁମ୍, ଅମରିୟ, ଯୋଷେଫ୍। ନେବୋରାଃ କିଲିଏତେ ଯିୟେଲ୍, ମାତ୍ତିଥିୟ, ଜାବଦ୍, ଜେବିନା, ଜାଦେୟ, ଯୋୟେଲ୍ ଓଡ଼ୋଃ ବେନାୟ। ନେ ସବେନ୍କ ଏଟାଃ ଦିଶୁମ୍ରେନ୍ କୁଡ଼ିକକେ ଆଣ୍ଦିକାନ୍ ତାଇକେନାକ। ଏନ୍ କୁଡ଼ିକକେ ଓଡ଼ୋଃ ହନ୍ଗାଁଣାକକେ ବାଗିକେଦ୍କଆକ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.