Munda Bible
ନିହିମିୟା 1
ଯୀରୁଶାଲେମ୍ଏତେ କାନାଜି
ହଖଲିୟରାଃ ହନ୍ତେକଡ଼ା ନିହିମିୟାରାଃ କାଜି, ମିଦ୍ହିସି ବାରାଷ୍ରେୟାଃ କିଶ୍ଲେବ୍1 ମାହିଁନାରେ ଆଇଙ୍ଗ୍ ଶୁଶନ୍ ନାଗାର୍ରେୟାଃ ରାଜ୍ମାହାଲ୍ରେ ତାଇକେନାଇଙ୍ଗ୍। ଏନ୍ ଦିପିଲିରେ ହନାନି ନୁତୁମ୍ ଆଇଁୟାଃ ମିହୁଡ଼୍ ହାଗା ଓଡ଼ୋଃ ଯିହୁଦାଏତେ ଚିମିନ୍ ଝାନ୍ ହଡ଼କଲଃ ଆଇଙ୍ଗ୍ତାଃ ସେଟେର୍ୟାନା। ଅକ ଯିହୁଦୀ ହଡ଼କ ଦାସିୟଃ ତନଲ୍ଏତେ ବାଞ୍ଚାଅକେଦ୍ତେ ଆପ୍ନାଃ ଦିଶୁମ୍ରେ ତାଇନଃ ତାଇକେନାକ, ଇନ୍କୁଆଃ ବିଷାଏରେ ଓଡ଼ୋଃ ଯୀରୁଶାଲେମ୍ ବିଷାଏରେ ଆଇଙ୍ଗ୍ ଇନ୍କୁକେ କୁଲିକେଦ୍କଆଇଙ୍ଗ୍। ଇନ୍କୁ ଆଇଙ୍ଗ୍କେ କାଜିକେଦିୟାଁକ, “ଅକନ୍କ ଦାସିୟଃ ତନଲ୍ଏତେ ବାଞ୍ଚାଅୟାନ୍ଲଃ ମେନାକଆ, ଇନ୍କୁ ପୁରାଃ ସାଙ୍କାଟ୍ରେ ଓଡ଼ୋଃ ଦୁକୁ ନାମେତାନାକ। ଯୀରୁଶାଲେମ୍ରାଃ ସବେନ୍ ପାଚ୍ରି ହାଦୁଡ଼ଃତାନା ଓଡ଼ୋଃ ଏନାରେୟାଃ ଦୁହାର୍କ ସେଙ୍ଗେଲ୍ତେ ଜୁଲଃତାନା।”
ନିହିମିୟାରାଃ ବିନ୍ତି
ନେଆଁ ଆୟୁମ୍କେଦ୍ତେ ଆଇଙ୍ଗ୍ ଦୁବ୍କେଦ୍ତେ ରାଆଃକେଦାଇଙ୍ଗ୍ ଓଡ଼ୋଃ ଚିମିନ୍ ହୁଲାଙ୍ଗ୍ ଜାକେଦ୍ ଏୟମ୍ ଓଡ଼ୋଃ କାଟାବ୍କେଦ୍ତେ ସିର୍ମାରେନ୍ ପାର୍ମେଶ୍ୱାର୍ତାଃରେ ବିନ୍ତିକେଦାଇଙ୍ଗ୍। ଆଇଙ୍ଗ୍ କାଜିକେଦାଇଙ୍ଗ୍, “ହେ ପ୍ରାଭୁ ସିର୍ମାରେନ୍ ପାର୍ମେଶ୍ୱାର୍, ଆମ୍ ମାରାଙ୍ଗ୍ ଓଡ଼ୋଃ ବରୱାନ୍ ପାର୍ମେଶ୍ୱାର୍ ତାନ୍ମେ। ଅକନ୍କ ଆମ୍କେ ଦୁଲାଡ଼ାଃକ ଓଡ଼ୋଃ ଆମାଃ ଆନ୍ଚୁ ମାନାତିଙ୍ଗ୍ ରିକାଃକ, ଆମ୍ ଇନ୍କୁ ନାଗେନ୍ତେ ଆମାଃ ଦୁଲାଡ଼୍ରାଃ ରାଜିନାମା ବାଞ୍ଚାଅ ରିକାଃମେ। ଆଇଙ୍ଗ୍କେ ନେଲିଙ୍ଗ୍ମେ, ଆଇଙ୍ଗ୍ ଇସ୍ରାଏଲ୍ ହଡ଼କ ନାଗେନ୍ତେ ଆମାଃ ଆୟାର୍ରେ ନିଦାସିଙ୍ଗି ବିନ୍ତିତାନାଇଙ୍ଗ୍, ଏନା ଆୟୁମେମେ। ଆଇଙ୍ଗ୍, ଆଇଁୟାଃ ଅଡ଼ାଃରେନ୍ ଏଙ୍ଗାଆପୁ ଓଡ଼ୋଃ ସବେନ୍ ଇସ୍ରାଏଲ୍ ହଡ଼କ ଆମାଃ ବିରୁଧ୍ରେ ଅକ ପାପ୍ ରିକାକାଦାଲେ, ଏନା ହେୟାତିଙ୍ଗ୍ ତାନାଇଙ୍ଗ୍। ଆଲେ ଆମାଃ ବିରୁଧ୍ରେ ପୁରାଃଗି ପାପ୍ ରିକାକାଦାଲେ। ଆମ୍ ଆମାଃ ଦାସି ମୁଶାକେ ଏମାକାଇ ଆନ୍ଚୁ ଓଡ଼ୋଃ ନିୟାମ୍କେ ଆଲେ କାଲେ ମାନାତିଙ୍ଗ୍କାଦା। ଆମ୍ ଆମାଃ ଦାସି ମୁଶାକେ କାଜିକାଇ ତାଇକେନାମ୍, ‘ଆପେ ଆନ୍ଚୁ ମାନାତିଙ୍ଗ୍ ନାଙ୍ଗ୍ କା ପାତିୟାର୍ରଃ ଲେକା ହବାଅଃରେଦପେ, ଆଇଙ୍ଗ୍ ଆପେକେ ଏଟାଃ ଏଟାଃ ଦିଶୁମ୍ରେନ୍ ହଡ଼କତାଃରେଇଙ୍ଗ୍ ଛିତିବିତିପେୟା। ମେନ୍ଦ ଆପେ ଆଇଙ୍ଗ୍ତାଃ ରୁହାଡ଼୍କେଦ୍ତେ ଆଇଁୟାଃ ଆନ୍ଚୁ ମାନାତିଙ୍ଗ୍ ଓଡ଼ୋଃ ଏନ୍ଲେକା କାମି ରିକାଏ ରେଦପେ, ଅତେଦିଶୁମ୍ରେୟାଃ ପୁରାଃ ସାଙ୍ଗିନ୍ ଜାକେଦ୍ ଛିତିବିତି କାନ୍ରେୟଗି, ଆଇଙ୍ଗ୍ ଆଇଁୟାଃ ହଡ଼କକେ ହୁଣ୍ଡିକଆଇଙ୍ଗ୍ ଓଡ଼ୋଃ ଅକ ଠାୟାଦ୍ତାଃ ସେୱା ରିକାନାଙ୍ଗ୍ ସାଲାକାଦାଇଙ୍ଗ୍, ଏନ୍ ଠାୟାଦ୍ତେ ଆଉ ରୁହାଡ଼୍କଆଇଙ୍ଗ୍।’
“ନେ ସବେନ୍କ ଆମାଃ ଦାସିକ ଓଡ଼ୋଃ ହଡ଼କ ତାନ୍କ, ଆମ୍ ନିକୁକେ ଆମାଃ ପୁରାଃ ମାରାଙ୍ଗ୍ ପେଡ଼େଃ ଓଡ଼ୋଃ ପେଡ଼େୟାନ୍ ତିଃଇଲଃ ବାଞ୍ଚାଅକାଦ୍କଆମ୍।
“ହେ ପ୍ରାଭୁ, ଆଇଙ୍ଗ୍ କାଜିଗହାର୍ ତାନାଇଙ୍ଗ୍, ଆମାଃ ନୁତୁମ୍କେ ବର ଓଡ଼ୋଃ ମାଇନ୍ ନାଙ୍ଗ୍ ରାସ୍କାଅଃତାନ୍ ହଡ଼କଆଃ ବିନ୍ତିକେ ଆୟୁମେମେ। ତିସିଙ୍ଗ୍ ନେ ରାଜାରାଃ ନେପେଲ୍ରେ ଆଇଙ୍ଗ୍କେ ଲିବୁଆଇଙ୍ଗ୍ତାନ୍ଲଃ ଜିନିତାଅ ଏମାଇଙ୍ଗ୍ମେ। ଏନ୍ ଦିପିଲିରେ ଆଇଙ୍ଗ୍ ରାଜାରାଃ ଜମ୍ ନୁଁ'ତେୟାଃ ଚାଖାଅକେଦ୍ତେ ଏମ୍ନିଃ ତାଇକେନାଇଙ୍ଗ୍।”
Source notes (1)
- Footnote ନଭେମ୍ବର୍ ଓଡ଼ୋଃ ଡିସେମ୍ବର୍, ନେ ବାରାନ୍ ମାହିଁନାକେ କାଜିୟାଃକ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.